Праведному Феодосию Балтскому (тропарь, кондак и молитва)
Тропарь, глас 3:
Святы́й пра́ведный о́тче Феодо́сие, / моли́ Ми́лостиваго Бо́га / и Присноде́ву Мари́ю, ро́ждшую Христа́ Го́спода, / да прегреше́ний всех оставле́ние, / неду́гов врачева́ние и не́мощей исцеле́ние /, от ко́зней де́монских огражде́ние, / вражды́ и за́висти потребле́ние, / душ и теле́с очище́ние и освяще́ние, / поги́бели ве́чныя избавле́ние и спасе́ние // от щедро́т Свои́х да́руют нам.
Кондак, глас 6:
Избра́нный пропове́дниче Христо́в/ и Тро́ицы Святы́я свяще́нниче /, к святы́ням Ки́евским пешеше́ствовавших корми́тель и успокои́тель был еси́, / еще́ же Покро́ву Бо́жия Ма́тери посвяще́нныя / оби́тели Ба́лтския построе́ния вдохнови́тель и распоряди́тель яви́лся еси́, / в не́йже моща́ми многоцеле́бными ны́не поко́ишися / и моле́ния на́ша прие́млеши и хвалы́, / мы́ же святы́не твое́й поклоня́ющеся, / ра́ку твою́ лобыза́юще, си́це глаго́лем ти: / Ра́дуйся, чудесы́ ди́вными и премно́гими / Го́сподом изря́дно просла́вленный, // о́тче пра́ведный Феодо́сие.
Молитва.
О чудотво́рче пресла́вный и о́тче святы́й и пра́ведный Феодо́сие, в земли́ на́шей по́двиги благоче́стия просия́вший и все́м к моли́твам твои́м и щедро́там прибега́вшим ру́ку по́мощи простира́вший и в ми́лости Бо́жией и уча́стии челове́честем нужда́ющимся вся во благо́е устроя́вший: изнемога́ющих укрепля́вший, наги́х одева́вший, жа́ждущих напоя́вший, а́лчущих пита́вший, стра́нствовавших упокоева́вший, неду́гующих врачева́вший и исцеля́вший, еще́ же словесы́ ре́вностными нече́стие и крамо́лы искореня́вший и гряду́щее прише́льствие сла́вное Христа́ Бо́га на́шего для нелицеме́рнаго Суда́ Стра́шнаго письмены́ богодухнове́нными, да́же до черто́гов ца́рских доше́дшими, пропове́давший, моли́ в Тро́ице Святе́й сла́вимаго Бо́га Вы́шняго и Пречи́стую Де́ву Мари́ю Богоро́дицу и за нас, во гресе́х, страсте́х и не́мощех пребыва́ющих, и к те́плому хода́тайству твоему́ за нас, погиба́ющих и спасе́ния своего́ отчаява́ющихся, притека́ющих. Испроси́ нам ве́ры пра́выя приложе́ния и моли́твеннаго ко Го́споду и Ма́тери Бо́жией горе́ния, да отложи́вшеся пути́ поги́бельнаго, сподо́бимся проще́ния, душе́внаго и теле́снаго исцеле́ния и по преставле́нии свое́м спасе́ние улучи́м и та́ко Бо́га, ди́внаго во святы́х Свои́х и Цари́цу Небе́сную вы́ну сла́вяще, и тя в селе́ниях пра́ведных ви́дяще, Отцу́ Безнача́льному, Сы́ну Единоро́дному и Ду́ху Свято́му Животворя́щему хвале́бное пе́ние непреста́нное с ли́ки а́нгельскими пое́м. Ами́нь.
Назад к списку
