Праведному Алексию (Мечеву), пресвитеру Московскому (тропари, кондаки, молитва и величание)
Тропарь, глас 5:
Па́стырю Христо́в, о́тче Алекси́е,/ по́двигом до́брым подвиза́вся,/ ве́ру Правосла́вную во мра́це беззако́ния испове́дал еси́/ и, я́ко уте́шитель и врач духо́вный,/ всех, притека́ющих к тебе́, врачева́л еси́./ Помози́ и нам, ве́рою чту́щим тя, // в любви́ к бли́жнему утверди́тися.
Кондак, глас 8:
Простото́ю ве́ры высоты́ смире́ния дости́гл еси́,/ в моли́тве же и доброде́лании подвиза́яся,/ дара́ми духо́вными обогати́лся еси́/ и све́том Христо́вым просвети́лся еси́,/ помо́щниче и уте́шителю о́тче Алекси́е./ Те́мже ве́ру на́шу укрепи́,/ любви́ ко Го́споду и бли́жним научи́ // и ко спасе́нию приведи́ моли́твами твои́ми.
Молитва
О, всечестны́й и преблаже́нный о́тче наш Алекси́е, ди́вный ста́рче Моско́вский и Це́ркве Ру́сския похвало́ и ра́дование! Ты, ве́лию любо́вь ко Го́споду име́я и за́поведи ева́нгельския непрело́жно исполня́я, ду́шу твою́ за па́ству полага́л еси́. Приими́ ма́лое сие́ моле́ние на́ше и, я́ко в земно́м житии́ твое́м вся́ку скорбь облегча́л еси́, та́ко и ны́не, милосе́рдый моли́твенниче и хода́таю наш, исполни́ стра́ждущая сердца́ ра́достию, умоли́ Человеколю́бца Бо́га о проще́нии прегреше́ний на́ших, да, очи́стивше ду́ши покая́нием, к доброде́тельному житию́ обрати́мся. Ей, пра́ведне о́тче Алекси́е, бу́ди нам па́стырь до́брый, на стезю́ спасе́ния наставля́яй, да моли́твами твои́ми безпоро́чно про́йдем путь жития́ на́шего и обря́щем Оте́чество Небе́сное, иде́же ты со а́нгелы и все́ми святы́ми предстои́ши Престо́лу Святы́я Тро́ицы, прославля́я Безнача́льнаго Отца́ со Единоро́дным Его́ Сы́ном и Пресвяты́м, и Благи́м, и Животворя́щим Его́ Ду́хом во ве́ки веко́в. Ами́нь.
Тексты тропаря, кондака и молитвы утверждены Священным Синодом Русской Православной Церкви 14 мая 2018 года (журнал № 37)
Ин тропарь, глас 4:
Наста́ де́нь но́ваго торжества́,/ град Москва́ ра́дуется,/ и вся Росси́йская страна́ ликовству́ет/ но́выми пе́ньми духо́вными,/ дне́сь бо свяще́нное торжество́/ в пренесе́ние честны́х и многоцеле́бных моще́й/ пра́ведника и чудотво́рца Алекси́я,/ я́ко бо свети́ло пресве́тлое,/ возсия́ нам благода́тными луча́ми,/ потребля́я тьму́ неду́г и страсте́й/ от пою́щих приле́жно,/ спаса́й нас моли́твами твои́ми, // пра́ведне Алекси́е о́тче наш.
Ин кондак, глас 2:
Ве́лия труды́ любве́ и милосе́рдия подъя́л еси́,/ пра́ведный о́тче Алекси́е,/ и, от свята́го па́стыря Кроншта́дтскаго благослове́ние на по́мощь стра́ждущим прие́м,/ беды́ и ско́рби людски́я, я́ко вери́ги, на ра́мо свое́ возложи́л еси́./ Мы же, ве́дуще тя моли́твенника дерзнове́нна ко Го́споду,/ со умиле́нием зове́м ти: // моли́ Христа́ Бо́га спасти́ся душа́м на́шим.
Величание
Ублажа́ем тя,/ святы́й пра́ведный Алекси́е,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
