Блаженному Иоанну, Христа ради юродивому, Устюжскому чудотворцу (тропарь, кондаки и молитва)
Тропарь, глас 5:
Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стражда́ со́лнечный вар,/ и ну́ждныя вели́кия сту́дени мра́за,/ и огня́ не чул еси́,/ Бо́жиею по́мощию покрыва́емь,/ Иоа́нне прему́дре,/ моли́ о ве́рою творя́щих па́мять твою́ че́стно/ и усе́рдно притека́ющих к ра́це моще́й твои́х,// изба́витися от бед и паде́ния избежа́ти.
Кондак, глас 8:
Вы́шния красоты́ жела́я,/ ни́жния сла́дости теле́сное яде́ние тща́тельно оста́вил еси́,/ нестяжа́нием су́етнаго ми́ра, возлюби́л еси́ а́нгельское житие́,/ преходя́ сконча́вся, Иоа́нне блаже́нне;// с ни́миже моли́ Христа́ Бо́га непреста́нно о всех нас.
Ин кондак, глас 1:
Иоа́нне прему́дре, / земны́я сла́вы не возлюби́в, / того́ ра́ди я́ко неи́стов ся творя́, / жела́я Ца́рство Небе́сное насле́довати, / ударе́ния и укоре́ния прие́мля, / наготу́ и зной терпя́, / тем ны́не со А́нгелы лику́еши, // моли́ Христа́ Бо́га о душа́х на́ших.
Молитва
О святы́й блаже́нный Иоа́нне! Припа́дающе, смире́нно мо́лимтися: приими́ на́ше ма́лое моле́ние и умоли́ Всеми́лостиваго Го́спода Бо́га на́шего, да проба́вит ми́лость Свою́ нам, гре́шным, и да да́рует нам вся, я́же к животу́ и ко спасе́нию благопотре́бная. О уго́дниче Христо́в! а́ще и зело́ недосто́йни есмы́, оба́че ду́хом сокруше́нным и се́рдцем смире́нным па́ки припа́дающе, мо́лимтися: предста́тельством твои́м ко Го́споду сохрани́ страну́ на́шу, да́руя ей на вся враги́ побе́ду и одоле́ние, град твой У́стюг и вся гра́ды и ве́си Росси́йския соблюди́ от вся́каго зла и от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от вся́кия боле́зни и от вся́каго обстоя́ния, да всегда́ пое́м и велича́ем всесвято́е и великоле́пое и́мя Бо́жие и твое́ ми́лостивое о нас предста́тельство, во ве́ки веко́в. Ами́нь.
Назад к списку
