Чин венчания супругов, в летех мнозех сущих
Поставляется аналогий посреде церкве, и полагаются на нем Евангелие и Крест. Предстоят же в притворе: муж одесную, жена же ошуюю. Священник, облачен в фелонь, назнаменует главы супруг трижды, и дает им свещы возжженны. Таже соединяет руце их, и входят во храм, поющу священнику псалом 127, сице:
Блаже́ни вси боя́щиися Го́спода, ходя́щии в путе́х Его́.
Людие же на кийждо стих глаголют: Сла́ва Тебе́, Бо́же наш, сла́ва Тебе́.
Труды́ плодо́в твои́х сне́си. Блаже́н еси́, и добро́ тебе́ бу́дет.
Жена́ твоя́ я́ко лоза́ плодови́та, во страна́х до́му твоего́.
Сы́нове твои́ я́ко новосажде́ния ма́сличная, о́крест трапе́зы твоея́.
Се та́ко благослови́тся челове́к, боя́йся Го́спода.
Благослови́т тя Госпо́дь от Сио́на, и у́зриши блага́я Иерусали́ма вся дни живота́ твоего́.
И у́зриши сы́ны сыно́в твои́х: мир на Изра́иля.
Таже глаголет священник слово вкратце.
По скончании же слова, вопрошает иерей мужа глаголя:
И́маши ли, имярек, произволе́ние благо́е и непринужде́нное, и кре́пкую мысль, пребыва́ти в зако́нном бра́ке с жено́ю се́ю имярек, ю́же зде пред тобо́ю ви́диши?
И отвещает муж, глаголя: И́мам, честны́й о́тче.
Иерей паки: Не обеща́лся ли еси́ ино́й жене́?
Муж: Не обеща́хся, честны́й о́тче.
И абие иерей, зря к жене, вопрошает ю, глаголя:
И́маши ли произволе́ние благо́е и непринужде́нное, и тве́рдую мысль, пребыва́ти в зако́нном бра́ке с му́жем сим имярек, его́же пред тобо́ю зде ви́диши?
И отвещает жена, глаголющи: И́мам, честны́й о́тче.
Иерей паки: Не обеща́лася ли еси́ ино́му му́жу?
И отвещает жена: Не обеща́хся, честны́й о́тче.
Таже глаголет диакон: Благослови́, Влады́ко.
И начинает иерей: Благослове́но Ца́рство Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
И абие ектения: Ми́ром Го́споду помо́лимся.
Лик: Го́споди, поми́луй.
О свы́шнем ми́ре и спасе́нии душ на́ших, Го́споду помо́лимся.
О ми́ре всего́ ми́ра, благостоя́нии святы́х Бо́жиих Церкве́й и соедине́нии всех, Го́споду помо́лимся.
О святе́м хра́ме сем и с ве́рою, благогове́нием и стра́хом Бо́жиим входя́щих вонь, Го́споду помо́лимся.
О Вели́ком Господи́не и отце́ на́шем, Святе́йшем Патриа́рхе имярек, и о господи́не на́шем, высокопреосвяще́ннейшем митрополи́те [или: архиепископе, или: преосвяще́ннейшем епи́скопе] имярек, честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
О Богохрани́мей стране́ на́шей, власте́х и во́инстве ея́, Го́споду помо́лимся.
О рабе́х Бо́жиих, имярек и имярек, и о спасе́нии их, Го́споду помо́лимся.
О е́же благослови́тися бра́ку сему́, я́коже в Ка́не Галиле́йстей, Го́споду помо́лимся.
О е́же пода́тися им целому́дрию, Го́споду помо́лимся.
О е́же возвесели́тися им о сыне́х и дще́рех, Го́споду помо́лимся.
О е́же дарова́тися им незазо́рному пребыва́нию, Го́споду помо́лимся.
О е́же дарова́ти им же и нам вся ко спасе́нию проше́ния, Го́споду помо́лимся.
О е́же изба́витися им же и нам от вся́кия ско́рби, гне́ва и ну́жды, Го́споду помо́лимся.
Заступи́, спаси́, поми́луй и сохрани́ нас, Бо́же, Твое́ю благода́тию.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Священник возгласно: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Таже глаголет священник молитвы сия три велегласно. Или точию третию от сих, довлеет бо зде.
Молитва 1. Го́споду помо́лимся.
Лик: Го́споди, поми́луй.
Бо́же Пречи́стый, и всея́ тва́ри Соде́телю, ребро́ пра́отца Ада́ма за Твое́ человеколю́бие в жену́ преобрази́вый, и благослови́вый я́, и реки́й: расти́теся и мно́житеся, и облада́йте земле́ю, и обою́ е́ю еди́н уд показа́вый сопряже́нием. Сего́ бо ра́ди оста́вит челове́к отца́ своего́ и ма́терь, и прилепи́тся жене́ свое́й, и бу́дета два в плоть еди́ну, и я́же Бог спряже́, челове́к да не разлуча́ет. И́же раба́ Твоего́ Авраа́ма благослови́вый и разве́рзый ложесна́ Са́ррина, и отца́ мно́жества язы́ков сотвори́вый. И́же Исаа́ка Реве́кце дарова́вый, и рождество́ ея́ благослови́вый. И́же Иа́кова Рахи́ле сочета́вый, и из него́ двана́десять патриа́рхов показа́вый. И́же Ио́сифа и Асене́фу спряги́й, плод детотворе́ния им, Ефре́ма и Манасси́ю дарова́вый. И́же Заха́рию и Елисаве́т прие́мый, и Предте́чу рожде́ние им показа́вый. И́же от ко́рене Иессе́ова по пло́ти израсти́вый Присноде́ву, и из Нея́ воплоти́выйся, и роди́выйся во спасе́ние ро́да челове́ческаго. И́же за неизрече́нный Твой дар и мно́гую бла́гость прише́дый в Ка́ну Галиле́йскую и та́мошний брак благослови́вый, да я́виши, я́ко Твоя́ во́ля есть зако́нное супру́жество, и е́же из него́ чадотворе́ние. Сам, Влады́ко Пресвяты́й, приими́ моле́ние нас, рабо́в Твои́х, я́коже та́мо, и зде прише́д неви́димым Твои́м предста́тельством, благослови́ брак сей, и пода́ждь рабо́м Твои́м сим, имярек и имярек, живо́т ми́рен, долгоде́нствие, целому́дрие, друг ко другу любо́вь в сою́зе ми́ра, се́мя долгожи́зненное, о ча́дех благода́ть, неувяда́емый сла́вы вене́ц. Сподо́би я́ ви́дети ча́да ча́дов, ло́же е́ю ненаве́тно соблюди́, и да́ждь и́ма от росы́ небе́сныя свы́ше, и от ту́ка земна́го; испо́лни до́мы их пшени́цы, вина́ и еле́а и вся́кия благосты́ни, да преподаю́т и тре́бующим, да́руя ку́пно и су́щим с ни́ма вся я́же ко спасе́нию проше́ния.
Я́ко Бог ми́лости, и щедро́т, и человеколю́бия еси́, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Молитва 2. Го́споду помо́лимся.
Лик: Го́споди, поми́луй.
Благослове́н еси́,Го́споди Бо́же наш, И́же та́йнаго и чи́стаго бра́ка Священноде́йствителю и теле́снаго Законоположи́телю, нетле́ния Храни́телю, жите́йских благи́й Строи́телю. Сам и ны́не, Влады́ко, в нача́ле созда́вый челове́ка и положи́вый его́ я́ко царя́ тва́ри, и реки́й: не добро́ бы́ти челове́ку еди́ному на земли́, сотвори́м ему́ помо́щника по нему́: и взем еди́но от ребр его́, созда́л еси́ жену́, ю́же ви́дев Ада́м, рече́: сия́ ны́не кость от косте́й мои́х, и плоть от пло́ти моея́: сия́ нарече́тся жена́, я́ко от му́жа своего́ взята́ бысть сия́. Сего́ ра́ди оста́вит челове́к отца́ своего́ и ма́терь, и прилепи́тся жене́ свое́й, и бу́дета два в плоть еди́ну: и я́же Бог сопряже́, челове́к да не разлуча́ет. Сам и ны́не, Влады́ко Го́споди Бо́же наш, низпосли́ благода́ть Твою́ Небе́сную на рабы́ Твоя́ сия́, имярек и имярек, и даждь рабе́ сей во всем повинова́тися му́жу, и рабу́ Твоему́ сему́ бы́ти во главу́ жены́, я́ко да поживу́т по воли́ Твое́й. Благослови́ я́, Го́споди Бо́же наш, я́коже благослови́л еси́ Авраа́ма и Са́рру. Благослови́ я́, Го́споди Бо́же наш, я́коже благослови́л еси́ Исаа́ка и Реве́кку. Благослови́ я́, Го́споди Бо́же наш, я́коже благослови́л еси́ Иа́кова, и вся патриа́рхи. Благослови́ я́, Го́споди Бо́же наш, я́коже благослови́л еси́ Ио́сифа и Асене́фу. Благослови́ я́, Го́споди Бо́же наш, я́коже благослови́л еси́ Моисе́я и Сепфо́ру. Благослови́ я́, Го́споди Бо́же наш, я́коже благослови́л еси́ Иоаки́ма и А́нну. Благослови́ я́, Го́споди Бо́же наш, я́коже благослови́л еси́ Заха́рию и Елисаве́т. Сохрани́ я́, Го́споди Бо́же наш, я́коже сохрани́л еси́ Но́я в ковче́зе. Сохрани́ я́, Го́споди Бо́же наш, я́коже сохрани́л еси́ Ио́ну во чре́ве ки́тове. Сохрани́ я́, Го́споди Бо́же наш, я́коже сохрани́л еси́ святы́я три о́троки от огня́, низпосла́вый им ро́су с Небесе́. И да прии́дет на ня ра́дость о́ная, ю́же имя́ше блаже́нная Еле́на, егда́ обре́те Честны́й Крест. Помяни́ я́, Го́споди Бо́же наш, я́коже помяну́л еси́ Ено́ха, Си́ма, Илию́. Помяни́ я́, Го́споди Бо́же наш, я́коже помяну́л еси́ святы́я Твоя́ четы́редесять му́ченики, низпосла́вый им с Небесе́ венцы́. Помяни́, Бо́же, и воспита́вшия их роди́тели: зане́ моли́твы роди́телей утвержда́ют основа́ния домо́в. Помяни́, Го́споди Бо́же наш, рабы́ Твоя́, прише́дшия в ра́дость сию́. Помяни́, Го́споди Бо́же наш, раба́ Твоего́ имярек и рабу́ Твою́ имярек и благослови́ я́. Даждь им доброча́дие и единомы́слие душ и теле́с, возвы́си я́ я́ко ке́дры лива́нския. Да́руй им се́мя кла́сяно, да вся́кое самодово́льство иму́ще, изоби́луют на вся́кое де́ло благо́е и Тебе́ благоуго́дное, и да у́зрят сы́ны сыно́в свои́х, я́ко новосажде́ния ма́сличная о́крест трапе́зы их. И благоугоди́вше пред Тобо́ю, возсия́ют я́ко свети́ла на небеси́, в Тебе́, Го́споде на́шем.
С Тобо́ю же сла́ва, держа́ва, честь и поклоне́ние, Безнача́льному Твоему́ Отцу́ и Животворя́щему Твоему́ Ду́ху, ны́не и при́сно, и во ве́ки веко́в.
Лик: Ами́нь.
Молитва 3. Го́споду помо́лимся.
Лик: Го́споди, поми́луй.
Бо́же Святы́й, созда́вый от пе́рсти челове́ка, и от ребра́ его́ возсозда́вый жену́, и спряги́й ему́ помо́щника по нему́, за е́же та́ко го́дно бысть Твоему́ Величеству, не еди́ному бы́ти челове́ку на земли́: Сам и ны́не, Влады́ко, низпосли́ руку́ Твою́ от свята́го жили́ща Твоего́, и сочета́й раба́ Твоего́ сего́, имярек, и рабу́ Твою́ сию́, имярек, зане́ от Тебе́ сочетава́ется му́жу жена́. Сопрязи́ я́ в единому́дрии и венча́й я́ в плоть еди́ну.
Я́ко Твоя́ держа́ва и Твое́ есть ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
И по амине, прием священник венцы, венчает первее мужа, глаголя:
Венча́ется раб Бо́жий имярек рабе́ Бо́жией имярек, во и́мя Отца́, и Сы́на, и Свята́го Ду́ха. Ами́нь.
Таже венчает и жену, глаголя:
Венча́ется раба́ Бо́жия имярек рабу́ Бо́жию имярек, во и́мя Отца́, и Сы́на, и Свята́го Ду́ха. Ами́нь.
Таже благословляет я трижды, глаголя трижды:
Го́споди Бо́же наш, сла́вою и че́стию венча́й я́.
И абие: Во́нмем. Мир всем.
Людие: И ду́хови твоему́.
Прему́дрость
Таже прокимен Апостола, глас 8:
Положи́л еси́ на глава́х их венцы́, от ка́меней честны́х, живота́ проси́ша у Тебе́, и дал еси́ им.
Стих: Я́ко да́си им благослове́ние в век ве́ка, возвесели́ши я́ ра́достию с лице́м Твои́м.
Премудрость.
И чтец: Ко Ефесе́ем посла́ния свята́го апо́стола Па́вла чте́ние.
И паки: Во́нмем.
Апостол ко Ефесеем, зачало 230.
Бра́тие, благодаря́ще всегда́ о всех, о и́мени Го́спода на́шего Иису́са Христа́, Бо́гу и Отцу́: повину́ющеся друг дру́гу в стра́се Бо́жии. Жены́, свои́м муже́м повину́йтеся, я́коже Го́споду: зане́ муж глава́ есть жены́, я́коже и Христо́с глава́ Це́ркве, и Той есть спаси́тель те́ла. Но я́коже Це́рковь повину́ется Христу́, та́кожде и жены́ свои́м муже́м во всем. Му́жие, люби́те своя́ жены́, я́коже и Христо́с возлюби́ Це́рковь, и Себе́ предаде́ за ню: да освяти́т ю́, очи́стив ба́нею водно́ю в глаго́ле. Да предста́вит ю́ Себе́ сла́вну Це́рковь, не иму́щу скве́рны, или́ поро́ка, или́ не́что от таковы́х, но да есть свя́та и непоро́чна. Та́ко до́лжни суть му́жие люби́ти своя́ жены́, я́ко своя́ телеса́: любя́й бо свою́ жену́, себе́ сама́го лю́бит. Никто́же бо когда́ свою́ плоть возненави́де, но пита́ет и гре́ет ю́, я́коже и Госпо́дь Це́рковь: зане́ у́ди есмы́ те́ла Его́, от пло́ти Его́, и от косте́й Его́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в плоть еди́ну. Та́йна сия́ велика́ есть: аз же глаго́лю во Христа́ и во Це́рковь. Оба́че и вы по еди́ному, ки́йждо свою́ жену́ си́це да лю́бит, я́коже и себе́, а жена́ да бои́тся своего́ му́жа.
Священник: Мир ти.
И чтец: И ду́хови твоему́.
Священник: Прему́дрость. Аллилуиа, глас 5.
Ты, Го́споди, сохрани́ши ны и соблюде́ши ны от ро́да сего́, и во век.
Священник: Прему́дрость, про́сти, услы́шим свята́го Ева́нгелия.
Мир всем.
Людие: И ду́хови твоему́.
Священник: От Иоа́нна свята́го Ева́нгелиа чте́ние.
Лик: Сла́ва Тебе́, Го́споди, сла́ва Тебе́.
Во́нмем.
Евангелие от Иоанна, зачало 6.
Во вре́мя о́но, брак бысть в Ка́не Галиле́йстей, и бе Ма́ти Иису́сова ту. Зван же бысть Иису́с и ученицы́ Его́ на брак. И не доста́вшу вину́, глаго́ла Ма́ти Иису́сова к Нему́: вина́ не и́мут. Глаго́ла Ей Иису́с: что есть Мне и Тебе́, же́но? Не у прии́де час Мой. Глаго́ла Ма́ти Его́ слуга́м: е́же а́ще глаго́лет вам, сотвори́те. Бе́ху же ту водоно́сы ка́менни шесть, лежа́ще по очище́нию иуде́йску, вместя́щия по двема́ или́ трие́м ме́рам. Глаго́ла им Иису́с: напо́лните водоно́сы воды́. И напо́лниша их до ве́рха. И глаго́ла им: почерпи́те ны́не, и принеси́те архитрикли́нови. И принесо́ша. Я́коже вкуси́ архитрикли́н вина́ бы́вшаго от воды́, и не ве́дяше отку́ду есть: слуги́ же ве́дяху поче́рпшии во́ду, пригласи́ жениха́ архитрикли́н. И глаго́ла ему́: всяк челове́к пре́жде до́брое вино́ полага́ет, и егда́ упию́тся, тогда́ ху́ждшее: ты же соблю́л еси́ до́брое вино́ досе́ле. Се сотвори́ нача́ток зна́мением Иису́с в Ка́не Галиле́йстей, и я́ви сла́ву Свою́, и ве́роваша в Него́ ученицы́ Его́.
Лик: Сла́ва Тебе́, Го́споди, сла́ва Тебе́.
Таже: Рцем вси от всея́ души́, и от всего́ помышле́ния на́шего рцем.
Лик: Го́споди, поми́луй.
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Лик: Го́споди, поми́луй.
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, имярек, и поминает ихже хощет: мужа, жену, чад их и прочая.
Лик: Го́споди, поми́луй, трижды.
Возглас от священника: Я́ко ми́лостив и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И глаголет велегласно священник. Го́споду помо́лимся.
Лик: Го́споди, поми́луй.
Го́споди Бо́же наш, во спаси́тельном Твое́м смотре́нии, сподо́бивый в Ка́не Галиле́йстей, честны́й показа́ти брак Твои́м прише́ствием: Сам ны́не рабы́ Твоя́, имярек и имярек, я́же благоволи́л еси́ сочетава́тися друг дру́гу, в ми́ре и единомы́слии сохрани́, честны́й их брак покажи́, нескве́рное их ло́же соблюди́, непоро́чное их сожи́тельство пребыва́ти благоволи́, и сподо́би я́ в ста́рости масти́тей дости́гнути, чи́стым се́рдцем де́лающе за́поведи Твоя́.
Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, со Безнача́льным Твои́м Отце́м, и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Таже: Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Дне всего́ соверше́нна, свя́та, ми́рна и безгре́шна, у Го́спода про́сим.
Лик: Пода́й, Го́споди.
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Лик: Пода́й, Го́споди.
Проще́ния и оставле́ния грехов и прегрешений наших, у Господа просим.
Лик: Пода́й, Го́споди.
До́брых и поле́зных душа́м на́шим, и ми́ра ми́рови, у Го́спода про́сим.
Лик: Пода́й, Го́споди.
Про́чее вре́мя живота́ на́шего в ми́ре и покая́нии сконча́ти, у Го́спода про́сим.
Лик: Пода́й, Го́споди.
Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на Стра́шнем Суди́щи Христо́ве про́сим.
Лик: Пода́й, Го́споди.
Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:
И людие: О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет воля́ Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м нашим; и не введи́ нас во искуше́ние, но изба́ви нас от лука́ваго.
Священник возглашает: Я́ко Твое́ есть ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
И абие приносится общая чаша. Го́споду помо́лимся.
Лик: Го́споди, поми́луй.
И благословляет священник общую чашу, и глаголет молитву сию:
Бо́же, вся сотвори́вый кре́постию Твое́ю, и утверди́вый вселе́нную, и украси́вый вене́ц всех сотворе́нных от Тебе́, и ча́шу о́бщую сию́ подава́яй сочета́вшимся во обще́нии бра́ка, благослови́ благослове́нием духо́вным.
Возгласно: Я́ко благослови́ся Твое́ и́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Таже взем священник в руку общую чашу, преподает им трижды: первее мужу, и потом жене.
И абие прием я священник, куму или иному держащу созади венцы, обращает яко образом круга. И поет священник, или людие, настоящия тропари:
Глас 5. Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.
Глас 7. Святи́и му́ченицы, до́бре страда́льчествовавшии и венча́вшиися, моли́теся ко Го́споду, поми́ловатися душа́м на́шим.
Сла́ва Тебе́, Христе́ Бо́же, апо́столом похвало́, му́чеников ра́дование, и́хже про́поведь: Тро́ица Единосу́щная.
Таже священник, взем венцы мужа и жены осеняет ими брачующиеся.
И абие: Го́споду помо́лимся.
Лик: Го́споди, поми́луй.
Священник молитву.
Бо́же, Бо́же наш, прише́дый в Ка́ну Галиле́йскую и та́мошний брак благослови́вый, благослови́ и рабы́ Твоя́ сия́, Твои́м Про́мыслом ко обще́нию бра́ка сочета́вшияся: благослови́ их вхо́ды и исхо́ды, умно́жи во благи́х живо́т их, восприими́ венцы́ их в Ца́рствии Твое́м, нескве́рны, и непоро́чны, и ненаве́тны соблюда́яй, во ве́ки веко́в.
Лик: Ами́нь.
Священник: Мир всем.
Лик: И ду́хови твоему́.
Главы́ ва́ша Го́сподеви приклони́те.
Лик: Тебе́, Го́споди.
И благословляет я священник, глаголя:
Оте́ц, Сын, и Святы́й Дух, Всесвята́я, и Единосу́щная, и Живонача́льная Тро́ица, еди́но Божество́ и Ца́рство, да благослови́т вас, и да пода́ст вам долгожи́тие, преспе́яние живота́ и ве́ры, и да испо́лнит вас всех су́щих на земли́ благи́х, да сподо́бит вас и обе́щанных благ восприя́тия, моли́твами Святы́я Богоро́дицы и всех святы́х. Ами́нь.
Таже: Прему́дрость.
Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва, и ныне: Го́споди, поми́луй, трижды. Благослови́.
Священник отпуст:
И́же в Ка́не Галиле́йстей прише́ствием Свои́м че́стен брак показа́вый, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, святы́х боговенча́нных царе́й и равноапо́столов Константи́на и Еле́ны, свята́го великому́ченика Проко́пия и всех святы́х, поми́лует и спасе́т нас, я́ко благ и Человеколю́бец.
И поют многолетие, и поздравляют друг друга.
Текст чинопоследования утвержден решением Священного Синода от 5 мая 2015 года (журнал № 29).
Назад к списку
