Священномученику Симеону (Лилееву), пресвитеру (тропарь, кондак и молитва)
Тропарь, глас 6:
Я́ко те́плаго пред Бо́гом моли́твенника/ и ве́рнаго па́стыря Христо́вых ове́ц/ восхваля́ем тя, священному́чениче Симео́не,/ ты бо, я́ко оте́ц чадолюби́вый,/ о па́стве свое́й боле́знуя/ и храм Бо́жий от поруга́ния сохраня́я,/ страда́ния и лю́тую смерть претерпе́л еси́/ и вене́ц неувяда́емыя сла́вы прия́л еси́.// Моли́ спасти́ся душа́м на́шим.
Кондак, глас 2:
Правосла́вныя ве́ры ревни́телю/ и Та́ин Бо́жиих усе́рдный соверши́телю,/ священному́чениче Симео́не,/ многоле́тне на ни́ве Христо́ве подвиза́яся/ и сло́во ева́нгельское пропове́дуя,/ па́ству твою́ до́бре упасл еси́,/ наве́ты же безбо́жных и бе́ды разли́чныя претерпева́я,/ Бо́га и́стиннаго да́же до сме́рти испове́дал еси́.// Его́же моли́, да спасе́т ду́ши на́ша.
Молитва
О, па́стырю до́брый слове́сных ове́ц Христо́вых, священному́чениче Симео́не, сла́во земли́ Ра́донежския, ве́си Заболо́тския похвало́, те́плый наш засту́пниче и во вся́ких ско́рбех и ну́ждах помо́щниче! Ты, благоче́стне пожи́в, тве́рдою ве́рою, усе́рдным соверше́нием Та́ин Бо́жиих, благогове́йным почита́нием Пресвяты́я Богоро́дицы, науче́нием ю́ных зако́ну Бо́жию, пропове́данием сло́ва ева́нгельскаго, любо́вию к па́стве, ре́вностию о святе́м хра́ме Госпо́днем, благоду́шным несе́нием боле́зней, терпе́нием злохуле́ний, наипа́че же дерзнове́нным да́же до сме́рти испове́данием Христа́ Небе́снаго Ца́рствия дости́гл еси́ и благода́ть во всем помога́ти нам улучи́л еси́.
О, всехва́льне священному́чениче! Услы́ши нас, гре́шных, моля́щихся тебе́, и умоли́ Всеми́лостиваго Бо́га, да прости́т нам согреше́ния на́ша и изба́вит от а́довых уз и ве́чнаго му́чения. Утверди́ нас, уго́дниче Христо́в, в ве́ре Правосла́вней и научи́ всегда́ твори́ти во́лю Бо́жию и храни́ти повеле́ния Госпо́дни. Моли́ся о стране́ на́шей, о ве́си сей и хра́ме, иде́же служе́ние соверша́л еси́, и о всех лю́дех земли́ на́шея, да изба́вит нас Всеблаги́й Госпо́дь от гла́да, мо́ра, о́гненнаго запале́ния и да́рует мир, изоби́лие плодо́в земны́х, телесе́м здра́вие и душа́м спасе́ние, и вся, я́же на потре́бу челове́ком, да та́ко, предста́тельством твои́м храни́ми, богоуго́дне поживе́м и сподо́бимся вни́ти в ра́дость Го́спода на́шего, прославля́юще Отца́ и Сы́на и Свята́го Ду́ха во ве́ки веко́в. Ами́нь.
Тексты тропаря, кондака и молитвы утверждены к общецерковному богослужебному употреблению на заседании Священного Синода 15 мая 2025 года (журнал № 39).
Назад к списку
