Чин благословения лечебницы
Священник: Благослове́н Бог наш, всегда́, ны́не и при́сно и во ве́ки веко́в.
Чтец: Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, Иже́ везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди поми́луй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 90:
Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится: оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́: Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши и попере́ши льва и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу eго́: с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилуиа, аллилуиа, аллилуиа, слава Тебе, Боже. (Трижды).
Таже, ектения:
Миром Господу помолимся.
Лик: Го́споди, поми́луй.
О свы́шнем ми́ре, и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих вонь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе имярек, и о господи́не нашем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О е́же испо́лнити прему́дрости тружда́ющихся в лече́бнице сей , дела́ рук их ко благо́му врачева́нию челове́ческих боле́зней упра́вити и во всем благопоспе́шство пода́ти, Го́споду помо́лимся.
Лик: Го́споди, поми́луй.
О е́же бы́ти лече́бнице сей стра́ждущим в приста́нище, разсла́бленным во изцеле́ние, немощны́м в укрепле́ние и всем неду́гующим во здра́вие, Го́споду помо́лимся.
Лик: Го́споди, поми́луй.
О е́же приста́вити ме́сту сему́ А́нгелов Храни́телей, да отразя́т вся препя́тия ви́димых и неви́димых враго́в, поспеше́ние же во всем ко врачева́нию боле́зней теле́сных су́щим зде сотвори́т, Го́споду помо́лимся.
Лик: Го́споди, поми́луй.
О избáвитися нaм от вся́кия ско́рби, гне́ва и нýжды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нaс, Бо́же, Твоéю благодáтию.
Лик: Го́споди, поми́луй.
Пресвятýю, Пречи́cтую, Преблагословéнную, слáвную Влады́чицу нáшу Богоро́дицу и Присноде́ву Мари́ю со все́ми святы́ми помянýвше, сáми себе́ и дрyг дрýга, и вeсь живо́т нaш Христу́ Бо́гу предади́м.
Возглaс: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Аминь.
Таже, Бог Господь:
Бог Госпо́дь, и яви́ся нам, благослове́н гряды́й во и́мя Госпо́дне.
Стих 1: Испове́дайтеся Го́сподеви, я́ко благ, я́ко в век ми́лость Е́го.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, Его́же небрего́ша зи́ждущии, Сей бысть во главу́ у́гла: от Го́спода бысть Сей, и есть ди́вен во очесе́х на́ших.
Лик поет: Бог Госпо́дь, и яви́ся нам, благослове́н гряды́й во и́мя Госпо́дне. во глас 2, к коемуждо стиху.
Тропарь, глас 2:
Тво́рче и Созда́телю вся́ческих, Бо́же,/ дела́ рук на́ших, к сла́ве Твое́й начина́емая,/ Твои́м благослове́нием благоуспе́шо испра́ви,/ и нас от вся́каго зла изба́ви, // я́ко Еди́н Всеси́лен и Человеколю́бец.
Слава, и ныне, глас 6:
Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.
Во́нмем. Прему́дрость. Во́нмем.
Чтец: Прокимен, глас 1: Бу́ди све́тлость Го́спода Бо́га на́шего на нас,/ и дела́ рук на́ших испра́ви. Стих: И при́зри на рабы́ Твоя́ и на дела́ Твоя́.
Премудрость.
Чтец: Деяний святых апостол чтение
Вонмем.
Чтец глаголет апостол
зачало 7 (глава 3,1-8):
Во дни о́ны, вку́пе же Петр и Иоа́нн восхожда́ста во святи́лище на моли́тву в час девя́тый. И не́кий муж, хром от чре́ва ма́тере своея́ сый, носи́мь быва́ше, его́же полага́ху по вся дни пред две́рьми церко́вными, реко́мыми кра́сными, проси́ти ми́лостыни от входя́щих в це́рковь. И́же ви́дев Петра́ и Иоа́нна, хотя́щыя вни́ти в це́рковь, проша́ше ми́лостыни. Воззре́в же Петр нань со Иоа́нном, рече́: воззри́ на ны. Он же прилежа́ше и́ма, мня не́что от нею́ прия́ти. Рече́ же Петр: сребра́ и зла́та несть у мене́, но е́же и́мам, сие́ ти даю́: во И́мя Иису́са Христа́ Назоре́я воста́ни и ходи́. И ем его́ за десну́ю ру́ку воздви́же: а́бие же утверди́стеся его плесне́ и гле́зне. И вскочи́в, ста и хожда́ше, и вни́де с ни́ма в це́рковь, ходя́ и скача́, и хваля́ Бо́га.
Священник: Мир ти.
Чтец: И ду́хови твоему́.
Аллилyиа, глaс 7: Ми́лость и суд воспою́ Тебе́, Го́споди.
Стих: Пою́ и разуме́ю в пути́ непоро́чне:
Прему́дрость, про́сти, услы́шим Свята́го Ева́нгелия. Мир всем.
Лик: И ду́хови твоему́.
Священник: От Иоанна святаго Евангелиа чтение
Лик: Сла́ва Тебе́, Го́споди, сла́ва Тебе́.
Вонмем.
И чтет священник Евангелие от Иоанна.
зачало 14 (глава 5,1-9):
Во вре́мя о́но, взы́де Иису́с во Иерусали́м. Есть же во Иерусали́мех на О́вчей купе́ли, я́же глаго́лется евре́йски Вифесда́, пять притво́р иму́щи. В тех слежа́ше мно́жество боля́щих, слепы́х, хромы́х, сухи́х, ча́ющих движе́ния воды́. А́нгел бо Госпо́день на вся́ко ле́то схожда́ше в купе́ль и возмуща́ше во́ду. И и́же пе́рвее вла́зяше по возмуще́нии воды́, здрав быва́ше, яце́м же неду́гом одержи́мь быва́ше. Бе же ту не́кий челове́к, три́десять и осмь лет имы́й в неду́зе свое́м. Сего́ ви́дев Иису́с лежа́ща и разуме́в, я́ко мно́га ле́та уже́ имя́ше в неду́зе, глаго́ла ему́: хо́щеши ли цел бы́ти? Отвеща́ ему́ неду́жный: ей, Го́споди, челове́ка не и́мам, да, егда́ возмути́тся вода́, вве́ржет мя в купе́ль; егда́ же прихожду́ аз, ин пре́жде мене́ сла́зит. Глаго́ла ему́ Иису́с: воста́ни, возми́ одр твой и ходи́. И а́бие здрав бысть челове́к, и взем одр свой, и хожда́ше.
Лик: Сла́ва Тебе́, Го́споди, сла́ва Тебе́.
Таже ектения:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди поми́луй, трижды.
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем высокопреосвяще́ннейшем митрополи́те (или: архиепи́скопе, или: преосвяще́ннейшем епи́скопе) имярек, и всей во Христе́ бра́тии на́шей.
Лик: Господи помилуй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди поми́луй, трижды.
При́зри, Человеколю́бче Го́споди, ми́лостивым Твои́м о́ком на лече́бницу сию́ и на рабы́ Твоя́ нача́льствующия, ле́кари, и вся зде тружда́ющияся и к Твоему́ благоутро́бию ве́рою припа́дающия, и услы́шав моле́ния, благо́е де́ло их благослови́ и благоуспе́шно во сла́ву Твою́ соверша́ти сподо́би, мо́лим Ти ся, услы́ши и поми́луй.
Лик: Го́споди поми́луй, трижды.
Еще́ мо́лимся о е́же низпосла́ти Го́споду Бо́гу благослове́ние Свое́ на лече́бницу сию́ и на рабо́в сих (имярек), зде тружда́ющихся, и на всех в ней ле́чащихся, и посла́ти им А́нгела Своего́ ми́лостива, соблюда́юща и сохраня́юща их от вся́каго зла, и наставля́юща к де́ланию всех доброде́телей, и ко исполне́нию святы́х Христо́вых за́поведей, и о е́же сохрани́ти их от гла́да, губи́тельства, тру́са, пото́па, огня́, меча́ и наше́ствия иноплеме́нников, и вся́кия смертоно́сныя ра́ны и дарова́ти им здра́вие, и долгоде́нствием огради́ти их и во всем угобзи́ти, рцем вси: Го́споди, услы́ши и по́милуй.
Лик: Го́споди поми́луй, трижды.
Возглас: Услы́ши ны, Бо́же Спаси́телю наш, Упова́ние всех конце́в земли́ и су́щих в мо́ри дале́че, и Ми́лостив, Ми́лостив бу́ди, Влады́ко, о гресе́х на́ших и поми́луй ны, Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху ны́не и при́сно и во ве́ки веко́в.
Лик: Ами́нь.
Го́споду помо́лимся.
Лик: Го́споди поми́луй.
Священник глаголет молитву:
Го́споди, Иису́се Христе́, Бо́же наш, приими́ усе́рдное моле́ние на́ше и благослови́ лече́бницу сию́, уста́ви ю́ стра́ждущим приста́нище, разсла́бленным воста́ние, немощны́м укрепле́ние и всем неду́гующим здравоно́сну, во е́же бы́ти очесе́м Твои́м отве́рстым на зде пребыва́ющих день и нощь, и ушеса́м Твои́м, вне́млющим моли́тве их, да, ели́ка воспро́сят у Тебе́, услы́шиши и ми́лость им сотвори́ши.
Ей, Го́споди, благопоспеши́ и дела́ рук враче́й и зде тружда́ющихся упра́ви, я́ко да, руководи́ми Тобо́ю, благо́е врачева́ние непреста́нно соверша́ют и, друг дру́га тяготы́ нося́ще, в неду́зех и боле́знех бли́жним свои́м с любо́вию да слу́жат во сла́ву Пресвята́го Твоего́ И́мене.
Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом ны́не, и при́сно, и во ве́ки веко́в. Ами́нь.
Посем священник кропит вся священною водою, глаголя:
Освяща́ется лече́бница сия́ благода́тию Пресвята́го Ду́ха, окропле́нием воды́ сея́ свяще́нныя во И́мя Отца́, и Сы́на, и Свята́го Ду́ха. Ами́нь.
Таже обычный отпуст и многолетие.
Прему́дрость. Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Го́споди, поми́луй,трижды. Благослови́.
Священник глаголет отпуст:
Христо́с, и́стинный Бог наш, моли́твами Пречи́стыя Своея́ Ма́тери, си́лою Честна́го и Животворя́щего Креста́, моли́твами свята́го му́ченика Вонифа́тия, преподо́бныя Мари́и Еги́петския и всех святы́х, поми́лует и спасе́т нас, я́ко Благ и Человеколю́бец.
Лик: Аминь.
Текст утвержден к общецерковному богослужебному употреблению решением Священного Синода от 24 марта 2022 года (журнал № 23).
Назад к списку
