Последование молебнаго пения о жене, плод во чреве носящей и родити готовящейся
Иерей начинает: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Я́ко Твое́ есть Ца́рство, и си́ла и сла́ва, Отца́, и Сы́на, и Свята́го Ду́ха, и ны́не и при́сно, и во ве́ки веко́в.
Чтец: Ами́нь. Го́споди, поми́луй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 142:
Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилуиа, аллилуиа, аллилуиа, слава Тебе, Боже. (трижды)
Таже, Бог Госпо́дь, и яви́ся нам, благослове́н гряды́й во и́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Е́го.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, Его́же небрего́ша зи́ждущии, Сей бысть во главу́ у́гла: от Го́спода бысть Сей, и есть ди́вен во очесе́х на́ших.
Тропарь, глас 4:
К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны́ милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи́,// Тя́ бо и еди́ну наде́жду и́мамы.
Ин тропарь, глас тойже:
Ма́ти Бо́га на́шего,/ во утро́бе заче́нши Христа́ Жизнода́вца,/ по́мощи в рожде́нии Того́ не потре́бовала еси́,/ те́мже ле́гце разреши́тися рабо́м Твои́м благослови́ и помози́,/ и младе́нцев и́х во вре́мя благопотре́бное роди́тися иму́щих,/ под покро́в Тво́й, я́ко Ма́терь, мо́лим, приими́:// Ты́ бо еси́ в ро́дах Помо́щница и Засту́пница рабо́м Твои́м.
Слава, и ныне:
Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты́ не бы предстоя́ла моля́щи,/ кто́ бы на́с избaвил от толи́ких бе́д,/ кто́ же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.
Псалом 50
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо́ мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х; я́ко да оправди́шися во словесе́х Твои́х, и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́, окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́: возра́дуется язы́к мой пра́вде Твое́й. Го́споди, устне́ мои́ отве́рзеши и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския; тогда́ благоволи́ши же́ртву пра́вды, возноше́ние и всесожига́емая, тогда́ возложа́т на олта́рь Твой тельцы́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же. (Трижды).
Таже припевы ко Пресвятей Богородице:
Пресвята́я Богоро́дице, спаси́ на́с (Дважды)
Сла́ва Отцу́ и Сы́ну и Свято́му Ду́ху.
И ны́не и при́сно и во ве́ки веко́в. Ами́нь.
По 3-й песни:
Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству.
При́зри благосе́рдием, Всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.
Ектения сугубая
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди поми́луй (трижды)
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек и о Господи́не на́шем Высокопреосвяще́ннейшем митрополи́те (архиепи́скопе, или Преосвяще́ннейшем епи́скопе) имярек, и о всей во Христе́ бра́тии на́шей.
Лик: Го́споди поми́луй (трижды)
Еще́ мо́лимся за всю бра́тию и за вся христиа́ны.
Лик: Го́споди поми́луй (трижды)
Еще́ мо́лимся о рабе́ Бо́жией (имярек), роди́ти гото́вящейся и к по́мощи Бо́жия Ма́тере прибега́ющей, рцем вси, Го́споди, услы́ши и поми́луй.
Лик: Го́споди поми́луй (трижды)
Возглас: Я́ко Ми́лоcтив и Человеколю́бец Бог еси́, и Тебе́ слáву возсылáем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.
Лик: Аминь.
Тропа́рь, гла́с 2:
Моле́ние те́плое, и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти́:/ Богоро́дице Влады́чице, предвари́/ и от бе́д изба́ви на́с,/ еди́на вско́ре предста́тельствующая.
Таже припевы:
Пресвята́я Богоро́дице, спаси́ на́с (Дважды)
Сла́ва Отцу́ и Сы́ну и Свято́му Ду́ху.
И ны́не и при́сно и во ве́ки веко́в. Ами́нь.
По 6-й песни:
Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству.
При́зри благосе́рдием, Всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.
Таже ектения малая: Па́ки и па́ки ми́ром Го́споду помо́лимся.
Лик: Го́споди поми́луй.
Заступи́, спаси́, поми́луй, и сохрани́ нас, Бо́же, Твое́ю благода́тию.
Лик: Го́споди поми́луй.
Пресвяту́ю, Пречи́стую, Преблагослове́нную, сла́вную Влады́чицу на́шу Богоро́дицу, и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Возглас: Ты бо еси́ Царь ми́ра, и Спас душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Конда́к, гла́с 6:
Предста́тельство христиа́н непосты́дное,/ Хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь на́с,/ ве́рно зову́щих Ти́:/ ускори́ на моли́тву, и потщи́ся на умоле́ние,/ предста́тельствующи при́сно, Богоро́дице, чту́щих Тя́.
Ин кондак, глас 2:
Сле́з Е́виных разреше́ние,/ проро́ческих писа́ний исполне́ние,/ от Ду́ха Свята́го Богомладе́нца заче́ншая,/ и во я́слех Вифлее́мских Того́ смире́нно роди́вшая,/ к Тебе́ прибега́ем я́ко Храни́тельнице же́н и младе́нцев,/ к Тебе́ воздыха́ем и Тя́ велича́ем:/ ра́дуйся, Благоутро́бная Ма́ти, в ро́дах Помо́щнице.
Во́нмем, прему́дрость, во́нмем.
Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́.
И о сподо́битися нам слы́шанию Свята́го Ева́нгелия, Го́спода Бо́га мо́лим.
Лик: Го́споди поми́луй (трижды)
Прему́дрость, про́сти, услы́шим Свята́го Ева́нгелия, мир всем.
Лик: И ду́хови твоему́.
От Луки́ Свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Во́нмем.
Евангелие от Луки, зачало 4-е:
Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́мь с не́ю я́ко три ме́сяцы, и возврати́ся в дом Свой.
Лик: Сла́ва Тебе́, Го́споди, сла́ва Тебе́.
Посем стихира, глас 6:
Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба Твоего;/ скорбь бо обдержи́т мя./ Терпе́ти не могу́ де́монскаго стреля́ния,/ покро́ва не и́мам, ниже́ где прибе́гну окая́нный,/ всегда побежда́емь,/ и утеше́ния не и́мам, разве Тебе, Влады́чице мира,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.
Таже припевы:
Пресвята́я Богоро́дице, спаси́ на́с (Дважды)
Сла́ва Отцу́ и Сы́ну и Свято́му Ду́ху.
И ны́не и при́сно и во ве́ки веко́в. Ами́нь.
По 9-й песни:
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Стихиры, глас 2:
Вы́сшую небе́с и чи́стшую све́тлостей со́лнечных,/ избáвльшую нас от кля́твы,/ Влады́чицу ми́ра пе́сньми почти́м.
От мно́гих мои́х грехо́в немощству́ет те́ло,/ немощству́ет и душа́ моя́,/ к Тебе́ прибегáю, Благодáтней,/ наде́ждо ненаде́жных,/ Ты ми помози́.
Влады́чице и Мáти Избáвителя,/ приими́ моле́ние недосто́йных раб Твои́х,/ да ходáтайствуеши к Ро́ждшемуся от Тебе́,/ о, Влады́чице ми́ра,/ бу́ди Ходáтаица!
Пое́м приле́жно Тебе́ песнь ны́не, Всепе́той Богоро́дице, рáдостно:/ со Предте́чею и все́ми святы́ми/ моли́, Богоро́дице, е́же уще́дрити ны.
Вся А́нгелов во́инства,/ Предте́че Госпо́день,/ апо́столов двоенадеся́тице,/ святи́и вси с Богоро́дицею, сотвори́те моли́тву,/ во е́же спасти́ся нам.
Трисвятое по Отче наш:
Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Я́ко Твое́ есть Ца́рство, и си́ла и сла́ва, Отца́, и Сы́на, и Свята́го Ду́ха, и ны́не и при́сно, и во ве́ки веко́в.
Чтец: Ами́нь.
Таже тропари, глас 6:
Поми́луй нас, Го́споди, поми́луй нас,/ вся́каго бо отве́та недоуме́юще,/ сию́ Ти моли́тву я́ко Влады́це,/ гре́шнии прино́сим:/ поми́луй нас.
Слава: Го́споди, поми́луй нас,/ на Тя бо упова́хом,/ не прогне́вайся на ны зело́,/ ниже́ помяни́ беззако́ний на́ших,/ но при́зри и ны́не я́ко благоутро́бен/ и изба́ви ны от враг на́ших,/ Ты бо еси́ Бог наш,/ и мы лю́дие Твои́,/ вси дела́ руку́ Твое́ю,/ и и́мя Твое́ призыва́ем.
И ныне: Милосе́рдия две́ри отве́рзи нам,/ Благослове́нная Богоро́дице,/ наде́ющиися на Тя да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.
Таже сугубая ектения:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди поми́луй (трижды)
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, и всей во Христе́ бра́тии на́шей.
Лик: Го́споди поми́луй (трижды)
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди поми́луй (трижды)
Еще́ мо́лимся, о рабе́ Бо́жией (имярек), о е́же в терпе́нии и кре́пости теле́сней взрасти́ти ей плод во чре́ве свое́м, рцем вси, Го́споди, услы́ши и поми́луй.
Лик: Го́споди поми́луй (трижды)
Еще́ мо́лимся о рабе́ Бо́жией (имярек), роди́ти гото́вящейся и к по́мощи Бо́жия Ма́тере прибега́ющей, рцем вси, Го́споди, услы́ши и поми́луй.
Лик: Го́споди поми́луй (трижды)
Еще́ мо́лимся, о е́же роди́тися и возраста́ти ча́ду ея́ здра́ву и под покро́вом Бо́жия Ма́тере храни́му, рцем вси, Го́споди, услы́ши и поми́луй.
Лик: Го́споди поми́луй (трижды)
Возглас: Услы́ши ны, Бо́же Спаси́телю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших и поми́луй ны, ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Аминь.
Иерей: Ко Пресвяте́й Влады́чице на́шей Богоро́дице помо́лимся.
Лик: Пресвята́я Богоро́дице, спаси́ нас.
Молитва
О, Пресвята́я Де́во, Ма́ти Го́спода на́шего Иису́са Христа́, поми́луй рабу́ Твою́ (имярек) и помози́ ей, да разреши́тся бре́мене своего́ благополу́чно. О, Всеми́лостивая Влады́чице Богоро́дице! Ты не потре́бовала еси́ по́мощи челове́ческия в рожде́нии Сы́на Бо́жия, пода́ждь по́мощь рабе́ Твое́й, по́мощи тре́бующей, наипа́че же от Тебе́. Да́руй ей кре́пость в час сей, и младе́нца, и́же и́мать роди́тися и вни́ти в свет ми́ра сего́, сподо́би во вре́мя благопотре́бно и у́мнаго све́та во святе́м Креще́нии водо́ю и Ду́хом. Тебе́ припа́даем, Ма́ти Бо́га Вы́шняго, и мо́лимся: бу́ди Ми́лостивая Ма́ти жене́ сей, е́йже прии́де вре́мя ма́терию бы́ти, и умоли́ воплоти́вшагося из Тебе́ Христа́ Бо́га на́шего, да укрепи́т ю́ свы́ше си́лою Свое́ю. Я́ко держа́ва Его́ благослове́на и препросла́влена, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
Ина молитва
О, Пресвята́я Де́во, Ма́ти Го́спода на́шего Иису́са Христа́, Скоропослу́шная Засту́пнице всех, с ве́рою к Тебе́ прибега́ющих! Ты, естество́ ма́тере и ча́да позна́вши, прозябе́нием чревоноше́ния ми́рови благослове́ние процвела́ еси́ и Сы́на Бо́жия, Единоро́днаго Отцу́, пло́ти приобщи́вши, на спасе́ние нам родила́ еси́! О, Всеми́лостивая Влады́чице Богоро́дице! Услы́ши нас в час сей и помози́ рабе́ Твое́й (имярек) благополу́чно разреши́тися бре́мене своего́, да́руй ей, нося́щей ча́до во утро́бе, здра́вие и благомо́щие, бу́ди Ми́лостивая Помо́щница и умоли́ воплоти́вшагося из Тебе́ Христа́ Бо́га на́шего, да укрепи́т ю́ свы́ше си́лою Свое́ю, и младе́нца, и́же и́мать роди́тися и вни́ти в свет ми́ра сего, сподо́бит у́мнаго све́та во святе́м Креще́нии водо́ю и Ду́хом. Я́ко держа́ва Его́ благослове́на и препросла́влена со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в.
Лик: Ами́нь.
Таже:
Иерей: Прему́дрость. Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Иерей: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй, трижды. Благослови́.
И отпуст: Христо́с, и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х, поми́лует и спасе́т нас, я́ко Благ и Человеколю́бец.
Текст молебного пения утвержден к общецерковному богослужебному употреблению на заседании Священного Синода 27 мая 2022 года (журнал № 46).
Назад к списку
