007 Великомученице Ксении Пелопонесской (акафист)

Кондак 1

Избра́нная уго́днице Бо́жия, све́том Христо́вым оде́янная и огне́м Боже́ственным осия́нная, свята́я великому́ченице Ксе́ние, восхваля́ем ангелоподо́бное житие́ и честна́я страда́ния твоя́; ты же, я́ко иму́щая от Го́спода си́лу свобожда́ти ве́рныя от тьмы духо́вныя, да́руй исцеле́ние и заступле́ние с любо́вию тебе́ зову́щим: Ра́дуйся, Ксе́ние, му́ченице многострада́льная.

Икос 1

А́нгельскою чистото́ю ко Го́споду прибли́зившаяся и с му́ченическим ли́ком ны́не веселя́щаяся, Ксе́ние пресла́вная, то́ки по́мощи всем излива́еши и покрови́тельство свое́ да́руеши вопию́щим ти:

Ра́дуйся, чистоты́ зерца́ло.

Ра́дуйся, и́долов плаче́вное пораже́ние.

Ра́дуйся, сомнева́ющихся ободре́ние.

Ра́дуйся, смире́нных ра́дование.

Ра́дуйся, де́вственников похвало́ и украше́ние.

Ра́дуйся, благода́тным све́том осия́нная.

Ра́дуйся, Ксе́ние, му́ченице многострада́льная.

Кондак 2

Ви́дящи непостоя́нство ми́ра сего́ многосу́етнаго, житие́ земно́е к го́рним напра́вила еси́, Ксе́ние преблаже́нная, хи́трости злолука́ваго врага́ посто́м и моли́твою побежда́я и непреста́нно Бо́гу поя́: Аллилу́иа.

Икос 2

Ра́зумом Боже́ственным просвеще́нная, ум и се́рдце к Небе́сному оте́честву впери́ла еси́, великому́ченице, и, во благоче́стии преуспева́я, сокро́вищем нетле́нным обогати́лася еси́. Те́мже ны́не Це́рковь Святу́ю украша́еши и гра́ду Каламо́ну покрови́тельствуеши, ве́рным же боле́зни теле́сныя исцеля́еши и смрад греха́ от них проганя́еши, восхваля́ющих тя си́це:

Ра́дуйся, хра́ме благода́тный.

Ра́дуйся, голу́бице, сия́ющая чистото́ю.

Ра́дуйся, сми́рно, целому́дрием благоуха́ющая.

Ра́дуйся, неду́жныя врачу́ющая.

Ра́дуйся, к Небеси́ нас направля́ющая.

Ра́дуйся, восхваля́ти Го́спода нас науча́ющая.

Ра́дуйся, Ксе́ние, му́ченице многострада́льная.

Кондак 3

Си́лою Всевы́шняго, Ксе́ние богому́драя, де́монския нападе́ния попира́еши, искуше́ния врага́ ро́да челове́ческаго отгоня́еши и кре́пкия у́зы его́ разруша́еши, по́хоть пло́ти и оче́с усмиря́еши, Бо́гу же пе́ти всех науча́еши: Аллилу́иа.

Икос 3

Име́я тща́ние со Христо́м вы́ну пребыва́ти, муче́ний лю́тых не убоя́лася еси́ и на столбе́ ви́сящи, пло́ти своея́ строга́ние и прижига́ние му́жественно претерпе́ла еси́; последи́ же от А́нгела утеше́ние и исцеле́ние улучи́ла еси́. Мы же, дивя́щеся таково́му терпе́нию твоему́, во умиле́нии серде́ц зове́м ти:

Ра́дуйся, ма́слино многопло́дная.

Ра́дуйся, све́том Боже́ственным оде́янная.

Ра́дуйся, све́та Небе́снаго сия́ние.

Ра́дуйся, виногра́де вертогра́да Христо́ва.

Ра́дуйся, Христа́ досто́йно воспева́ющая.

Ра́дуйся, велиа́ра страда́ниями свои́ми попира́ющая.

Ра́дуйся, Ксе́ние, му́ченице многострада́льная.

Кондак 4

Бу́ря муче́ний от нечести́ваго иге́мона, ю́же воздви́же на тя, а́гнице свята́я, во е́же поколеба́ти ве́ру твою́ во Христа́, ничи́мже возмо́же смути́ти тя, Ксе́ние: ты бо, неради́вши о му́ках и му́жеством вооружи́вшися, ра́достно вопия́ла еси́ Го́сподеви: Аллилу́иа.

Икос 4

Слы́шав от тебе́ злочести́вый прави́тель Дометиа́н словеса́ о ве́ре Христо́вой, распаля́шеся на тя зло́бою и, по жестокосе́рдию своему́, на многообра́зныя му́ки предаде́ тя, оба́че ничто́же успе́ о укрепля́ющем тя Христе́ Иису́се. Те́мже, помина́юще честна́я страда́ния твоя́, со умиле́нием зове́м ти:

Ра́дуйся, доброде́тельми сия́ющая.

Ра́дуйся, в ве́ре утвержда́ющая.

Ра́дуйся, кро́тости науча́ющая.

Ра́дуйся, ра́дости духо́вныя исполня́ющая.

Ра́дуйся, му́чеников Христо́вых соприча́стнице.

Ра́дуйся, всем приходя́щим к тебе́ приста́нище.

Ра́дуйся, Ксе́ние, му́ченице многострада́льная.

Кондак 5

Боготе́чней звезде́ подо́бна была́ еси́, Ксе́ние, егда́ в темни́це посети́ тя Христо́с и, исцели́в ра́ны твоя́, возгласи́ тебе́: «Не убо́йся, Ксе́ние, муче́ний: вско́ре бо изба́вишися от всех искуше́ний и бу́деши пребыва́ти со Мно́ю во ве́ки!», Его́же, лику́ющи, славосло́вила еси́, поя́: Аллилу́иа.

Икос 5

Ви́дя мучи́тель тя, свята́я Ксе́ние, изведе́нну из темни́цы, здра́ву те́лом и ли́ком све́тлу, па́ки повелева́ше ти поже́рти и́долом, рече́ бо, я́ко ти́и чуде́сне тя исцели́ша. Ты же, я́ко богому́драя де́ва, рекла́ еси́ ему́, я́ко исцели́ тя Господь Иису́с, а не ло́жныя бо́ги, и во увере́ние сего́, прише́дши во храм и́дольский, помоли́лася еси́ Еди́ному И́стинному Бо́гу, от Его́же свята́го и́мене вся и́долы падо́ша и разсы́пашася. Мы же, прославля́я ве́лию ве́ру твою́, вопие́м ти:

Ра́дуйся, благоче́стием оде́янная.

Ра́дуйся, терпе́нием облече́нная.

Ра́дуйся, от искуше́ний свобожда́ющая.

Ра́дуйся, бу́ри страсте́й утиша́ющая.

Ра́дуйся, и́ночествующим посо́бствующая.

Ра́дуйся, благочести́вых весе́лием исполня́ющая.

Ра́дуйся, Ксе́ние, му́ченице многострада́льная.

Кондак 6

Пропове́дницею чуде́с и сла́вы Бо́жия яви́лася еси́, Ксе́ние добропобе́дная: егда́ бо жестоковы́йный епа́рх повеле́ привяза́ти тя к коню́ и по ка́мени влачи́ти, милосе́рдный Госпо́дь сотвори́ коню́ не дви́гатися, да не сотвори́т тебе́ зла. Лю́дие же, ви́девше чу́до сие́ и восклица́юще: «Вели́к Бог христиа́нский!» - уве́роваша во Христа́, вопия́ Ему́: Аллилу́иа.

Икос 6

Возсия́ в те́мнице свет Боже́ственный, до́блестная великому́ченице, егда́ посреде́ но́щи па́ки яви́ся Госпо́дь Иису́с Христо́с и рече́ ти о прия́тии тобо́ю венца́ побе́днаго, и́же украша́ет де́вственников во Ца́рствии Небе́снем. Мы же, прославля́я Бо́га, ди́внаго во святы́х Свои́х, во умиле́нии серде́ц пое́м ти:

Ра́дуйся, сладостра́стия обличе́ние.

Ра́дуйся, чистоты́ о́бразе.

Ра́дуйся, страда́ньми дости́гшая Небесе́.

Ра́дуйся, сла́вою в ли́це страстоте́рпцев блиста́ющая.

Ра́дуйся, мяту́щихся успокое́ние.

Ра́дуйся, неду́жных исцеле́ние.

Ра́дуйся, Ксе́ние, му́ченице многострада́льная.

Кондак 7

Хотя́ безу́мный иге́мон жела́ние свое́ улучи́ти, па́ки покуси́ся ласка́тельными словесы́ к почита́нию ло́жных бого́в и супру́жеству тебе́, свята́я великому́ченице, приклони́ти, не вразуми́вшися бы́вшими на тебе́ чудесы́ Бо́жиими. Ты же, лука́вство его́ отве́ргши, вопия́ла еси́ Христу́: Аллилу́иа.

Икос 7

Но́вую показа́ безчелове́чия я́рость зверообра́зный мучи́тель, егда́ повеле́ чрез ме́чное усече́ние умертви́ти тя, многострада́льная Ксе́ние, те́ло же твое́ честно́е огню́ преда́ти. Те́мже, му́ченическую кончи́ну твою́ благогове́йне воспомина́юще, похвала́ми блажи́м тя си́ми:

Ра́дуйся, испове́днице Христо́ва.

Ра́дуйся, му́ченице препросла́вленная.

Ра́дуйся, страда́ньми свои́ми Бо́га прославля́ющая.

Ра́дуйся, моли́твами твои́ми милосе́рдие Его́ на нас излива́ющая.

Ра́дуйся, гра́да Каламо́на украше́ние.

Ра́дуйся, всех христиа́н защище́ние.

Ра́дуйся, Ксе́ние, му́ченице многострада́льная.

Кондак 8

Стра́нна и страшна́ бысть му́ченическая кончи́на твоя́ за Христа́ лю́дем неве́дущим Бо́га, присноблаже́нная Ксе́ние: ты бо, на ме́сто ка́зни приведе́нная, усе́рдную моли́тву вознесла́ еси́ ко Го́споду и, с ра́достию прия́вши за Него́ муче́ния, воспе́ла еси́: Аллилу́иа.

Икос 8

Весь Сладча́йший Иису́с сла́дость тебе́ бысть, му́ченице Ксе́ние, за Него́же го́рькия му́ки и истяза́ния претерпе́ла еси́; те́мже душа́ твоя́ ра́достию ве́лиею вострепета́, егда́ во вре́мя моли́твы твоея́ Боже́ственный глас благовествова́ше ти о исполне́нии проше́ния твоего́. От нас же приими́ похва́льная сия́:

Ра́дуйся, А́нгелов удивле́ние.

Ра́дуйся, земноро́дных украше́ние.

Ра́дуйся, нече́стия прогони́тельнице.

Ра́дуйся, ве́рных наста́внице.

Ра́дуйся, о всех нас моли́твеннице изря́дная.

Ра́дуйся, неду́гов душе́вных и теле́сных цели́тельнице ско́рая.

Ра́дуйся, Ксе́ние, му́ченице многострада́льная.

Кондак 9

Вся Си́лы Небе́сныя и святы́х ли́цы ра́достно тя срето́ша, страстоте́рпице сла́вная, егда́ во врата́ Ца́рствия Небе́снаго возшла́ еси́, во е́же от руки́ Вседержи́теля вене́ц нетле́нный прия́ти и в ра́дости святы́х воспева́ти: Аллилу́иа.

Икос 9

Вити́йство челове́ческое не довле́ет досто́йно восхвали́ти страда́льческия по́двиги твоя́, му́ченице свята́я, ты бо под меч о́стрый, а́ки под вене́ц кра́сный, ра́достно потекла́ еси́, и во главу́ усекнове́нна бы́вши, душе́ю твое́ю возлете́ла еси́ в черто́г Жениха́ твоего́, Христа́ Бо́га. Мы же вся сия́ помина́юще, со умиле́нием прино́сим ти песнь сицеву́ю:

Ра́дуйся, о́бразе целому́дрия.

Ра́дуйся, пра́вило милосе́рдия.

Ра́дуйся, бесо́в прогони́тельнице.

Ра́дуйся, вра́жиих ко́зней разруши́тельнице.

Ра́дуйся, пропове́днице чуде́с Бо́жиих.

Ра́дуйся, наста́внице до́брых дел.

Ра́дуйся, Ксе́ние, му́ченице многострада́льная.

Кондак 10

Спаси́тельнаго твоего́ по́двига тече́ние зря́ще, восхваля́ем страда́ния твоя́, му́ченице пресла́вная, и мо́лим тя: омраче́нныя страстьми́ сердца́ на́ша просвети́ и оставле́ние грехо́в нам у Щедрода́вца Бо́га испроси́, да вопие́м Ему́ с тобо́ю: Аллилу́иа.

Икос 10

Стено́ю моли́тв твои́х от бед и зол сохраня́й вся правосла́вныя христиа́ны, и путе́м пра́вым в Ца́рствие Небе́сное нас руководи́, да твое́ предста́тельство пред Го́сподем помина́юще, со умиле́нием зове́м ти:

Ра́дуйся, страда́ньми твои́ми Це́рковь Христову укра́сившая.

Ра́дуйся, де́моны нога́ми твои́ма попра́вшая.

Ра́дуйся, моли́твами твои́ми избавля́ющая от скорбе́й.

Ра́дуйся, хода́тайством твои́м свобожда́ющая от искуше́ний.

Ра́дуйся, сокро́вищнице исцеле́ний неоску́дная.

Ра́дуйся, ча́ше даро́в Бо́жиих преизоби́льная.

Ра́дуйся, Ксе́ние, му́ченице многострада́льная.

Кондак 11

Пе́ние хвале́бное прино́сим ти, свята́я великому́ченице Ксе́ние, и смире́нно мо́лим тя: умоли́ Го́спода о нас, гре́шных, да низпосле́т и нам благода́тную по́мощь Свою́, пою́щим Ему́: Аллилу́иа.

Икос 11

Светопода́тельная свеща́ была́ еси́ во страда́нии твое́м, свята́я му́ченице, озаря́я све́том правосла́вныя ве́ры всех взыску́ющих Бо́га и́стиннаго. Сего́ ра́ди с любо́вию вопие́м ти:

Ра́дуйся, ве́ру Христо́ву возлюби́вшая.

Ра́дуйся, чистоту́ де́вства твоего́ соблю́дшая.

Ра́дуйся, претерпе́вшая тесноту́ Ца́рствия ра́ди Небе́снаго.

Ра́дуйся, скорбьми́ твои́ми к Бо́гу прибли́зившаяся.

Ра́дуйся, де́вственных ликостоя́ний неотсту́пная храни́тельнице.

Ра́дуйся, и́ночествующих Небе́сная наста́внице.

Ра́дуйся, Ксе́ние, му́ченице многострада́льная.

Кондак 12

Благода́ть дана́ ти от Бо́га храни́ти и соблюда́ти от разли́чных боле́зней, бед и скорбе́й вся́каго челове́ка, ве́рою и любо́вию честна́я страда́ния твоя́ почита́ющаго. Те́мже мо́лим тя, страстоте́рпице Христо́ва: моли́твеннаго твоего́ предста́тельства не лиши́ и нас, гре́шных, да и мы в ны́нешней и бу́дущей жи́зни пое́м о тебе́ Бо́гу: Аллилу́иа.

Икос 12

Пое́м твоя́ по́двиги, почита́ем страда́ния, хва́лим долготерпе́ние и непобеди́мое му́жество, ублажа́ем святу́ю твою́ кончи́ну и мо́лим тя: простри́ с Небесе́ по́мощь твою́ на нас, вопию́щих ти си́це:

Ра́дуйся, серафи́мския любви́ подража́тельнице.

Ра́дуйся, диа́вольских сете́й разруши́тельнице.

Ра́дуйся, чудесы́ твои́ми нас утеша́ющая.

Ра́дуйся, враги́ неви́димыя от нас отража́ющая.

Ра́дуйся, да́ры целе́бныя земноро́дным подаю́щая.

Ра́дуйся, к бе́дствующим на по́мощь ускоря́ющая.

Ра́дуйся, Ксе́ние, му́ченице многострада́льная.

Кондак 13

О свята́я великому́ченице Ксе́ние, приими́ сие́ ма́лое моле́ние от серде́ц, лю́бящих тя, и моли́ся за ны ко Го́споду, да прости́т нам вся прегреше́ния на́ша и сподо́бит нас Ца́рствия Небе́снаго, иде́же вку́пе с тобо́ю и со все́ми святы́ми воспое́м Ему́: Аллилу́иа.

(Этот кондак читается трижды, затем икос 1 и кондак 1)

Назад к списку