Преподобномученику Никанору (Морозкину), архимандриту Перервинскому (тропарь и кондак)
Тропарь, глас 3:
Мирска́го мяте́жа удали́вся,/ во оби́тель Нико́льскую на Пере́рве всели́лся еси́,/ егда́ же мяте́жнии на Бо́га и Це́рковь Его́ воста́ша,/ я́ко па́стырь до́брый, ду́шу за ню положи́л еси́,/ преподо́бне Никано́ре му́чениче./ Ны́не, в Небе́сных оби́телех пребыва́я,/ помина́й нас, любо́вию чту́щих тя,/ и моли́ спасти́ся душа́м на́шим.
Кондак, глас 5:
Во оби́тели Пере́рвинстей терпели́вно подвиза́яся,/ доброде́телем усе́рдно прилежа́л еси́/ и и́ноком богому́дрый наста́вник яви́лся еси́,/ преподо́бне Никано́ре достосла́вне./ Егда́ же прии́де час испыта́ния ве́ры твоея́,/ тве́рдость и терпе́ние показу́я,/ да́же до сме́рти за Христа́ вся претерпе́л еси́/ и му́ченический вене́ц от Него́ прия́л еси́,/ ны́не, Престо́лу Бо́жию предстоя́,/ моли́ приле́жно спасти́ся душа́м на́шим.
Тексты тропаря и кондака утверждены на заседании Священного Синода 16 мая 2023 года (журнал № 32).
Назад к списку
