Блаженному Василию Кадомскому (тропарь, кондак, молитва и величание)
Тропарь, глас 4:
Моли́тва усе́рдная пи́ща и питие́ тебе́ бысть,/ блаже́нне Васи́лие,/ в несе́нии креста́ жития́ стра́нническаго/ любо́вь Христо́ву позна́л еси́./ О́ком чи́стым бу́дущая, я́ко настоя́щая, прозрева́я,/ ра́дость и от бед избавле́ние тре́бующим твоея́ по́мощи дарова́л еси́./ Те́мже и нас, я́ко Бо́жий избра́нник,/ не забу́ди твои́ми хода́тайствы,// Христа́ Бо́га о нас умоля́я.
Кондак, глас 2:
Вся́кое мирско́е попече́ние во́лею отри́нув,/ чистоту́ же душе́вную юро́дством утаи́в,/ Бо́гу и бли́жним усе́рдне послужи́л еси́,/ те́мже, благода́ти Ду́ха Свята́го испо́лнився,/ а́нгельски на земли́ пожи́л еси́./ Ны́не ми́лостию твое́ю нас посети́,/ исцеля́я не́мощи душ и теле́с,// Васи́лие блаже́нне, те́плый наш хода́таю.
Молитва
О, пресла́вный уго́дниче Святы́я и Единосу́щныя Тро́ицы, свя́те блаже́нне Васи́лие, пресла́внаго гра́да Ряза́ни те́плый засту́пниче, в беда́х, ско́рбех и печа́лех ско́рый помо́щниче! Воззри́ ми́лостивне на нас, припа́дающих к ра́це честны́х моще́й твои́х и сле́зно взыва́ющих к твоему́ предста́тельству: не пре́зри смире́нная проше́ния на́ша и моли́ Всеми́лостиваго Бо́га, да да́рует нам проще́ние согреше́ний во́льных и нево́льных, да проба́вит ми́лость Свою́ и пода́ст вся ну́жная к житию́ сему́ вре́менному и к ве́чному спасе́нию благопотре́бная. А́ще и многогре́шни и зело́ недосто́йни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и сподо́битися и́стиннаго покая́ния и непоро́чными в Ца́рствие Небе́сное вни́ти.
О, свя́те блаже́нне Васи́лие! Ты ны́не, а́ки со́лнце, сия́еши во Ца́рствии Небе́снем: научи́ нас во́лю Бо́жию исполня́ти и безро́потне испыта́ния претерпева́ти, просвети́ помраче́нныя ду́ши на́ша и на стезю́ за́поведей Бо́жиих наста́ви нас, да понесе́м благо́е и́го Христо́во во смире́нии и долготерпе́нии до конца́ дний, ча́юще бу́дущаго живота́ безконе́чнаго, да сподо́бимся мы, недосто́йнии, вку́пе с тобо́ю и все́ми святы́ми сла́вити и воспева́ти Еди́наго в Тро́ице Бо́га, Отца́ и Сы́на и Свята́го Ду́ха, во ве́ки веко́в. Ами́нь.
Величание:
Ублажа́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.
Тексты тропаря, кондака, молитвы и величания утверждены на заседании Священного Синода 8 декабря 2020 года (журнал № 99).
Назад к списку
