Чин молебнаго пения во дни губительных бедствий и техногенных катастроф
Иерей: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Таже чтец: Трисвятое по Отче наш:
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Яко Твое есть Царство, и сила и слава, Отца, и Сына, и Святаго Духа, и ныне и присно, и во веки веков.
Чтец: Аминь. Господи, помилуй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Таже псалом 50-ый.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
И абие Бог Господь: глас 8:
Бог Госпо́дь, и яви́ся нам, благослове́н Гряды́й во и́мя Госпо́дне.
Стих 1: Испове́дайтеся Го́сподеви, я́ко Благ, я́ко в век ми́лость Его́.
Стих 2: Обыше́дше обыдо́ша мя, и и́менем Госпо́дним противля́хся им.
Стих 3: Не умру́, но жив бу́ду, и пове́м дела́ Госпо́дня.
Стих 4: Ка́мень, его́же небрего́ша зи́ждущий, сей бысть во главу́ у́гла: от Го́спода бысть сей, и есть ди́вен во оче́сех на́ших.
Тропарь, глас 8
Призира́яй на зе́млю и творя́й ю́ трясти́ся,/ изба́ви ны стра́шнаго преще́ния Твоего́, Христе́ Бо́же наш,/ и низпосли́ нам бога́тыя ми́лости Твоя́/ моли́твами Богоро́дицы, и спаси́ ны.
Слава, глас 6:
И́же дре́вле в Вавило́не го́рдыя язы́ки порази́вый, Го́споди, пра́веднаго Твоего́ преще́ния изба́ви ны./ Пощади́ гре́шныя лю́ди Твоя́,/ я́же стяжа́л еси́ Твое́ю Кро́вию;/ не преда́ждь нас поги́бели от дел рук на́ших,/ ино́го бо, ра́зве Тебе́, Бо́га не ве́мы,/ и воззови́ погиба́ющим:/ Аз есмь с ва́ми, и никто́же на вы.
И ныне, глас тойже:
Милосе́рдия две́ри отве́рзи нам,/ Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед,/ Ты бо еси́ спасе́ние ро́да христиа́нскаго.
Во́нмем, прему́дрость, во́нмем.
Прокимен глас 4: Бу́ди, Го́споди, ми́лость Твоя́ на нас, я́коже упова́хом на Тя. Стих: Услы́шит тя Госпо́дь в день печа́ли.
Апостол ко Евреем, зачало 331 от полу.
Бра́тие, его́же лю́бит Госпо́дь, наказу́ет: бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове. К сим, пло́ти на́шей отца́ име́хом наказа́теля, и срамля́хомся: не мно́го ли па́че повине́мся Отцу́ духово́м, и жи́ви бу́дем? Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же плод ми́рен науче́ным тем воздае́т пра́вды. Те́мже осла́бленныя ру́ки и осла́бленная коле́на испра́вите. И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет. Блюди́те же, да не отрече́теся Глаго́лющаго, а́ще бо не избежа́ша они́, отре́кшиися проро́чествующаго на земли́, мно́жае па́че мы отрица́ющиися Небе́снаго. Его́же глас зе́млю тогда́ поколеба́, ны́не же обетова́, глаго́ля: еще́ еди́ною Аз потрясу́ не то́кмо земле́ю, но и не́бом. А е́же, еще́ еди́ною, сказу́ет коле́блемых преложе́ние, а́ки сотворе́нных, да пребу́дут, я́же суть не подви́жимая.
Аллилуиа, глас 4: Бо́же, отри́нул ны еси́ и низложи́л еси́ нас. Стих: Го́споди, да не я́ростию Твое́ю обличи́ши мене́,/ ниже́ гне́вом Твои́м нака́жеши мене́.
И о сподо́битися нам слы́шанию свята́го Ева́нгелия Го́спода Бо́га мо́лим.
Лик: Го́споди, поми́луй (трижды).
Диакон: Прему́дрость, про́сти, услы́шим свята́го Ева́нгелиа.
Иерей: Мир всем.
Лик: И ду́хови твоему́.
Иерей: От Матфеа святаго Евангелиа чтение.
Лик: Сла́ва Тебе́, Го́споди, сла́ва Тебе́.
Вонмем.
Евангелие от Матфеа, зачало 27.
Во вре́мя о́но, вле́зшу Иису́су в кора́бль, по Нем идо́ша ученицы́ Его́. И се трус вели́к бысть в мо́ри, я́коже кораблю́ покрыва́тися волна́ми, То́йже же спа́ше. И прише́дше ученицы́ Его́ возбуди́ша Его́, глаго́люще: Го́споди, спаси́ ны, погиба́ем. И глаго́ла им: что страшли́ви есте́, малове́ри? Тогда́ воста́в запрети́ ве́тром и мо́рю, и бысть тишина́ ве́лия. Челове́цы же чуди́шася, глаго́люще: кто есть Сей, я́ко и ве́три и мо́ре послу́шают Его́?
Лик: Сла́ва Тебе́, Го́споди, сла́ва Тебе́.
Ектениа:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй (трижды).
Еще молимся о Великом Господине и отце нашем Святейшем Патриархе имярек и о Господине нашем Высокопреосвященнейшем митрополите (архиепископе, или Преосвященнейшем епископе) имярек, и о всей во Христе братии нашей.
Лик: Го́споди, поми́луй (трижды).
Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди, поми́луй (трижды).
И́же от бу́ри морски́я спасы́й ученики́ Твоя́, Го́споди, запрети́ бу́ри и ве́тром, утверди́ основа́ния земли́, мо́лимтися, услы́ши и ми́лостивно поми́луй.
Лик: Го́споди, поми́луй (трижды).
Сотвори́вый мир и вся, я́же в нем, Го́споди, приими́ покая́ние на́ше и во вре́мя потре́бно посли́ земли́ дождь и благорастворе́ние возду́хов, умири́ стихи́и, да грех на́ших ра́ди не му́чается и стра́ждет тварь, мо́лимтися, услы́ши и ми́лостивно поми́луй.
Лик: Го́споди, поми́луй (трижды).
Дело́м го́рдых проти́вящийся, Го́споди, дела́ рук на́ших испра́ви, да не обратя́тся на главы́ на́ша и не погубя́т ны, но при́зри на смире́ние на́ше и низпосли́ благода́ть и мир, мо́лимтися услы́ши и ми́лостивно поми́луй.
Лик: Го́споди, поми́луй (трижды).
Возглас: Услы́ши ны, Бо́же Спаси́телю наш, упова́ние всех концо́в земли́ и су́щих в мо́ре дале́че: и ми́лостив, ми́лостив бу́ди, Влады́ко, о гресе́х на́ших и поми́луй ны. Ми́лостив бо и человеколю́бец, Бог еси́, и Тебе́ сла́ву воссыла́ем, Отцу́ и Сы́ну, и Свято́му Ду́ху, ны́не и при́сно и во ве́ки веко́в.
Лик: Аминь.
По ектении иерей чтет молитву.
Влады́ко Многоми́лостиве, Го́споди, Иису́се Христе́ Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х, Небе́сных Сил Безпло́тных, честна́го сла́внаго проро́ка Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́ченик, преподо́бных и богоно́сных оте́ц на́ших и всех святы́х благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, изба́ви нас от гла́да, губи́тельства, тру́са, пото́па, огня́, и вся́каго про́чияго бе́дствия, умири́ на́шу жизнь, Го́споди, поми́луй нас и мир Твой и спаси́ ду́ши на́ша, я́ко Благ и Человеколю́бец.
Лик: Ами́нь.
Иерей: Прему́дрость. Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́во ро́ждшую, су́щую Бого́родицу Тя велича́ем.
Иерей: Сла́ва Тебе́, Христе́ Бо́же, Упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй, (трижды) Благослови́.
Иерей отпуст:
Христо́с и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х, поми́лует и спасе́т нас, я́ко Благ и Человеколю́бец.
Лик: Аминь.
Особые Чинопоследования по случаю различных бедствий находятся в Большом Требнике.
Чин молебного пения утвержден решением Священного Синода от 25-26 декабря 2013 года (журнал № 148)
Назад к списку
