Праведному Александру, Чагринскому чудотворцу (тропарь, кондак, молитва и величание)
Тропарь, глас 3:
Да возра́дуется земля́ Сама́рская, обре́тши тя предста́теля и засту́пника у Престо́ла Влады́чня, па́стырю наш до́брый и чудотво́рче преди́вный, святы́й пра́ведный о́тче Алекса́ндре, моли́ Христа́ Бо́га в Ве́ре Правосла́вней и исполне́нии Ева́нгельских за́поведей непоколеби́мым пребы́ти и спасти́ся душа́м на́шим.
Кондак глас 4:
Яви́лся еси́ Правосла́вныя Це́ркве столп, Христо́вых за́поведей усе́рдный де́латель, приходя́щим к тебе́ с ве́рою ско́рый помо́щник, в ско́рбех и ну́ждах уте́шитель и му́дрый наста́вник: те́мже и нам любо́вию почита́ющим тя, грехо́в оставле́ние испроси́, оби́тель и град сей невреди́мы сохрани́, пра́ведне Алекса́ндре, о́тче наш, моли́твенниче о нас пред Бо́гом тепле́йший.
Молитва
О вели́кий и пречу́дный уго́дниче Христо́в, о́тче наш пра́ведне Алекса́ндре, земли́ Пово́лжския благо́е прозябе́ние и хода́таю о всех зде живу́щих и повсю́ду тружда́ющихся Правосла́вных христиа́нах: воззри́ ны́не на нас, недосто́йных, ми́лостивным твои́м о́ком и виждь я́ко зело́ умно́жишася ско́рби и злострада́ния в ми́ре сем, во гресе́х и беззако́ниих иждива́ем дни своя́, да́нное же нам вре́мя на покая́ние в су́етных и многомяте́жных страсте́х провожда́юще, уми́льно про́сим и мо́лим тя, засту́пниче наш: помози́ нам, ча́дом твои́м, и испроси́ предста́тельством твои́м ко Всевы́шнему Влады́це вся я́же к житию́ и благоче́стию поле́зная и благопотре́бная: боля́щия исцели́, немощны́я подкрепи́, печа́льныя и уны́лыя ободри́, скорбя́щия уте́ши и пове́рженныя возста́ви. Вознеси́, уго́дниче Бо́жий, всемо́щную моли́тву твою́, да утверди́тся в держа́ве на́шей мир и благоде́нствие, благоче́стие и единомы́слие, да пребу́дет во благи́х челове́цех пра́вда и ми́лость, в злых же страх и раска́яние, во е́же преста́ти им от зла и твори́ти до́брая, да тобо́ю наставля́еми и вразумля́еми, просла́вим ди́внаго во Святы́х Свои́х Бо́га, Ему́же Еди́ному подоба́ет вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
Величание
Ублажа́ем тя, святы́й пра́ведный Алекса́ндре, и чтим святу́ю па́мять твою́, ты бо мо́лиши за нас Христа́ Бо́га на́шего.
Назад к списку
