Молебное пение пред хирургическим действием
Иерей начинает: Благослове́н Бог наш, всегда́, ны́не и при́сно и во ве́ки веко́в.
Чтец: Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, Иже́ везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди поми́луй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 70:
На Тя, Го́споди, упова́х, да не постыжу́ся в век. Пра́вдою Твое́ю изба́ви мя и изми́ мя, приклони́ ко мне у́хо Твое́ и спаси́ мя. Бу́ди ми в Бо́га Защи́тителя и в ме́сто кре́пко спасти́ мя, я́ко утвержде́ние мое́ и прибе́жище мое́ еси́ Ты. Бо́же мой, изба́ви мя из руки́ гре́шнаго, из руки́ законопресту́пнаго и оби́дящаго, я́ко Ты еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты еси́ мой покрови́тель: о Тебе́ пе́ние мое́ вы́ну. Я́ко чу́до бых мно́гим, и Ты помо́щник мой кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, весь день великоле́пие Твое́. Не отве́ржи мене́ во вре́мя ста́рости, внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне, и стрегу́щии ду́шу мою́ совеща́ша вку́пе, глаго́люще: Бог оста́вил есть его́, пожени́те и ими́те его́, я́ко несть избавля́яй. Бо́же мой, не удали́ся от мене́, Бо́же мой, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в студ и срам и́щущии зла́я мне. Аз же всегда́ возупова́ю на Тя и приложу́ на вся́ку похвалу́ Твою́. Уста́ моя́ возвестя́т пра́вду Твою́, весь день спасе́ние Твое́, я́ко не позна́х кни́жная. Вни́ду в си́ле Госпо́дни, Го́споди, помяну́ пра́вду Тебе́ Еди́наго. Бо́же мой, и́мже научи́л мя еси́ от ю́ности моея́, и до ны́не возвещу́ чудеса́ Твоя́, и да́же до ста́рости и престаре́ния, Бо́же мой, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми еси́ вели́чия. Бо́же, кто подо́бен Тебе́? Ели́ки яви́л ми еси́ ско́рби мно́ги и злы, и обра́щься оживотвори́л мя еси́, и от бездн земли́ возве́л мя еси́. Умно́жил еси́ на мне вели́чествие Твое́, и обра́щься уте́шил мя еси́, и от бездн земли́ па́ки возве́л мя еси́. И́бо аз испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же, воспою́ Тебе́ в гу́слех, Святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил. Еще́ же и язы́к мой весь день поучи́тся пра́вде Твое́й, егда́ постыдя́тся и посра́мятся и́щущии зла́я мне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилуиа, аллилуиа, аллилуиа, слава Тебе, Боже. (Трижды).
Таже, ектения:
Миром Господу помолимся.
Лик: Го́споди, поми́луй.
О свы́шнем ми́ре, и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих вонь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе имярек, и о господи́не нашем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О рабе́ Божии́ (или: рабе́ Божие́й) (имярек), и о е́же прости́ти ему́ (ей) вся́кое прегреше́ние во́льное и нево́льное, Го́споду помо́лимся.
Лик: Го́споди, поми́луй.
О е́же му́дре упра́вити ум и укрепи́ти ру́ку врача́, да хирурги́ческое де́йствие благопоспе́шно соверши́т премене́ние неду́га и тя́жкия боле́зни раба́ Твоего́ (или: рабы Твоея) (имярек), Го́споду помо́лимся.
Лик: Го́споди, поми́луй.
О е́же вско́ре, я́ко со́тнича о́трока, ханане́ину дщерь и Петро́ву те́щу, сло́вом си́лы Своея́ ми́лостивно исцели́ти, и от одра́ боле́зни воздви́гнути его́ (ю́), Го́споду помо́лимся.
Лик: Го́споди, поми́луй.
О е́же, я́коже иногда́ разсла́бленнаго, сло́вом Боже́ственныя Своея́ благода́ти ско́ро от одра́ боле́зни воздви́гнути, и здра́ва (здра́ву) сотвори́ти, Го́споду помо́лимся.
Лик: Го́споди, поми́луй.
О е́же не презре́ти приле́жнаго моле́ния раба́ Своего́ (или: рабы́ Своея́), но ми́лостивно услы́шати и поми́ловати его́ (ю) и здра́вие ему́ (ей) пода́ти, Го́споду помо́лимся.
Лик: Го́споди, поми́луй.
О е́же посети́ти его́ (ю́) посеще́нием Свята́го Своего́ Ду́ха и исцели́ти всяк неду́г и вся́кую боле́знь, в нем (в ней) гнездя́щуюся, сла́вы ра́ди и́мене Своего́, Го́споду помо́лимся.
Лик: Го́споди, поми́луй.
О е́же ми́лостивно, я́коже ханане́ин, услыша́ти глас моле́ния нас, недосто́йных рабо́в Свои́х, к Нему вопию́щих, и, я́коже тоя́ дщерь, поми́ловати и исцели́ти больна́го раба́ Своего́ (или: больну́ю рабу́ Свою́) (имярек), Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нaс, Бо́же, Твоéю благодáтию.
Лик: Го́споди, поми́луй.
Пресвятýю, Пречи́cтую, Преблагословéнную, слáвную Влады́чицу нáшу Богоро́дицу и Присноде́ву Мари́ю со все́ми святы́ми помянýвше, сáми себе́ и дрyг дрýга, и вeсь живо́т нaш Христу́ Бо́гу предади́м.
Лик: Тебе́ Го́споди.
Возглaс: Я́ко Ми́лоcтив и Человеколю́бец Бог еси́, и Тебе́ слáву возсылáем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Таже, Бог Господь:
Бог Госпо́дь, и яви́ся нам, благослове́н гряды́й во и́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Е́го.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, Его́же небрего́ша зи́ждущии, Сей бысть во главу́ у́гла: от Го́спода бысть Сей, и есть ди́вен во очесе́х на́ших.
Лик поет: Бог Госпо́дь, и яви́ся нам, благослове́н гряды́й во и́мя Госпо́дне. во глас 4, к коемуждо стиху.
Таже, Тропaрь, глaс 4:
Ско́рый в заступле́нии Еди́н Сый, Христе́,/ ско́рое свы́ше покажи́ посеще́ние стра́ждущым рабо́м Твои́м,/ и изба́ви от неду́г и го́рьких боле́зней,/ и воздви́гни во е́же пе́ти Тя и сла́вити непреста́нно // моли́твами Богоро́дицы, Еди́не Человеколю́бче.
Слава, глас 3:
Ду́шу мою́, Го́споди, во гресе́х вся́ческих/ и безме́стными дея́ньми лю́те разсла́бленную,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти, спаса́емь: // Ще́дрый, даждь ми, Христе́, исцеле́ние.
И ныне, глас 2:
Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви ны, // Еди́на вско́ре предста́тельствующая.
Во́нмем. Прему́дрость. Во́нмем.
Чтец: Прокимен, глас 7: Поми́луй мя, Го́споди, я́ко не́мощен есмь,/ исцели́ мя, я́ко смято́шася ко́сти моя́. Стих: Я́ко несть в сме́рти помина́яй Тебе́.
Прему́дрость.
Чтец: К Солу́няном посла́ния свята́го апо́стола Па́вла, чте́ние
зачало 273 (глава 5, 14-23):
Бра́тие, мо́лим вы, вразумля́йте безчи́нныя, утеша́йте малоду́шныя, заступа́йте немощны́я, долготерпи́те ко всем. Блюди́те, да никто́же зла за зло кому́ возда́ст: но всегда́ до́брое гони́те и друг ко дру́гу, и ко всем. Всегда́ ра́дуйтеся. Непреста́нно моли́теся. О всем благодари́те: сия́ бо есть во́ля Бо́жия о Христе́ Иису́се в вас. Ду́ха не угаша́йте. Проро́чествия не уничижа́йте. Вся же искуша́юще, до́брая держи́те. От вся́кия ве́щи злы́я отгреба́йтеся. Сам же Бог ми́ра да освяти́т вы всесоверше́нны во всем: и всесоверше́н ваш дух, и душа́, и те́ло непоро́чно, в прише́ствие Го́спода на́шего Иису́са Христа́ да сохрани́тся.
Священник: Мир ти.
Чтец: И ду́хови твоему́.
Аллилуиа, глас 7. Стих: Услы́шит тя Госпо́дь в день печа́ли,/ защи́тит тя И́мя Бо́га Иа́ковля.
Прему́дрость, про́сти, услы́шим Свята́го Ева́нгелия. Мир всем.
Лик: И ду́хови твоему́.
Священник:От Матфе́я Свята́го Ева́нгелия чте́ние
Лик: Сла́ва Тебе́, Го́споди, сла́ва Тебе́.
Вонмем.
И чтет священник Евангелие от Матфея.
зачало 26 (глава 8,14-17):
Во вре́мя о́но, прише́д Иису́с в дом Петро́в, ви́де те́щу его́ лежа́щу и огне́м жего́му, и прикосну́ся руце́ ея́, и оста́ви ю́ огнь; и воста́, и служа́ше Ему́. По́зде же бы́вшу, приведо́ша к Нему́ бе́сны мно́ги, и изгна́ ду́хи сло́вом, и вся боля́щыя изцели́. Да сбу́дется рече́нное Иса́ием проро́ком, глаго́лющим: Той неду́ги на́ша прия́т и боле́зни понесе́.
Лик: Сла́ва Тебе́, Го́споди, сла́ва Тебе́.
Таже ектения:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди поми́луй, трижды.
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, и всей во Христе́ бра́тии на́шей.
Лик: Господи помилуй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в раба́ Бо́жия (или: рабы́ Бо́жия) (имярек).
Лик: Го́споди поми́луй, трижды.
Го́споди, Иису́се Христе́, Бо́же наш, я́ко Милосе́рд всеси́льною Твое́ю десни́цею укрепи́ ру́ку врача́ (имярек), да хирурги́ческое де́йствие и благо́е врачева́ние соверши́т во сла́ву И́мене Твоего́ Свята́го, мо́лим Ти ся, услы́ши и поми́луй.
Лик: Го́споди поми́луй, трижды.
Врачу́ душ и теле́с, со умиле́нием в се́рдце сокруше́нном к Тебе́ припа́даем и, стеня́ще, вопие́м Ти: исцели́ боле́знь, уврачу́й стра́сти души́ и телесе́ раба́ Твоего́ (или: рабы́ Твоея́) (имярек) и прости́ ему́ (ей), я́ко Благосе́рд, вся прегреше́ния, во́льная и нево́льная, и ско́ро воздви́гни от одра́ боле́зни, мо́лим Ти ся, услы́ши и поми́луй.
Лик: Го́споди поми́луй, трижды.
Не хотя́й сме́рти гре́шных, но е́же обрати́тися и живы́м им бы́ти, пощади́ и поми́луй раба́ Твоего́ (или: рабу́ Твою́) (имярек) Ми́лостиве, запрети́ боле́зни, отста́ви всю стра́сть и весь неду́г, утоли́ огнь, и простри́ кре́пкую Твою́ ру́ку, и, я́коже Иаи́рову дщерь, от одра́ боле́зни воздви́гни и здра́ва (или: здра́ву) предста́ви, мо́лим Ти ся, услы́ши и поми́луй.
Лик: Го́споди поми́луй, трижды.
О́гненную боле́знь Петров́ой те́щи прикоснове́нием Твои́м исцели́вый, и ны́не лю́те стра́ждущаго раба́ Твоего́ (или: стра́ждущия рабы́ Твоея́) (имярек) боле́знь благосе́рдием Твои́м исцели́, здра́вие ему́ (ей) ско́ро подава́я, приле́жно мо́лим Ти ся, Исто́чниче цельба́м, услы́ши и поми́луй.
Лик: Го́споди поми́луй, трижды.
Возглас: Услы́ши ны, Бо́же Спаси́телю наш, Упова́ние всех конце́в земли́ и су́щих в мо́ри дале́че, и Ми́лостив, Ми́лостив бу́ди, Влады́ко, о гресе́х на́ших и поми́луй ны, Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Ами́нь.
Го́споду помо́лимся.
Лик: Го́споди поми́луй.
Священник глаголет молитву:
Го́споди, Бо́же наш, Благи́й Человеколю́бче и Врачу́ душ и теле́с на́ших, не́мощи на́ша боле́зненно нося́й и неду́ги на́ша прие́мляй; в ти́хости ми́луяй, превосходя́й беззако́ния и изыма́яй непра́вды, ско́рый в по́мощь и ко́сный во гнев! Ты, я́ко Па́стырь До́брый, на взыска́ние прише́дый заблу́ждшаго овча́те, малоду́шным дая́й утеше́ние и живо́т сокруше́нным, исто́чник кровоточи́выя дванадесятоле́тен бы́вший исцели́вый и слепорожде́нному о́чи откры́вый, дщерь ханане́ину от лю́таго де́мона свободи́вый и исцеле́ние разсла́бленному дарова́вый со оставле́нием грехо́в его́, мытаря́ сло́вом оправда́вый и разбо́йника в после́днем его́ испове́дании прие́мый, грех ми́ра взе́мый и на Кресте́ пригвозди́вый. Тебе́ мо́лимся и Тебе́ про́сим, О́тче щедро́т и Бо́же вся́каго утеше́ния хирурги́ческий дар врачева́ния святи́телю Луке́ пода́вый укрепи́ ру́ку врача́ (имярек), да ну́ждную хирурги́ю и врачева́ние благо́е соверши́т раба́ Твоего́ (или: рабы́ Твоея́) (имярек) в премене́ние неду́га и тя́жкия боле́зни, ча́ющаго (ча́ющия) е́же от Тебе́ исцеле́ния. Ей, Благоутро́бне и Многоми́лостиве Го́споди! Исцели́ раба́ Твоего́ (или: рабу́ Твою́) (имярек), воздви́гни его́ (ю́) от одра́ боле́зненнаго и от ло́жа озлобле́ния це́ла и всесоверше́нна (це́лу и всесоверше́нну), посети́ его́ (ю́) щедро́тами Твои́ми, отжени́ от него́ (нея́) вся́кий неду́г и вся́кую не́мощь, да́руй его́ (ю́) Це́ркви Твое́й благоугожда́юща и творя́ща (благоугожда́ющу и творя́щу) во́лю Твою́, я́ко да воста́в (воста́вши) руко́ю Твое́ю кре́пкою, порабо́тает Тебе́ со вся́ким благодаре́нием.
Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем Отцу́, и Сы́ну, и Свято́му Ду́ху ны́не, и при́сно, и во ве́ки веко́в. Аминь.
Прему́дрость. Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй,трижды. Благослови́.
Священник глаголет отпуст:
Христо́с, И́стинный Бог наш, моли́твами Пречи́стыя Своея́ Ма́тере, свята́го сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́столов, свята́го великому́ченика и цели́теля Пантелеи́мона, и́же во святы́х отца́ на́шего Луки́, архиепи́скопа Симферо́польскаго, святы́х и безме́здных враче́в Космы́ и Дамиа́на и всех святы́х Свои́х, поми́лует и спасе́т нас, я́ко Благ и Человеколю́бец.
Лик: Аминь.
Текст молебного пения утвержден к общецерковному богослужебному употреблению решением Священного Синода от 24 марта 2022 года (журнал № 23).
Назад к списку
