Священномученику Герману (Ряшенцеву), епископу Вязниковскому (тропари, кондаки и величание)
Тропарь, глас 1:
Небе́снаго Ца́рствия взыску́я,/ измла́да о Го́рнем помышля́л еси́/ и, все́ю кре́постию Бо́га возлюби́в,/ благове́стие Христо́во лю́дем возвеща́л еси́,/ во дни же гоне́ний лю́тых/ сквозе́ огнь муче́ний побе́дне преше́л еси́./ Мы же, прославля́юще тя, Ге́рмане прехва́льне,/ си́це тебе́ вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Я́вльшему нам тя те́пла предста́теля.
Кондак, глас 2:
Сло́вом Бо́жиим наставля́емь,/ святи́телю о́тче Ге́рмане,/ от ю́ности Христу́ после́довал еси́,/ в годи́ну же лю́тых испыта́ний/ непоколеби́мый щит ве́ры яви́лся еси́,/ ны́не, на Небесе́х Бо́гу с ли́ки му́ченик предстоя́,/ моли́ спасти́ся душа́м на́шим.
Величание:
Велича́ем тя,/ священному́чениче Ге́рмане,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия,/ претерпе́л еси́.
Текст службы (из которой взяты тропарь, кондак и величание) утвержден к общецерковному богослужебному употреблению на заседании Священного Синода 27 декабря 2023 года (журнал № 131).
Ин тропарь, глас 4:
Красоты́ лица́ Бо́жия взыску́я, измла́да еди́на Небе́сная помышля́я, все́ю кре́постию твое́ю возлюби́л еси́ Бо́га, и вся, ели́ка стяжа́л, Дарова́вшему воврати́л еси́ умно́жив, последи́ же и себе́ само́го я́ко же́ртву кра́сную прине́сл еси́ Благода́телю. Моли́ Христа́ Бо́га, святи́телю о́тче Ге́рмане, спасти́ся душа́м на́шим.
Ин тропарь, глас 7:
К ве́чной Па́схе нетле́ния возше́л еси́ на зов Христа́, ди́вный па́стырю и пла́менный учи́телю, правосла́вия побо́рниче. Да́льняя изгна́ния и заточе́ния му́жески претерпе́л еси́, му́ченическим венце́м я́ко со́лнце возсия́л еси́, священному́чениче Ге́рмане. Моли́ Христа́ Бо́га дарова́ти нам терпе́ние, от наве́тов вра́жиих спасти́ся и поми́ловатися душа́м на́шим.
Ин кондак, глас 5:
Хощу́, рекл еси́, о́тче наш Ге́рмане, со Христо́м мои́м бы́ти и Тому́ еди́ному рабо́тати. Любве́ Влады́чни ничто́же есть сладча́йше. Прииди́те, лю́дие, принеси́те да́ры Власти́телю душ на́ших и вся́каго бла́га Исто́чнику, и возра́дуется душа́ ва́ша, ни во что же ско́рби земны́я вменя́ющи. И нас, чту́щих любо́вию па́мять твою́, не забу́ди в моли́твах, влады́ко святы́й.
Ин кондак, глас 5:
Преудо́брен во архиере́ех, за ве́ру Христо́ву от богобо́рцев пострада́л еси́, муче́ния кро́вию украси́лся еси́. Ра́дуйся, святи́телю о́тче Ге́рмане, Це́ркве Ру́сския украше́ние.
Назад к списку
