Священномученику Сергию (Фелицыну), пресвитеру (тропарь, кондаки, молитва и величание)
Тропарь, глас 4:
Во́ине Бо́га Вы́шняго, во дни́ гоне́ния безбо́жнаго, жи́знь свою́ за ве́ру во Христа́ положи́в, служи́телю ве́рный земли́ Подо́льския бы́л еси́, священному́чениче Се́ргие, моли́ за на́с Христа́ и Засту́пницу усе́рдную, сохрани́тися от зла́ и тя́жких обстоя́ний.
Кондак, глас 3:
Ве́рный служи́телю Бо́га Вы́шняго, до́брый па́стырю о́тче на́ш Се́ргие, Правосла́вныя ве́ры защи́тниче и преди́вный моли́твенниче, ты́ в со́нме новому́чеников Росси́йских в Го́рних оби́телях пребыва́еши, моли́ся за на́с, гре́шных, да возда́ст на́м Госпо́дь ве́лию ми́лость.
Ин кондак, глас 8:
Возбра́нному служи́телю Бо́жию хвалу́ вси досто́йно принесе́м/, я́ко предста́телю и хода́таю за страну́ на́шу Росси́йскую;/ во дни гоне́ния безбо́жного ду́шу свою́ за Христа́ Царя́ отда́вшему,/ те́мже дерзнове́ние ко Всеблаго́му Бо́гу стяжа́вшему, благода́рственно взыва́ем ти:// ра́дуйся, Се́ргие, земли́ Подо́льския пресла́вное украше́ние.
Молитва
О избра́нниче и уго́дниче Христо́в, священному́чениче Се́ргие, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и о́вцы Его́ полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре свято́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим - пра́вило ве́ры, во́ином - вождь духо́вный, боля́щим - врач изря́дный, печа́льным - уте́шитель, гони́мым - засту́пник, ю́ным - наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́ и Сы́на и Свята́го Ду́ха во ве́ки веко́в. Ами́нь.
Величание
Велича́ем тя,/ священному́чениче Се́ргие,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
