Преподобномученику Илии (Вятлину) (тропарь, кондак и величание)
Тропарь, глас 2:
Правосла́вныя ве́ры тве́рдый испове́дниче/ и Небе́снаго Царя́ во́ине добропобе́дный,/ в годи́ну гоне́ний лю́тых на и́ноческий путь вступи́вый/ и да́же до сме́рти ве́рность Христу́ запечатле́вый,/ преподобному́чениче Илие́ всехва́льне,// моли́ спасти́ся душа́м на́шим.
Кондак, глас 3:
Тка́тельное худо́жество оста́вив,/ ко плете́нию доброде́телей устреми́лся еси́,/ те́мже, и́ноческий о́браз и свяще́нства дар прие́м,/ во благоче́стия ри́зы обле́клся еси́/ и, любо́вию ко Христу́ распала́емь,/ кро́вию твое́ю свяще́нныя оде́жды украси́л еси́,/ преподобному́чениче Илие́ досточу́дне,// моли́твенниче о душа́х на́ших.
Величание:
Велича́ем тя,/ преподобному́чениче Илие́,/ и чтим по́двиги и страда́ния твоя́,/ я́же за Христа́// претерпе́л еси́.
Тексты тропаря, кондака и величания утверждены к общецерковному богослужебному употреблению на заседании Священного Синода 24 октября 2024 года (журнал № 118).
Назад к списку
