Последование исповеданию и разрешению грехов тех, иже от Святыя Церкве в глаголемое староверие отпадоша

Во пе́рвых у́бо, от святи́теля или́ иере́я, пре́жде всего́ обраща́ющийся да испыта́н бу́дет в чле́нах заблужде́ния его́. По сем в уче́нии правосла́вныя ве́ры да наста́вит и утверди́т его́. И повели́т ему́ испове́дати вся грехи́ своя́, наипа́че же о том, а́ще прия́л есть в раско́ле и́но креще́ние. Разреше́ния же а́бие да не подае́т ему́, но по испове́дании и наставле́нии да поста́вит его́ в хра́ме пред амво́ном, иде́же на анало́гии свято́е Ева́нгелие положено́ есть.

Та́же исхо́дит иере́й, облаче́н во свяще́нную оде́жду по своему́ чи́ну, и вопроша́ет его́:

Хо́щеши ли бы́ти во обще́нии Святы́х Та́инств и во всем послу́шным (или́: послу́шней) Це́ркви Святе́й, и в соедине́нии ве́ры правосла́вныя до кончи́ны живота́ твоего́ неотсту́пно пребы́ти?

Отвеща́ет: Хощу́.

А́бие же иере́й зна́менает чело́ его́ три́жды, глаго́ля:

Во и́мя Отца́, и Сы́на, и Свята́го Ду́ха. Ами́нь.

Та́же возло́жь десни́цу на главу́ его́, глаго́лет моли́тву сию́, ре́кшу диа́кону: Го́споду помо́лимся. И ли́ку: Го́споди, поми́луй.

Го́споди, Го́споди, вся́ческих Тво́рче и Влады́ко, Исто́чниче благи́х и Спаси́телю всем челове́ком, па́че же ве́рным; не презре́вый челове́ка, диа́вольскою ко́знию во глубину́ поги́бели и пре́лести низведе́ннаго, но спаси́тельным вочелове́чением Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, сего́ взыска́вый и спасы́й, и к себе́ возведы́й! Сам, Влады́ко Человеколю́бче, и ны́не при́зри на раба́ Твоего́ (или́: рабу́ Твою́), и́мярек, овча́ слове́снаго Твоего́ ста́да су́щаго (или́: су́щую), его́же (или́: ю́же) сподо́бил еси́, а́ки от сна, от пре́лести воста́ти, и ко Святе́й Твое́й Апо́стольстей Це́ркви возрати́тися. Даждь ему́ (или́: ей) нелицеме́рно, невозвра́тно и неле́стно соедини́тися Святе́й Твое́й Собо́рней Це́ркви, и́стинно же всегда́ испове́дати и тве́рдо содержа́ти правосла́вную ве́ру. Сопричти́ его́ (или́: ю́) избра́нному Твоему́ ста́ду, и соедини́ его́ (или́: ю́) те́лу Це́ркве Твоея́ Святы́я. Оста́ви ему́ (или́: ей) вся согреше́ния во́льная и нево́льная, и очи́сти его́ (или́: ю́) от вся́кия скве́рны пло́ти и ду́ха. Ты бо еси́ Бог ми́лости и щедро́т и человеколю́бия, и всем челове́ком спасти́ся хо́щеши, и Тебе́ сла́ву возсыла́ем, со Единоро́дным Твои́м Сы́ном и Святы́м Твои́м Ду́хом, ны́не и при́сно, и во ве́ки веко́в.

Лик: Ами́нь.

Сконча́в же моли́тву глаго́лет к нему́:

От всего́ ли се́рдца твоего́ жале́еши, и и́стинно ли ка́ешися, я́ко от Святы́я Апо́стольския Це́ркве, и от соедине́ния пра́выя ве́ры отступи́л еси́ (или́: отступи́ла еси́)?

Отвеща́ет: Жале́ю и и́стинно ка́юся.

Вопроша́ет и си́це, а́ще пови́нен есть в сем:

От всего́ ли се́рдца твоего́ жале́еши, и и́стинно ли ка́ешися, я́ко в благода́ти церко́вных Тайн усомни́лся еси́ (или́: усомни́лася еси́), и симво́л ве́ры попра́в (или́: попра́вши), в раско́ле и́но креще́ние приима́л еси́ (или́: приима́ла еси́)?

Отвеща́ет: Жале́ю и и́стинно ка́юся.

Иере́й глаго́лет:

Отрица́еши ли ся от всех ересе́й и отсту́пств, Бо́жией и́стине и це́ркви его́ святе́й проти́вных?

Отвеща́ет: Отрица́юся.

Иере́й глаго́лет:

Ста́ни до́бре, ста́ни со стра́хом, и и́стинно испове́ждь правосла́вную ве́ру.

Он же чтет во услы́шание всем испове́дание правосла́вныя ве́ры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с Небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

И посе́м глаго́лет к нему́:

Припади́ пред Го́сподем Бо́гом, Его́же испове́дал еси́ (или́: испове́дала еси́), и прии́меши оставле́ние грехо́в твои́х, и разреше́ние от вся́кия кля́твы.

Он же припа́дает, преклони́в коле́на.

Иере́й глаго́лет над ним со вся́ким умиле́нием моли́тву сию́, ре́кшу диа́кону: Го́споду помо́лимся. И ли́ку: Го́споди, поми́луй.

Влады́ко Многоми́лостиве, Го́споди Иису́се Христе́, Бо́же наш, верхо́вному Твоему́ апо́столу Петру́ и про́чиим апо́столом Твои́м ключи́ Ца́рствия Небе́снаго вручи́вый, и Твое́ю благода́тию всей им да́тися восхоте́вый вла́сти, е́же свя́занным бы́ти и на Небеси́, ели́ка от них свя́зана суть, и разреше́нным бы́ти та́кожде на Небеси́, ели́ка от них на земли́ разреше́на суть: насле́дники же нас, худы́х и недосто́йных, неизрече́нным Твои́м человеколю́бием да́нныя им вла́сти сподо́бивый бы́ти. Са́м, Преблаги́й Царю́, и ны́не от пре́лести воста́вшаго (или́: воста́вшую) и в ра́зум и́стины приити́ изво́лившаго раба́ Твоего́ сего́ (или́: изво́лившую рабу́ Твою́ сию́), и́мярек, Це́ркви Твое́й па́ки соедини́тися жела́ющаго (или́: жела́ющую), я́ко Человеколюби́вый и до́брый Па́стырь, ми́лостивно приими́. Ты бо рекл еси́: и́ныя о́вцы и́мам, я́же не суть от двора́ сего́, и ты́я ми подоба́ет привести́, и глас Мой услы́шат: и бу́дет еди́но ста́до, и еди́н Па́стырь. И мно́ю, недосто́йным рабо́м Твои́м, разреши́ его́ (или́: ю́) от вся́каго сою́за кля́твеннаго, и от вся́каго отлуче́ния. И а́ще что в настоя́щем житии́, я́ко челове́к, согреши́л есть (или́: согреши́ла есть), сло́вом, или́ де́лом, или́ помышле́нием, прости́ и отпусти́ ему́ (или́: ей). И от вся́каго поро́ка душе́внаго благода́тию Твое́ю того́ (или́: ту) омы́в, чи́ста (или́: чи́сту) во двор Твой введи́, и сопричти́ его́ (или́: ю́) овца́м избра́ннаго Твоего́ ста́да, и соедини́ его́ (или́: ю́) Те́лу Це́ркве Твоея́ Святы́я, я́ко да творя́ (или́: творя́щи) во́лю Твою́ благу́ю, благоуго́дную же и соверше́нную, сподо́бится и восприя́тия Небе́сных Твои́х благи́х, со все́ми благоугоди́вшими Тебе́. Твое́ бо есть, е́же ми́ловати и спаса́ти нас, Бо́же наш, и Ты еси́ Бог, всем челове́ком хотя́й спасти́ся, и в ра́зум и́стины приити́, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

А́бие же по сей моли́тве разреша́ет его́ си́це:

Госпо́дь и Бог наш Иису́с Христо́с, ключи́ Ца́рствия Небе́снаго апо́столом Свои́м вручи́вый, и да́вый им всю власть Свое́ю благода́тию, е́же вяза́ти и реши́ти челове́ки от грехо́в на земли́: Той сам, неизрече́нныя ра́ди ми́лости Своея́, да прости́т и разреши́т тя́. И аз всеси́льною Его́ вла́стию, чрез святы́я апо́столы и их прее́мники, мне, а́ще и недосто́йному иере́ю, да́нною, проща́ю и разреша́ю тя, ча́до и́мярек, от сою́за кля́твеннаго, и от вся́каго отлуче́ния, и запреще́ния, в ня́же отсту́пством от пра́выя ве́ры впал еси́ (или́: впа́ла еси́), и от всех грехо́в твои́х, и соедине́нию ве́рных, и те́лу Це́ркве Христо́вы совокупля́ю, и Боже́ственным Та́йнам церко́вным приобща́ю тя, во и́мя Отца́, и Сына, и Свята́го Ду́ха. Ами́нь.

Сему́ же бы́вшу, воздвиза́ет его́, глаго́ля:

Воста́ни, бра́те (или́: сестро́), и ста́ни до́бре, ста́ни со стра́хом, и я́ко ве́рный Иису́с Христо́в раб (или́: ве́рная Иису́с Христо́ва раба́), пребу́ди в ве́ре и и́стине, соблюда́я (или́: соблюда́ющи) вся за́поведи Его́, и прии́меши благода́ть от Него́, и Ца́рствию Небе́сному сподо́бишися.

Посе́м подае́т ему́ иере́й свято́е Ева́нгелие к лобза́нию, и сему́ бы́вшу, глаго́лет:

Благослове́н Бог, изво́ливый си́це.

Посе́м отхо́дит в дом свой, ра́дуяся и благодаря́ Бо́га, я́ко поми́лован есть, и подоба́ет ему́ причасти́тися Святы́х Та́ин на Боже́ственней Литурги́и.

Утверждено Священным Синодом Русской Православной Церкви 09.03.2017 (журнал № 11).

 

Назад к списку