Глава 02. Чин великия вечерни, сиесть бдения всенощнаго, и утрени воскресныя. Чин о панагии.

По еже заити солнцу мало, отходит кандиловжигатель, и творит поклон предстоятелю. Таже восходя ударяет в великий кампан не скоро, поя непорочны, или глаголя псалом 50, тихо 12-ю. И потом вшед и вжигает лампады, и уготовляет кадильницу. И тако паки изшед клеплет во вся кампаны. И возвращься в церковь, и вжег свещу в насвещнице, поставляет прямо царских врат. Таже творит поклонение иерею, егоже есть чреда. иерей же востав творит поклон предстоятелю: И отшед творит поклоны 3, пред святыми дверьми, и на оба лика: братиям же всем седящим. И вшед во святый олтарь, возлагает на ся епитрахилий, целовав крест верху его и приим кадильницу, и став пред святою трапезою, влагает фимиам: и глаголет молитву кадила тайно. И тако кадит святую трапезу крестовидно окрест, и весь жертвенник: и отворив святыя двери исходит. Кандиловжигатель же прием свещник стоящий среди церкве, возгласит велиим гласом: Востаните! держа свещник в руце со свещею возжженною, всем же воставшим. И изшед священник святыми дверьми, и творит крест кадилом пред святыми дверьми, возводя праве и преки: и идет и кадит поряду святыя иконы, яже на десней стране, таже на левей, посем предстоятеля, и оба лика по чину их: параекклисиарху же предходящу ему со свещником. Егда же иерей сотворит крест кадилом, покланяяся мало, покланяется с ним и параекклисиарх. Исходит же и в притвор, и кадит по чину и тамо сущую братию: и паки возвращься в церковь, и став посреди обою лику знаменует кадилом крест, зря к востоком, и возглашает велегласно: Господи благослови. И абие кадит образ Спаса Христа, и Богородицы, и предстоятеля на месте его: и вшед во святый олтарь, и став пред святою трапезою, знаменует кадилом крест, трижды. И потом возглашает сице: Слава святей, и единосущней, и животворящей и нераздельней Троице, всегда, ныне и присно, и во веки веков. И начинает предстоятель, или екклисиарх: Аминь. Приидите поклонимся цареви нашему Богу. низким и тихим гласом. Таже второе мало повышше: Приидите поклонимся и припадем Христу, цареви нашему Богу. Паки третие вышшим гласом, сице: Приидите поклонимся и припадем самому Христу цареви и Богу нашему. Таже особне: Приидите, поклонимся, и припадем ему. И абие начинает вышшим гласом предстоятель, или екклисиарх, на глас осмый: Благослови душе моя Господа: не скоро, и со сладкопением, споющей и прочей братии. И припев: Благословен еси Господи. Таже вторый певец праваго лика: Господи Боже мой, возвеличился еси зело: Благословен еси Господи: легко со гласом соглашающим и прочим братиям с ними. Иерей же с параекклисиархом, изшед из святаго олтаря, и сотворше поклоны три пред святыми дверьми, и обращшеся творят поклон предстоятелю: Таже на оба лика по единому: И идут и станут на своих им местех.

[В соборных же и приходских храмех действует священник сия в фелоне, диакон же в стихаре.]

Егда же начнут пети: Вся премудростию сотворил еси: и, Слава ти Господи, сотворившему вся. Тогда иерей приходит пред царския двери во епитрахилии, и откровенною главою стоя, глаголет молитвы светильничныя. Скончавшуся же псалму, глаголет ектению великую: Миром Господу помолимся. И по ектении возглас: Яко подобает тебе: Таже стихологисуем псалтир на глас 8, первую кафисму: Блажен муж, первый антифон: вторый же и третий антифон поем на глас дне. По всяком же антифоне, ектениа малая, и возглас. По первом антифоне, Яко твоя держава: По втором, Яко благ и человеколюбец: Певаему же третиему антифону, отходит диакон, и положив поклон предстоятелю, входит во святый олтарь, входит же с ним и чредный священник. Взем же диакон стихарий свой и орарий, емлет от священника благословение, и целовав десницу его, облачится в стихарь обычно, и глаголет последнюю ектению, и возглас от священника: Яко ты еси Бог наш: По скончании же обычныя стихологии, творит канонарх метание, и возгласит глас октоиха, или минеи. Мы же поем: Господи воззвах в прилучившийся глас октоиха. Священник же стоит на обычном месте. Егда же начнут пети, Господи воззвах: Тогда кадит иерей или диакон, яко обычай есть, творя поклонение предстоятелю. Мы же ставим стихов десять: от Изведи из темницы душу мою: И поем стихиры воскресны гласа, три: И анатолиевы 4: И минеи святаго, три: Слава, святаго, аще имать. Аще ли ни, Слава, и ныне, богородичен гласа, настоящий. И егда речем стих: Яко утвердися милость его на нас: поюще оба лика вкупе. Тогда иерей сотворь поклон предстоятелю: И вшед во святый олтарь, облачится в фелонь, нам же Славу рекшим, И абие творят вход, отверзаемым святым дверем: Предыдущим подсвещником двема со свещами. Диакону же кадильницу держащу, и по нем иерею просту, опущен имущу фелонь. священник же стоит прямо святых дверей: Стоит же и диакон одесную священника мало откосвенно, и приник держя и орарь свой треми персты десныя руки, глаголет тайно, елико токмо слышати священнику: Господу помолимся. Священник же глаголет тайно молитву: Вечер и утро и полудне: И по молитве восклонився, и глаголет диакон ко священнику, показуя вкупе к востоку со орарем, держя и треми персты десныя руки: Благослови владыко святый вход. И священник благословляет к востоку, глаголя: Благословен вход святых твоих Господи: Таже диакон отходит и кадит святую икону, сущую на месте предстоятеля, и самаго предстоятеля: и паки стоит на немже месте прежде стояше, ожидаяй исполнения стиха. Исполншуся же стиху входит диакон посреде, и начертав крест с кадильницею, возглашает: Премудрость, прости. И мы поем: Свете тихий святыя славы: Чтецы же вземше лампады, предходят даже до святых дверей: Диакон же вшед внутрь святаго олтаря, кадит святую трапезу. священник же поклонився пред святыми дверьми, и целовав я входит, и затворяются святыя двери. По конце же, Свете тихий: глаголет диакон: Вонмем. Иерей, Мир всем. И паки диакон: Премудрость, вонмем. Канонарх же поклонение сотворь к настоятелю, сказует прокимен, и стихи. Клирицы же поют, Прокимен дне, на глас 6-й: Господь воцарися, в лепоту облечеся. Стих: Облечеся Господь в силу и препоясася. Стих: Ибо утверди вселенную, юже не подвижится. Стих: Дому твоему подобает святыня Господи, в долготу дний. И паки, Господь воцарися, в лепоту облечеся. Чтец же согбенне руце имея при персех, среди храма стоя, ожидает конца прокимена: и сотворив поклонение, отходит на свое место. Посем изшед глаголет диакон ектению: Рцем вси: И возглас от священника. И по возгласе глаголет настоятель, или учиненный чтец: Сподоби Господи в вечер сей: И паки диакон: Исполним вечернюю молитву нашу господеви. И возглас от иереа: Яко благ и человеколюбец: Таже, Мир всем. И диакон: Главы наша Господеви приклоним. И глаголет иерей молитву тайно. Таже возглашает: Буди держава царствия твоего: И тако исходит иерей со диаконом, северными дверьми, предыдущим им двема светильникома, диакону же с кадильницею, нам же последующим. И поем стихиру храма, и исходим в притвор. И тамо кадит диакон святыя иконы, и настоятеля, и лики по чину: и станет на своем месте, и по совершении стихир, Слава, и ныне, богородичен. И посем возглашает диакон во услышание всем молитву сию: Спаси Боже люди твоя, и благослови достояние твое, посети мир твой милостию и щедротами: Даже до конца. Лик: Господи помилуй, 40. Диакон: Еще молимся о Великом Господине и отце нашем Святейшем Патриархе Алексии и Преосвященнейшем Епископе (егоже есть область), и о всей во Христе братии нашей. Лик: Господи помилуй, 30 Еще молимся о Богохранимей стране Россистей, о властех и воинстве ея. Лик: Господи помилуй, 50. Еще молимся, о еже сохранитися граду сему, и святей обители сей, и всякому граду, и стране: Лик: Господи помилуй, трижды. Еще молимся и о еже услышати Господу Богу глас моления нас грешных и помиловати нас. Лик: Господи помилуй, трижды. Посем возглашает иерей: Услыши ны Боже спасителю наш: Лик: Аминь. Таже глаголет: Мир всем. Диакон глаголет: Главы наша Господеви приклоним. И всем главы приклоньшим, иерей молится велегласно: Владыко многомилостиве, Господи Иисусе Христе Боже наш: И по исполнении ея, мы: Аминь. Таже восклоньшеся поем стихиру воскресну. И входим в храм предходящим свещником, поюще и прочия стихиры воскресны, яже суть по алфавиту: Глаголем же припевы сия, 1: Господь воцарися, в лепоту облечеся. 2: Ибо утверди вселенную, яже не подвижится. 3: Дому твоему подобает святыня Господи в долготу дний. Слава, и ныне, богородичен. И свещники убо поставляются от обою страну, предукрасившуся четвероножцу, на немже лежит со пшеницею и пятию хлебы блюдо, еже имамы обычай приносити в церковь. От обою же страну два сосуда исполнена, ов убо вина, ов же елеа. Стоит же вино убо ошуюю, елей же одесную. Таже глаголет настоятель: Ныне отпущаеши: И чтец, Трисвятое: по Отче наш: Возглас: Яко твое есть царство: И мы поем отпустительный тропарь Богородицы, глас 4: Богородице Дево радуйся: трижды. Тогда диакон взем благословение от священника, кадит окрест стола. Таже предстоятеля токмо, на месте его, и иереа. И паки хлебы спреди токмо. И глаголет молитву настоятель, или иерей велегласно: Господи Иисусе Христе Боже наш, благословивый пять хлебов, и пять тысящ насытивый: И подъем един хлеб знаменует с ним прочия хлебы: и егда речет, Сам благослови: И указует десницею на хлебы: Хлебы сия: Такожде на пшеницу, и вино и елей, Пшеницу, Вино, и Елей: И по скончании молитвы, и по Амине поем: Буди имя господне благословено от ныне и до века, трижды, на глас 4-й. Таже псалом 33, Благословлю Господа на всякое время: И глаголем его до Не лишатся всякаго блага. Иерей же шед станет пред царскими враты, зря к западом. И по скончании псалма, глаголет: Благословение Господне на вас: И чтец, аминь. И глаголет начало чтения. И священник: Молитвами святых отец наших: И извлачаются священник и диакон священных одежд, и исходят. И тако сядут вси кождо на своих местех. Келарь же взем от хлеб благословенных, и раздробив на блюде, раздает братии, и почерпает по единой чаши вина всем равно, от настоятеля и до последних, иже во обители суть. [Ныне же сей чин весьма в церквах упразднися]. И полагается чтение в деяниих святых апостол.

[Зри] Ведомо же буди: Яко от недели святыя пасхи, даже до недели всех святых, по благословении хлебов, чтутся деяния святых апостол. В прочия же недели всего лета чтутся седмь соборная послания апостольская, и четыренадесять посланий святаго апостола Павла, и откровение святаго апостола Иоанна Богослова. Егда же раздаст келарь братии хлебы, и по единой чаши вина, труда ради бденнаго, якоже из начала прияхом от святых отец, и шед творит обычный поклон, со служившими с ним по два в ряд, пред святыми дверьми, и на оба лика по единому, и исходят. В вечер же, по приятии хлеба и вина по черпании, от того часа, да никтоже уже дерзнет вкусити потом что, причащения ради святых пречистых Христовых Таин.

Сицево же раздробление хлебов творим, и почерпание.

От перваго дне месяца септемвриа, до 25 дне марта. А яже во бдениих летних, благословенныя хлебы, раздаваем я на трапезе, и прежде вкушения снедаем их.

[Зри] Благословенныя же имут хлебы дарования различна:

Рекше, уставляют огневицу пиющим с водою, и трясавицу отгонят, и всяк недуг и всяку болезнь исцелевают: к сим же и мыши от жит отгонят и ина пакостящая прогоняют.

По чтении же великом деяний святых апостол, исходит параекклисиарх, и клеплет в великий, и в прочия кампаны.

   Воставшу же предстоятелю, и всем братиям, начинает: аминь. Слава в вышних Богу, и на земли мир в человецех благоволение, трижды. Таже глаголет: Господи устне мои отверзеши, и уста моя возвестят хвалу твою, дважды. И глаголет шестопсалмие кротким и тихим гласом. По триех же псалмех, Слава, и ныне, аллилуиа, трижды. Господи помилуй, трижды. Слава, и ныне: Господи Боже спасения моего: Тогда иерей во епитрахилии, инде же и в фелони, глаголет молитвы утренния пред святыми дверьми стоя откровен. По скончании же шестопсалмия, по Слава, и ныне: глаголет великую ектению: Миром господу помолимся. И по возгласе отшед стоит на своем месте. Учиненный же канонарх, иже прокимены на вечерни сказует, сотворив поклон предстоятелю, и возглашает: Бог Господь: со стихи его, в настоящий глас. И поем тропарь воскресный, дважды: Слава, святаго, того дне: И ныне, богородичен, по гласу тропаря святаго, аще имать. Аще ли ни: Слава, и ныне, богородичен настоящаго гласа. И абие лик глаголет: Господи помилуй, трижды. Слава Отцу, и Сыну, и Святому Духу. Чтец же, И ныне: И стихологисует кафисму псалтира: Исповемся тебе Господи всем сердцем моим. По исполнении же коеяждо стихологии, отшед священник пред святыя двери, глаголет малую ектению: И возглас, яко обычай. И поем седален воскресн прежде просто. Таже припев: Воскресни Господи Боже мой, да вознесется рука твоя, не забуди убогих твоих до конца, и 2 седален: Слава, и ныне, богородичен. И посем полагается чтение во евангелии толковом. Таже кафисма, и седален 2-й. Припев: Исповемся тебе Господи всем сердцем моим, повем вся чудеса твоя. Слава, и ныне, богородичен его. И чтение. и поем поем непорочны, на глас 5: в нихже кадит иерей. Таже тропари, Ангельский собор: Ипакои гласа и чтение. Таже степенны гласа, в нихже исходит кандиловжигатель, и ударяет в кампаны. Иерей же и диакон, вшедше во святилище облачатся по обычаю. И глаголет: Вонмем, премудрость. Канонарх же сказует: Прокимен, псалом давидов, гласа. По совершении же прокимена, диакон: Господу помолимся. Иерей: Яко свят еси Боже наш: Лик: Аминь. И канонарх: Всякое дыхание да хвалит Господа. Стих: Хвалите Бога во святых его: хвалите его во утвержении силы его. Диакон же глаголет: И о сподобитися нам слышанию святаго евангелиа, Господа Бога молим. Лик: Господи помилуй, трижды. Диакон: Премудрость, прости услышим святаго евангелиа. Иерей: Мир всем. Лик: И духови твоему. Посем иерей именует евангелиста, от негоже евангелие. Лик: Слава тебе Господи, слава тебе. Диакон, Вонмем. И чтет иерей евангелие воскресно рядовое. По чтении лик паки: Слава тебе Господи, слава тебе. Посем глаголем: Воскресение Христово: и псалом 50. Сему же глаголему, исходит священник святыми дверьми со евангелием, держя е при персех своих, предыдущема же его от обою страну двема подсвещникома со свещами: имеяй же и фелонь отпущен долу, стоит посреде храма, держя святое евангелие при персех своих, подсвещники же от обою страну. И приходит предстоятель един, и творит поклоны два, таже целует евангелие, и паки творит поклон един: [не до земли творит поклоны, но малыя, приклоняя главу, дондеже рукою достигнет до земли. В неделю бо и владычний праздник, и в пятьдесятницу всю, колена не приклоняют.] По внегда же поклонится евангелию предстоятель, творит и к левому лику образ поклона, и к десному подобно, отходя на место свое. Таже и братия вси идут два два по чину, творят и тии подобне прежде два поклонения, и целуют святое евангелие: и паки едино поклонение, и к настоятелю поклон. Исполншуся же целованию, и 50-му псалму, Поем, Слава: Молитвами апостолов: И ныне, Молитвами Богородицы: Таже, Помилуй мя Боже, по велицей милости твоей: Посем стихира воскресна, глас 6: Воскрес Иисус от гроба, якоже прорече: По целовании же святаго евангелиа, [осеняет иерей братию со евангелием,] и входит во святый олтарь. Диакон же глаголет на обычном месте молитву: Спаси Боже люди твоя: Мы же, Господи помилуй, 12. Иерей же возглас: Милостию и щедротами: и по амине начинаем ирмос канона воскресна. И поем канон воскресн со ирмосом на 4: и крестовоскресен на 3: и Богородицы на 3: и минеи на 4. К 1-му же тропарю припев: Слава Господи святому воскреснию твоему. Таже припевы песней воскресных, [писаны во ирмологии.] И по иснолнении 3-я песни, диакон глаголет ектению малую: и возглас от священника внутрь олтаря: Яко ты еси Бог наш: И изоблачаются священных одежд, изшедше же стоят на обычных местех. Таже кондак, и седален минеи святаго. И чтение. По 6-й же песни священник глаголет ектению малую пред святыми дверьми, и возглас: Ты бо еси царь мира: Таже кондак воскресн: И икос. И чтем пролог.

[Зри] Ведомо же буди и сие: Яко всегда по конце 8-я песни, егда хощем начати 9-ю песнь, творим вси метание единоравно глаголюще: Хвалим, благословим, покланяемся Господеви: Таже ирмос 8-я песни, катавасиа. Иерей же и диакон облачатся обычно. И по скончании 8-я песни покадив святую трапезу, возглашает диакон: Богородицу и матерь света песньми возвеличим. И мы стихословим 9-ю песнь, поюще велегласно: Величит душа моя Господа: и Честнейшую херувим. Творим же и поклоны малыя. Иерей же, или диакон, кадит святый олтарь, и всю церковь, и братию. По 9-й песни возвращься, и отдав кадило, глаголет ектению малую: И возглас от священника: Яко тя хвалят вся силы небесныя: Таже возглашает диакон: Свят Господь Бог наш, в настоящий глас. Стих 1: Яко свят Господь Бог наш. Стих 2-й: Над всеми людьми Бог наш. Священник стоит на обычном месте. И посем светилен воскресн. Таже Слава, святаго, аще имать. И ныне, богородичен воскресн. На хвалитех: Всякое дыхание, на глас дне. Поставим же стихов, 8: и поем стихиры октоиха воскресны, 4: и анатолиевы, 4. На всякое же дыхание, совокупльшимся обоим ликом, припеваем и припевы сия: 1: Воскресни Господи Боже мой, да вознесется рука твоя, не забуди убогих твоих до конца. 2: Исповемся тебе Господи всем сердцем моим, повем вся чудеса твоя. Слава, стихира евангельская, ряд. И ныне, богородичен, глас 2: Преблагословенна еси Богородице: Славословие великое. Таже тропарь воскресн, един от обою, гласа 1-го: Днесь спасение миру бысть: Или гласа 2-го: Воскрес от гроба: Таже ектению глаголет иерей, или диакон: Помилуй нас Боже: И возглас: Яко милостив и человеколюбец: Посем: Исполним утреннюю молитву: Возглас: Яко Бог милости и щедрот: Иерей: Мир всем. Лик: И духови твоему. Диакон: Главы наша Господеви приклоним. Иерей молитву тайно. Таже, возглас: Твое бо есть еже миловати: Посем, Премудрость. Лик: Благослови. Иерей: Сый благословен Христос Бог наш: И лик: Аминь: Утверди Боже: Посем иерей: Пресвятая Богородице: Лик, Честнейшую: И прочее обычное, и отпуст. И многолетствуем Святейшаго Патриарха и Епископа (егоже есть область). Таже творим исхождение в притвор, поюще стихиру самогласну, яко обычай, и оглашение студитово. По чтении же тропарь святаго феодора, глас 8: Православия наставниче: И час 1. На 1-м часе тропарь воскресн. Слава, святаго, аще имать: аще же ни: И ныне, богородичен часов. По Отче наш: кондак воскресн. И совершенный отпуст. На Литургии: Блаженна осмогласника на 8. По входе тропарь воскресн: Таже храма, и святаго дневнаго, аще имать. Кондак воскресн, и храма: Слава, святаго, аще имать: И ныне, храма Богородицы. Аще же ни, И ныне, кондак: Предстательство христиан: Христова же храма тропаря и кондака в неделю на литургии не глаголем во весь год: понеже предваряет воскресн. Прокимен, апостол, аллилуиа, и евангелие гласа, и святаго, аще имать. Причастен: Хвалите Господа с небес: Таже святаго, аще имать.

[Зри] На бдении всенощнаго пения. Егда бывает полиелей, и поют псалом: Хвалите имя Господне: и Исповедайтеся Господеви: тогда поставляется аналогий среди церкве, и на нем полагается праздничная икона Господскаго дне, или Богородицына, или святаго, и святыя: и облачаются настоятель во святилищи и вси священнослужители в фелони по обычаю, и изшедше из олтаря во отверзенная царская врата, станут по дву странам около аналогиа. И раздает настоятель сослужителем, и стоящему во храме святем народу свещи. По раздаянии же взем кадило, емуже предходит диакон со свещею горящею, кадит первее на аналогии икону окрест, и идет во олтарь, и тамо святую трапезу, и олтарь весь кадит, и во храме святыя местныя иконы вся, таже священнопредстоятелей по обоим странам, и правый лик певцев, и левый. Посем кадит преходя стоящий народ весь, и паки святыя двери, и две точию иконы, Христову и Богородицыну, и на аналогии. В тоже время поют величание, со избранными стихи от псалмов давидовых. По сем обычном пении ектениа от диакона малая глаголется, и седальны поются, и входят вси священнослужители во святый олтарь, и изоблачаются священных одежд, точию держай чреду иерей остает во облачении, к прочитанию евангелиа. Но и в неделю на утрени, егда кроме полиелеа поется кафисма: Блажени непорочнии: и по ней тропари: Ангельский собор: и во иныя дни кому поется величание кроме бдения, и тогда иерей с диаконом точию облачатся во священныя одежды, и вземлют, диакон светильник со свещею горящею, иерей же кадило, и покадив окрест святую трапезу и олтарь весь, исходят северными враты, и кадит царския двери, и по странам святыя иконы, и на аналогии, таже настоятеля и лики, и стоящий народ, якоже обычай, и паки входят во врата южныя страны.

Чин о панагии,

бываемый во обителех по вся дни.

По отпусте божественныя литургии, исходит настоятель, и братии последующим по нем два, два. и глаголют псалом 144: Вознесу тя Боже мой, царю мой: весь до конца. Достигше же в трапезу, и кончану бывшу псалму, глаголем молитву трапезы: Отче наш: Слава, и ныне: Господи помилуй, трижды. Благослови: Настоятель, или священник держай чреду глаголет: Христе Боже, благослови ястие и питие рабом твоим: И часть или просфора имущая возношена быти, влагается в панагиар, и стоит на устроенном месте. И по вкушении творяй служение, глаголет стих: Молитвами святых отец наших, Господи Иисусе Христе Боже наш, помилуй нас. И мы: Аминь. И воставше глаголем: Благословен Бог милуяй, и питаяй нас от юности нашея: Слава тебе Господи, слава тебе Святый, слава тебе Царю. Слава, и ныне: Господи помилуй, трижды. Благослови. И положив поклон хотяй возвысити пресвятую, глаголет сице: Благословите отцы святии, простите ми грешному. И мы: Бог простит ти, и помилует тя. И прием часть крайними персты рук, возвышает ю мало над образом Святыя Троицы, глаголя велегласно: Велико имя: Настоятель или иерей чредный: Святыя Троицы. И пренося над образ Богородицы крестовидно знаменует, глаголя: Пресвятая Богородице, помогай нам. И мы: Тоя молитвами Боже помилуй, и спаси нас. И глаголем: Блажим тя вси роди Богородице Дево: Таже поем: Достойно есть яко воистинну: И по еже причаститися всем, глаголет настоятель или священник: Во многия молитвы пречистыя Владычицы нашея Богородицы, и приснодевы Марии. Мы же: Тоя молитвами Боже помилуй, и спаси нас. Милостив и щедр Господь, пищу даде боящимся его, и правда его пребывает в век века. Таже псалом: Возвеселихся о рекших мне, в дом Господень пойдем. Трисвятое, Пресвятая Троице: По Отче наш: Благодарим тя Христе Боже наш, яко насытил еси нас земных твоих благ: И аще убо есть Владычний праздник, глаголется, Слава и ныне, кондак празднику: аще ни, глаголем сия: Слава, Боже отец наших, творяй присно с нами: И ныне, Молитвами Господи всех святых: Господи помилуй, трижды. Благослови. Священник глаголет: Благословен Бог милуяй, и питаяй нас от своих богатых даров, своею благодатию и человеколюбием, всегда, ныне и присно, и во веки веков, аминь.