Священномученику Иоанну (Ильинскому), пресвитеру Томыловскому (тропарь, кондак и молитва)
Тропарь, глас 4:
О́тчее повеле́ние исполня́я, / ста́до Христо́во пасти́ неуста́нно, / чад своих кро́вных и духо́вных упа́сл еси́ / в любви́ и му́дрости Боже́ственней. / И ны́не о́тче, Иоа́нне Томыло́вский, / за неразу́мныя и злы́я мо́лишися: // всех спаси́ и поми́луй, Го́споди.
Кондак, глас 4:
Вознесы́йся на Крест во́лею Госпо́дь, / обетова́ние даде́ Кресто́м побежда́ти: / те́мже и ты, священному́чениче Иоа́нне, укрепля́емь, / не убоя́лся еси́ преще́ния вра́жия да́же до сме́рти, / от Креста́ Святы́я Да́ры стра́ждущим неся́, / и свиде́тельствуя благоче́стием // непобеди́мую побе́ду.
Молитва
О священному́чениче Иоа́нне, тезоиме́нный благода́ти, доброде́тельми честны́ми просла́вленный, пе́рвый новому́чениче земли́ Симби́рския! Услы́ши ны, о́тче, зде живу́щих и па́мять твою́ почита́ющих : ты бо чрез все житие́ во еди́ном хра́ме еди́ному Бо́гу Тро́ице послужи́в, ны́не в дому́ у Того́ пребыва́еши, дре́вним благода́тным подви́жником уподо́бився. Иоа́нну Предте́че Госпо́дню подража́я, о́тче, лю́ди ко иорда́ну ве́ры призыва́еши, науча́я не вне́шним о́бразом во Христа́ крести́тися, но покая́нием и жития́ исправле́нием в Того́ облека́тися, не боя́щеся поноше́ния и сме́рти от челове́к. Апо́столу Иоа́нну Богосло́ву после́дуя, и да́же до Креста́ неотсту́пно с Го́сподем пребыва́я, всем житие́м твои́м и кончи́ною, священному́чениче, ве́ру в Победи́теля сме́рти пропове́дуеши. Подо́бне Иоа́нну Златоу́сту, с ни́мже, па́стырю томыло́вский, в день Воздви́жения Креста́ Госпо́дня к Царю́ Небе́сному возше́л еси́, вся учи́ши не страши́тися прави́телей непра́ведных, ругат́елей Зако́на Бо́жия, но покланя́тися в Тро́ице Еди́ному Бо́гу, и за вся Того́ благодари́ти. Днесь, священному́чениче Иоа́нне, о Бо́зе пребыва́я, вкупе с си́ми треми́, и со все́ми святы́ми земли́ Симби́рския, всем и коему́ждо испроси́ти мо́жеши даро́в благода́ти. Помози́ нам, о́тче, ве́ру правосла́вную храни́ти; па́стырей укрепи́ в дерзнове́нии, е́же Христа́ пропове́дати; прави́телей в му́дрости, е́же на врага́ ополча́тися; муже́й научи́ Боголю́бию и му́жеству, да не погубя́т нераде́нием Це́рковь и дом свой; жена́м и де́вам откры́й потае́нную се́рдца красоту́, да явя́тся храни́тельницы даро́в Госпо́дних и попечи́тельницы бу́дущих. Вся́кому челове́ку исхода́тайствуй , о благода́тный па́стырю томыло́вский, терпе́ния и постоя́нства, да взира́юще на Крест Госпо́день, я́ко на зна́мение побе́дное, не ослабе́ем, но с тобою и со все́ми святы́ми просла́вим Отца́ и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Назад к списку
