001 Пресвятой Владычице нашей Богородице в честь иконы Ея Мироносицкая или Царевококшайская (акафист)
Кондак 1
Избра́нней от всех родо́в Де́ве, Пречи́стей Богоро́дице, изво́лившей ли́ка Своего́ о́браз в земли́ на́шей яви́ти и просла́вити, пе́сни и пе́ния духо́вныя ны́не принесе́м, То́ю бо язы́ков тьма неве́рия разгоня́ется, и лю́дие науча́ются пе́ти: Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Икос 1
А́нгел все мно́жество на небеси́, род же челове́ческий зде на земли́ немо́лчными усты́ прославля́ет Тя, Де́во, Гаврии́ла Архистрати́га подража́юще, внегда́ зва́ти Тебе́ си́це:
Ра́дуйся, Небесе́ Цари́це;
ра́дуйся, земли́ Храни́тельнице.
Ра́дуйся, А́нгелов непреста́нное Велича́ние;
ра́дуйся, челове́ков ти́хое Приста́нище.
Ра́дуйся, Киво́те Бо́га Сло́ва;
ра́дуйся, Ски́ние Небе́сная.
Ра́дуйся, моли́тв на́ших ско́рая Услы́шательнице;
ра́дуйся, Влады́ки Христа́ Умилостиви́тельнице.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 2
Ви́дя свет ве́лий а́ки столп о́гненный, на селе́ трудя́йся челове́к не́кий, Андре́й и́менем, прите́к узре́ о́браз Твой, Госпоже́ Богоро́дице, оба́че не возмо́же прия́ти его́, моли́тву нача́т твори́ти, поя́ Бо́гу: Аллилу́иа.
Икос 2
Разуме́ Андре́й, раб Бо́га Вы́шняго, я́ко яви́ся о́браз чудотворя́щ, Тебе́, Небесе́ и земли́ Цари́це, моли́тву сотвори́, и снем с дре́ва ико́ну новоявле́нную, поста́ви ю́ в до́ме свое́м. Мы же, дивя́щеся Твоему́ о земли́ на́шей произволе́нию, воспева́ем Ти си́це:
Ра́дуйся, о́бразы святы́ми зе́млю Ру́сскую просла́вльшая;
ра́дуйся, те́ми ду́хи зло́бы разгна́вшая.
Ра́дуйся, стра́сти душ и теле́с ве́рных врачу́ющая;
ра́дуйся, неве́рныя и глумли́выя ско́ро наказу́ющая.
Ра́дуйся, чудеса́ мно́гая ико́ною Твое́ю нам явля́ющая;
ра́дуйся, язы́ческая ве́рования разоря́ющая.
Ра́дуйся, путь и́стинный нам указу́ющая;
ра́дуйся, ко Христу́ ше́ствующия покрыва́ющая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 3
Си́лы многоразли́чныя де́яшася о ико́не Твое́й, Де́во, мно́зи бо неду́жнии исцеле́ша, слепи́и прозре́ша, хро́мии пря́мо ходи́ти нача́ша, вси же ве́рнии воззва́ша Сы́ну Твоему́ и Бо́гу на́шему: Аллилу́иа.
Икос 3
Име́я о́браз Твой, Де́во, град Царевококша́йск све́тло украша́ется: новопросвеще́нный бо наро́д мари́йский Хода́таицу те́плу прие́млет, ве́ра христиа́нская в лю́дех утвержда́ется, слове́сныя о́вцы умножа́ются. Сего́ ра́ди песнь возсле́м Ти сицеву́ю:
Ра́дуйся, хромы́я пря́мо ходи́ти сотворя́ющая;
ра́дуйся, слепы́м очеса́ отверза́ющая.
Ра́дуйся, гугни́вым ре́чи уясня́ющая;
ра́дуйся, пла́мень страсте́й угаша́ющая.
Ра́дуйся, моле́ния ми́лостивно прие́млющая;
ра́дуйся, печа́лем и ско́рбем осла́бу ско́ро подаю́щая.
Ра́дуйся, в житии́ на́шем ско́рое Вспоможе́ние;
ра́дуйся, и по сме́рти неотсту́пная нам Хода́таице.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 4
Бу́ри помышле́ний сумни́тельных зрим о Тебе́ утоля́емыя, Пречи́стая Де́во, ходи́ти пра́во путе́м Христо́вых за́поведей нас науча́ющая: предста́тельством бо Твои́м неве́рствия и язы́ческих шата́ний в земли́ на́шей отлуча́емся, дерза́юще же пое́м Бо́гу: Аллилу́иа.
Икос 4
Слы́шав царь великоимени́тый, я́ко обре́теся честны́й о́браз Богома́тере Чи́стыя, повеле́ в первопресто́льный град принести́ ико́ну Твою́, я́ко да вси лю́дие получа́т от Тебе́ неизглаго́ланныя ми́лости и науча́тся пе́ти Тебе́ си́це:
Ра́дуйся, заблу́дшия на путь пра́вый наставля́ющая;
ра́дуйся, обурева́емых сердца́ све́том Сы́на Твоего́ просвеща́ющая.
Ра́дуйся, неду́ги на́ша ско́ро врачу́ющая;
ра́дуйся, враги́ христиа́н гро́зно устраша́ющая.
Ра́дуйся, окамене́нная сердца́ еле́ем моли́тв умягча́ющая;
ра́дуйся, наве́ты бесо́вския нивочто́же вменя́ющая.
Ра́дуйся, душа́м на́шим мир подава́ющая;
ра́дуйся, проше́ния на́ша во бла́го исполня́ющая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 5
Боготе́чная звезда́ о́браз Неискусобра́чныя яви́ся, в нощи́ неве́рия и лжеуче́ний язы́ческих просия́вшая. Град же Москва́ ту́ю прия́т на вре́мя не́кое и воспе́ Бо́гу: Аллилу́иа.
Икос 5
Ви́девше лю́дие земли́ Ру́сския ве́лию ми́лость Твою́ к ним, во явле́нии ико́н мно́гих проявля́емую, Де́во, воспева́ху Твой покро́в градо́м и ве́сем и Твое́ промышле́ние о христоимени́тых лю́дех, пою́ще Ти та́ко:
Ра́дуйся, Ма́ти Христа́ Бо́га на́шего;
ра́дуйся, воззва́ние Ада́ма па́дшаго.
Ра́дуйся, Трапе́зо Небе́снаго Царя́;
ра́дуйся, Престо́ле на о́блацех Седя́щаго.
Ра́дуйся, те́мных духо́в Прогони́тельнице;
ра́дуйся, си́рым те́плая Предста́тельнице.
Ра́дуйся, вдови́цам ско́рое Утеше́ние;
ра́дуйся, ве́ры Христо́вы в лю́дех Утвержде́ние.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 6
Пропове́дающе чудеса́ ве́лия, от ико́ны явля́емая, мно́зи лю́дие возвеща́ху ми́лости Влады́чицы на́шея, ве́рным быва́ющия, подвиза́ющия нас пе́ти Бо́гу: Аллилу́иа.
Икос 6
Возсия́ па́ки свет от ико́ны Де́вы Нетле́нныя в земли́ Мари́йской: повеле́ бо царь Алекси́й о́браз Влады́чицы возврати́ти, и оби́тель в честь мироно́сиц святы́х на ме́сте явле́ния устро́ити, я́ко да в ней живу́щии и́ноцы подвиза́ются пе́ти си́це:
Ра́дуйся, земли́ Ру́сския неусы́пная Храни́тельнице;
ра́дуйся, малове́рных строга́я Вразуми́тельнице.
Ра́дуйся, млады́х Наста́внице;
ра́дуйся, ста́рых Укрепи́тельнице.
Ра́дуйся, Купино́ неопали́мая;
ра́дуйся, Стено́ неруши́мая.
Ра́дуйся, христиа́н Защище́ние;
ра́дуйся, благочести́вых Ра́дование.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 7
Хотя́ исцеле́ние получи́ти, воево́да Царе́ва гра́да проси́ принести́ о́браз новоявле́нный во град и в собо́рней це́ркви поста́вити, я́ко да моле́бствия соверша́тися бу́дут и здра́вие пода́стся всем тре́бующим, пою́щим Бо́гу: Аллилу́иа.
Икос 7
Но́вое зна́мение сотвори́ла еси́, Де́во Неискусобра́чная, воево́де бо и бли́жним его́ здра́вие подала́ еси́. Той же проси́ кре́стным ше́ствием с явле́нным о́бразом Твои́м окре́стныя ве́си освяща́ти, я́ко да ту живу́щии здра́вие по моли́твам прии́мут, Тебе́ же, я́ко ско́рой Хода́таице песнь сицеву́ю принесу́т:
Ра́дуйся, Воево́до непобеди́мая;
ра́дуйся, Небе́сных Сил Цари́це.
Ра́дуйся, враго́в гро́зное посрамле́ние;
ра́дуйся, рабо́в Твои́х ми́лостивая Послу́шательнице.
Ра́дуйся, из глубины́ зол извлача́ющая;
ра́дуйся, на высоту́ доброде́телей возводя́щая.
Ра́дуйся, явле́нием ико́ны Твоея́ град Царевококша́йск возвесели́вшая;
ра́дуйся, лю́дем заступле́ние подаю́щая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 8
Стра́нно бе язы́чником виде́ти, я́ко чудеса́ оби́льно точа́тся лю́дем правосла́вным, пред о́бразом Чи́стыя Де́вы моля́щимся, поле́зная ко спасе́нию приима́ющим и воспева́ющим Бо́гу: Аллилу́иа.
Икос 8
Вси ве́рнии чтим Тя, Ма́ти Бо́жия, во чре́ве Спасе́ние на́ше Прии́мшую и ми́рови но́вый живо́т Подаю́щаго Ро́ждшую. Те́мже христоимени́тии лю́дие, о́браз Твой честны́й стяжа́вшии я́ко ве́лие утвержде́ние земли́ Мари́йския, со благогове́нием пою́т Ти сицева́я:
Ра́дуйся, Це́ркве Правосла́вныя утвержде́ние;
ра́дуйся, земли́ на́шея кре́пкое забра́ло.
Ра́дуйся, по́стников похвало́;
ра́дуйся, де́вственных ликова́ние.
Ра́дуйся, я́ко Тобо́ю отго́нится рыда́ние;
ра́дуйся, я́ко Тобо́ю прино́сится ра́дование.
Ра́дуйся, избра́нная в жена́х;
ра́дуйся, Се́мя жи́зни нам ро́ждшая, Христа́.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 9
Вся́кое естество́ А́нгельское воспева́ет Тя, Богоро́дице, Херуви́м бо вы́шшая яви́лася еси́ и Серафи́м сла́внейшая ви́дена была́ еси́. Мы же, житию́ Твоему́ в чистоте́ и пра́вде дивя́щеся, зове́м Бо́гу: Аллилу́иа.
Икос 9
Вети́йствовати язы́к не мо́жет, Де́во, ка́ко по достоя́нию воспе́ти чи́стое житие́ Твое́ и ми́лости, нам явля́емыя. Я́ко ры́бы безгла́сны явля́емся вси пред вели́чеством сла́вы Твоея́, оба́че изрещи́ потщи́мся ю́ словесы́ сицевы́ми:
Ра́дуйся, Голуби́це чи́стая;
ра́дуйся, Ле́ствице, Е́юже возво́димся в Небе́сная.
Ра́дуйся, Ковче́же жи́зни Пода́теля;
ра́дуйся, Очисти́лище ми́ру я́вльшееся.
Ра́дуйся, на скрижа́лех се́рдца во́лю Бо́жию запечатле́вшая;
ра́дуйся, Ста́мно, нетле́нную Пи́щу нам дарова́вшая.
Ра́дуйся, Ка́меню, Во́ду живу́ю лю́дем источи́вый;
ра́дуйся, злата́я Кади́льнице, арома́т Свята́го Ду́ха излива́ющая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 10
Спасе́ния от язв душ и теле́с и́щуще, мно́зи и́ноцы во оби́тель Твою́ собира́хуся, Ма́ти Све́та, и та́мо в посте́ и бде́нии дни своя́ жи́тельствоваху, пою́ще Бо́гу: Аллилу́иа.
Икос 10
Стена́ и заступле́ние лю́дем Твои́м яви́лася еси́, Чи́стая, внегда́ годи́на гоне́ний на Це́рковь Христо́ву наста́. А́ще и разоре́на бысть оби́тель Твоя́, о Богома́ти, но не исчезе́ до конца́, промышле́нием же Твои́м вре́мя благоприя́тно приспе́ и нача́ша собира́тися ве́рнии, я́ко да послу́жат Бо́гу и Тебе́ песнь та́ко воспою́т:
Ра́дуйся, очеса́ теле́сная ско́ро врачу́ющая;
ра́дуйся, и духо́вная очеса́ отверза́ющая.
Ра́дуйся, по́стником жи́ти на ме́сте чудесе́ Твоего́ благоволи́вшая;
ра́дуйся, оби́тель Мироно́сицкую ми́лостию Свое́ю не оставля́ющая.
Ра́дуйся, серде́чных неду́гов Исцели́тельнице;
ра́дуйся, рассла́бленным от одра́ Возставле́ние.
Ра́дуйся, печа́льным ско́рое Утеше́ние;
ра́дуйся, обурева́емым страстьми́ осла́бу да́рующая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 11
Пе́ние похва́льное прино́сят Ти, Де́во, архиере́и и свяще́нницы, мона́си и мирсти́и, предстоя́ще пред ди́вным о́бразом Твои́м, чудеса́ точа́щим всем, с ве́рою вопию́щим Бо́гу: Аллилу́иа.
Икос 11
Свет ра́дости возсия́ нам, внегда́ моли́твы лампа́да па́ки возжже́на бысть на ме́сте явле́ния о́браза Влады́чицы и жен мироно́сиц, гро́бу Живода́вца предстоя́щих. Мы же, дивя́щеся таково́му Богома́терню произволе́нию, си́це вопие́м:
Ра́дуйся, всем притека́ющим к Тебе́ любо́вь Свою́ простира́ющая;
ра́дуйся, на́ша не́мощи оби́льно восполня́ющая.
Ра́дуйся, бли́жних люби́ти науча́ющая;
ра́дуйся, оби́дящих проща́ти наставля́ющая.
Ра́дуйся, в по́двизех су́щия укрепля́ющая;
ра́дуйся, гре́шники к покая́нию призыва́ющая.
Ра́дуйся, от сна грехо́внаго возбужда́ющая;
ра́дуйся, от рва поги́бели возводя́щая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 12
Благода́ть Твою́ оби́льно пода́ждь всем с ве́рою и любо́вию притека́ющим под кров Твой, Богоро́дице Де́во, изво́лившая зе́млю Мари́йскую о́бразы Твои́ми просвети́ти, я́ко да та́мо живу́щии просла́вят И́стиннаго Бо́га, зову́ще Ему́: Аллилу́иа.
Икос 12
Пою́ще неисче́тная благодея́ния Твоя́, Ма́ти Бо́жия, к ро́ду челове́ческому, наипа́че благодари́м Тя, я́ко неусы́пную Хода́таицу, ма́тернюю любо́вь к нам явля́ющую. Сего́ ра́ди песнь прино́сим Ти сицеву́ю:
Ра́дуйся, Русь Правосла́вную возлюби́вшая;
ра́дуйся, зе́млю Мари́йскую ми́лостию Свое́ю не оста́вльшая.
Ра́дуйся, ве́ру Христо́ву в земли́ на́шей утверди́вшая;
ра́дуйся, отце́м и ма́терем на́шим в по́двизех преспе́яние дарова́вшая.
Ра́дуйся, во́инство Христо́во на враги́ укрепля́ющая;
ра́дуйся, о нас пред Бо́гом усе́рдно моля́щаяся.
Ра́дуйся, ненаде́янным наде́жду спасе́ния подаю́щая;
ра́дуйся, си́рым и вдо́вым прибе́жище и утеше́ние да́рующая.
Ра́дуйся, Пречи́стая Де́во Богоро́дице, ми́лость Сы́на Твоего́ нам явля́ющая.
Кондак 13
О Всеблагослове́нная Де́во Богоро́дице, услы́ши похва́льное пе́ние сие́, от серде́ц на́ших Тебе́ возноси́мое, и не оста́ви нас ми́лостию Твое́ю: соше́дшияся лю́ди благослови́, ра́зум наш уцелому́дри и братолю́бие утверди́, и всех наста́ви пе́ти Сы́ну Твоему́: Аллилу́иа.
(Этот кондак читается трижды, затем икос 1 и кондак 1)
Молитва
О Всепе́тая Ма́ти, Небесе́ и земли́ Цари́це, Де́во Богоро́дице, изво́лившая зе́млю на́шу просвети́ти явле́нием чудотво́рнаго о́браза Твоего́ вку́пе с пречестны́ми жена́ми мироно́сицами! К Тебе́ припа́даем, Госпоже́, к Тебе́ из глубины́ серде́чныя зове́м: не оста́ви нас си́рых, бу́ди нам те́плое приста́нище, обурева́емым жите́йскими страстьми́ и во гресе́х жизнь свою́ иждива́ющим. Яви́ нам неоскудева́ющую любо́вь Твою́, сохрани́ град же и лю́ди, Тя сла́вящия, в ве́ре правосла́вней нас утверди́, нече́стие язы́ческое отжени́, любо́вь друг ко дру́гу умно́жи. Оби́тель Твою́ непоколеби́му сотвори́, и в ней тружда́ющияся ко спасе́нию упра́ви, я́ко да воспое́м вели́чия Твоя́ и просла́вим Единоро́днаго Сы́на Твоего́, Го́спода на́шего Иису́са Христа́ вку́пе со Безнача́льным Его́ Отце́м и Животворя́щим Его́ Ду́хом во вся дни живота́ на́шего, ны́не и при́сно и во ве́ки веко́в. Ами́нь.
Текст акафиста одобрен для употребления за богослужением и в домашней молитве на заседании Священного Синода 16 июля 2026 года (журнал № 55).
Назад к списку
