008 Преподобному Никону Радонежскому (акафист)
Кондак 1
Избра́нный Боже́ственныя Тро́ицы уго́дниче пресла́вный, храни́телю заве́тов а́ввы Се́ргия, люби́мый учениче́ и прее́мниче того́ во игýменстве, наста́вниче бра́тии духоно́сный! Ты до́бре упа́сл еси́ ста́до слове́сных ове́ц, житие́м свои́м показýя пра́вило ве́ры и о́браз послуша́ния, сего́ ра́ди с любо́вию зове́м тѝ: Ра́дуйся, преподо́бне Ни́коне, послуша́ния до́брый рачи́телю.
Икос 1
Áнгела земна́го и челове́ка Небе́снаго, преподо́бнаго Се́ргия, услы́шав житие́ и чудеса́, о́тче Ни́коне, се́рдцем свои́м распали́лся еси́, и я́ко еле́нь возжада́в испи́ти подви́жничества воды́, но́зе свои́ во оби́тель его́ святýю устреми́л еси́. И я́ко дре́во насажде́нное при исто́чнице во́д, ве́рою вся́ наставле́ния учи́теля своего́ восприи́м, в доброде́тели оби́льный пло́д прине́сл еси́, Отцá и Сы́на и Свята́го Дýха прославля́я. Мы же дивя́щеся семý, восхваля́ем тя си́це:
Ра́дуйся, от ю́ности житие́ во Христе́ возлюби́вый;
ра́дуйся, ве́тхаго челове́ка в себе́ смире́нием умертви́вый.
Ра́дуйся, нищетý духо́вную ра́ди Ца́рствия Небе́снаго избра́вый;
ра́дуйся, пла́чем по Бо́зе в се́рдцы свое́м умиле́ние стяжа́вый.
Ра́дуйся, кро́тость а́ввы Се́ргия унасле́дивый;
ра́дуйся, того́ воздержа́нию Бо́га ра́ди подража́вый.
Ра́дуйся, милосе́рдием к стра́ждущим ми́лость от Бо́га себе́ испроси́вый;
ра́дуйся, чи́стым се́рдцем свои́м Бо́га в Тро́ице сла́вимаго во све́те благода́тнем созерца́вый.
Ра́дуйся, преподо́бне Ни́коне, послуша́ния до́брый рачи́телю.
Кондак 2
Ви́дя суетý суе́т ми́ра сего́, во зле лежа́щаго, скороги́бнущую красотý его́ и пре́лесть земны́х бла́г, тле́нию прича́стных, вся сия́ Бо́га ра́ди отри́нул еси́, восхоте́в я́ко ве́рный и благи́й раб еди́ному Го́сподеви неле́ностно порабо́тати, в се́рдце свое́м воспева́я Емý: Аллилýиа.
Икос 2
Ра́зумом благоразсýдным богомýдрый Се́ргий о ю́ности твое́й разсужда́я, Ни́коне досточýдне, и, прови́дя богоуго́дное твое́ житие́, я́ко па́стырь до́брый во оби́тель Высо́цкую ко ученикý своемý Афана́сию посыла́ет тя во е́же сотвори́ти души́ твоея́ искýс, да восприи́меши досто́йно чин и́ноческий. Сего́ ра́ди зове́м ти:
Ра́дуйся, ве́рою измла́да пра́во пред Бо́гом ходи́вый;
ра́дуйся, во упова́нии жи́зни ве́чныя стопы́ своя́ ко спасе́нию напра́вивый.
Ра́дуйся, любо́вию Христо́вою се́рдце свое́ сла́дце уязви́вый;
ра́дуйся, ре́вностию о житии́ мона́шестем мно́гия удиви́вый.
Ра́дуйся, послуша́нию и́ноческому от ю́ности прилежа́вый;
ра́дуйся, чистото́ю целомýдрия хра́м души́ своея́ украси́вый.
Ра́дуйся, благода́тию Дýха Свята́го вся бла́га ми́ра сего́ презре́вый;
ра́дуйся, нищетý Христо́ву па́че зла́та и ка́мене че́стна возлюби́вый.
Ра́дуйся, преподо́бне Ни́коне, послуша́ния до́брый рачи́телю.
Кондак 3
Си́лою свы́ше осеня́емь, на высотý доброде́телей я́ко на го́ру возше́д, вся́ ко́зни душетле́ннаго велиа́ра разруши́л еси́ и, внегда́ дости́гнути тебе́ в ме́ру во́зраста и ра́зума, возврати́лся еси́ к отцý своемý духо́вному Се́ргию. Той же, ви́дев духо́вныма очи́ма благода́ть, я́же в тебе́, о́тче Ни́коне, в ра́довании возгласи́ Бо́гу: Аллилýиа.
Икос 3
Име́я неколе́блемо произволе́ние спасти́ дýшу свою́, преподо́бне Ни́коне, всеконе́чно вда́лся еси́ води́тельству богомýдраго учи́теля твоего́ áввы Се́ргия, две́ри се́рдца своего́ емý всеце́ло отверза́я, то́й же возлю́бленным сотаи́нником свои́м тя соде́ла. Тем и мы, воспева́я вели́чие по́двигов твои́х, с любо́вию зове́м ти такова́я:
Ра́дуйся, равноа́нгельнаго жития́ подража́телю;
ра́дуйся, до́брый купе́ц и би́сера ева́нгельскаго иска́телю.
Ра́дуйся, Го́споду Домовлады́це я́ко ве́рный и благи́й раб послужи́вый;
ра́дуйся, всю наде́жду спасе́ния души́ своея́ на Бо́га возложи́вый.
Ра́дуйся, во́лю свою́ отцý духо́вному до конца́ покори́вый;
ра́дуйся, ко гра́ду Небе́сному по стопа́м его́ ра́достно ше́ствовавый.
Ра́дуйся, мно́гим даро́м Бо́жиим со богомýдрым а́ввою прича́стниче;
ра́дуйся, кýпно с ни́м бога́тства неиждива́емаго сонасле́дниче.
Ра́дуйся, преподо́бне Ни́коне, послуша́ния до́брый рачи́телю.
Кондак 4
Бýри жите́йских треволне́ний неприча́стен бысть, преподо́бне, егда́ возврати́ся в ти́хое приста́нище, оби́тель Пресвяты́я Тро́ицы, иде́же в по́двизех неуста́нных я́ко фи́никс процвета́ше и благода́тию Бо́жиею от си́лы в си́лу восхожда́ше. Отцý же твоемý Се́ргию немощству́ющу, води́тельство ста́да Христо́ва им собра́ннаго насле́дова, и со смире́нием крест чинонача́лия восприя́в, благода́рно Го́споду Пастыренача́льнику воспе́: Аллилýиа.
Икос 4
Слы́шавше лю́дие правосла́внии о блаже́ннем преставле́нии вели́каго Се́ргия, возскорбе́ша зело́, я́ко лиши́шася такова́го наста́вника духо́внаго и чудотво́рца. Оба́че уте́шишася, ви́дяще тя досто́йна и добронра́вна ученика́ его́, Ни́коне приснопа́мятне, послуша́ния ра́ди поне́сшаго па́стырский труд, те́мже и слыши́ши от па́ствы твоея́ сицева́я:
Ра́дуйся, стра́сти жите́йския ми́ра сего́ победи́вый;
ра́дуйся, вся́ку доброде́тель всеблагогове́йно я́ко еди́ну испра́вивый.
Ра́дуйся, оде́ждею безстра́стия и сла́вою нетле́ния оболки́йся;
ра́дуйся, да́ра чудоде́йствия от Бо́га удосто́ивыйся.
Ра́дуйся, Се́ргия вели́каго достохва́льный насле́дниче;
ра́дуйся, игýменства его́ многорачи́тельный прее́мниче.
Ра́дуйся, Лозы́ и́стинныя, Христá, розго́ многопло́дная;
ра́дуйся, ни́во духо́вная, доброде́тельми плодоно́сная.
Ра́дуйся, преподо́бне Ни́коне, послуша́ния до́брый рачи́телю.
Кондак 5
Боготе́чней звезде́ подо́бяся, све́том благода́ти Бо́жия сия́я, озари́л еси́ путь ко спасе́нию всем приходя́щим к тебе́ с ве́рою. Мно́зи бо тружда́ющиися и обремене́ннии грехми́ в земны́х попече́ниих осуети́шася и во уны́ние впадо́ша: позна́вше же тя наста́вника мýдра и путевождя́ в Небéсныя оби́тели, со тща́нием притека́ху к тебе́, благода́рно пою́ще Бо́гу: Аллилýиа.
Икос 5
Ви́дим тя, преподо́бне Ни́коне, сосýд богоизбра́нный: любо́вию, кро́тостию и смире́нием от áввы Се́ргия испо́лненный, со А́нгелы Престо́лу Бо́жию предстои́ши, со Арха́нгелы Влады́ку славосло́виши, проше́ния ча́д твои́х к Го́рнему же́ртвеннику возно́сиши, моли́твами твои́ми Пресвяте́й Тро́ице священноде́йствуеши, и сы́ны Бо́жиими чтýщих па́мять твою́ содева́еши. Сего́ ра́ди, наде́жду на моли́твы твоя́ имýще, уми́льно зове́м ти:
Ра́дуйся, жития́ мона́шескаго смире́нный наста́вниче;
ра́дуйся, бра́тии во Христе́ кро́ткий и богомýдрый чинонача́льниче.
Ра́дуйся, Ева́нгельскаго уче́ния усе́рдный се́ятелю;
ра́дуйся, жа́твы Госпо́дни до́брый де́лателю.
Ра́дуйся, проти́ву духо́в зло́бы мýжественный вои́телю;
ра́дуйся, си́л де́монских до́блестный победи́телю.
Ра́дуйся, я́ко тобо́ю ста́до слове́сных ове́ц умножа́ется;
ра́дуйся, я́ко тебе́ ра́ди пото́цы Бо́жия благода́ти на него́ источа́ются.
Ра́дуйся, преподо́бне Ни́коне, послуша́ния до́брый рачи́телю.
Кондак 6
Пропове́дник немо́лчный заве́тов свята́го Се́ргия бя́ше, о́тче наш Ни́коне, по́двигом до́брым подвиза́яся и со тща́нием подража́я ему́: те́мже де́латель явля́ешися в вертогра́де Госпо́дни, вруче́ннем ти отце́м по дýху, и та́ко благи́я плоды́ собра́л еси́ во временá своя́, услажда́я ве́рных сердцá и Бо́гу поя́: Аллилýиа.
Икос 6
Возсия́ по лицý всея́ земли́ Рýсския сла́ва оби́тели Се́ргиевы, до́ма Живонача́льныя Тро́ицы, в ню́же я́ко в вертогра́д сла́достный притека́ху лю́дие в нýждах сýщии, иде́же обрета́ху по́мощь твои́ми моли́твами, преподо́бне о́тче Ни́коне, и те́плым твои́м хода́тайством пред престо́лом Царя́ Небéснаго. Те́мже позна́вше тя ско́раго помо́щника в земне́й юдо́ли, со умиле́нием воспева́ху ти сицева́я:
Ра́дуйся, и́стинный по́двигов áввы Се́ргия подража́телю;
ра́дуйся, все́х его́ духо́вных заве́тов храни́телю.
Ра́дуйся, мона́шеския уста́вы до́бре соблюда́яй;
ра́дуйся, к соверше́нству и́ноческих доброде́телей чáда своя́ препровожда́яй.
Ра́дуйся, пле́вел на ни́ве Бо́жией искорени́телю;
ра́дуйся, виногра́да Христо́ва искýсный насади́телю.
Ра́дуйся, я́ко тобо́ю ма́лая пýстынь сла́вно распространи́ся;
ра́дуйся, я́ко тобо́ю Цéрковь Рýсская возвесели́ся.
Ра́дуйся, преподо́бне Ни́коне, послуша́ния до́брый рачи́телю.
Кондак 7
Хотя́й Госпóдь все́м челове́ком спасти́ся и в позна́ние и́стины приити́, избрá тя пе́рвее, преподо́бне Ни́коне, я́ко послушли́ва и кро́тка, в ученикá вели́кому Се́ргию, по́слежде поста́ви по не́м отцá и па́стыря слове́сному ста́ду Христо́ву. Ты́ же я́ко свети́льник горя́й и светя́й дарова́нии Святáго Дýха, во стра́се и тре́пете служе́ние игýменства понесе́, и вне́млющих твоемý сло́ву к Бóгу приве́л еси́, да и ти́и с сыно́вним благодаре́нием всегдá сла́вят пречестно́е и великоле́пое и́мя Святы́я Живонача́льныя Тро́ицы, пою́ще: Аллилýиа.
Икос 7
Но́ваго застýпника пред Престо́лом Вседержи́теля прия́т тя вся странá Рýсская, я́ко вои́стинну в тебе́ псало́мски ми́лость и и́стина срето́стеся, пра́вда и ми́р облобыза́стася. Те́м ве́дуще тя предстоя́ща пред Триеди́ным Бо́гом душéю чи́стою и умоли́ти Его́ за лю́ди ве́рныя могýща, во е́же всем еди́ным бы́ти по обра́зу Святы́я Тро́ицы, благода́рне зове́м ти:
Ра́дуйся, лю́дем ве́рным земли́ Ру́сския неусы́пный храни́телю;
ра́дуйся, прибега́ющим к тебе́ в ча́с бра́ни усо́бныя и нахожде́ния иноплеме́нник защи́тителю.
Ра́дуйся, мно́гия заблýждшия о́вцы от грехо́внаго пути́ обрати́вый;
ра́дуйся, мно́жеству стра́ждущих печа́ль в ра́дость преложи́вый.
Ра́дуйся, ненави́стную ро́знь ми́ра сего́ посреде́ единоплеме́нник искореня́вый;
ра́дуйся, вожделе́нное едине́ние среди́ них во и́мя Тро́ицы насажда́вый.
Ра́дуйся, в житии́ свое́м Тро́ицу Единосýщную просла́вивый;
ра́дуйся, во и́мя Ея па́ству свою́ единомы́сленно жи́ти наста́вивый.
Ра́дуйся, преподо́бне Ни́коне, послуша́ния до́брый рачи́телю.
Кондак 8
Стра́нное отше́ствие твоé в затво́р ви́девше бра́тия, возскорбе́ху зело́, я́ко о́вцы без па́стыря пребыва́юще. Ты же име́яй жела́ние всеце́ло разреши́тися суеты́ мирски́я и со Христо́м бы́ти, ну́жнейшее их ра́ди избра́л еси́, затво́р оста́вль и па́ки игýменство восприя́в: да то́жде мýдрствуют, ту же и́мут любо́вь, единодýшни и единомýдрени сýще. И та́ко пожи́в, до́бре па́ству слове́сных ове́ц упа́с, в ра́йскую па́жить к Пастыренача́льнику Христý востече́, непреста́нно поя́: Аллилýиа.
Икос 8
Вся́каго благогове́ния и удивле́ния чýдо сиé досто́йно: оби́тель Се́ргиева, наше́ствию безбо́жных ага́рян бы́вшу, я́ко зерно́ в зе́млю падé и у́мре, оба́че ты, досточýдный о́тче Ни́коне, по́мощию Бо́жиею и поспеше́нием моли́тв áввы Се́ргия, неусы́пными труды́ свои́ми сию́ среди́ пе́пла возгради́л еси́, и па́ки прозябé и возрасте́, принося́щи стори́чный пло́д. Тем и до ны́не мно́жества хотя́щих спасти́ся во святýю оби́тель притека́ют, иде́же утеше́ние, исцеле́ние, спасе́ние обрета́ют, тебе́ же, я́ко насле́дующу по вели́ком áвве Се́ргии, ра́достно вопию́т:
Ра́дуйся, безмо́лвие затво́ра зело́ возлюби́вый;
ра́дуйся, всю наде́жду на про́мысл Бо́жий возложи́вый.
Ра́дуйся, во дни тя́жких испыта́ний в уны́ние ника́коже впада́вый;
ра́дуйся, бра́тию в часы́ лю́тых искуше́ний духóвне укрепля́вый.
Ра́дуйся, храня́щаго оби́тель промышле́ния Бóжия орýдием бы́ти удосто́ивыйся;
ра́дуйся, до́браго обетова́ния о живýщих в не́й сподо́бивыйся.
Ра́дуйся, в кре́пком упова́нии на промышле́ние Бо́жие поко́й обреты́й;
ра́дуйся, за вся приско́рбная благодаре́ние Го́споду принесы́й.
Ра́дуйся, преподо́бне Ни́коне, послуша́ния до́брый рачи́телю.
Кондак 9
Все́м житие́м свои́м, достоблажéнне Ни́коне, мýчеником уподо́бился еси́: ти́и бо мно́гия рáны за Христá на себé прия́ша, ты же вери́ги искуше́ний мýжественно прия́л еси́; ти́и свои́х хито́нов совлеко́шася и на поруга́ния у́ды своя́ преда́ша, ты же ве́тхаго челове́ка посто́м и моли́твою совле́клся еси́; ти́и блужда́ющих в нече́стии страда́ньми свои́ми ко Христý приведо́ша, ты же пра́ведным свои́м житие́м и богомýдрыми словесы́ мно́гия на и́стину наста́вил еси́. Те́мже, огне́м любвé Божéственныя распала́емь, вся от Бо́га посыла́емая со благодаре́нием терпели́вно поне́сл еси, Тро́ице Святе́й вопия́: Аллилýиа.
Икос 9
Вети́и суемýдреннии не мо́гут прия́ти открове́ние Пресвяты́я Тро́ицы, ты же, преподо́бне, во едине́нии дýха преподо́бному Се́ргию, я́коже сын отцý послужи́л еси́, па́че моли́твами его́ и богомýдрым води́тельством Отцý и Сынý и Свято́му Дýху всего́ себе́ поже́рл еси́. Тем быв Тро́ице вселе́ние и в Небе́сных оби́телех водвори́вся, слы́шиши от на́с таковáя:
Ра́дуйся, Живонача́льныя Тро́ицы хра́ме одушевле́нный;
ра́дуйся, мно́гих даро́в Бо́га Вы́шняго сосýде благоуха́нный.
Ра́дуйся, в служе́нии Святéй Тро́ице áввы Се́ргия соприча́стниче;
ра́дуйся, в почита́нии и́мени Отца́ и Сы́на и Свята́го Дýха мона́хов чýдный наста́вниче.
Ра́дуйся, чи́стым се́рдцем та́йны Святы́я Тро́ицы созерца́вый;
ра́дуйся, глубино́ю ве́ры своея́ любо́вь Тро́ичную познава́вый.
Ра́дуйся, чре́з безмо́лвие ум сво́й в Го́рняя простира́вый;
ра́дуйся, Цáрствие Бо́жие внутрь се́рдца восприя́вый.
Ра́дуйся, преподо́бне Ни́коне, послуша́ния до́брый рачи́телю.
Кондак 10
Спасти́ хотя́ дýшу свою́, разсе́кл еси́ мо́ре сла́ное страсте́й и похоте́й, и я́ко сто́лп светоза́рный до небéс досяза́яй, стра́ждущих и обременéнных путеводи́л еси́ и наставля́л любо́вию Боже́ственною. Ти́и же в обновле́нии дýха прии́мше освяще́ние душáм, ко спасе́нию теча́ху невозвра́тно, и Тро́ице Святе́й со умиле́нием воспева́ху: Аллилýиа.
Икос 10
Стенá обре́лся еси́, о́тче Ни́коне, всем с ве́рою к тебе́ прибега́ющим: хра́мины душе́вныя ученико́в свои́х на непоколеби́мем основа́нии оте́ческих преда́ний премýдро возгражда́я, оби́тель трудолю́бно устроя́я, чýдную це́рковь во и́мя Тро́ицы Живоначáльныя и в похвалý áввы Се́ргия воздви́гл еси́, ра́дость и весе́лие лю́дем да́руя. Те́мже слы́шиши от всех похвалы́ сицевы́я:
Ра́дуйся, в безмо́лвней моли́тве Божéственныя Тро́ицы тайнозри́телю;
ра́дуйся, преподо́бнаго Се́ргия, служи́теля Святы́я Тро́ицы, ре́вностный после́дователю.
Ра́дуйся, иконопи́сцев изря́дных Андре́я и Дании́ла украси́ти цéрковь Святы́я Тро́ицы призва́вый;
ра́дуйся, преподо́бному Андре́ю о́браз Пресвяты́я Тро́ицы на похвалý áвве Се́ргию написа́ти повеле́вый.
Ра́дуйся, обéтов мона́шеских благогове́йный храни́телю;
ра́дуйся, хра́ма души́ своея́ на ка́мени ве́ры и́стый зижди́телю.
Ра́дуйся, я́ко незы́блемою наде́ждею на Бо́га спаса́лся еси́;
ра́дуйся, я́ко во Цáрствии Небе́снем диади́мою любвé венча́лся еси́.
Ра́дуйся, преподо́бне Ни́коне, послуша́ния до́брый рачи́телю.
Кондак 11
Пéние всеумиле́нное прино́сим ти, óтче Ни́коне, взира́юще на богоуго́дное и сла́вное твоé житие́: ты бо суетý и скороте́чность ми́ра сегó разумева́я, че́сть и сла́ву земнýю возненави́дел еси́, сла́вы и че́сти в Го́рних ищá, мир преми́рный обре́л еси́. Сего́ ра́ди Христý до́брый пло́д стокра́ты прине́сл еси́, пе́рвее зе́млю се́рдца своего́ возде́лав, по́двиги многоразли́чныя соверша́я и ско́рби многообра́зныя мýжественне претерпева́я, в моли́твах сле́зы те́плыя пролива́я и в за́поведях Госпо́дних преуспева́я. Мы же, житию́ твоему́ дивя́щеся, Бо́гу вопие́м: Аллилýиа.
Икос 11
Светоза́рною звездо́ю просия́л еси́ в земли́ Ра́донежской, о́тче на́ш Ни́коне, освеща́я держа́вы на́шея концы́, и́бо трисо́лнечный восприя́л еси́ свет, стопа́м вели́каго Се́ргия после́дуя. Мы же, чáда твоя́, на свет до́брых дел твои́х взира́юще и с любо́вию к тебе́ притека́юще, просвеще́ние и очище́ние душáм на́шим прие́млем, тебе́ же благода́рственно пое́м:
Ра́дуйся, яко по́двигом до́брым неосла́бно подвиза́лся еси́;
ра́дуйся, я́ко тече́ние многоско́рбнаго земна́го пути́ пра́во сконча́л еси́.
Ра́дуйся, я́ко вéру непоколеби́му в Бóга, в Тро́ице сла́вимаго, соблю́л еси́;
ра́дуйся, я́ко вене́ц пра́вды, угото́ванный мздовоздая́телем Бо́гом, восприя́л еси́.
Ра́дуйся, ле́ствицею духо́вною ко врато́м Рая́ возведе́нный;
ра́дуйся, в ра́йскую хра́мину моли́твами отцá своего́ введе́нный.
Ра́дуйся, та́мо невече́рним све́том осиява́емый;
ра́дуйся, ве́чною сла́вою Царя́ царе́й и Го́спода господе́й озаря́емый.
Ра́дуйся, преподо́бне Ни́коне, послуша́ния до́брый рачи́телю.
Кондак 12
Благода́ти Бо́жия испо́лнися оби́тель Тро́ицкая, о́тче Ни́коне, обре́тшу тебе́ многоцеле́бныя мо́щи духо́внаго отца́ твоего́, и́бо я́коже дре́вле ми́лотию проро́ка Илии́ сугýбая си́ла ученикý его́ низпослáся, та́ко и откры́тием моще́й ве́рным дар свы́ше даде́ся. Мы же, благода́ть Святы́я Тро́ицы стяжа́ти ча́юще и к моще́м преподо́бнаго а́ввы Се́ргия прибега́юще, уми́льно вопие́м Богу: Аллилýиа.
Икос 12
Пое́м тя, преподо́бне Ни́коне, уго́дника Бо́жия, Пресвятýю Тро́ицу непреста́нно воспева́юща, и ве́мы, я́ко не забыва́еши нас, убо́гих чад твои́х: по преселе́нии бо в черто́ги Небе́снаго Царя́ твори́ши чудеса́, заблýждших вразумля́еши, недýгующих исцеля́еши, бе́сных свобожда́еши, и вся поле́зная ко спасе́нию на́м да́руеши. Ны́не приими́ сия́ хвале́бная словеса́ любо́вию чтýщих тя:
Ра́дуйся, стезе́ю Ева́нгельскою от земли́ к Небеси́ возше́дый;
ра́дуйся, крест мона́шескаго жития́ безро́потно понесы́й.
Ра́дуйся, и́го Христо́во на ра́мена своя́ ничто́же сумня́ся возложи́вый;
ра́дуйся, я́ко ско́рби и тяготы́ Госпо́дь Иисýс в легкотý тебе́ преложи́.
Ра́дуйся, я́ко ве́чное упокое́ние ны́не обрета́еши;
ра́дуйся, я́ко Святýю Тро́ицу со А́нгелы и все́ми святы́ми при́сно прославля́еши.
Ра́дуйся, я́ко дерзнове́нием моли́тв твои́х пред Бо́гом всех чтýщих тя утеша́еши;
ра́дуйся, я́ко всех в мо́ри жите́йстем обурева́емых окормле́нием не оставля́еши.
Ра́дуйся, преподо́бне Ни́коне, послуша́ния до́брый рачи́телю.
Кондак 13
О пресла́вный Бо́жий уго́дниче и те́плый о нас моли́твенниче о́тче Ни́коне, приими́ сие́ ма́лое на́ше благодаре́ние. Испроси́ нам у человеколюби́ваго Христа́ Бо́га на́шего ве́ры правосла́вныя утвержде́ние и в доброде́телех преспе́яние, недýгующим исцеле́ние и согреша́ющим чре́з покая́ние проще́ние, на Стра́шнем же суде́ до́браго отве́та, да вси вкýпе воспое́м Бо́гови: Аллилýиа.
Сей кондак глаголи трижды. И паки чтется первый икос и кондак первый
Молитва
Преподо́бне и преблаже́нне о́тче наш Ни́коне, подража́телю, сподви́жниче и насле́дниче дарова́ний Богоно́снаго отца́ на́шего Се́ргия, и́же честны́я своя́ мо́щи в рука́х твои́х, я́коже Илия́ ми́лоть свою́ в рука́х Елисе́я, оста́вил есть, тобо́ю в зе́млю сокрыва́емыя, не а́ки в погребе́ние, но во удостовере́ние нетле́ния, и тобо́ю открыва́емыя во явле́ние чуде́с и во оби́льнейшее излия́ние исто́чника исцеле́ний. К тебе́, ку́пно с ним на Небесе́х живу́щему и ку́пно с ним на земли́ блаже́нне почива́ющему, с любо́вию простира́ем серде́чная жела́ния и моле́бная словеса́, тебе́ предлага́юще на́ша не́мощи и ско́рби, и ну́жды, душе́вныя же и теле́сныя. Приими́ недосто́йная на́ша моле́ния, соверши́ и вознеси́ я́ ко Многоми́лостивому и Великодарови́тому Влады́це на́шему Го́споду и Бо́гу Иису́су Христу́. Моли́ся Ему́, да благослови́т и сохрани́т страну́ на́шу и святу́ю оби́тель твою́ в ми́ре и тишине́, нам же всем да пода́ст благода́тию Свое́ю грехо́в оставле́ние, неду́гов исцеле́ние, от бед избавле́ние, искуше́ний избы́тие, в ско́рбех утеше́ние, в ну́ждах благовре́менну по́мощь, жития́ исправле́ние, наипа́че же в ве́ре преспе́яние, в наде́жде утвержде́ние, в любви́ возраста́ние, душ на́ших спасе́ние, я́ко да и во вре́меннем сем житии́, соверше́ннее же в ве́чном Его́ Ца́рствии, вы́ну прино́сим Ему́ сла́ву, честь и поклоне́ние, со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом во ве́ки веко́в. Ами́нь.
Молитва ина.
О свяще́нная главо́, Це́ркве Правосла́вныя похвало́, святы́й уго́дниче Бо́жий и досточу́дный служи́телю Животворя́щия Тро́ицы, преподо́бне и богоно́сне о́тче Ни́коне, при́сный учениче́ и блаже́нный насле́дниче а́ввы Се́ргия! Ты́ положи́л еси́ ве́лия труды́, благоустроя́я насажде́нный и́м вертогра́д, до́м Животворя́щия Тро́ицы, луча́ми све́та своего́ озаря́ющ всю́ страну́ на́шу и су́щих в мо́ри дале́че. Кто́ исчи́слит твоя́ по́двиги, нощна́я бде́ния, сле́зы умиле́ния, серде́чныя моли́твы и душе́вная воздыха́ния? Кто́ ви́де твою́ неуста́нную бра́нь со ду́хи зло́бы поднебе́сными? Кто́ слы́ша глаго́лы благодаре́ния, исходя́щия из у́ст твои́х, егда́ Влады́ка Госпо́дь избавля́ше тя́ в лю́тых обстоя́ниих и вра́жеских напа́стех? Вои́стину от ю́ности ты́ благоугоди́л еси́ Подвигополо́жнику Христу́ все́м свои́м житие́м и умно́жил еси́ да́нныя тебе́ Бо́гом тала́нты во спасе́ние души́ своея́ и вруче́ннаго тебе́ ста́да слове́сных ове́ц. Приими́, о́тче святы́й, на́шу хвалу́ и благодаре́ние за вся́ твоя́ моли́твы о чту́щих святу́ю па́мять твою́, да вне́млет Всеблаги́й Госпо́дь твоему́ предста́тельству пред Ни́м о на́с, немощны́х и убо́гих рабе́х Его́. Помози́ ча́дом твои́м, во и́ночестве подвиза́ющимся и с ве́рою притека́ющим ко гро́бу твоему́, да никто́же от ни́х впаде́т в се́ти вра́жия и поги́бнет для жи́зни ве́чныя. Умоли́ Нача́льника жи́зни Христа́, да изведе́т из темни́цы ду́ши на́ша и напра́вит стопы́ на́ша к Ца́рству ве́чных бла́г, иде́же непреста́нно сла́вится Пречестно́е и великоле́пое и́мя Отца́ и Сы́на и Свята́го Ду́ха. Ами́нь.
Текст акафиста одобрен для употребления за богослужением и в домашней молитве на заседании Священного Синода
Назад к списку
