Священномученику Александру (Телемакову), пресвитеру Чумакинскому (тропарь, кондак и молитва)
Тропарь, глас 1:
Ра́дуйся, священному́чениче Алекса́ндре, / в сре́тение Царя́ Небе́снаго от ю́ности устреми́выйся, / житие́м свои́м пропове́давый и́стину да́же до сме́рти, / детоводи́телю к Све́ту позна́ния и́стиннаго; / моли́ Христа́ Бо́га о спасе́нии душ на́ших, // ве́рующих пресла́вному Воскресе́нию.
Кондак, глас 6:
Покая́нным по́двигом, / две́рей дости́гл еси́ ра́йских, / священному́чениче Алекса́ндре, / ми́рным ду́хом наставля́я ты́сящи душ / на путь спаси́тельный. / Мы же ны́не в сре́тение Жениху́ исходя́ще, / не угаси́м свети́льников свои́х, / но храня́ще па́мять о Бо́зе возопии́м: // вы́ну, Го́споди, близ еси́, при две́рех.
Молитва
О священному́чениче Алекса́ндре, па́стырю Чума́кинский предо́брый, услы́ши чад свои́х, тя призыва́ющих! Ты бо от роди́телей благочести́вых на па́мять ди́внаго уго́дника Христо́ва в мир роди́выйся, житие́м твои́м явля́еши нам ве́ры пра́вило и о́браз кро́тости: те́мже у́бо испроси́ и нам смиренному́дрия. Ты изде́тска к Бо́гу по́мыслы свои́ми прилепи́вся, не погуби́л еси́ тала́нты богода́нныя, но во спасе́ние употреби́л еси́, ду́ши мно́гих отвраща́я от поги́бели: научи́ и нас уны́нию не предава́тися. Ве́лия прему́дрость, о́тче, тебе́ даде́ся, ка́ко де́ти ма́лыя в Зако́не Бо́жии наста́вити, я́ко и девятери́це кро́вных чад твои́х, и мно́жеству дете́й духо́вных красоту́ пути́ Госпо́дня показа́л еси́: укрепи́ и нас в любви́ и целому́дрии. Ты, священному́чениче Алекса́ндре, мудрецо́в богопроти́вных посрами́л еси́ богоразу́мием, не в су́етных стяза́ниих и словопре́ниих, но в де́ле Бо́жием преуспева́я: помози́ нам избега́ти пра́здности и праздносло́вия. Мно́га ле́та у престо́ла Бо́жия в хра́ме Никола́я чудотво́рца предстоя́л еси́, о́тче Алекса́ндре, па́стырю Чума́кинский, ны́не у́бо, во святы́х тебе просла́влену, во твое́ свято́е и́мя храм воздви́жеся: умоли́ о нас, нетерпели́вых и зави́стливых, да от любонача́лия и осужде́ния изба́вимся. Сам до ста́рости масти́тыя Христо́ви послужи́вый, и сме́рти ну́ждныя не устраши́выйся, священному́чениче Алекса́ндре, вои́стину еси́ Христо́в уго́дник: моли́ о лю́дех земли́ Симби́рския, я́ко о сро́дницех твои́х, любо́вию тя почита́ющих, да впредь не забыва́ют Бо́га, но вы́ну сла́вят Святу́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.
Назад к списку
