Молебное пение ко Господу нашему Иисусу Христу о разрешении неплодства скорбящих супругов
Иерей: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Яко Твое есть Царство, и сила и слава, Отца, и Сына, и Святаго Духа, и ныне и присно, и во веки веков.
Чтец: Аминь. Господи, помилуй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 70:
На Тя, Го́споди, упова́х, да не постыжу́ся в век. Пра́вдою Твое́ю изба́ви мя и изми́ мя, приклони́ ко мне у́хо Твое́ и спаси́ мя. Бу́ди ми в Бо́га Защи́тителя и в ме́сто кре́пко спасти́ мя, я́ко утвержде́ние мое́ и прибе́жище мое́ еси́ Ты. Бо́же мой, изба́ви мя из руки́ гре́шнаго, из руки́ законопресту́пнаго и оби́дящаго, я́ко Ты еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты еси́ мой Покрови́тель: о Тебе́ пе́ние мое́ вы́ну. Я́ко чу́до бых мно́гим, и Ты помо́щник мой кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, весь день великоле́пие Твое́. Не отве́ржи мене́ во вре́мя ста́рости, внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне, и стрегу́щии ду́шу мою́ совеща́ша вку́пе, глаго́люще: Бог оста́вил есть его́, пожени́те и ими́те его́, я́ко несть избавля́яй. Бо́же мой, не удали́ся от мене́, Бо́же мой, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в студ и срам и́щущии зла́я мне. Аз же всегда́ возупова́ю на Тя и приложу́ на вся́ку похвалу́ Твою́. Уста́ моя́ возвестя́т пра́вду Твою́, весь день спасе́ние Твое́, я́ко не позна́х кни́жная. Вни́ду в си́ле Госпо́дни, Го́споди, помяну́ пра́вду Тебе́ Еди́наго. Бо́же мой, и́мже научи́л мя еси́ от ю́ности моея́, и до ны́не возвещу́ чудеса́ Твоя́, и да́же до ста́рости и престаре́ния, Бо́же мой, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми еси́ вели́чия. Бо́же, кто подо́бен Тебе́? Ели́ки яви́л ми еси́ ско́рби мно́ги и злы, и обра́щься оживотвори́л мя еси́, и от бездн земли́ возве́л мя еси́. Умно́жил еси́ на мне вели́чествие Твое́, и обра́щься уте́шил мя еси́, и от бе́здн земли́ па́ки возве́л мя еси́. И́бо аз испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же, воспою́ Тебе́ в гу́слех, Святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил. Еще́ же и язы́к мой весь день поучи́тся пра́вде Твое́й, егда́ постыдя́тся и посра́мятся и́щущии зла́я мне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилуиа, аллилуиа, аллилуиа, слава Тебе, Боже. (трижды)
Таже ектениа: Ми́ром Го́споду помо́лимся.
Лик: Го́споди, поми́луй.
О свы́шнем ми́ре, и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих вонь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе имярек и о Господи́не на́шем Высокопреосвяще́ннейшем митрополи́те (архиепископе, или Преосвяще́ннейшем епи́скопе) имярек, честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
Миром Господу помолимся.
О е́же прости́ти вся́кое прегреше́ние во́льное и нево́льное рабо́в Твои́х (имярек) и ми́лостиву бы́ти им, Го́споду помо́лимся.
Лик: Го́споди, поми́луй.
О е́же пода́тися им целому́дрию и пло́ду чре́ва на по́льзу, Го́споду помо́лимся.
Лик: Го́споди, поми́луй.
О е́же благосе́рдия ра́ди ми́лости Твоея́, грехо́в ю́ности и неве́дения их не помяну́ти, но ми́лостивно поми́ловати и здра́вие им дарова́ти, Го́споду помо́лимся.
Лик: Го́споди, поми́луй.
О е́же не презре́ти приле́жнаго моле́ния рабо́в Твои́х (имярек), но услы́шати, и благоуве́тливу и благопремени́тельну и человеколюби́ву бы́ти и ча́да им пода́ти, Го́споду помо́лимся.
Лик: Го́споди, поми́луй.
О е́же ми́лостивно призре́ти на рабо́в сих (имярек), моля́щихся о дарова́нии чад для продле́ния ро́да и утеше́ния, Го́споду помо́лимся.
Лик: Го́споди, поми́луй.
О е́же возложи́ти им тве́рдое упова́ние на Бо́га и, прия́ти во́лю Его́ во смире́нии, понести́ крест свой, Го́споду помо́лимся.
Лик: Го́споди, поми́луй.
О е́же дарова́ти им же и нам вся ко спасе́нию проше́ния, Го́споду помо́лимся.
Лик: Го́споди, поми́луй.
О избáвитися нaм от вся́кия ско́рби, гне́ва и нýжды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нaс, Бо́же, Твоéю благодáтию.
Лик: Го́споди, поми́луй.
Пресвятýю, Пречи́cтую, Преблагословéнную, слáвную Влады́чицу нáшу Богоро́дицу и Присноде́ву Мари́ю со все́ми святы́ми помянýвше, сáми себе́ и дрyг дрýга, и вeсь живо́т нaш Христу́ Бо́гу предади́м.
Лик: Тебе́, Го́споди.
Возглaс: Яко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Таже, Бог Госпо́дь, и яви́ся нам, благослове́н Гряды́й во и́мя Госпо́дне.
Стих 1: Испове́дайтеся Го́сподеви, я́ко Благ, я́ко в век ми́лость Его́.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, его́же небрего́ша зи́ждущий, сей бысть во главу́ у́гла: от Го́спода бысть сей, и есть ди́вен во оче́сех на́ших.
Тропaрь, глaс 2:
При́зри ми́лостивно на моле́ния на́ша,/ О́тче наш Небе́сный,/ и не пре́зри к Тебе́ припа́дающия,/ но посети́ ми́лостию Твое́ю рабы́ сия́,/ да́руя им плод чре́ва,/ благоча́дия восприя́тие,// моли́твами Богоро́дицы, Еди́не Человеколю́бче.
Слава, и ныне, Богородичен:
При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи,/ Тя бо, Еди́ну, тве́рдое и изве́стное утвержде́ние и́мамы,/ и Твое́ предста́тельство стяжа́хом./ Да не постыди́мся, Влады́чице, Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице, всех по́моще, ра́досте и покро́ве,// и спасе́ние душ на́ших.
Во́нмем. Прему́дрость. Во́нмем.
Чтец: Проки́мен, глас глас 7: В Тебе́ утверди́хся от утро́бы,/ от чре́ва ма́тере моея́ Ты еси́ мой Покрови́тель. Стих: На Тя, Го́споди, упова́х, да не постыжу́ся во век.
Прему́дрость
Чтец: Собо́рнаго посла́ния Петро́ва, чте́ние.
Во́нмем.
И читается Апостол (главы 1,25 – 2,5):
Возлю́бленнии! Глаго́л Госпо́день пребыва́ет во ве́ки. Се же есть глаго́л благовествова́нный в вас. Отло́жше у́бо вся́ку зло́бу и вся́ку лесть и лицеме́рие и за́висть и вся клеветы́, я́ко новорожде́ни младе́нцы, слове́сное и неле́стное млеко́ возлюби́те, я́ко да о нем возрасте́те во спасе́ние. Поне́же вкуси́сте, я́ко благ Госпо́дь. К Нему́же приходя́ще, Ка́мени Жи́ву, от челове́к у́бо уничиже́ну, от Бо́га же избра́нну, че́стну, и са́ми я́ко ка́мение жи́во зижди́теся в храм духо́вен, святи́тельство свя́то, возноси́ти же́ртвы духо́вны, благоприя́тны Бо́гови Иису́с Христо́м.
Священник: Мир ти.
Чтец: И ду́хови твоему́.
Аллилýиа, глaс 4: По́мощь моя́ от Го́спода, сотво́ршаго не́бо и зе́млю. Стих: Услы́ши, Бо́же, глас мой, внегда́ моли́ти ми ся к Тебе́.
Прему́дрость, про́сти, услы́шим Свята́го Ева́нгелия. Мир всем.
Лик: И ду́хови твоему́.
Священник: От Луки святаго Евангелиа чтение.
Лик: Сла́ва Тебе́, Го́споди, сла́ва Тебе́.
Во́нмем.
И чтет Евангелие: (глава 1, 5–13, 23–25).
Во вре́мя о́но бысть во дни И́рода царя́ иуде́йска, иере́й не́кий, и́менем Заха́риа, от дневны́я чреды́ Авиа́ни: и жена́ его́ от дще́рей Ааро́новех, и и́мя ей Елисаве́т. Бе́ста же пра́ведна о́ба пред Бо́гом, ходя́ща во всех за́поведех и оправда́ниих Госпо́дних безпоро́чна. И не бе и́ма ча́да, поне́же Елисаве́т бе непло́ды, и о́ба заматоре́вша во днех свои́х бе́ста. Бысть же служа́щу ему́ в чину́ чреды́ своея́ пред Бо́гом, по обы́чаю свяще́нничества ключи́ся ему́ покади́ти, вше́д в це́рковь Госпо́дню: и все мно́жество люде́й бе моли́тву де́я вне, в год [во вре́мя] фимиа́ма: яви́ся же ему́ а́нгел Госпо́день, стоя́ одесну́ю олтаря́ кади́льнаго: и смути́ся Заха́риа ви́дев, и страх нападе́ нань. Рече́ же к нему́ а́нгел: не бо́йся, Заха́рие: зане́ услы́шана бысть моли́тва твоя́, и жена́ твоя́ Елисаве́т роди́т сы́на тебе́, и нарече́ши и́мя ему́ Иоа́нн. И бысть я́ко испо́лнишася дни́е слу́жбы его́, и́де в дом свой. По сих же днех зача́т Елисаве́т жена́ его́, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех.
Лик: Сла́ва Тебе́, Го́споди, сла́ва Тебе́.
Таже ектениа: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди поми́луй, трижды.
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, и всей во Христе́ бра́тии на́шей.
Лик: Господи помилуй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих (имярек).
Лик: Го́споди поми́луй, трижды.
Еще́ мо́лимся Тебе́, Го́споду Бо́гу на́шему, о е́же призре́ти на рабо́в Твои́х (имярек) и прия́ти моли́твы их Тебе́ возноси́мыя, да, непло́дства разреше́ние улучи́вше, благоча́дие восприи́мут и виде́нием сыно́в и дще́рей свои́х возвеселя́тся и восхва́лят Тя во вся дни живота́ своего́.
Лик: Го́споди поми́луй, трижды.
Еще́ мо́лимся Тебе́, Творцу́ и Созда́телю на́шему, о е́же услы́шати усе́рдная проше́ния рабо́в Твои́х (имярек) о дарова́нии им чадоро́дия, да у́зрят сы́ны сыно́в свои́х, я́ко новосажде́ния ма́сличная о́крест трапе́зы своея́.
Лик: Го́споди поми́луй, трижды.
Еще́ мо́лимся Тебе́, Пода́телю ве́чных благ, о е́же ми́лостивно призре́ти на нас и вся проше́ния на́ша ко спасе́нию испо́лнити, Го́споду помо́лимся.
Лик: Го́споди поми́луй, трижды.
Возглас: Услы́ши ны, Бо́же Спаси́телю наш, Упова́ние всех конце́в земли́ и су́щих в мо́ри дале́че, и Ми́лостив, Ми́лостив бу́ди, Влады́ко, о гресе́х на́ших и поми́луй ны, Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Аминь.
Го́споду помо́лимся.
Лик: Го́споди поми́луй.
Священник глаголет молитву:
Влады́ко Вседержи́телю, Святы́й Царю́, наказу́яй и не умервщля́яй, утвержда́яй низпа́дающая и возводя́й низве́рженныя, теле́сныя челове́ков ско́рби исправля́яй! Мо́лимся Тебе́, Бо́же наш, посети́ ми́лостию Твое́ю рабы́ Твоя́ (имярек), прости́ им вся́кое согреше́ние во́льное и нево́льное, низпосли́ с Небесе́ враче́бную Твою́ си́лу, исцели́ боле́зни тая́щияся, да́руй им плод чре́ва, благоча́дия восприя́тие.
Ей, Го́споди, Иису́се Христе́ Бо́же наш! Не вмени́ во грех моле́ние на́ше, ве́мы бо глаго́лы проро́ка, и́мже рекл еси́: я́ко не́бо отстои́т от земли́, та́ко отстои́т путь Мой от пути́й ва́ших, и помышле́ния ва́ша от мы́сли Моея́. Оба́че ве́мы и я́же Сам рекл еси́: расти́теся и мно́житеся; и па́ки рекл еси́: проси́те и да́стся вам. Сего́ ра́ди, на ми́лость Твою́ упова́юще, разреше́ния безпло́дия и дарова́ние благоча́дия рабо́м Твои́м (имярек) дерза́ем проси́ти. Ты бо еси́ Исто́чник исцеле́ний и Спас душ на́ших, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, Пресвяты́м Благи́м и Животворя́щим Твои́м Ду́хом ны́не и при́сно и во ве́ки веко́в.
Лик: Ами́нь.
Прему́дрость. Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй, трижды. Благослови́.
Священник глаголет отпуст:
Текст молебного пения утвержден к общецерковному богослужебному употреблению на заседании Священного Синода 27 мая 2022 года (журнал № 46).
Назад к списку
