08 03 Полунощница воскресная (восьми гласов) для домашнего (келейного) чтения.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй (12 раз).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

И абие глаголем канон Пресвятей и Живоначальней Троице из Октоиха настоящего гласа:

КАНОН, ГЛАС 1

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припе́в: Пресвята́я Тро́ице Бо́же на́ш, сла́ва Тебе́.

Еди́но Триипоста́сное Нача́ло, Серафи́ми немо́лчно сла́вят: безнача́льное, присносу́щное, твори́тельное все́х, непостижи́мое, е́же и вся́к язы́к ве́рно почита́ет пе́сньми.

Припе́в: Пресвята́я Тро́ице Бо́же на́ш, сла́ва Тебе́.

Да челове́ком еди́нственное, трисия́тельное Твое́ яви́ши Божество́, созда́вый пре́жде челове́ка, по твоему́ о́бразу вообрази́л еси́, у́м ему́, и сло́во и ду́х да́в, я́ко Человеколю́бец.

Сла́ва Отцу́ и Сы́ну и Свято́му Ду́ху.

Свы́ше показу́я еди́нственную богонача́льных в трие́х ипоста́сех держа́ву, Отче, ре́кл еси́ равноде́тельному Твоему́ Сы́ну, и Ду́ху: прииди́те соше́дше, язы́ки и́х слия́им.

И ны́не и при́сно и во ве́ки веко́в. Ами́нь.

Богоро́дичен: У́м у́бо е́сть Нерожде́нный Оте́ц, обра́зно прему́дрыми предрече́ся, Сло́во же Собезнача́льно, Cоесте́ственный Cы́н и Ду́х Святы́й, и́же в Де́ве Сло́ва созда́вший воплоще́ние.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Ты́ дре́вле я́ве Авраа́му я́ко яви́лся еси́ триипоста́сный, еди́нствен же естество́м Божества́, богосло́вия и́стиннейшее обра́зно яви́л еси́: и ве́рно пое́м Тя́, единонача́льнаго Бо́га, и трисо́лнечнаго.

Припе́в: Пресвята́я Тро́ице Бо́же на́ш, сла́ва Тебе́.

Из Тебе́ роди́выйся боголе́пно нетле́нно, О́тче, возсия́ све́т от све́та, Сы́н непреме́нен, и Ду́х Боже́ственный, све́т изы́де: еди́наго Божества́ све́тлости триипоста́сней покланя́емся ве́рно, и сла́вим.

Сла́ва Отцу́ и Сы́ну и Свято́му Ду́ху.

Еди́ница Тро́ица преесте́ственне, неизрече́нно па́че смы́сла, у́мными существы́ сла́вится, трисвяты́ми гла́сы немо́лчную вопию́щими хвалу́: и́миже согла́сно пое́тся и на́ми триипоста́сный Госпо́дь.

И ны́не и при́сно и во ве́ки веко́в. Ами́нь.

Богоро́дичен: Из Тебе́ вре́менне без се́мене произы́де вышшеле́тный, уподо́бивыйся на́м неви́димый, и еди́ному естеству́ и госпо́дьству О́тчу научи́в, и Сыно́вню, и Ду́хову, Богоро́дице: те́мже Тя́ сла́вим.

Го́споди, поми́луй, (три́жды)

Седа́лен, гла́с 1:

Отцу́ и Сы́ну поклони́мся вси́, и Ду́ху пра́вому и равноче́стну, сла́ва Тро́ице несозда́нней, и пребоже́ственней си́ле, ю́же сла́вят безпло́тных чи́нове: сию́ дне́сь и земноро́днии со стра́хом ве́рно восхва́лим.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Наста́ви ны́ на пу́ть покая́ния, уклоня́ющыяся при́сно к безпу́тием зо́л, и преблага́го прогне́вающыя Го́спода, неискусобра́чная благослове́нная Мари́е, прибе́жище отча́янных челове́ков, Бо́жие пребыва́ние.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припе́в: Пресвята́я Тро́ице Бо́же на́ш, сла́ва Тебе́.

Возсия́й ми́ Богонача́лие трисо́лнечное, сия́ньми Твои́х богоде́тельных озаре́ний, в серде́чных очесе́х добро́те мечта́тися, е́же па́че ума́ богонача́льныя Твоея́ све́тлости, и светоде́тельнаго и сла́дкаго прича́стия.

Припе́в: Пресвята́я Тро́ице Бо́же на́ш, сла́ва Тебе́.

Пе́рвее небеса́ утверди́л еси́, Го́споди, и всю́ си́лу и́х сло́вом Твои́м вседе́тельным, и Ду́хом у́ст соесте́ственным, с ни́миже влады́чествуеши вся́ческими в трисия́тельне единонача́лии Божества́.

Сла́ва Отцу́ и Сы́ну и Свято́му Ду́ху.

Я́ко созда́л еси́ мя́ по о́бразу Твоему́ и подо́бию, Богонача́льная и вседе́тельная Тро́ице, неслия́нная Еди́нице, вразуми́, просвети́, во е́же твори́ти во́лю Твою́ святу́ю, благу́ю в кре́пости, и соверше́нную.

И ны́не и при́сно и во ве́ки веко́в. Ами́нь.

Богоро́дичен: Родила́ еси́ от Тро́ицы Еди́наго, Пречи́стая, Богонача́льнейша Сы́на, вопло́щшася на́с ра́ди из Тебе́, озаря́юща земноро́дных, трисо́лнечнаго Божества́ невече́рним све́том и сия́ньми.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия, правосла́вно пою́щих Тя́.

Припе́в: Пресвята́я Тро́ице Бо́же на́ш, сла́ва Тебе́.

Я́же пе́рвой а́нгельской непосре́дственне у́твари, непристу́пными Твоея́ добро́ты луча́ми осиява́емой бы́ти благоволи́вши, Твои́ми све́тлостьми просвети́, Тро́ице единонача́льственнейшая, правосла́вно Тебе́ пою́щих.

Припе́в: Пресвята́я Тро́ице Бо́же на́ш, сла́ва Тебе́.

Ны́не естество́, еди́нственное Богонача́лия трисо́лнечное, воспева́ет Тя́. Е́же осуществова́ла еси́ за бла́гость, прегреше́ний избавле́ние и напа́стей испроша́ющи, и бе́д и скорбе́й.

Сла́ва Отцу́ и Сы́ну и Свято́му Ду́ху.

Отца́, и Сы́на, и Ду́ха Свята́го, Еди́но Естество́ и Божество́ ве́рою сла́вим, дели́тельное, неразде́льное, еди́наго Бо́га неви́димыя и ви́димыя же тва́ри.

И ны́не и при́сно и во ве́ки веко́в. Ами́нь.

Богоро́дичен: Рече́ния вся́ проро́ческая преднаписа́ша, Пречи́стая, Твое́ рождество́, неизрече́нное и неудо́бь сказу́емое, е́же мы́ позна́хом, тайноводи́тельное еди́нственнаго и трисо́лнечнаго Божества́.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Припе́в: Пресвята́я Тро́ице Бо́же на́ш, сла́ва Тебе́.

Равноста́тную си́лу я́ко иму́щи, Тро́ице пресу́щественная, в то́ждестве хоте́ния, Еди́ница еси́ проста́ и неразде́льна: Ты́ у́бо на́с си́лою Твое́ю соблюди́. [Два́жды.]

Сла́ва Отцу́ и Сы́ну и Свято́му Ду́ху.

Ты́ вся́ ве́ки хоте́нием Твои́м, я́ко бла́га соста́вила еси́ от не су́щих, непостижи́мая Тро́ице, та́же и челове́ка создала́ еси́: но и ны́не от вся́каго изба́ви мя́ обстоя́ния.

И ны́не и при́сно и во ве́ки веко́в. Ами́нь.

Богоро́дичен: Со́лнца незаходи́маго до́м была́ еси́, созда́вшаго и в чину́ поста́вльшаго свети́ла вели́кая Всеси́льне, Пречи́стая Де́во Богоневе́стная: но и ны́не страсте́й мя́ изба́ви помраче́ния.

Го́споди поми́луй, (три́жды)

Седа́лен, гла́с 1:

Тро́ице святе́й, и неразде́льному Естеству́, в Тре́х Ли́цех секо́мей несе́чено, и пребыва́ющей неразде́льней по существу́ Божества́, поклони́мся земноро́днии со стра́хом, и сла́вим я́ко Творца́ и Влады́ку, Бо́га преблага́го.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Упра́ви, Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

Пе́снь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Припе́в: Пресвята́я Тро́ице Бо́же на́ш, сла́ва Тебе́.

Сло́ве Бо́жий, соесте́ственное сия́ние Вседержи́теля Бо́га, я́коже обеща́л еси́ е́же у тебе́, богоде́тельное вселе́ние сотвори́, я́ко благоутро́бен, со Отце́м Твои́м и Ду́хом: и стра́шна бесо́м мя́ покажи́, и страсте́м. [Два́жды.]

Сла́ва Отцу́ и Сы́ну и Свято́му Ду́ху.

Да Твоего́ благоутро́бия, Влады́ко, пока́жеши пучи́ну на́м, Сы́на Твоего́ посла́в к на́шему смире́нию, па́ки вообрази́л еси́ на пе́рвую све́тлость, но и ны́не Боже́ственным мя́ вразуми́ Ду́хом.

И ны́не и при́сно и во ве́ки веко́в. Ами́нь.

Богоро́дичен: И́же на херуви́мстем престо́ле носи́мый, и все́х Ца́рь, во чре́ве Твое́м де́вственнем всели́ся, Пречи́стая, все́х избавля́я от истле́ния, я́ко Человеколю́бец: но и ны́не Твои́ми мя́ моли́твами сохрани́.

Пе́снь 8

Ирмо́с: Чу́да преесте́ственнаго показа́ о́браз, огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Те́м воспева́юще воспои́м: да благослови́т тва́рь вся́ Го́спода, и превозно́сит во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Ма́нием богоде́тельным, Го́споди все́х, Триипоста́сне и Вседержи́телю, небеса́ просте́рл еси́ я́ко ко́жу: та́же и земли́ пове́сил еси́ глубину́, всемогу́щею Твое́ю дла́нию. Те́мже и рабы́ Твоя́ укрепи́ любо́вию и ве́рою Твое́ю, Человеколю́бче: да Тя́ сла́вим жела́нием во ве́ки. (дважды)

Сла́ва Отцу́ и Сы́ну и Свято́му Ду́ху.

Просвети́ Богонача́льным све́том пою́щих Тя́, Трисо́лнечный Све́те Ли́цы, еди́нственный же па́ки существо́м, и к Твои́м светода́тельным луча́м взира́ти при́сно: и́миже насы́щуся сла́вы Твоея́ сла́дкия, и светода́тельныя, и пребога́тыя: и превозношу́ Тя ве́рно во ве́ки.

И ны́не и при́сно и во ве́ки веко́в. Ами́нь.

Богоро́дичен: Вознесе́ на небеса́, челове́ческое прие́м естество́ непрело́жне Сы́н Тво́й, Пречи́стая Богоро́дице, превосхожде́нием бла́гости изба́вль дре́вния тли́. Ему́же благода́рственно воспева́ем: да благослови́т тва́рь вся́ Го́спода, и превозно́сит во вся́ ве́ки.

Пе́снь 9

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Припе́в: Пресвята́я Тро́ице Бо́же на́ш, сла́ва Тебе́.

Спаси́, Спаси́телю тва́ри, чу́вственныя же и у́мныя рабы́ Твоя́ от вра́жия наве́та и озлобле́ния, Пресвята́я Тро́ице Единосу́щная, и соблюда́й ста́до Твое́ вы́ну ненаве́тно. [Два́жды]

Сла́ва Отцу́ и Сы́ну и Свято́му Ду́ху.

Да глубину́ неизче́тную су́щественныя пока́жеши Твоея́ бла́гости, да́л еси́ на́м обе́ты: трисо́лнечный, и единонача́льный Бо́же Всеси́льный, спаси́тельныя Твои́м рабо́м, и́хже соверши́ти сподо́би.

И ны́не и при́сно и во ве́ки веко́в. Ами́нь.

Богоро́дичен: При́зри на на́ша моле́ния, и́же в трие́х Богонача́льных Ипоста́сех, еди́н сы́й Бо́г во и́стине ве́руемый: и пода́ждь Твои́м рабо́м утеше́ние, моли́твами Пречи́стыя и препе́тыя Богома́тере.

КАНОН, ГЛАС 2

Пе́снь 1

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Припе́в: Пресвята́я Тро́ице Бо́же на́ш, сла́ва Тебе́.

Тро́ичное и Единонача́льное Естество́ Божества́, пе́сненно воспои́м глаго́люще: ми́лости пучи́ну неизчерпа́емую, суще́ственную я́ко иму́щи, Тебе́ кла́няющихся соблюди́ и спаси́, я́ко Человеколю́бец.

Припе́в: Пресвята́я Тро́ице Бо́же на́ш, сла́ва Тебе́.

И́же исто́чник, и ко́рень Оте́ц сы́й, я́ко вино́вен, И́же в Сы́не, и Святе́м Твое́м Ду́се, сра́сленнаго Божества́ Трисо́лнечный се́рдцу моему́ источи́ све́т, и прича́стием осия́й, Богоде́тельнаго сия́ния.

Сла́ва Отцу́ и Сы́ну и Свято́му Ду́ху.

Трисве́тлая Еди́нице Богонача́льная, ве́сь разори́ грехо́в и страсте́й мои́х мра́к, све́тлых луче́й Твои́х сладча́йшими причаще́ньми, и сотвори́ мя Твоея́ непристу́пныя сла́вы хра́м и се́нь пречи́стую.

И ны́не и при́сно и во ве́ки веко́в. Ами́нь.

Богоро́дичен: То́к дре́вний естества́ на́шего, страда́вший безме́стно, и к тли́ попо́лзшийся, Пречи́стая, вопло́щься во утро́бе Твое́й Бо́г Сло́во, человеколю́бне осия́, и Богонача́лию Трисве́тлому на́с та́йно научи́.

Пе́снь 3

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припе́в: Пресвята́я Тро́ице Бо́же на́ш, сла́ва Тебе́.

Ра́венством естества́ Богонача́лие Единоче́стное сла́влю Тя́ Ли́цы: Живо́т бо от Живота́ Ты́ произше́д нетле́нно, Еди́н сы́й Бо́г на́ш, и не́сть свя́т, па́че Тебе́, Го́споди.

Припе́в: Пресвята́я Тро́ице Бо́же на́ш, сла́ва Тебе́.

Ты́ чи́ны невеще́ственныя и небе́сныя соста́вил еси́, я́ко зерца́ла Твоея́ добро́ты: Тро́ице Неразде́льное Единонача́лие, пе́ти непреста́нно Тебе́: но и ны́не на́ше от бре́нных у́ст приими́ хвале́ние.

Сла́ва Отцу́ и Сы́ну и Свято́му Ду́ху.

Утверди́ на ка́мени ве́ры, и разшири́ любве́ Твоея́ пучи́ною сердца́ и мы́сль Твои́х ра́б, Еди́нице Трисо́лнечная: Ты́ бо Бо́г на́ш, на Него́же упова́юще, да не посрами́мся.

И ны́не и при́сно и во ве́ки веко́в. Ами́нь.

Богоро́дичен: И́же вся́к пре́жде соста́в осуществова́вый тва́ри, во утро́бе Твое́й осуществова́ся, неизче́тною бла́гостию, Богоро́дице, и све́т Трисо́лнечный все́м возсия́ Еди́наго Божества́ и Госпо́дьства.

Го́споди поми́луй, (три́жды)

Седа́лен, гла́с 2:

Егда́ в нача́ле Ада́ма созда́л еси́ Го́споди, тогда́ Сло́ву Твоему́ Ипоста́сному возопи́л еси́, Благоутро́бне: сотвори́м по На́шему подо́бию, Ду́х же Святы́й сопрису́тствоваше Соде́тель. Те́мже вопие́м Ти́: Тво́рче Бо́же на́ш, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Егда́ к на́м Бо́г приити́ изво́ли, тогда́ в Твою́, Пречи́стая, чисте́йшую утро́бу всели́ся, и спасе́ Тобо́ю челове́ческое смеше́ние, дарова́вый все́м Ца́рство Небе́сное. Те́мже вопие́м Ти́, Богоро́дице Чи́стая, ра́дуйся, Влады́чице.

Пе́снь 4

Ирмо́с: Пою́ Тя, слу́хом бо Го́споди услы́шах и ужасо́хся, до мене́ бо и́деши, мене́ ищя́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припе́в: Пресвята́я Тро́ице Бо́же на́ш, сла́ва Тебе́.

Разуме́ти Тя́ ниже́ чи́нове мо́гут невеще́ственнии а́нгельстии, Еди́нице, Тро́ице Безнача́льная: но у́бо мы́ бре́нным язы́ком Твою́ Су́щественную бла́гость воспева́ем, и ве́рою сла́вим.

Припе́в: Пресвята́я Тро́ице Бо́же на́ш, сла́ва Тебе́.

Сы́й Созда́тель естества́ челове́ческаго, Вседержи́телю, все́ мое́ ви́диши ны́не, я́ко Всеви́дец неможе́ние: те́мже уще́дри раба́ Твоего́, и к жи́зни лу́чшей па́ки возведи́.

Сла́ва Отцу́ и Сы́ну и Свято́му Ду́ху.

Еди́ницы Нача́льныя несме́сна Три́ Ли́ца воспева́ем, я́ко сво́йственне иму́щая, и разде́льне Ипоста́си: но у́бо Соедине́на и Неразде́льна, в Сове́те же, и Сла́ве, и Божестве́.

И ны́не и при́сно и во ве́ки веко́в. Ами́нь.

Богоро́дичен: Хра́м Тя́ чи́ст и пренепоро́чен, Присноде́во Богоро́дице, Вседе́тель обре́те Еди́ну я́ве от ве́ка, в Ню́же все́лься: вообрази́ челове́ческое естество́, я́ко Человеколю́бец.

Пе́снь 5

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ Бо́га не зна́ю.

Припе́в: Пресвята́я Тро́ице Бо́же на́ш, сла́ва Тебе́.

Я́ко вся́чески на вся́ су́щыя Твоего́ про́мысла, мирода́рныя простира́яй лучы́, и спаси́тельныя, Царю́ ми́ра, соблюди́ мя в ми́ре Твое́м: Ты́ бо живо́т и ми́р вся́ческому.

Припе́в: Пресвята́я Тро́ице Бо́же на́ш, сла́ва Тебе́.

Моисе́ю в купине́ я́ко яви́лся еси́ в виде́нии о́гненне, а́нгел наре́клся еси́, О́тчее Сло́во, Е́же к на́м Твое́ предъявля́я прише́ствие: И́мже все́м я́ве возвести́л еси́ держа́ву Богонача́лия Еди́наго, Триипоста́сную.

Сла́ва Отцу́ и Сы́ну и Свято́му Ду́ху.

Я́же Есте́ственную, Соприсносу́щную сла́ву предло́жиши, Единонача́льнейшая Тро́ице Свята́я, воспева́ющих Тя́ правосла́вною ве́рою, Твоея́ сла́вы ви́дети сподо́би, Безнача́льную, и Еди́ну зарю́ Трисо́лнечную.

И ны́не и при́сно и во ве́ки веко́в. Ами́нь.

Богоро́дичен: Содержи́тельный по существу́ сы́й Бо́г Сло́во, все́м веко́м, Де́во Ма́ти, во чре́ве Твое́м удержа́ся неизрече́нно, челове́ки призыва́я ко еди́нству Еди́наго Госпо́дьства.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́ Бо́же мя́ возведи́.

Припе́в: Пресвята́я Тро́ице Бо́же на́ш, сла́ва Тебе́.

Воли́телю ми́лости, поми́луй в Тя́ ве́рующих, Бо́же Трисо́лнечне, и прегреше́ний изба́ви, и страсте́й, и бе́д, рабы́ Твоя́. [Два́жды.]

Сла́ва Отцу́ и Сы́ну и Свято́му Ду́ху.

Неизрече́нною пучи́ною бла́гости, необмы́слимую Твоего́ сия́ния, и Трисия́ннаго Божества́ светода́тельную зарю́ пода́ждь ми́.

И ны́не и при́сно и во ве́ки веко́в. Ами́нь.

Богоро́дичен: Неизрече́нне, Де́во, Вы́шний Челове́к бы́сть из Тебе́, в челове́ка по всему́ обо́лкся, и све́том мя́ Трисо́лнечным озари́.

Го́споди поми́луй. (три́жды)

Седа́лен, гла́с 2:

Благоутро́бия пучи́ну на́м простры́й, приими́ на́с, Ми́лостиве, при́зри на лю́ди Тя́ сла́вящыя, приими́ пе́снь прося́щих Тя́, Тро́ице Еди́нице Безнача́льная: на Тя́ бо упова́ем все́х Бо́га, прегреше́ний да́ти проще́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Благоутро́бия ро́ждши Исто́чник, ми́лостива Ты́ еси́, Блага́я Богоро́дице: Ты́ бо ве́рных еди́но заступле́ние, Ты́ скорбя́щих утеше́ние. Те́мже Тебе́ ны́не вси́ ве́рою припа́даем, обрести́ разреше́ние лю́тых, обогате́ющеся еди́ною Тебе́ по́мощию.

Пе́снь 7

Ирмо́с: О́бразу злато́му на по́ле деи́ре служи́му, трие́ Твои́ о́троцы небрего́ша безбо́жнаго веле́ния: посреде́ же огня́ вве́ржени, ороша́еми поя́ху: благослове́н еси́ Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Уставля́еши при́сно а́нгельская во́инства к непреложе́нию, Еди́не сы́й Неизме́нне и Триипоста́сне Го́споди: покажи́ у́бо и мое́ се́рдце непрело́жно всегда́, во е́же сла́вити Тя́ те́пле, и воспева́ти благоче́стно. [Два́жды.]

Сла́ва Отцу́ и Сы́ну и Свято́му Ду́ху.

Ли́цы у́мнии невеще́ственных суще́ств, Твои́ми луча́ми, Бо́же Единонача́льне, и Трисо́лнечне, озаря́еми быва́ют, положе́нием втори́и све́тове: и́хже и мене́ сия́ньми, и прича́стием покажи́ све́т, я́ко Светоде́тель Трисия́нен.

И ны́не и при́сно и во ве́ки веко́в. Ами́нь.

Богоро́дичен: Направля́ти на́с и возвыша́ти к небесе́м не оскуде́й, Тебе́ лю́бящих, и́же за неизрече́нное человеколю́бие, бы́в челове́к во утро́бе Де́вы, и обожи́в челове́ка, и на престо́ле сла́вы со Отце́м седя́й.

Пе́снь 8

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь, и превозно́сит во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Непристу́пная Тро́ице Соприсносу́щная, Собезнача́льная, Богонача́льная, неизме́нная во все́х, кроме́ Светоно́сных Сво́йств, вся́кий лука́вый упраздни́ сопротиволежа́щих сове́т, и стуже́ния де́монов, невре́дна соблюда́яй мя́ при́сно, Го́споди все́х. [Два́жды.]

Сла́ва Отцу́ и Сы́ну и Свято́му Ду́ху.

Прему́дре и Всемо́щне, Неопи́санное, Трисо́лнечное Единонача́лие соста́вльшее ми́р, и соблюда́ющее в невреди́мом чи́не всесоверше́нном, всели́ся в мое́ се́рдце, пе́ти и сла́вити Тя́ немо́лчно с ли́ки а́нгельскими во вся́ ве́ки.

И ны́не и при́сно и во ве́ки веко́в. Ами́нь.

Прему́дросте О́тчая, Непостижи́ме, Неизрече́нне, Бо́жий Сло́ве, Непрело́жное Твое́ Естество́ не измени́в, естество́ челове́ческое ми́лостивне восприя́л еси́: и Еди́нственную Тро́ицу чести́ все́х научи́л еси́, я́ко Господонача́лие все́х веко́в.

Пе́снь 9

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Припе́в: Пресвята́я Тро́ице Бо́же на́ш, сла́ва Тебе́.

От Све́та Безнача́льна, Собезнача́лен Сы́н Све́т возсия́, и Соесте́ственный Све́т Ду́х изы́де, неизрече́нно боголе́пно, нетле́нну рождеству́ уверя́еми, вку́пе же и неизрече́нному исхожде́нию.

Припе́в: Пресвята́я Тро́ице Бо́же на́ш, сла́ва Тебе́.

Возсия́й в сердца́х Трисо́лнечное Божество́, воспева́ющих Тя́, Трисия́нным Све́том Твои́м: и да́ждь ра́зум е́же во все́х разуме́ти, и де́яти Твое́ хоте́ние благо́е и соверше́нное, и велича́ти и сла́вити Тя́.

Сла́ва Отцу́ и Сы́ну и Свято́му Ду́ху.

Неизче́тен естество́м сы́й я́ко Бо́г, неизче́тную пучи́ну щедро́т я́ко име́я, уще́дрила еси́ Тро́ице пре́жде: та́ко и ны́не уще́дри рабы́ Твоя́, и от прегреше́ний изба́ви, и напа́стей и обстоя́ний.

И ны́не и при́сно и во ве́ки веко́в. Ами́нь.

Богоро́дичен: Спаси́ мя, Бо́же мо́й, от вся́каго искуше́ния и озлобле́ния, И́же в Трие́х Ли́цех воспева́емый несказа́нно, Еди́нственне Бо́г и Всеси́льный, и Твое́ ста́до сохрани́, Богоро́дицы моли́твами.

КАНО́Н, ГЛА́С 3

Пе́снь 1

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш препросла́влен е́сть: Тому́ Еди́ному пои́м, я́ко просла́вися.

Припе́в: Пресвята́я Тро́ице Бо́же на́ш, сла́ва Тебе́.

Непостижи́мое Еди́но Господонача́лие, и Еди́но Тро́ическое Богонача́лие, Трисия́ннаго Све́та Твоего́ мя сподо́би: я́ко да воспою́ Тя́, пева́емое непреста́нно трисвяты́ми пе́сньми, а́нгельскими усты́.

Припе́в: Пресвята́я Тро́ице Бо́же на́ш, сла́ва Тебе́.

Свяще́нно невеще́ственнии вси́ чи́нове пою́т, я́ко твори́тельную вину́, Еди́нственную, Трисве́тлую, Нача́льнейшую я́ве: Ю́же согла́сно пое́м, и челове́ческая мно́жества, и ве́рно сла́вим бре́нными усты́.

Сла́ва Отцу́ и Сы́ну и Свято́му Ду́ху.

У́м, и Сло́во и Ду́х, богосло́вцы прили́чне, и знамени́тельне Тебе́ нари́чут: безстра́стно Рождество́ от Нерожде́ннаго Отца́, Сы́ну зна́менающу, Бо́же единонача́льне все́х, вку́пе и Ду́ха Боже́ственнаго исхожде́ние.

И ны́не и при́сно и во ве́ки веко́в. Ами́нь.

Я́ко Человеколю́бец естество́м, челове́ческое существо́ прие́м, Бо́жий Сло́ве, Тро́ичный возсия́л еси́, Единонача́льнейший све́т Еди́наго Божества́, Препросла́вленную все́м показа́вый, ро́ждшую Тя́ Де́ву Пречи́стую.

Пе́снь 3

Ирмо́с: И́же от не су́щих вся́ приведы́й Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Припе́в: Пресвята́я Тро́ице Бо́же на́ш, сла́ва Тебе́.

Утро́ити дре́вле во́ду повеле́в Илиа́ на поле́нах, обра́зно прояви́ Тро́ичную Ипоста́сь, Еди́нственнаго Бо́жия Господонача́лия.

Припе́в: Пресвята́я Тро́ице Бо́же на́ш, сла́ва Тебе́.

Тле́нное естество́ пое́т Тя́ земноро́дных, Еди́наго и Трисве́тлаго Созда́теля Неизме́ннаго, и вопие́т Ти́, Влады́ко: всеразли́чнаго мя́ премене́ния изба́ви, и спаси́ мя.

Сла́ва Отцу́ и Сы́ну и Свято́му Ду́ху.

Ра́вно веща́юще словесе́м проро́ческим, сла́вных апо́стол же и пропове́дник ве́ры, равноде́тельную Тя́ Тро́ицу славосло́вим ве́рнии, Бо́же все́х.

И ны́не и при́сно и во ве́ки веко́в. Ами́нь.

С престо́ла высо́каго сни́де Христо́с, челове́ка возвыша́я, я́ко Человеколю́бец, Тобо́ю Пречи́стая, и Трисо́лнечный Све́т все́м возсия́.

Го́споди, поми́луй. (три́жды).

Седа́лен, гла́с 3:

Пресу́щественный и Еди́не Го́споди Христе́, и рожде́ние Пребезнача́льнаго Отца́, и Ду́ше Боже́ственнейший, поми́луй рабы́ Твоя́: вси́ бо согреши́хом, но от Тебе́ не отступи́хом. Те́мже мо́лим Тя́, триипоста́сне Го́споди, я́ко име́яй вла́сть, созда́ние Твое́ спаси́ от вся́каго обстоя́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Пресу́щественный Бо́г и Госпо́дь из Тебе́ воплоти́ся за бла́гость, Е́же по на́м осуществова́выйся, и пребы́в е́же бе́. Те́мже и Богочелове́ка Сего́ почита́юще, Всечи́стая, Тя́ Неискусобра́чную Богоро́дицу пропове́дуем, сла́вяще преве́лие чу́до Твоего́ безсе́меннаго Рожде́ния.

Пе́снь 4

Ирмо́с: Положи́л еси́ к на́м Тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.

Припе́в: Пресвята́я Тро́ице Бо́же на́ш, сла́ва Тебе́.

О́трасль сугу́б от Отца́, я́ко от ко́рене прозябе́ Сы́н, и Ду́х Пра́вый, соесте́ственна прозябе́ния, и богосажде́нна, и цве́ти Собезнача́льнии: я́ко трие́м бы́ти све́том Божества́. [Два́жды.]

Сла́ва Отцу́ и Сы́ну и Свято́му Ду́ху.

Мно́жества у́мных суще́ств, непреста́нно пою́т Тя́, недомы́слимаго Бо́га, с ни́миже мы́ сла́вим, глаго́люще: Тро́ице Пресу́щная, Твоя́ рабы́ спаси́, я́ко Человеколю́бец.

И ны́не и при́сно и во ве́ки веко́в. Ами́нь.

Распали́л еси́ на́с в любо́вь Твою́, Многоми́лостиве Сло́ве Бо́жий, И́же на́с ра́ди вопло́щься непрело́жне, и Трисве́тлое Еди́но Божество́ та́йно научи́в: те́мже Тя́ сла́вим.

Пе́снь 5

Ирмо́с: Я́ко ви́де Иса́иа обра́зно на престо́ле превознесе́нна Бо́га, от а́нгел сла́вы дориноси́ма. О окая́нный, вопия́ше, а́з: прови́дех бо воплоща́ема Бо́га, Све́та Невече́рня, и ми́ром влады́чествующа.

Припе́в: Пресвята́я Тро́ице Бо́же на́ш, сла́ва Тебе́.

Еди́наго Господонача́льника, обра́зно я́ко ви́де Иса́иа Бо́га, в Трие́х Ли́цех славосло́вима пречи́стыми гла́сы Серафи́м, по́слан бы́сть пропове́дати а́бие Трисве́тлое Существо́, и Еди́ницу Трисо́лнечную. [Два́жды.]

Сла́ва Отцу́ и Сы́ну и Свято́му Ду́ху.

Я́же все́х неви́димых и ви́димых естество́, от не су́щих пре́жде соста́вльшая, Еди́нице Трисо́лнечная, И́же Еди́наго Тя́ Бо́га ве́рно воспева́ющих от вся́ких искуше́ний изба́вльши, Твоея́ сла́вы сподо́би.

И ны́не и при́сно и во ве́ки веко́в. Ами́нь.

Неве́стник светоно́сен и чи́ст, Де́во, бы́вший Бо́жий, воспева́ем Тя́ любо́вию, и блажи́м: из Тебе́ бо роди́ся Христо́с, в существа́х и хоте́ниих сугу́бых, И́же Еди́н от Тро́ицы и сла́вы сы́й Госпо́дь.

Пе́снь 6

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Припе́в: Пресвята́я Тро́ице Бо́же на́ш, сла́ва Тебе́.

Пресе́льник сы́й Авраа́м, сподо́бися обра́зно восприя́ти Еди́нственнаго у́бо Го́спода в Трие́х Ипоста́сех, пресу́щественна му́жескими же зра́ки. [Два́жды.]

Сла́ва Отцу́ и Сы́ну и Свято́му Ду́ху.

Напра́ви сердца́ Твои́х рабо́в к Све́ту Непристу́пному, О Трисо́лнечне Го́споди, и Твоея́ сла́вы сия́ние пода́ждь душа́м на́шым, во е́же облиста́емым бы́ти Твое́ю добро́тою неизрече́нною.

И ны́не и при́сно и во ве́ки веко́в. Ами́нь.

Отве́рзи мне́ две́ри Све́та ро́ждшагося от утро́бы Твоея́, Пречи́стая: да зрю́ Трисве́тлую лучу́ Божества́, и сла́влю Тя́, Всесве́тлую Влады́чицу.

Го́споди, поми́луй. (три́жды).

Седа́лен, гла́с 3:

Боже́ственнаго Естества́ Единосу́щнаго Трисо́лнечную пое́м держа́ву, и трисвяты́ми гла́сы возопии́м: Свя́т еси́, О́тче Пребезнача́льный, Свя́т еси́, Сы́не Собезнача́льный, и Ду́ше Святы́й, Еди́не Неразде́льный Бо́же на́ш, и все́х Тво́рче Человеколю́бче.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Чу́до преве́лие: ка́ко содержа́ся Невмести́мый во чре́ве Твое́м и воплоти́ся, и яви́ся, я́ко Челове́к, не претерпе́вый смеше́ния или́ разделе́ния Боже́ственнаго и Непрело́жнаго Божества́, Отрокови́це всечи́стая: те́мже Богоро́дицу тя́ ве́рно пропове́дуем при́сно и сла́вим.

Пе́снь 7

Ирмо́с: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́ взыва́ющыя, Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Хра́м мя́ покажи́ Твоего́ Божества́, Влады́ко, Трисия́ннаго, Ве́сь Све́тел: грехо́внаго омраче́ния лю́таго и страсте́й вы́шша, светода́тельными Твои́ми сия́нии, Бо́же оте́ц на́ших, благослове́н еси́.

Припе́в: Пресвята́я Тро́ице Бо́же на́ш, сла́ва Тебе́.

Божества́ зра́к Еди́н возвеща́ем, в Трие́х Ипоста́сных и разде́льных сво́йствах, Отца́, и Сы́на, и Ду́ха: благослове́н еси́ зову́ще, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Яви́ся Авраа́му Бо́г Триипоста́сный у ду́ба дре́вле мамври́йскаго, о страннолю́бии мзду́ Исаа́ка воздая́ за ми́лость: Его́же и ны́не сла́вим, я́ко Бо́га оте́ц на́ших.

И ны́не и при́сно и во ве́ки веко́в. Ами́нь.

Яви́ся на земли́, бы́в Челове́к Вседе́тель, боголе́пно от де́вственнаго и пречи́стаго Твоего́ чре́ва, и на́с обожи́, Благослове́нная Всечи́стая, Богоро́дице Пречи́стая.

Пе́снь 8

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Безнача́льна Отца́ я́ко от ко́рене, Сло́во, и Ду́х Собезнача́льне су́ща: я́ко о́трасли Пресу́щественнаго Богонача́лия показа́ша Тро́ицы сла́ву еди́ную и си́лу: Ю́же пое́м вси́ ве́рнии во ве́ки. [Два́жды.]

Сла́ва Отцу́ и Сы́ну и Свято́му Ду́ху.

Управля́еши Твои́ми светлостьми́ чи́ны небе́сныя, воспева́ти немо́лчно трисвяты́ми пе́сньми Боже́ственными, О́тче, Сло́ве сообра́зне, и Ду́ше, Трисве́тлую Держа́ву и Равномо́щную. Те́мже Тя́ пое́м во вся́ ве́ки.

И ны́не и при́сно и во ве́ки веко́в. Ами́нь.

Прорече́ния проро́ческая, Твое́ Рождество́ издале́ча ви́девше, Богоро́дице, восхваля́ху, я́ко без се́мене, и па́че естества́ ро́ждшагося, Влады́чице: и согла́сно Сего́ пое́м, я́ко Го́спода, и превозно́сим во вся́ ве́ки.

Пе́снь 9

Ирмо́с: Но́вое чу́до и боголе́пное, деви́ческую бо две́рь затворе́нную, я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет Две́рь затворе́на: Сию́ неизрече́нно я́ко Богома́терь велича́ем.

Припе́в: Пресвята́я Тро́ице Бо́же на́ш, сла́ва Тебе́.

Ви́дети сла́ву Трисия́нную, богови́днии безпло́тных чи́нове я́ве, восходи́ти крилы́ жела́ют горе́: но гове́ют зело́ непристу́пнаго све́та, и пе́сни непреста́нно вопию́т: с ни́ми согла́сно, Еди́нственная Тро́ице, Тя́ сла́вим. [Два́жды.]

Сла́ва Отцу́ и Сы́ну и Свято́му Ду́ху.

Несы́тною любо́вию и и́же на земли́, у́мную ду́шу от Тебе́ прие́мше, и слове́сную, Тебе́ пои́м, Влады́ко, Бо́же все́х, Еди́нственное Естество́ вои́стинну, и Тро́ичное Ли́цы, от всего́ се́рдца. Те́мже ще́дре я́ко многоми́лостив, на́с уще́дри.

И ны́не и при́сно и во ве́ки веко́в. Ами́нь.

Хра́м мя́ покажи́ Единонача́льнаго, и Трисве́тлаго Твоего́ Богонача́лия, Светови́ден, чи́сте служи́ти Тебе́, Зижди́телю все́х, и неизрече́нную Твою́ сла́ву у́мно зре́ти: моли́твами Еди́ныя Богоро́дицы, Ю́же досто́йно я́ко Пресла́вную велича́ем.

КАНО́Н ГЛА́С 4

Пе́снь 1

Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припе́в: Пресвята́я Тро́ице Бо́же на́ш, сла́ва Тебе́.

Тро́ицу Богонача́льную да просла́вим Ипоста́сьми, Еди́нственное же Естество́ Трие́х, Соприсносу́щную, Сопресто́льную, Ю́же моля́ще, глаго́лем: спаси́ и́же ве́рою Тебе́ сла́вящих.

Припе́в: Пресвята́я Тро́ице Бо́же на́ш, сла́ва Тебе́.

Пома́зася от Отца́ Ду́хом ра́дования, Богоде́тельным еле́ем, Сы́н, и Челове́к бы́сть, и Еди́наго Божества́ Триипоста́сное научи́л е́сть.

Сла́ва Отцу́ и Сы́ну и Свято́му Ду́ху.

Добро́ту непристу́пныя сла́вы Твоея́, Еди́нице Трисо́лнечная, Серафи́ми не терпя́ще зре́ти, спокрыва́ются кри́лы: и Трисвяты́ми пе́сньми непреста́нно Тебе́ сла́вят.

И ны́не и при́сно и во ве́ки веко́в. Ами́нь.

Богоро́дичен: Неизрече́нно Творца́ родила́ еси́ все́х, Пречи́стая, избавля́ющаго дре́вния кля́твы челове́ки, и сме́ртныя тли́, и Тобо́ю позна́хом Еди́наго Бо́га Триипоста́снаго.

Пе́снь 3

Ирмо́с: Не му́дростию и си́лою и бога́тством хва́лимся, но Тобо́ю, О́тчею Ипоста́сною му́дростию, Христе́: не́сть бо свя́т, па́че Тебе́, Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Си́лу свы́ше святы́м Твои́м пре́жде апо́столом, я́ко посла́л еси́, Христе́, от Отца́ Уте́шителя, Еди́но яви́л еси́ Естество́ Трисо́лнечное.

Припе́в: Пресвята́я Тро́ице Бо́же на́ш, сла́ва Тебе́.

Патриа́рху Авраа́му егда́ яви́лася еси́ во о́бразе му́жесте, Тро́ичня Еди́нице, непреме́нное показа́ла еси́ Твоея́ Бла́гости и Госпо́дьства.

Сла́ва Отцу́ и Сы́ну и Свято́му Ду́ху.

И́же во О́бразех Трие́х, Еди́н Бо́г ве́руемый: Неопи́санный я́ве, Недомы́слимый все́ми, изба́ви ду́шы на́шя от вся́кия ско́рби.

И ны́не и при́сно и во ве́ки веко́в. Ами́нь.

Богоро́дичен: Наста́вльшеся Сы́на Твоего́ прему́дрыми приведе́ньми, Еди́нственное и Трисве́тлое Богонача́лие сла́вим, и Тебе́ блажи́м, Присноде́ву.

Та́же седа́лен, гла́с 4:

Трисо́лнечная, Несозда́нная и Единосу́щная Eди́нице, Триипоста́сная и Непостижи́мая, рабы́ Твоя́ уще́дри: спаси́ от бе́д, я́ко Бо́г ми́лостив, Тя́ бо, Го́споди, Еди́наго Изба́вителя и Влады́ку и́мамы, вопию́ще: бу́ди на́м ми́лостив.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Мно́гими обстояньми и напа́стьми лю́тых, Де́во, окружа́еми, и ко отча́янию при́сно впа́дающе, Еди́ну Тя́ спасе́ние и наде́жду, и сте́ну и́мамы, Богоро́дице, и Тебе́ по до́лгу ве́рою и ны́не мо́лим: спаси́ рабы́ Твоя́.

Пе́снь 4

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щыя: сла́ва, Христе́, си́ле Твое́й.

Припе́в: Пресвята́я Тро́ице Бо́же на́ш, сла́ва Тебе́.

Пресу́щную Тро́ицу, во Еди́нице Божества́ и Господонача́лие, с Cерафи́мы Тебе́ сла́вим, я́ко Неразде́льно Естество́, я́ко Непристу́пное, я́ко равноста́тно сла́вою, Бо́же Непостижи́мый.

Припе́в: Пресвята́я Тро́ице Бо́же на́ш, сла́ва Тебе́.

Разделе́нну су́щу неизрече́нно Ли́цы Божества́, и соединя́ему Держа́вою вку́пе Еди́нем Госпо́дством, Безпреде́льну Еди́ну, Неопи́санну, воспева́ем Тя́, Творца́ всея́ тва́ри.

Сла́ва Отцу́ и Сы́ну и Свято́му Ду́ху.

Ум безнача́льный, Сло́во Неизглаго́ланне роди́, и Боже́ственнаго Ду́ха Равномо́щна испусти́: и сего́ ра́ди Тро́ицу Единосу́щную, Влады́ку все́х Бо́га пропове́даем.

И ны́не и при́сно и во ве́ки веко́в. Ами́нь.

Богоро́дичен: Ви́дим быва́я дре́вними обра́зне, предвозвести́ло е́сть, е́же от Тебе́ воплоще́ние, Сло́во: но по́слежде я́влься челове́ком, пои́стинне Триипоста́сное Единонача́лие яви́.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м воспева́ющым Тя́ ми́р подава́ющая.

Припе́в: Пресвята́я Тро́ице Бо́же на́ш, сла́ва Тебе́.

Разуме́вше от ве́ры Вседе́тельнаго Божества́, Еди́но у́бо Непристу́пно Существо́, Три́ же Ипоста́си Живонача́льны, сра́слены чте́м: Отца́, и Сы́на, и Ду́ха Свята́го Соприсносу́щное бытие́.

Припе́в: Пресвята́я Тро́ице Бо́же на́ш, сла́ва Тебе́.

Све́те Трисо́лнечне, су́щественнаго Све́та Твоего́ возсия́й ми́ Еди́нственное Божество́, Несозда́нное Естество́, и светоде́йственный Исто́чниче вся́кия светода́тельныя зари́: да созерца́ю Твою́ добро́ту неизрече́нную.

Сла́ва Отцу́ и Сы́ну и Свято́му Ду́ху.

Я́ко Еди́ному су́щу Соде́телю вся́ческих, и Содержи́телю, и Ко́рмчию Всепрему́дру, вои́стинну и жи́зни Пода́телю, сего́ ра́ди и вопие́м Ти́ ве́рно: Влады́ко Трисо́лнечне, пою́щыя Тя́ соблюди́.

И ны́не и при́сно и во ве́ки веко́в. Ами́нь.

Богоро́дичен: Обожи́ти хотя́ дре́вле истле́вшаго челове́ка, за бла́гость, Де́во, созда́вый, и показа́вый О́браза Боже́ственный зра́к, Челове́к бы́сть из Тебе́, Еди́но Тричи́сленное Богонача́лие пропове́да.

Пе́снь 6

Ирмо́с: Возопи́, прообразу́я погребе́ние тридне́вное, проро́к Ио́на в ки́те моля́ся: от тли́ изба́ви мя́, Иису́се Царю́ Си́л.

Припе́в: Пресвята́я Тро́ице Бо́же на́ш, сла́ва Тебе́.

Яви́ Оте́ц изглаго́луя Сыновство́, и Ду́х, Христу́ кре́щшуся, ви́дим бы́в: сего́ ра́ди Еди́но и Тро́ическое Богонача́лие сла́вим.

Припе́в: Пресвята́я Тро́ице Бо́же на́ш, сла́ва Тебе́.

Я́ко ви́де Тя́ Трисвяты́ми гла́сы воспева́емаго Иса́иа, на высо́це Престо́ле седя́ща, Тро́ическую позна́ Еди́наго Богонача́лия Ипоста́сь.

Сла́ва Отцу́ и Сы́ну и Свято́му Ду́ху.

Возвыше́но се́рдце покажи́ и на́с ра́б Твои́х, Высо́кий Царю́ Триипоста́сне: да Твоея́ сла́вы зри́м я́сно све́тлость.

И ны́не и при́сно и во ве́ки веко́в. Ами́нь.

Богоро́дичен: Восхоте́ вообрази́тися я́ве в на́ше, от Де́вы Сы́н Бо́жий я́ко Человеколю́бец, и Боже́ственныя Сла́вы о́бщники челове́ки сотвори́.

Седа́лен, гла́с 4:

Отца́ нерожде́нна, Сы́на же рожде́нна, и Ду́ха Свята́го исхо́дна от Отца́ му́дрствующе, пропове́даем Безнача́льное Ца́рство и Божество́ еди́но, Е́же славосло́вяще единому́дренно вопие́м: Тро́ице Единосу́щная, спаси́ на́с, Бо́же.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Лет превы́шше, и пре́жде ве́к Бо́га, в ле́то родила́ еси́ преесте́ственне пло́тию, Бо́га Челове́ка, Пречи́стая. Те́мже Тя́, Богоро́дицу, и́стинно и госпо́дственне вси́ испове́дающе, приле́жно Ти́ вопие́м: сла́вы ве́чныя вся́ сподо́би.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме Сла́вы Твоея́, Го́споди.

Припе́в: Пресвята́я Тро́ице Бо́же на́ш, сла́ва Тебе́.

Учине́ная небе́сная естества́, и у́мныя чи́ны правосла́вно вси́ земноро́днии подража́юще, сла́вим Еди́но Божество́ в Трие́х Равноде́тельных ипоста́сех. [Два́жды.]

Сла́ва Отцу́ и Сы́ну и Свято́му Ду́ху.

Ре́чи святы́х проро́к, Тя́ дре́вле обра́зно Еди́наго веко́в все́х Соде́теля прояви́ша, Неизрече́ннаго Бо́га и Го́спода, Богонача́льными Треми́ Ипоста́сьми.

И ны́не и при́сно и во ве́ки веко́в. Ами́нь.

Богоро́дичен: И́же по существу́ Неви́димое Сло́во и Вседе́тельное, яви́лся еси́ челове́ком, Челове́к от Чи́стыя Богома́тере, челове́ка призыва́я ко прича́стию Твоего́ Божества́.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Припе́в: Пресвята́я Тро́ице Бо́же на́ш, сла́ва Тебе́.

Све́те Единонача́льный и Трисия́нный, Существо́ Безнача́льное, Добро́то Недове́домая, в се́рдцы мое́м всели́ся, и хра́м Твоего́ Божества́, светови́ден и чи́ст покажи́ мя, зову́ща: благослови́те вся́ дела́ Госпо́дня Го́спода, по́йте и превозноси́те Его́ во ве́ки. [Два́жды.]

Сла́ва Отцу́ и Сы́ну и Свято́му Ду́ху.

От разли́чных мя́ страсте́й, Тро́ице Неразде́льная, Еди́нице Несли́тная, и омраче́ния прегреше́ний изба́ви, и озари́ луча́ми Твои́ми Боже́ственными: да вообразу́ю Твою́ сла́ву, и воспева́ю Тя́ сла́вы Го́спода.

И ны́не и при́сно и во ве́ки веко́в. Ами́нь.

Богоро́дичен: Ум у́бо Нерожде́нный Оте́ц, и Сло́во Сообра́зно, и Ду́х Сопресто́лен, Существо́, Си́ла, Бытие́: Пресу́щная, Неизрече́нная, Великоде́йственная Тро́ице, Еди́нице, соблюда́й ста́до Твое́ моли́твами Богоро́дицы, я́ко Естество́м Человеколю́бец.

Пе́снь 9

Ирмо́с: Вся́к земноро́дный да взыгра́ется Ду́хом просвеща́ем, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припе́в: Пресвята́я Тро́ице Бо́же на́ш, сла́ва Тебе́.

Все́ к Тебе́ ны́не дви́жу се́рдце мое́ и мы́сль, и предложе́ния же всея́ души́ и те́ла, Соде́телю и Изба́вителю моему́, Единонача́льне, и Трисве́тле, и вопию́ Ти: спаси́ мя, раба́ Твоего́, от вся́ких искуше́ний и скорбе́й. [Два́жды.]

Сла́ва Отцу́ и Сы́ну и Свято́му Ду́ху.

Возвы́си на́ш у́м, и мы́сль к Тебе́, Вы́шнему, просвети́ Твои́ми сия́ньми Пречи́стыми, О́тче, Сло́ве, Уте́шителю, во Све́те живы́й Непристу́пнем, Сла́вы Со́лнце, Светоде́ржче, всегда́ сла́вити Тя́ Единонача́льнаго Бо́га Триипоста́снаго.

И ны́не и при́сно и во ве́ки веко́в. Ами́нь.

Богоро́дичен: Спаси́ и́же в Тя́ ве́рующыя, Го́споди, и пропове́дающыя Безнача́льное Присносу́щное Существо́ Еди́но, Три́ же Ли́ца Богонача́льна и Сообра́зна, Твоего́ Госпо́дьствия, и Боже́ственныя Сла́вы Твоея́ сподо́би, мольба́ми Чи́стыя Богома́тере.

КАНО́Н ГЛА́С 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́: Изра́иля же спасе́, побе́дную пе́снь пою́ща.

Припе́в: Пресвята́я Тро́ице Бо́же на́ш, сла́ва Тебе́.

Держа́ву Еди́нственнаго и Трисо́лнечнаго зра́ка воспева́юще вопие́м: у́м на́ш озари́, Бо́же Всеси́льне, и к Твое́й Влады́ко, возвы́си сла́ве неизрече́нней.

Припе́в: Пресвята́я Тро́ице Бо́же на́ш, сла́ва Тебе́.

Горе́ Тя а́нгельская удобре́ния у́мная немо́лчно пою́т Трисвяты́ми пе́сньми, Еди́ницу Тричи́сленную, и Тро́ицу Сообра́зну, Пресу́щественну, Всеси́льну.

Сла́ва Отцу́ и Сы́ну и Свято́му Ду́ху.

Боже́ственное питие́ Твоея́ любве́, сладча́йшее, светоде́йственное, души́ мое́й пода́ждь, Тро́ице Еди́нице Светонача́льная, и Боже́ственное умиле́ние чисти́тельное, Влады́ко Многоми́лостиве, всея́ тва́ри.

И ны́не и при́сно и во ве́ки веко́в. Ами́нь.

Богоро́дичен: Я́коже на руно́ сни́де без шу́ма с небесе́, Де́во, до́ждь в ложесна́ Твоя́ Боже́ственный: и спасе́ все́ изсо́хшее челове́ческое естество́, Пречи́стая.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Умы́слив у́мная существа́, соста́вил еси́ певцы́ непреста́нныя Твоего́ Божества́, Трисве́тлый Бо́же и Вседе́телю: но и бре́нных и земноро́дных приими́ моле́ние и мольбу́, я́ко Благоутро́бен.

Припе́в: Пресвята́я Тро́ице Бо́же на́ш, сла́ва Тебе́.

И́же вся́каго по естеству́ премене́ния неприя́тен, изменя́емым на́м и пою́щым, неизсле́димый исто́чник Твоея́ бла́гости, согреше́ний да́ждь проще́ние, и спасе́ние, я́ко Благоутро́бен.

Сла́ва Отцу́ и Сы́ну и Свято́му Ду́ху.

Отца́ и Сы́на, и Ду́ха сла́вим, в непреме́ннем зра́це Божества́ Тебе́ Еди́нственнаго и Трисия́ннаго Го́спода все́х, я́коже проро́цы, и апо́столи от Тебе́ я́ве научи́шася.

И ны́не и при́сно и во ве́ки веко́в. Ами́нь.

Богоро́дичен: Яви́лся еси́ Моисе́ю в купине́, я́ко а́нгел сове́та Вели́каго Вседержи́телева, Твое́ е́же от Де́вы проявля́я воплоще́ние, Бо́жий Сло́ве: и́мже на́с претвори́л еси́, и на небеса́ возве́л еси́.

Го́споди, поми́луй (три́жды).

Седа́лен, гла́с 5:

Ми́лостива еси́ Тро́ице Неразде́льная: ми́луеши бо все́х, я́ко Всеси́льная и Всеще́дра, Сострада́тельна и Многоми́лостива. Те́мже прибега́ем к Тебе́, и́же грехми́ мно́гими отягча́еми взыва́юще: очи́сти Твоя́ рабы́, и изба́ви все́х вся́кия му́ки.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Всесвята́я Де́во, поми́луй на́с прибега́ющих ве́рою к Тебе́ Благоутро́бней, и прося́щих те́плаго Твоего́ ны́не заступле́ния: мо́жеши бо я́ко Блага́я все́х спасти́, я́ко су́щи Ма́ти Бо́га Вы́шняго, Ма́терния Твоя́ моли́твы при́сно употребля́ющи, Богоблагода́тная.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припе́в: Пресвята́я Тро́ице Бо́же на́ш, сла́ва Тебе́.

Та́йно науча́ется Еди́наго Госпо́дьства Трисве́тлому Дании́л, Христа́ Судию́ узре́в ко Отцу́ иду́ща, и Ду́ха проявля́юща виде́ние.

Припе́в: Пресвята́я Тро́ице Бо́же на́ш, сла́ва Тебе́.

Бре́нными пою́щих Тя́ усты́, Пресу́щественнаго Бо́га, Тро́ична Ипоста́сьми, Еди́нственна же Естество́м, сла́вы а́нгельския сподо́би.

Сла́ва Отцу́ и Сы́ну и Свято́му Ду́ху.

Еди́ну вла́сть, и Еди́но Госпо́дьство, в Трие́х Сво́йствах неразлу́чно сла́вим: О́тче, и Сы́не, и Ду́ше, просвети́ ны́ рабы́ Твоя́.

И ны́не и при́сно и во ве́ки веко́в. Ами́нь.

Богоро́дичен: Гора́ ча́стая и присе́нная, Ю́же ви́дев пре́жде Авваку́м, из Нея́же про́йде Святы́й: неудо́бь зри́мое Рождество́ явля́ше Твоего́, Де́во, зача́тия.

Пе́снь 5

Ирмо́с: Одея́йся све́том я́ко ри́зою, к Тебе́ у́треннюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припе́в: Пресвята́я Тро́ице Бо́же на́ш, сла́ва Тебе́.

И́же за бла́гость созда́вый челове́ка, и по о́бразу Твоему́ сотво́рь, во мне́ обита́й, Трисве́тне Бо́же мо́й, я́ко Бла́г и Благоутро́бен.

Припе́в: Пресвята́я Тро́ице Бо́же на́ш, сла́ва Тебе́.

Ты́ мя наста́ви, Еди́нице Трисо́лнечная, к стезя́м Боже́ственным спасе́ния, и Твоего́ сия́ния испо́лни, я́ко естество́м Бо́г Неисчетноси́лен.

Сла́ва Отцу́ и Сы́ну и Свято́му Ду́ху.

Све́т Неразде́льный Еди́наго Естества́, разделе́нный начерта́ньми, Трисия́нный, Невече́рний, мое́ се́рдце луча́ми Твои́ми озари́.

И ны́не и при́сно и во ве́ки веко́в. Ами́нь.

Богоро́дичен: Я́ко ви́де Тя́ дре́вле, Чи́стая Пренепоро́чная, проро́к, зря́щая врата́ к Све́ту Незаходи́мому, а́бие Тя́ позна́ Бо́жие Жили́ще.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя́, я́ко Благоутро́бен.

Припе́в: Пресвята́я Тро́ице Бо́же на́ш, сла́ва Тебе́.

Трисве́тлое су́ще Богонача́лие Ипоста́сне, Еди́нственна еси́, я́ко сообра́зна и Равноде́тельна, и по существу́ и хоте́нию.

Припе́в: Пресвята́я Тро́ице Бо́же на́ш, сла́ва Тебе́.

Дово́льно изъяви́ проро́к, поя́ Отцу́ Твоему́ Све́ту: у́зрим Ду́хом, Све́т Сы́на, Еди́наго Бо́га Трисо́лнечнаго.

Сла́ва Отцу́ и Сы́ну и Свято́му Ду́ху.

Несоста́вно Существо́ в Трие́х Сво́йствех, Еди́ну вла́сть и Держа́ву имы́й: Те́м бо состои́тся тва́рь вся́ческая, и обновля́ется.

И ны́не и при́сно и во ве́ки веко́в. Ами́нь.

Богоро́дичен: Прегреше́ний избавле́ние и бе́д, Влады́ко Бо́же, Еди́нственне и Трисве́тне, низпосли́ Твои́м певце́м, моли́твами Богома́тере.

Го́споди, поми́луй (три́жды).

Седа́лен, гла́с 5:

Трисо́лнечный Све́т славосло́вим, и Про́стей Тро́ице ны́не поклони́мся, я́ко просвети́ на́с и поми́лова, и изба́ви от тли́ ве́сь ро́д челове́ческий, избавля́ющи от пре́лести и́дольския ве́сь ми́р, и Ца́рство на́м подаде́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Недоуме́вся от все́х, к Тебе́ прибего́х к Наде́жди все́х, и Прибе́жищу гре́шных и смире́нных, зовы́й: согреши́х, и пребыва́ю в злы́х, нечу́вствуя окая́нный. Поми́луй мя́, пре́жде конца́ обрати́ мя, и изба́ви вся́кия му́ки, недосто́йнаго.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щыя: Бо́же, благослове́н еси́.

Припе́в: Пресвята́я Тро́ице Бо́же на́ш, сла́ва Тебе́.

Я́ко имы́й бе́здну ми́лости, Го́споди, и пучи́ну неизче́тну щедро́т, поми́луй Еди́наго Тя́ пою́щих, Трисве́тлаго Бо́га все́х.

Припе́в: Пресвята́я Тро́ице Бо́же на́ш, сла́ва Тебе́.

Необмы́слимаго, Еди́нственна и Трисве́тла, Бо́га Тя́ и Го́спода пою́ще вопие́м Ти́: пода́ждь Твои́м рабо́м очище́ние грехо́в.

Сла́ва Отцу́ и Сы́ну и Свято́му Ду́ху.

Ра́вно Ипоста́си во Еди́ной Держа́ве чту́ще разделя́ем Нераздели́мо Существо́, Бо́га Отца́, и Сы́на, и Пресвята́го Ду́ха.

И ны́не и при́сно и во ве́ки веко́в. Ами́нь.

Богоро́дичен: О́трасль прозябла́ еси́, Отцу́ Собезнача́льную, цве́т Божества́: О́трасль Соприсносу́щную, Де́во, даю́щую жи́знь все́м челове́ком.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая Го́спода по́йте, и превозноси́те во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Да Еди́наго откры́еши дре́вле я́ве Госпо́дьства Тро́ичную Ипоста́сь, яви́лся еси́, Бо́же мо́й, во о́бразе челове́ков Авраа́му, пою́щу Твою́ Держа́ву Еди́нственную.

Припе́в: Пресвята́я Тро́ице Бо́же на́ш, сла́ва Тебе́.

Ты́ мя к Твои́м благоде́тельным луча́м взира́ти сподо́би, Све́те Непристу́пный, О́тче Ще́дрый, и Сло́ве, и Ду́ше, е́же благоугожда́ти Тебе́ при́сно, Го́споди все́х.

Сла́ва Отцу́ и Сы́ну и Свято́му Ду́ху.

Свя́т Оте́ц Бо́г Преве́чный: Свя́т же Сы́н из Отца́ рожде́н: Свя́т же и Животворя́щий Ду́х, исходя́ из Отца́, Сы́ном же явля́емь.

И ны́не и при́сно и во ве́ки веко́в. Ами́нь.

Богоро́дичен: Облиста́ла еси́ на́м от Трисо́лнечныя сла́вы, Еди́наго Всепе́тая Христа́ Го́спода, все́х тайнонауча́юща Еди́ному Богонача́лию в Трие́х Ли́цех, пе́ти во ве́ки.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к И́мя ему́: Его́же велича́юще, Де́ву ублажа́ем.

Припе́в: Пресвята́я Тро́ице Бо́же на́ш, сла́ва Тебе́.

Глаго́лания челове́ческая по достоя́нию, Безнача́льная Еди́нице, не мо́гут пе́ти Тя́: оба́че я́коже мо́щно дерза́юще от ве́ры, Богонача́льная, Сопресто́льная Тро́ице, сла́ву прино́сим Твое́й Держа́ве, и хвалу́.

Припе́в: Пресвята́я Тро́ице Бо́же на́ш, сла́ва Тебе́.

Равноста́тною сла́вою, Тя́ Единонача́льнаго Трисве́тлаго Бо́га сла́вят Херуви́ми и Серафи́ми пречи́стыми усты́: с ни́миже и на́с гре́шных приими́, Го́споди, Твою́ Держа́ву велича́ющих.

Сла́ва Отцу́ и Сы́ну и Свято́му Ду́ху.

Иса́иа Тя́ ви́де на Престо́ле херуви́мсте, и Серафи́мы стоя́щыя о́крест Тебе́, кри́лы ли́ца закрыва́ющыя, и вопию́щыя: Свя́т, Свя́т, Свя́т, Трисвяты́й Бо́же, сла́вимый в Трие́х Сво́йствех.

И ны́не и при́сно и во ве́ки веко́в. Ами́нь.

Богоро́дичен: Я́ко Чи́стая и Непоро́чная и Де́ва, родила́ еси́ Сы́на, избавля́ющаго на́с от искуше́ний, Бо́га Неизме́нна: но и ны́не оставле́ние на́м прегреше́ний да́ти Сего́ моли́.

КАНОН, ГЛАС 6

Пе́снь 1

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припе́в: Пресвята́я Тро́ице Бо́же на́ш, сла́ва Тебе́.

Три́ ипоста́си пое́м Богонача́льныя, Еди́нственнаго естества́ неизме́нный зра́к, Блага́го Человеколю́бца Бо́га, прегреше́ний очище́ние на́м да́рующа.

Припе́в: Пресвята́я Тро́ице Бо́же на́ш, сла́ва Тебе́.

Пресу́щный еди́не, и трисия́нный начерта́ньми Го́споди, в Божестве́ еди́ном Сы́й, вразуми́ на́с, и сподо́би Твоего́ Боже́ственнаго сия́ния.

Сла́ва Отцу́ и Сы́ну и Свято́му Ду́ху.

Невестоукраси́в Па́вел, ю́же от язы́к Це́рковь, Еди́ному Тебе́ Триипоста́сному Бо́гу покланя́тися научи́, от Него́же, и И́мже, и в Не́мже вся́ бы́ша.

И ны́не и при́сно и во ве́ки веко́в. Ами́нь.

Богоро́дичен: Из чре́ва Твоего́ про́йде у́мное, Богоро́дице, Со́лнце, и осия́ на́с Трисве́тлаго Божества́ заря́ми: Его́же пою́ще, благоче́стно Тя́ ублажа́ем.

Пе́снь 3

Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припе́в: Пресвята́я Тро́ице Бо́же на́ш, сла́ва Тебе́.

Украси́в Трисве́тлый Бо́же чи́ны небе́сныя, устро́ил еси́ пе́ти Тя́ трисвяты́ми гла́сы: с ни́миже приими́ и на́с воспева́ющих Твою́ бла́гость.

Припе́в: Пресвята́я Тро́ице Бо́же на́ш, сла́ва Тебе́.

Еди́но непрело́жное Тро́ичное, сообра́зное еди́нственное Богонача́лие пою́ще, мо́лим Тя́ те́пле, грехо́в мно́гих низпосла́ти ны́не на́м проще́ние.

Сла́ва Отцу́ и Сы́ну и Свято́му Ду́ху.

У́ме Безнача́льный О́тче, сообра́зный Бо́жий Сло́ве, и Ду́ше Боже́ственный, Благи́й и Пра́вый, воспева́ющыя ве́рно Твою́ держа́ву, соблюди́ я́ко Благоутро́бен.

И ны́не и при́сно и во ве́ки веко́в. Ами́нь.

Богоро́дичен: Па́жить потреби́ тли́, челове́к по существу́ бы́в Бо́г мо́й, во утро́бе Твое́й, Чи́стая: и родонача́льники пре́ждняго осужде́ния Еди́н свободи́.

Та́же, Го́споди поми́луй. (три́жды).

Седа́лен, гла́с 6:

Влады́ко Бо́же, при́зри с Небесе́, и ви́ждь на́ше смире́ние я́ко Ще́др, и умилосе́рдися, Человеколю́бче Преблаги́й: ни отку́ду бо наде́емся проще́ние получи́ти злы́х, и́миже согреши́хом. Те́мже бу́ди с на́ми, и никто́же на ны́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Влады́чице Чи́стая, при́зри, Богоро́дице, ви́ждь на́ших я́зв боле́зни, и умилосе́рдися, Пречи́стая, и исцели́ со́вестное жже́ние, Твое́ю ми́лостию ороша́ющи, и вопию́щи рабо́м Твои́м: Аз е́смь с ва́ми, и никто́же на вы́.

Пе́снь 4

Ирмо́с: Христо́с моя́ си́ла, Бо́г и Го́сподь, честна́я Це́рковь, боголе́пно пое́т взыва́ющи, от смы́сла чи́ста о Го́споде пра́зднующи.

Припе́в: Пресвята́я Тро́ице Бо́же на́ш, сла́ва Тебе́.

Возвыша́яй мы́сль, Еди́нице Трисве́тлая, и ду́шу и се́рдце Твои́х певе́ц ско́ро возведи́, и сия́ния Твоего́ и све́тлости сподо́би.

Припе́в: Пресвята́я Тро́ице Бо́же на́ш, сла́ва Тебе́.

Претвори́ и преобрази́ от зло́бы мя́ вся́кия к доброде́тели, Еди́на неизображе́нная, и неизме́нная Тро́ице, и Твои́ми заря́ми просвети́.

Сла́ва Отцу́ и Сы́ну и Свято́му Ду́ху.

Помы́слив пре́жде, му́дре соста́вил еси́ А́нгелов чи́ны, служи́тельныя Твоея́ бла́гости, Триипоста́сная Еди́нице, с ни́миже приими́ мою́ хвалу́.

И ны́не и при́сно и во ве́ки веко́в. Ами́нь.

Богоро́дичен: И́же естество́м несозда́нный Бо́г Присносу́щный, созда́нное восприе́м челове́ческое естество́, возобрази́ во Святе́й Твое́й утро́бе, Богоро́дице Присноде́во.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся: Тя́ ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Припе́в: Пресвята́я Тро́ице Бо́же на́ш, сла́ва Тебе́.

Помышля́юще естество́ Богонача́льное, промысли́тельное и спаси́тельное все́х су́щее, Владыко, Трисве́тлое же еди́но, к Тебе́ у́тренюем, проще́ния прося́ще грехопаде́ний.

Припе́в: Пресвята́я Тро́ице Бо́же на́ш, сла́ва Тебе́.

О́тче Безнача́льный Бо́же, и Соприсносу́щный Сы́не, и Ду́ше Святы́й, утверди́ Единонача́льная Тро́ице Твоя́ певцы́, и от вся́кия напа́сти изба́ви и ско́рби.

Сла́ва Отцу́ и Сы́ну и Свято́му Ду́ху.

Управля́яй сия́ньми Богоде́тельными, и к благоугожде́нию Твоего́ Триипоста́снаго Божества́, Со́лнце Сла́вы, наставля́я мя́ при́сно, и Боже́ственнаго Ца́рствия сотвори́ прича́стника.

И ны́не и при́сно и во ве́ки веко́в. Ами́нь.

Богоро́дичен: И́же вся́ нося́й и соблюда́яй всеси́льною Твое́ю руко́ю, Сло́ве Бо́жий, неизме́нне, сохрани́ и соблюди́ Тя сла́вящыя, моли́твами Ро́ждшия Тя́ Богома́тере.

Пе́снь 6

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Припе́в: Пресвята́я Тро́ице Бо́же на́ш, сла́ва Тебе́.

Прему́дрость и ра́зум, Богонача́лие Трисве́тлое певце́м Твои́м да́руй, и добро́ты луча́ми светоде́тельныя Твоея́ бла́гости, осиява́тися все́х сподо́би. (Два́жды)

Сла́ва Отцу́ и Сы́ну и Свято́му Ду́ху.

Све́те Неразде́льный по существу́, Трисия́нне, Вседержи́тельне, Непристу́пне, сердца́ озари́ ве́рно хва́лящих держа́ву Твою́, и к Боже́ственней любви́ впери́.

И ны́не и при́сно и во ве́ки веко́в. Ами́нь.

Богоро́дичен: В Тя́ всели́ся, Присноде́во, я́ве Вседержи́тель и Госпо́дь все́х, и Еди́ному Трисия́нному зра́ку Божества́ челове́ки покланя́тися научи́.

Го́споди, поми́луй. (три́жды)

Седа́лен, гла́с 6:

О́тче и Сы́не со Ду́хом Святы́м, при́зри на ны́ ве́рою Тебе́ покланя́ющыяся, и сла́вящыя держа́ву Твою́, Благоутро́бне, со о́гненными бре́ннии, ино́го бо ра́зве Тебе́ не ве́мы, и возопи́й пою́щым Тя́: Аз е́смь с ва́ми, и никто́же на вы́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: При́зри на ны́, Всепе́тая Богоро́дице, возсия́й просвеще́ние сердца́м омраче́нным, и озари́ ста́до Твое́, Пречи́стая. Ели́ко бо хо́щеши и мо́жеши, я́ко Ма́ти су́щи Зижди́теля Твоего́, и возопи́й моля́щым Тя́: Аз е́смь с ва́ми, и никто́же на вы́.

Пе́снь 7

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Кре́пкую мне́ мы́сль устро́й Трисве́тлая начерта́ньми Еди́нице, е́же храни́ти и соблюда́ти Боже́ственныя за́поведи Твоя́, и всегда́ пе́ти Тебе́ ве́рно: благослове́н еси́, Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Я́ко то́ждеством естества́ пое́мый, неизрече́нно Еди́нственный Бо́же, Ли́цы же Тро́ицы нося́ число́, соблюди́ все́х на́с от разли́чных искуше́ний и обстоя́ний.

Сла́ва Отцу́ и Сы́ну и Свято́му Ду́ху.

Соесте́ственна и Соприсносу́щна сла́вим, Еди́наго Тя́ по существу́ Бо́га, сво́йствы неслия́нне Ипоста́сными Тро́ице, разли́чное про́сто предлага́юще, во зра́це непреме́ннем я́ве.

И ны́не и при́сно и во ве́ки веко́в. Ами́нь.

Богоро́дичен: Бо́г Пресу́щный прия́т, Пречи́стая, от чре́ва Твоего́ чи́стаго на́ше человеколюбе́зне смеше́ние я́ве, и все́х научи́ вопи́ти: благослове́н еси́, Бо́же оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти: Тя́ превозно́сим во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Очище́ние прегреше́ний ско́ро пода́ждь ми́, и страсте́й многообра́зных избавле́ние, сообра́зная Тро́ице, Еди́нице Триипоста́сная: да Тя́ сла́влю во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Воли́тель ми́лости изве́ствован, я́ко Бо́г ми́лостив, все́х поми́луй, Трисве́тлая Еди́нице и Тро́ице Преблага́я, славосло́вящих Твое́ вели́чествие.

Сла́ва Отцу́ и Сы́ну и Свято́му Ду́ху.

От Све́та Присносу́щнаго Отца́, Све́та Соприсносу́щна ро́ждшася Сло́ва, со Ду́хом исхо́дным Све́том, ве́рою сла́вим, и превозно́сим во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Врача́ челове́ком, Пречи́стая, родила́ еси́ Всеси́льнаго Сло́ва, Христа́ Го́спода, прароди́тельныя я́звы все́х исцеля́юща, превознося́щих Его́ во ве́ки.

Пе́снь 9

Ирмо́с: Бо́га челове́ком не возмо́жно ви́дети, на Него́же не сме́ют чи́ни А́нгельстии взира́ти: Тобо́ю же, Всечи́стая, яви́ся челове́ком Сло́во Воплоще́нно. Его́же велича́юще, с Небе́сными во́и Тя́ ублажа́ем.

Припе́в: Пресвята́я Тро́ице Бо́же на́ш, сла́ва Тебе́.

Зре́ти чи́нове херуви́мстии, Влады́ко, добро́ты Твоея́ сла́вы не могу́ще, кри́лы покрыва́ющеся, непреста́нно Тро́ичную пе́снь вопию́т, Триипоста́сную Твоего́ Богонача́лия Еди́нственнаго держа́ву сла́вяще.

Припе́в: Пресвята́я Тро́ице Бо́же на́ш, сла́ва Тебе́.

Твоя́ сия́ния, Со́лнце незаходи́мое, Твои́х рабо́в пода́ждь сердца́м, и просвети́ ду́шы, и изба́ви от мно́гих прегреше́ний, Еди́не Всеми́лостиве, и Триипоста́сне: и нетле́нныя Твоея́ жи́зни на́с сподо́би.

Сла́ва Отцу́ и Сы́ну и Свято́му Ду́ху.

Е́же Све́т Единоче́стный, и Трисо́лнечный, и Светоде́тельный, Божество́ су́щее озари́ ве́рою Тя́ пою́щих, и от мра́чнаго изба́ви злоде́йства, и сподо́би светле́йших Твои́х селе́ний, я́ко Преблаги́й.

И ны́не и при́сно и во ве́ки веко́в. Ами́нь.

Богоро́дичен: Прему́дре челове́ка пре́жде созда́ Сы́н Тво́й, Де́во, и истле́вшаго обнови́ Тобо́ю, Всепе́тая: и Боже́ственнаго Све́та зари́ невече́рния все́х испо́лни, Тя́ Богоро́дицу и́стинну ве́рою сла́вящих.

КАНО́Н ГЛА́С 7

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Припе́в: Пресвята́я Тро́ице, Бо́же на́ш, сла́ва Тебе́.

Отве́рзи ми́ уста́ у́мная се́рдца, и устне́ веще́ственныя ко хвале́ Твое́й, Трисве́тлое Еди́но Божество́ все́х, пе́ти Тебе́ пе́снь, Светоде́телю, благода́рственную.

Припе́в: Пресвята́я Тро́ице Бо́же на́ш, сла́ва Тебе́.

Да преизли́шнее Твоея́ бла́гости пока́жеши, создала́ еси́ челове́ка Тро́ице безмерноси́льная: то́кмо о́браз бре́нный Твоего́ нача́льнаго соде́телю, Госпо́дьства.

Сла́ва Отцу́ и Сы́ну и Свято́му Ду́ху.

Ум безнача́льный, Сло́во соприсносу́щное роди́вый, и Ду́ха собезнача́льнаго просия́вый, сподо́би еди́ному Бо́гу по существу́ сообра́зну на́с покланя́тися Триипоста́сному.

И ны́не и при́сно и во ве́ки веко́в. Ами́нь.

Богоро́дичен: Яви́лся еси́ при купине́ Моисе́ю Бо́жий Сло́ве, я́ко о́гнь чисти́тельный, не опаля́я же отню́д, е́же от Де́вы прообразу́я твое́ воплоще́ние, и́мже челове́ки вообрази́л еси́.

Пе́снь 3

Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х: на недви́жимем мя́ ка́мени испове́дания Твоего́ утверди́.

Припе́в: Пресвята́я Тро́ице Бо́же на́ш, сла́ва Тебе́.

И́же Еди́нственнаго и Трисия́ннаго, и вседе́тельнаго Тя́ Влады́ку воспева́юще, грехо́в и искуше́ний про́сим избавле́ния, безмерноси́льный Бо́же: да не у́бо пре́зриши, ве́рою Твою́ бла́гость сла́вящих.

Припе́в: Пресвята́я Тро́ице Бо́же на́ш, сла́ва Тебе́.

О́трасль яви́ся от Отца́, я́ко от ко́рене безнача́льна Бо́г Сло́во, и равномо́щен со сра́сленым и Боже́ственным ду́хом: и сего́ ра́ди ве́рнии, тро́ичное ли́цы еди́но Госпо́дьство сла́вим.

Сла́ва Отцу́ и Сы́ну и Свято́му Ду́ху.

Равносла́вно и сра́слено, триипоста́сное естество́ неразде́льне и разде́льне, и единонача́льную Тро́ицу вси́ Тя славосло́вим ве́рнии: и покланя́ющеся про́сим согреше́ний проще́ния.

И ны́не и при́сно и во ве́ки веко́в. Ами́нь.

Богоро́дичен: Неизме́нно челове́ком уподо́блься по всему́ Бо́жий Сло́ве, от Чи́стыя Отрокови́цы проше́л еси́ я́ве: и все́м показа́л еси́ Богонача́лие Трисия́нное, и еди́нственное Существо́м неизме́нных Ипоста́сей.

Го́споди, поми́луй (три́жды).

Седа́лен, гла́с 7:

Согреши́вшыя поми́луй, Тро́ице Свята́я, рабы́ Твоя́: и приими́ ка́ющыяся Тебе́ благоутро́бне, и проще́ния сподо́би.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Озло́бленныя ду́шы на́шя грехми́, ублажи́, Всечи́стая Богоро́дице, и изба́ви от прегреше́ний Тебе́ пою́щыя Богоневе́сто.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Содержи́тельная Трисве́тлая Еди́нице, Богонача́льная и спаси́тельная все́х, Твоя́ певцы́ ны́не огради́, и спаси́ от ско́рби, и страсте́й, и вся́каго озлобле́ния.

Припе́в: Пресвята́я Тро́ице Бо́же на́ш, сла́ва Тебе́.

Назна́менательных рече́ний, Твоего́ непостижи́маго Трисве́тлаго Божества́, недоумева́юще воспева́ем Тя́, Человеколю́бче Го́споди, и прославля́ем Твою́ си́лу.

Сла́ва Отцу́ и Сы́ну и Свято́му Ду́ху.

На земли́ я́ко на небесе́х со безпло́тными ли́ки, Еди́нице и Тро́ице, неразде́льно Тя́ разделя́ем, и любо́вию сла́вим, я́ко су́щими все́ми влады́чествующую.

И ны́не и при́сно и во ве́ки веко́в. Ами́нь.

Богоро́дичен: Оте́ческия сла́вы не отсту́пль, к на́шей ху́дости снизше́л еси́ во́лею, вопло́щься Пресу́щественный: и возне́сл еси́ к Боже́ственней сла́ве, я́ко благоутро́бен.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́.

Припе́в: Пресвята́я Тро́ице Бо́же на́ш, сла́ва Тебе́.

Светонача́льное Естество́ Тро́ице начерта́ньми, и Еди́нице в Сове́те и Сла́ве и Че́сти, утверди́ на́с в Твое́й любви́.

Сла́ва Отцу́ и Сы́ну и Свято́му Ду́ху. (Дважды).

Ум, и Сло́во, и Ду́х, еди́но Богонача́льное и трисо́лнечное естество́ сла́вяще, про́сим изба́витися искуше́ний, и вся́ких скорбе́й.

И ны́не и при́сно и во ве́ки веко́в. Ами́нь.

Богоро́дичен: Вообра́жься Бо́жий Сло́ве, в естество́ челове́ческое, от Святы́я Де́вы, Тро́ицу во Еди́нице научи́л еси́ пе́ти, сообра́зну и сопресто́льну.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Припе́в: Пресвята́я Тро́ице Бо́же на́ш, сла́ва Тебе́.

Единосла́вную держа́ву, и единонача́льное богонача́лие, треми́ ипоста́сьми су́щее, непреме́нне с дру́г дру́гом сла́вим, разли́чие иму́ще то́кмо, бытие́м ко́йждо сво́йства. (Дважды).

Сла́ва Отцу́ и Сы́ну и Свято́му Ду́ху.

У́мнии Тя́ чи́нове а́нгельских красо́т хва́лят, трисо́лнечное Богонача́лие: с ни́миже и мы́ бре́нными усты́, я́ко твори́тельну все́х, еди́ну песносло́вим, и ве́рно сла́вим.

И ны́не и при́сно и во ве́ки веко́в. Ами́нь.

Богоро́дичен: Недоуме́нным сло́вом, Сло́во ро́ждшееся от Со́лнца Отца́, и́но со́лнце, пре́жде ве́к, от Де́вы напосле́док возсия́: и еди́нственнаго треми́ ли́цы, недомы́слимаго Бо́га пропове́да.

Седа́лен, гла́с 7:

Тро́ице Единосу́щная, Еди́нице все́х Триипоста́сная, поми́луй, я́же создала́ еси́, Безсме́ртная: попаля́ющи зло́бы прегреша́ющих, и просвеща́ющи сердца́ пою́щих благоутро́бие Твое́, Бо́же на́ш, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Огня́ светле́йши, све́та де́йственнейши ми́лость благода́ти Твоея́, Влады́чице, попаля́ющи грехи́ челове́ков, и ороша́ющи мы́сли хва́лящих вели́чия Твоя́, Богоро́дице Пренепоро́чная.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Светолу́чными блиста́нии при́сно сия́я, трисве́те Бо́же, Еди́нице непристу́пная и пресу́щная спаси́, и́же в Тя́, Влады́ко, ве́рующыя благоче́стно, и покланя́ющыяся Тебе́.

Припе́в: Пресвята́я Тро́ице Бо́же на́ш, сла́ва Тебе́.

Рече́нием Боже́ственных проро́к повину́ющеся, еди́наго тя́ то́чию Бо́га все́х сла́вим в трие́х начерта́ниих, си́це вопию́ще: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Пе́рстными устна́ми мы́ с невеще́ственными чи́нми, пе́сньми Тро́ице Свята́я, Тя́ пое́м во еди́нстве существа́, вопию́ще: благослове́н еси́, Го́споди, Бо́же Оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Да и́же созда́вый Ада́ма, возсози́ждет па́ки, Всечи́стая, из Тебе́ я́ве вочелове́чися, челове́ки обожи́в си́це вопию́щыя: благослове́н, Пречи́стая, пло́д Твоего́ чре́ва.

Пе́снь 8

Ирмо́с: Неопа́льная огню́ в Сина́и прича́щшаяся купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Со́лнца луча́ми трисия́ннаго озари́тися светоде́тельными сподо́би, сердца́м певце́в Твои́х: и ны́не зре́ти добро́ту Твою́ Тро́ице, Еди́нице, я́ко мо́щно да́руй всегда́, все́м ве́рою подо́бною, Твое́ вели́чие песносло́вящым во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Держи́ши вся́ческая, тро́ичное и еди́нственное Господонача́лие безнача́льное, и управля́еши не́бо и зе́млю. Те́мже мя́ любо́вию Твое́ю привлачи́ма при́сно, сохрани́ пе́ти Тебе́: вся́ дела́ Госпо́дня Го́спода по́йте, и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху.

Хра́м мя́ Твоея́ трисве́тныя сотвори́ зари́, Благоде́телю Человеколю́бче: и прича́стия и приобще́ния непристу́пна враго́м неви́димым, и плотски́м страсте́м, Влады́ко, покажи́, единонача́льный Бо́же мо́й и Го́споди сла́вы, песносло́вити Тя́ во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Све́т Богонача́льный от чре́ва Твоего́ возсия́вый, Богома́ти Пречи́стая, ве́сь ми́р трисо́лнечным све́том озари́, и зе́млю я́коже друго́е не́бо показа́, пою́щу: вся́ дела́ Госпо́дня Го́спода по́йте, и превозноси́те во вся́ ве́ки.

Пе́снь 9

Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну Бо́жиих чуде́с сподо́бльшуюся, Тя́ при́сно велича́ем.

Припе́в: Пресвята́я Тро́ице Бо́же на́ш, сла́ва Тебе́.

Высокосло́вити и пе́ти Тя́ досто́йно, Его́же в вы́шних непреста́нно Серафи́ми воспева́ют, не возмога́ем бре́ннии: оба́че я́ко Влады́ку все́х дерза́юще, и человеколю́бнейшаго Бо́га велича́ем.

Припе́в: Пресвята́я Тро́ице Бо́же на́ш, сла́ва Тебе́.

Теле́сныя боле́зни изба́ви, и душе́внаго пристра́стия певцы́ Твоя́, еди́нственная Тро́ице неразде́льная, и сохрани́тися неврежде́нным от все́х жите́йских искуше́ний сподо́би.

Сла́ва Отцу́ и Сы́ну и Свято́му Ду́ху.

Равноси́льная, Богонача́льная, Трисве́тная, Всеси́льная Держа́во, неизме́нная Добро́то су́щественныя Бла́гости, да́ждь прегреше́ний разреше́ние Твои́м рабо́м, и искуше́ний, и страсте́й изба́ви.

И ны́не и при́сно и во ве́ки веко́в. Ами́нь.

Богоро́дичен: Ум и ду́шу, и плотско́е смеше́ние прие́м, Богоро́дице, от Твои́х ложе́сн пречи́стых, Бо́г Сло́во пои́стинне челове́к яви́ся: и Боже́ственнаго существа́ о́бщника челове́ка я́ве показа́л е́сть.

КАНО́Н, ГЛА́С 8

Пе́снь 1

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́ пешехо́дца спасе́, пе́снь Бо́гови воспева́юща.

Припе́в: Пресвята́я Тро́ице, Бо́же на́ш, сла́ва Тебе́.

Трисо́лнечному Царю́, и Строи́телю, и Промысли́телю вся́ческих, и Благо́му Еди́ному, Есте́ственне Су́щему, и Еди́нственную иму́щему Божества́ сла́ву, Бо́гу Единонача́льному припа́даем, пе́снь Трисвяту́ю пою́ще.

Припе́в: Пресвята́я Тро́ице Бо́же на́ш, сла́ва Тебе́.

Рече́ния Боже́ственная, и проро́чествия я́же свы́ше по́мняще я́ве, Богонача́льное Естество́ Еди́нственное сла́вим, Присносу́щное, Собезнача́льное, в Трие́х Ли́цех, Отце́, и Сы́не, и Ду́се, Соде́тельное, Всеси́льное.

Сла́ва Отцу́ и Сы́ну и Свято́му Ду́ху.

Священнотаи́нник Авраа́м бы́в, священнообра́зно дре́вле, Творца́ все́х и Бо́га и Го́спода, в Трие́х у́бо Ипоста́сех прия́т ра́дуяся, и Тре́х Ипоста́сей держа́ву еди́нственную позна́.

И ны́не и при́сно и во ве́ки веко́в. Ами́нь.

Богоро́дичен: Неискусобра́чно Христа́ родила́ еси́, Е́же по на́м, на́с ра́ди восприе́мша естество́, Пречи́стая, и Непрело́жна по обою́ пребы́вша. Его́же моли́ непреста́нно, грехо́в ми́ дарова́ти и искуше́ний избавле́ние.

Пе́снь 3

Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Тебе́ Непристу́пнаго Бо́га и Царя́ сла́вы на престо́ле Иса́иа ви́де высо́це, и Херуви́мы и Серафи́мы сла́вящыя непреста́нными пе́сньми, Еди́нственнаго Триипоста́снаго.

Припе́в: Пресвята́я Тро́ице Бо́же на́ш, сла́ва Тебе́.

Еди́наго от Отца́ я́ко от ума́ рожде́наго Сло́ва, и Ду́ха происходя́ща неизглаго́ланно, по коему́ждо помышле́нии, и кни́жными уче́нии пости́гше, Еди́наго Бо́га Трисо́лнечнаго почита́ем.

Сла́ва Отцу́ и Сы́ну и Свято́му Ду́ху.

И́же сы́й Нерожде́нный Оте́ц, и Своего́ Существа́ сия́ние роди́в нетле́нно Сы́на, Све́т от Све́та: исхо́дне предлага́ет сра́сленный Све́т Ду́ха, Вседе́тельна, и Единоче́стна.

И ны́не и при́сно и во ве́ки веко́в. Ами́нь.

Богоро́дичен: Хра́м яви́лася еси́ чи́ст, Де́во Ма́ти Мари́е, вся́ всеси́льно и прему́дро соста́вльшему Христу́, и в чи́не поло́жшему и нося́щему: Его́же Ми́лостива ми́ сотвори́ Ма́терними Твои́ми моли́твами.

Го́споди, поми́луй (три́жды).

Та́же, седа́лен, гла́с 8:

Трисо́лнечнаго и Честна́го Богонача́лия си́лу ве́рнии ны́не восхва́лим, я́ко ма́нием то́кмо вся́ соста́вил вы́шняя ликостоя́ния а́нгельская, и ни́жняя священнонача́лия церко́вная, е́же взыва́ти: Свя́т, Свя́т, Свя́т еси́ Бо́же Преблаги́й: сла́ва и пе́ние Держа́ве Твое́й.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Я́же Непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами Ма́терними Твои́ми: я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припе́в: Пресвята́я Тро́ице Бо́же на́ш, сла́ва Тебе́.

Восто́к я́вльшися Божества́ су́щым во тьме́, всю́ разгна́ несве́тлую но́щь страсте́й: и пра́вды Со́лнце возсия́, Про́сто у́бо по Существу́, Трисия́нно же Ли́цы: Е́же пое́м при́сно, и сла́вим.

Припе́в: Пресвята́я Тро́ице Бо́же на́ш, сла́ва Тебе́.

Серафи́мскими усты́ воспева́емаго, бре́нными устна́ми сла́вим Еди́нственнаго, и Тро́ичнаго Го́спода сла́вы, Естество́м и Ипоста́сьми, вопию́ще: О Всецарю́, Твои́м рабо́м пода́ждь разли́чных прегреше́ний проще́ние!

Сла́ва Отцу́ и Сы́ну и Свято́му Ду́ху.

Содержи́тельная все́х су́щих, Неви́димая, Всеще́драя, Благоутро́бная, Человеколюби́вая Тро́ице Честна́я, и Богонача́льная, не забу́ди мене́, Твоего́ раба́, в коне́ц: ниже́ разори́ и́же завеща́л еси́ Твои́м рабо́м заве́т, за неизрече́нную ми́лость.

И ны́не и при́сно и во ве́ки веко́в. Ами́нь.

Богоро́дичен: Кра́сную Тя́, Всечи́стая, Еди́ну обре́т от ве́ка добро́ту Иа́ковлю, Пребезнача́льное Сло́во, и всели́ся в Тя́ благоутро́бия ра́ди, обнови́ челове́ческое естество́: Его́же моли́ непреста́нно, от вся́кия мне́ изба́витися ско́рби.

Пе́снь 5

Ирмо́с: Вску́ю мя́ отри́нул еси́ от лица́ Твоего́ Све́те незаходи́мый, и покры́ла мя́ е́сть чужда́я тьма́ окая́ннаго: но обрати́ мя, и к све́ту за́поведей Твои́х пути́ моя́ напра́ви, молю́ся.

Припе́в: Пресвята́я Тро́ице Бо́же на́ш, сла́ва Тебе́.

Соприсносу́щная Три́ Ли́ца сла́вим, Еди́наго же Го́спода, Тя́ Боже́ственное Естество́, разделя́юще про́сто, и совокупля́юще, и ве́рно вопие́м: Богонача́льная Тро́ице Свята́я, Твоя́ рабы́ от ско́рби изба́ви.

Припе́в: Пресвята́я Тро́ице Бо́же на́ш, сла́ва Тебе́.

Рыда́ю зе́льне за не́мощь мы́сли моея́, ка́ко не хотя́ стражду́ нево́льное вои́стинну измене́ние; сего́ ра́ди зову́: Живонача́льная Тро́ице Свята́я, до́брых в стоя́нии мя́ учини́.

Сла́ва Отцу́ и Сы́ну и Свято́му Ду́ху.

Дрема́нием отягче́на мя́ грехо́вным, и порева́ема в со́н сме́ртный, я́ко Человеколюби́вая и Преблага́я, и Всеми́лостивая, Богонача́льная Тро́ице Свята́я, уще́дри и возста́ви мя́.

И ны́не и при́сно и во ве́ки веко́в. Ами́нь.

Богоро́дичен: Ма́ти Де́во Отрокови́це, Пречи́стая, Всенепоро́чная, Богоблагода́тная, Твои́ми моли́твами Сы́на и Бо́га Твоего́ и Го́спода ми́лостива сотвори́ мне́: и страсте́й, и прегреше́ний Твоего́ раба́ изба́ви вско́ре.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Припе́в: Пресвята́я Тро́ице Бо́же на́ш, сла́ва Тебе́.

Небе́сных умо́в чинонача́лия подража́юще, Единонача́льная все́х Тро́ице Пресу́щественная, Трисвяты́ми пе́сньми Тя́ славосло́вим, бре́нными на́шими усты́.

Припе́в: Пресвята́я Тро́ице Бо́же на́ш, сла́ва Тебе́.

И́же по о́бразу Твоему́ челове́ка созда́вшему, и от не су́щих все́ прему́дро соста́вльшему, Бо́гу Триипоста́сному покланя́юся, и чту́, и пою́, и велича́ю Тя́.

Сла́ва Отцу́ и Сы́ну и Свято́му Ду́ху.

Вседержи́телю Бо́же, и Еди́не Неопределе́нный, всели́ся в мя́ за неизрече́нную ми́лость, Трисо́лнечный Влады́ко: и озари́ мя, и вразуми́, я́ко Благоутро́бен.

И ны́не и при́сно и во ве́ки веко́в. Ами́нь.

Богоро́дичен: Хра́м яви́лася еси́ Бо́га Невмести́маго, Пречи́стая, хра́м и мене́ Того́ покажи́, Боже́ственныя благода́ти Пресвята́я Влады́чице, Твои́ми мольба́ми, и соблюди́ невреди́ма.

Го́споди, поми́луй (три́жды).

Седа́лен, гла́с 8:

Отца́ Безнача́льна ве́рнии, Сы́на Собезнача́льна, и Ду́ха Боже́ственнаго вои́стинну песносло́вим, Неслия́нне, Непревра́тне и Неизме́нне, Тро́ицу Про́сту, и Свя́ту, и Сра́слену, вопию́ще со а́нгелы: Свя́т еси́ О́тче, Сы́не, со Ду́хом Пресвяты́м и Честны́м. Поми́луй, я́же созда́л еси́ по о́бразу Твоему́, Влады́ко.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Благодари́м Тя́ при́сно, Богоро́дице, и велича́ем, Чи́стая, и покланя́емся, воспева́юще рождество́ Твое́, Благода́тная, вопию́ще непреста́нно: спаси́ на́с, Де́во Преми́лостивая, я́ко Блага́я в ча́с испыта́ния, да не посра́млени бу́дем раби́ Твои́.

Пе́снь 7

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще поя́ху: благослове́н еси́ Бо́же оте́ц на́ших.

Припе́в: Пресвята́я Тро́ице Бо́же на́ш, сла́ва Тебе́.

Прему́дростию неизглаго́ланною Твое́ю, и пучи́ною благосты́ни, ту́не Твоего́ раба́ поми́лованна покажи́ мя: и ны́не, я́коже дре́вле, изба́ви озлобле́ния, Тро́ице Еди́нице Бо́же, грехо́в и страсте́й. [Два́жды.]

Сла́ва Отцу́ и Сы́ну и Свято́му Ду́ху.

У́м Нерожде́нный Оте́ц, и Сло́во ро́ждшееся от Него́, и Ду́х Боже́ственный, непости́жне Исхо́ден сы́й, Бо́же Единонача́льне, Трисо́лнечне, пою́ Тебе́: благослове́н Бо́г О́те́ц на́ших.

И ны́не и при́сно и во ве́ки веко́в. Ами́нь.

Богоро́дичен: Умерщвле́н бы́х, Пречи́стая, грехо́вным я́дом напое́н, и притека́ю к Тебе́ ве́рою, ро́ждшей Нача́льника живота́: Твои́ми моли́твами раба́ Твоего́ оживи́, и искуше́ний и страсте́й изба́ви, Еди́на Чи́стая.

Пе́снь 8

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Све́т сы́й Незаходи́м, Трисия́нен и Трисо́лнечный и Единонача́лен, Самодержа́вен, Просте́йший, Бо́г Непостижи́мый, и Самодержа́вен Госпо́дь, ны́не те́мное и омраче́нное мое́ се́рдце озари́: и покажи́ светоза́рно и светоно́сно пе́ти Тя́, и сла́вити во вся́ ве́ки.

Припе́в: Пресвята́я Тро́ице Бо́же на́ш, сла́ва Тебе́.

Свяще́ннейшими крилы́, Серафи́ми Боже́ственнейшии, ли́ца и но́ги благогове́йно покрыва́ют, сла́вы не терпя́ще непостижи́мыя добро́ты Твоея́, Благонача́льная, Богонача́льная, Единонача́льная Тро́ице пресвята́я: оба́че и мы́ воспева́ти Тя́ дерза́ем, и сла́вити ве́рно во ве́ки.

Сла́ва Отцу́ и Сы́ну и Свято́му Ду́ху.

Господонача́лие Безнача́льное, Всеси́льную и Пребла́гу, Совершеннонача́льну, Благоде́йственну, Неопреде́льну, Вину́ Невино́вну, Твори́тельну, Присносу́щну, Промысли́тельну и спаси́тельную все́м Едини́цу по Существу́, и Тро́ицу Ли́цы, сла́влю Тя́, Бо́же мо́й, ве́рно во ве́ки.

И ны́не и при́сно и во ве́ки веко́в. Ами́нь.

Богоро́дичен: На земли́ возсия́ Невече́рнее Со́лнце, рождество́м Е́же из Тебе́ де́вственным, Пречи́стая Влады́чице, и челове́ки изба́ви от и́дольскаго помраче́ннаго мра́ка. Те́мже и ны́не мя́ па́че Того́ Богонача́лия озари́ луча́ми, и соблюди́ Твоего́ раба́.

Пе́снь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют.

Припе́в: Пресвята́я Тро́ице Бо́же на́ш, сла́ва Тебе́.

И́же все́ми Ца́рствующее, и Вседе́тельное Пренача́льное Естество́, Вышшеле́тную, Живонача́льную, Благоутро́бну, Человеколюби́вую, Благу́ю, Единонача́льную Тро́ицу Тя́ ны́не славосло́вяще, грехо́в проще́ния про́сим, ми́рови ми́ра, и це́рквам единомы́слия. [Два́жды.]

Сла́ва Отцу́ и Сы́ну и Свято́му Ду́ху.

Еди́но Госпо́дьство и Трисия́нное, Еди́нственное Богонача́лие Трисо́лнечное, певцы́ приими́ Твоя́ боголе́пно, и прегреше́ний изба́ви, и искуше́ний и лю́тых: и вско́ре ми́р пода́ждь человеколю́бно, и це́рквам соедине́ние.

И ны́не и при́сно и во ве́ки веко́в. Ами́нь.

Богоро́дичен: Во утро́бу, Христе́ Спа́се мо́й, Деви́ческую все́лься, яви́лся еси́ ми́ру Твоему́ Богому́жно, Непревра́тен, Неслия́нен вои́стинну: и обеща́л еси́ всегда́ с Твои́ми рабы́ бы́ти я́ве. Те́мже Тебе́ ро́ждшия моли́твами, ми́р всему́ ста́ду Твоему́ устро́й.

ПО КАНОНЕ абие, припевы Григория Синаита, глас 6:

Досто́йно есть я́ко вои́стинну, / сла́вити Тя Бо́га Сло́ва, / Его́же трепе́щут и трясу́тся Херуви́ми, / и славосло́вят Си́лы Небе́сныя, / воскре́сшаго тридне́вно из гро́ба / Христа́ Жизнода́вца, стра́хом просла́вим.

Воспои́м вси боголе́пно пе́сньми Боже́ственными, / Отца́, и Сы́на, и Ду́ха Боже́ственнаго, / Триипоста́сную Держа́ву, еди́но Ца́рство и Госпо́дьство.

Ю́же пою́т вси земноро́днии, / и славосло́вят Си́лы Небе́сныя, / от всех ве́рно поклоня́емую, / Еди́ницу по существу́, Триипоста́сную.

Господонача́льную Херуви́м / и Богонача́льную без сравне́ния Серафи́м, / неразде́льную Тро́ицу во Еди́нице, / су́щее Богонача́лие, Тя велича́ем.

Отцу́ Безнача́льному и Бо́гу, / Собезнача́льному Сло́ву со Ду́хом покланя́юся: / неразлу́чное еди́но соединя́емое Существо́, / тричи́сленную Еди́ницу пе́сньми почти́м.

Лучеза́рная Твоя́ мо́лния возсия́й ми, / Бо́же мой, Триипоста́сне Вседе́телю, / и дом мя покажи́ Твоея́ непристу́пныя сла́вы, / све́тел и светоно́сен и неизме́нен.

Его́же трепе́щут и трясу́тся Херуви́ми, / и славосло́вят А́нгельская Во́инства, / от Де́вы неизрече́нно вопло́щшагося / Христа́ Жизнода́вца, стра́хом просла́вим.

Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Ипакои гласа.

Глас 1: Разбо́йничо покая́ние рай окра́де, / плачь же мироно́сиц ра́дость возвести́, / я́ко воскре́сл еси́, Христе́ Бо́же, / подая́й мiрови ве́лию ми́лость.

Глас 2: По стра́сти ше́дша во гроб жены́, / во е́же пома́зати те́ло Твое́, Христе́ Бо́же, / ви́деша А́нгелы во гро́бе, и ужасо́шася: / глас бо слы́шаху от них, я́ко воскре́се Госпо́дь, / да́руя мiрови ве́лию ми́лость.

Глас 3: Удивля́я виде́нием, / ороша́я глаго́лании, / блиста́яйся А́нгел мироно́сицам глаго́лаше: / что жива́го и́щете во гро́бе; / воста́ истощи́вый гро́бы. / Тли Премени́теля разуме́йте Непреме́ннаго. / Рцы́те Бо́гови: коль стра́шна дела́ Твоя́, / я́ко род спасл еси́ челове́ческий.

Глас 4: Я́же Твоего́ пресла́внаго воста́ния, предте́кша мироно́сицы, / апо́столом пропове́даху Христе́, / я́ко воскре́сл еси́ я́ко Бог, / подая́ мiрови ве́лию ми́лость.

Глас 5: А́нгельским зра́ком ум смуща́юща, / и Боже́ственным воста́нием душе́ю просвеща́емы, / мvроно́сицы апо́столом благовествова́ху: / возвести́те во язы́цех Воскресе́ние, / Го́споду соде́йствующу чудесы́, / подаю́щему нам ве́лию ми́лость.

Глас 6: Во́льною и животворя́щею Твое́ю сме́ртию, Христе́, / врата́ а́дова сокруши́в, я́ко Бог, / отве́рзл еси́ нам дре́вний рай, и воскре́с из ме́ртвых, / изба́вил еси́ от тле́ния живо́т наш.

Глас 7: И́же наш зрак восприе́мый, / и претерпе́вый Крест пло́тски, / спаси́ мя воскресе́нием Твои́м Христе́ Бо́же, / я́ко человеколю́бец.

Глас 8: Мироно́сицы Жизнода́вца предстоя́ща гро́бу, / Влады́ку иска́ху в ме́ртвых, Безсме́ртнаго, / и ра́дость благове́щения от А́нгела прие́мша, апо́столом возвеща́ху: / я́ко воскре́се Христо́с Бог, / подая́й мiрови ве́лию ми́лость.

Го́споди поми́луй. (40 раз).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И молитва Пресвятей Троице, творение Марка монаха:

Всемогу́щая и Животворя́щая Свята́я Тро́ице и светонача́льная, я́же мíрную вся́кую и премíрную тварь, за еди́ну бла́гость от не су́щих приведы́й, и промышля́я и содержа́. И́же по про́чих Твои́х неизрече́нных о земно́м ро́де благодея́ниих, и покая́ние нам ра́ди плотска́го неможе́ния до сме́рти дарова́вый: не оста́ви нас окая́нных в лука́вых на́ших дея́ниих умре́ти, ниже́ злонача́льнику и зави́стцу, и губи́телю посме́шство бы́ти. Зри́ши бо Благосе́рде, ели́к у́бо о́наго на нас наве́т и вражда́, ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на нас, мо́лим на вся́кий день и час прогне́вающии Тя честны́х и животво́рных за́поведей преступле́нием. И вся у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же нас, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, кого́ бра́та на́шего оскорби́хом, а́ще язы́ком неизбе́жных и стро́потных и кре́пких сете́й объя́хомся: а́ще ко́им чувств на́ших, или́ все́ми, во́лею или́ нево́лею, ве́дуще или́ не ве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го: прости́ нам, и оста́ви вся Всеще́дре, Пребла́же и Многоми́лостиве: и да́руй нам про́чее бо́дрость и си́лу, во е́же твори́ти во́лю Твою́ бла́гу, и благоуго́дну и соверше́нну: да нощна́го и мра́чнаго зла, светови́дным покая́нием преме́ншеся, и я́ко во дни благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя и велича́юще во ве́ки. Ами́нь.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди поми́луй. (трижды).

Го́споди Иису́се Христе́, Сы́не Бо́жий, моли́тв ра́ди пречи́стыя Твоея́ Ма́тере, преподо́бных и богоно́сных оте́ц на́ших и всех святы́х поми́луй и спаси́ нас, я́ко Благ и Человеколю́бец. Ами́нь.

Назад к списку