Священномученику Александру (Гневушеву), пресвитеру Бряндинскому (тропарь, кондак и молитва)
Тропарь, глас 6:
О́тче Алекса́ндре Бря́ндинский, / лю́ди Бо́жия направля́л еси́, / не к возмуще́нию Вара́ввину, / но к восста́нию Христо́ву. / Те́мже тя помина́юще, / вы́ну взыва́ем: // душе́ моя, восста́нии, что спи́ши?
Кондак, глас 6:
Четыредеся́тницу лет свои́х, / священному́чениче Алекса́ндре, / Го́споду посвяти́л еси́, / яко четыредеся́тницу по́стную; / ны́не же вре́мени во умале́ние приходя́щу, / по грехо́м челове́ческим, / помози́ нам тру́дным путе́м проити́, // от страсте́й к воскресе́нию.
Молитва
О, священному́чениче Алекса́ндре, зре́лый пло́де виногра́да Христо́ва! Ка́ко не диви́мся богому́дрому твоему́ благорассужде́нию? От ю́ных бо лет за Христо́м устреми́лся еси́, не свои́х си ища́, но то́кмо Бо́жия сла́вы. По стопа́м отца́ твоего́ в храм прише́д, возсла́вил еси́ Отца́ Небе́снаго гла́сом псало́мским. В са́не же свяще́ннем сподо́бився ежеде́нно прославля́ти ро́ждшагося Богомладе́нца, не оста́вил еси́ ма́лых чад Христо́вых кроме́ попече́ния; сего́ ра́ди и Ми́лостивый Госпо́дь пятери́цу младе́нцев твои́х от гла́да в годи́ну ску́дную изба́ви. Лю́дие же Бо́жии, сугу́бую ре́вность ко хра́му Бо́жию иму́ще, и твое́ усе́рдие ве́дуще, испроси́ша тя себе́ в до́браго па́стыря; оба́че Христо́с Первопа́стырь лу́чшая тебе́ предсуди́, да испыта́еши, что е́сть, е́же не и́мать где главу́ подклони́ти, и да обря́щеши ве́лию прему́дрость, и от путе́й лука́вых уклони́шися. Та́ко, о́тче, па́мятуя стра́шная Госпо́дня словеса́, е́же бди́те и моли́теся, не оста́вил еси́ Христа́, преда́телем Его́ приближа́ющимся: но душе́ю воспряну́в и истрезви́вся, и весе́лие о Рождестве́ на плач о гресе́х прела́гая, па́стве твое́й смысл воплоще́ния и распя́тия Христо́ва изъясни́л еси́.
И ныне мы, о́тче Алекса́ндре, ча́да твоя́, вку́пе со все́ми святы́ми тебе́ почита́юще, мо́лим ти ся усе́рдно : моли́ о нас Христа́ Бо́га, Ему́же всем житие́м и кончи́ною угоди́л еси́. Ви́дим бо ны́не сбытие́ слове́с твои́х, я́ко прии́дет час, егда́ прави́тели на́ши, тщету́ заблужде́ний бесо́вских позна́вше, се́рдцем сокруше́нным ко Христу́ обратя́тся; се у́бо ны́не вре́мя благоприя́тно, и близ есть Госпо́дь, и смире́нныя ду́хом спаса́ет. Испроси́, священному́чениче, у Христа́, Воскресе́нием смерть попра́вшаго, Це́ркви Правосла́вней едине́ние, архипа́стырем ея́ и па́стырем о Бо́зе ре́вность; стране́ Росси́йстей благоде́нствие и мир, прави́телем же му́дрость и терпе́ние; мона́шествующим укрепле́ние в духо́вней бра́ни, и мирски́м лю́дем трудолю́бие и чадолю́бие; да вы́ну жи́тельствует жи́знь по всей земли́, Бо́гом возлю́бленней, да лю́дие пою́т и прославля́ют Отца́, и Сы́на, и Свята́го Ду́ха, Тро́ицу Единосу́щную, во ве́ки веко́в. Ами́нь.
Назад к списку
