Священномученику Николаю (Покровскому), пресвитеру Горюшкинскому (тропарь, кондак и молитва)
Тропарь, глас 4:
Пра́вилу ве́ры и о́бразу кро́тости / уподо́бився от ю́ности, / до ны́не от волко́в соблюда́еши ста́до свое́, / о́тче Нико́лае Горю́шкинский; / мы же прие́мше тя во о́браз и пра́вило, / опира́емся на тверды́ню ве́ры, // и враго́в низлага́ем кро́тостию богому́дрою.
Кондак, глас 3:
Земли́ Симби́рския засту́пник еси́, Нико́лае священному́чениче, / Христо́во бо наставле́ние испо́лнив, / за о́вцы слове́сныя положи́л еси́ ду́шу твою́, / и от сме́рти непови́нныя / преше́л еси́ к жи́зни ве́чней, / умоля́я Бо́га низпосла́ти ча́дом свои́м // кре́пости сил и благода́ти.
Молитва
О священному́чениче Нико́лае, па́стырю до́брый и любвеоби́льный! Ны́не и на вся́кий день па́мять твою́ соверша́юще, мо́лим ти ся усе́рдно: при́зри на чад свои́х, во след твои́м стопа́м гряду́щих к Бо́гу, и поддержи́ нас моли́твами твои́ми, я́ко на те́сную стезю́ ступи́хом. Ты бо, о́тче, от ю́ных лет чи́стым се́рдцем и све́тлым ра́зумом, вслед Го́спода устреми́лся еси́, во е́же де́лу пре́дков свои́х прилежа́ти, и ча́да Бо́жия явле́нием любве́ Христо́вы к Бо́гу приводи́ти. Те́мже у́бо, не сподо́бився с супру́гою твое́ю чад по пло́ти, к ча́дом по ду́ху мно́гую любо́вь яви́л еси́, де́ти ма́лыя Зако́ну Бо́жию науча́я, мона́шествующих же и мирски́х в несе́нии Креста́ укрепля́я. Вои́стину па́стырь до́брый быв, о́тче Нико́лае, на всяк день препита́л еси́ ста́до твое́ слове́сным хле́бом, призыва́я ще́дростию приближа́тися к ще́дрому Бо́гу и бли́жнему, да от гла́да духо́внаго и теле́снаго лю́ди изба́вятся. Ты и в годи́ну лю́тых испыта́ний храм и де́ти своя́ духо́вныя не оста́вил еси́ кроме́ попече́ния, но скорбя́ о ча́дех неразу́мных, Бо́гом да́нное насле́дие несмы́сленно расхища́ющих, призыва́л еси́ покая́нием в ра́зум и́стины приити́, и во объя́тия О́тча возврати́тися. Та́ко мече́м слове́сным врага́ поража́я, я́ко и́стинный во́ин Христа́ Бо́га, да́же до сме́рти подвиза́лся еси́: те́мже и ны́не сме́ртию твое́ю всем о воскресе́нии гряду́щем благовеству́еши. Мо́лим тя, о́тче наш Нико́лае Горю́шкинский: моли́ Христа́ Бо́га, нас ра́ди Распя́таго и Воскре́сшаго, да в горе́нии серде́ц на́ших сподо́бимся вы́ну горе́ устремля́тися, покро́вом же Ма́тери Бо́жия и моли́твами святы́х покрыва́еми, не лиши́мся и ны́не нам потре́бных благ, и во вре́мя, коему́ждо угото́ванное, дости́гнем Ца́рствия вои́стину Небе́снаго. Ами́нь.
Назад к списку
