Глава 53. Отпустительнии тропари воскреснии осми гласов, с богородичны их, ипакои, и кондаки. И прокимени на утрени пред евангелием, и на литургии, и аллилуиаре.
Отпустительнии тропари воскреснии осми гласов,
с богородичны их, ипакои, и кондаки. И прокимени на утрени пред евангелием, и на литургии, и аллилуиаре.
Тропарь, глас 1: Камени запечатану от иудей, и воином стрегущим Пречистое Тело Твое, воскресл еси тридневный Спасе, даруяй мирови жизнь. Сего ради Силы Небесныя вопияху Ти Жизнодавче: слава Воскресению Твоему Христе. слава Царствию Твоему. слава смотрению Твоему, едине Человеколюбче.
Богородичен: Гавриилу вещавшу Тебе Дево, радуйся, со гласом воплощашеся всех Владыка, в Тебе святем кивоте, якоже рече праведный Давид, явилася еси ширшая Небес, поносивши Зиждителя Твоего. слава Всельшемуся в Тя. слава Прошедшему из Тебе. слава Свободившему нас Рождеством Твоим.
Ипакои: Разбойничо покаяние рай окраде, плачь же мироносиц радость возвести, яко воскресл еси Христе Боже, подаяй мирови велию милость.
На Утрени прокимен, глас 1: Ныне воскресну, глаголет Господь, положуся во спасение, не обинюся о нем. Стих: Словеса Господня, словеса чиста: Таже, Всякое дыхание: Стих: Хвалите Бога во святых Его: Евангелие воскресно, ряд. По 6-й песни,
Кондак, Подобен: Егда приидеши: Воскресл еси яко Бог из гроба во славе, и мир совоскресил еси, и естество человеческое яко Бога воспевает Тя, и смерть исчезе. Адам же ликует, Владыко: Ева ныне от уз избавляема, радуется зовущи: Ты еси иже всем подая Христе воскресение.
На хвалитех стихиры воскресны по обычаю. Слава, стихира евангельская. И ныне, поем во вся недели,
Настоящий богородичен, глас 2: Преблагословенна еси Богородице Дево, воплощшим бо ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом. тем воспевающе вопием: благословен Христос Бог благоволивый тако, слава Тебе.
Славословие великое, и по скончании славословия, и трисвятаго, глаголем тропарь воскресный:
И в 1-й убо глас, и 3-й, 5-й, 7-й, глаголем сей:
Днесь спасение миру бысть, поем воскресшему из гроба и Начальнику жизни нашея: разрушив бо смертию смерть, победу даде нам, и велию милость.
Во глас же, 2-й, 4-й, 6-й, 8-й, глаголем сей:
Воскрес из гроба, и узы растерзал еси ада, разрушил еси осуждение смерти Господи, вся от сетей врага избавивый, явивый же Себе апостолом Твоим, послал еси я на проповедь, и теми мир Твой подал еси вселенней, едине многомилостиве.
На литургии прокимен: Буди Господи милость твоя на нас, якоже уповахом на Тя. Стих: Радуйтеся праведнии о Господе, правым подобает похвала. Апостол, ряд. Аллилуиа: Бог даяй отмщение мне, и покоривый люди под мя. Стих: Величаяй спасения царева, и творяй милость христу своему Давиду, и семени его до века.
Тропарь, глас 2: Егда снизшел еси к смерти, Животе безсмертный, тогда ад умертвил еси блистанием Божества. егда же и умершия от преисподних воскресил еси, вся Силы Небесныя взываху: Жизнодавче Христе Боже наш, слава Тебе.
Богородичен: Вся паче смысла, вся преславная Твоя Богородице таинства, чистоте запечатанной, и девству храниму, Мати позналася еси неложна, Бога рождши Истиннаго. Того моли спастися душам нашим.
Ипакои: По страсти шедше во гроб жены, во еже помазати Тело Твое Христе Боже, видеша Ангелы во гробе, и ужасошася: глас бо слышаху от них, яко воскресе Господь, даруяй мирови велию милость.
На утрени, прокимен: Востани Господи Боже мой повелением, имже заповедал еси, и сонм людей обыдет Тя. Стих: Господи Боже мой на Тя уповах, спаси мя. Таже евангелие воскресно ряд.
Кондак: Воскресл еси от гроба Всесильне Спасе, и ад видев чудо ужасеся, и мертвии восташа: тварь же видящи, срадуется Тебе, и Адам свеселится, и мир Спасе мой воспевает Тя присно.
На литургии прокимен: Крепость моя и пение мое Господь, и бысть мне во спасение. Стих: Наказуя наказа мя Господь, смерти же не предаде мя. Апостол, ряд. Аллилуиа: Услышит тя Господь в день печали, защитит тя имя Бога Иаковля. Стих: Господи спаси царя, и услыши ны, воньже аще день призовем тя. Евангелие, ряд.
Тропарь, глас 3: Да веселятся Небесная, да радуются земная, яко сотвори державу мышцею Своею Господь, попра смертию смерть, первенец мертвых бысть: из чрева адова избави нас, и подаде мирови велию милость.
Богородичен: Тя ходатайствовавшую спасение рода нашего, воспеваем Богородице Дево: плотию бо от Тебе восприятою Сын Твой, и Бог наш, Крестом восприим страсть, избави нас от тли, яко Человеколюбец.
Ипакои: Удивляя видением, орошая глаголании, блистаяйся Ангел, мироносицам глаголаше: что живаго ищете во гробе? воста истощивый гробы, тли пременителя разумейте непременнаго. рцыте Богови: коль страшна дела твоя, яко род спасл еси человеческий.
На утрени прокимен: Рцыте во языцех, яко Господь воцарися: ибо исправи вселенную, яже не подвижится. Стих: Воспойте Господеви песнь нову, воспойте Господеви вся земля. Евангелие воскресно, ряд.
Кондак. Подобен: Дева днесь: Воскресл еси днесь из гроба Щедре, и нас возвел еси от врат смертных. днесь Адам ликует, и радуется Ева: вкупе же и пророцы с патриархи воспевают непрестанно Божественную державу власти Твоея.
На литургии прокимен: Пойте Богу нашему, пойте, пойте Цареви нашему, пойте. Стих: Вси языцы восплещите руками, воскликните Богу гласом радования. Апостол, ряд. Аллилуиа: На тя Господи уповах, да не постыжуся во век. Стих: Буди ми в Бога защитителя, и в дом прибежища, еже спасти мя. Евангелие рядовое.
Тропарь, глас 4: Светлую Воскресния проповедь, от Ангела уведевше Господни ученицы, и прадеднее осуждение отвергше, апостолом хвалящеся глаголаху: испровержеся смерть, воскресе Христос Бог, даруяй мирови велию милость.
Богородичен: Еже от века утаеное, и Ангелом несведомое таинство, Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
Ипакои: Яже Твоего преславнаго востания, предтекшия мироносицы, апостолом проповедаху Христе, яко воскресл еси яко Бог, подаяй мирови велию милость.
На утрени прокимен: Воскресни Господи, помози нам, и избави нас имене Твоего ради. Стих: Боже, ушима нашима услышахом, и отцы наши возвестиша нам.
Кондак. Подобен: Явился еси днесь: Спас и Избавитель мой, из гроба яко Бог, воскреси от уз земнородныя: и врата адова сокруши, и яко Владыка воскресе тридневен.
На литургии прокимен: Яко возвеличишася дела твоя Господи, вся премудростию сотворил еси. Стих: Благослови душе моя Господа, Господи Боже мой возвеличился еси зело. Аллилуиа: Наляцы, и успевай, и царствуй истины ради, и кротости, и правды. Стих: Возлюбил еси правду, и возненавидел еси беззаконие.
Тропарь, глас 5: Собезначальное Слово Отцу и Духови, от Девы рождшееся на спасение наше, воспоим вернии, и поклонимся: яко благоволи плотию взыти на Крест, и смерть претерпети, и воскресити умершия славным Воскресением Своим.
Богородичен: Радуйся, двере Господня непроходимая. радуйся, стено и покрове притекающих к Тебе. радуйся необуреваемое пристанище, и Неискусобрачная, рождшая плотию Творца Твоего и Бога: молящи не оскудевай о воспевающих, и кланяющихся рождеству Твоему.
Ипакои: Ангельским зраком ум смущающия, и Божественным востанием душею просвещаемыя, мироносицы апостолом благовествоваху: возвестите во языцех Воскресение, Господу содействующу чудесы, подающему нам велию милость.
На утрени прокимен: Воскресни Господи Боже мой, да вознесется рука Твоя, яко Ты царствуеши во веки. Стих: Исповемся Тебе Господи всем сердцем моим, повем вся чудеса Твоя.
Кондак. Подобен: Собезначальное слово: Ко аду Спасе мой сошел еси, и врата сокрушивый яко всесилен, умерших яко Создатель, совоскресил еси, и смерти жало сокрушил еси: и Адам от клятвы избавлен бысть Человеколюбче. темже вси зовем: спаси нас Господи.
На литургии прокимен: Ты Господи сохраниши ны, и соблюдеши ны от рода сего, и во век. Стих: Спаси мя Господи, яко оскуде преподобный. Аллилуиа: Милости твоя Господи во век воспою, в род и род возвещу истину твою усты моими. Стих: Зане рекл еси: во век милость созиждется, на Небесех уготовится истина Твоя.
Тропарь, глас 6: Ангельския Силы на гробе Твоем, и стрегущии омертвеша, и стояше Мариа во гробе, ищущи Пречистаго Тела Твоего. пленил еси ад, не искусився от него: сретил еси деву, даруяй живот. Воскресый из мертвых Господи, слава Тебе.
Богородичен: Благословенную нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя Ангелом: срадуйтеся Мне, яко обретеся погибшая драхма. вся мудре устроивый Боже наш, слава Тебе.
Ипакои: Вольною и животворящею Твоею смертию Христе, врата адова сокрушив яко Бог: отверзл еси. нам древний рай, и воскрес, из мертвых, избавил еси от тления живот наш.
На утрени прокимен: Господи воздвигни силу Твою, и прииди во еже спасти нас. Стих: Пасый Израиля вонми, наставляяй яко овча Иосифа.
Кондак: Живоначальною дланию, умершия от мрачных удолий, Жизнодавец воскресив всех Христос Бог, воскресение подаде человеческому роду: есть бо всех Спаситель, Воскресение, и Живот и Бог всех.
На литургии прокимен: Спаси Господи люди Твоя, и благослови достояние Твое. Стих: К тебе Господи воззову, Боже мой, да не премолчиши от мене. Аллилуиа: Живый в помощи вышняго, в крове Бога Небеснаго водворится. Стих: Речет Господеви: заступник мой еси, и прибежище мое, Бог мой, и уповаю на Него.
Тропарь, глас 7: Разрушил еси Крестом Твоим смерть, отверзл еси разбойнику рай, мироносицам плачь преложил еси, и апостолом проповедати повелел еси, яко воскресл еси Христе Боже, даруяй мирови велию милость.
Богородичен: Яко нашего воскресния сокровище, на Тя надеющияся Всепетая, от рова и глубины прегрешений возведи. Ты бо повинныя греху спасла еси, рождшая Спасение наше: яже прежде рождества Дева, и в рождестве Дева, и по рождестве паки пребываеши Дева.
Ипакои: Иже наш зрак восприемый, и претерпевый Крест плотски, спаси мя Воскресением Твоим Христе Боже, яко Человеколюбец.
На утрени прокимен: Воскресни Господи Боже мой, да вознесется рука Твоя, не забуди убогих Твоих до конца. Стих: Исповемся Тебе Господи всем сердцем моим: повем вся чудеса Твоя.
Кондак: Не ктому держава смертная возможет держати человеки, Христос бо сниде сокрушая и разоряя силы ея. связуемь бывает ад, пророцы согласно радуются, предста, глаголюще Спас сущим в вере: изыдите вернии в воскресение.
На литургии прокимен: Господь крепость людем Своим даст, Господь благословит люди Своя миром. Стих: Принесите Господеви сынове Божии: принесите Господеви сыны овни. Аллилуиа: Благо есть исповедатися Господеви, и пети имени Твоему Вышний. Стих: Возвещати заутра милость Твою, и истину Твою на всяку нощь.
Тропарь, глас 8: С высоты снизшел еси Благоутробне, погребение приял еси тридневное, да нас свободиши страстей, Животе и Воскресение наше, Господи слава Тебе.
Богородичен: Иже нас ради рождейся от Девы, и распятие претерпев Благий, испровергий смертию смерть, и Воскресение явлей яко Бог, не презри яже создал еси рукою Твоею. яви человеколюбие Твое Милостиве, приими рождшую Тя Богородицу молящуюся за ны, и спаси Спасе наш люди отчаянныя.
Ипакои: Мироносицы Жизнодавца предстоящия гробу, Владыку искаху в мертвых безсмертнаго, и радость благовещения от Ангела приемшия, апостолом возвещаху: яко воскресе Христос Бог, подаяй мирови велию милость.
На утрени прокимен: Воцарится Господь во век, Бог твой Сионе в род и род. Стих: Хвали душе моя Господа, восхвалю Господа в животе моем.
Кондак. Подобен: Яко начатки: Воскрес из гроба, умершия воздвигл еси, и Адама воскресил еси, и Ева ликует во Твоем Воскреснии: и мирстии концы торжествуют: еже из мертвых востанием Твоим, Многомилостиве.
На Литургии прокимен: Помолитеся, и воздадите Господеви Богу нашему. Стих: Ведом во Иудеи Бог, во Израили велие имя Его. Аллилуиа: Приидите возрадуемся Господеви, воскликнем Богу Спасителю нашему. Стих: Предварим лице Его во исповедании, и во псалмех воскликнем Ему.
Назад к списку
