Священноисповеднику Роману (Медведю), пресвитеру (тропари, кондаки и величание)
Тропарь, глас 4:
Кроншта́дтскаго па́стыря ча́до духо́вное,/ фло́та Черномо́рскаго окорми́теля,/ моско́вския па́ствы похвалу́ и ра́дование,/ испове́дника правосла́вныя ве́ры непоколеби́маго,/ сохра́ньшаго в страда́ниих свои́х/ Безце́нный Би́сер – Христа́,/ прииди́те, ве́рнии,/ све́тло просла́вим священноиспове́дника Рома́на и воспои́м ему́:// моли́, па́стырю до́брый, Христа́ Бо́га спасти́ся душа́м на́шим.
Ин тропарь, глас 4:
Заве́ты Кроншта́дтскаго па́стыря исполня́я,/ Христу́ усе́рдно после́довал еси́/ и, я́ко оте́ц чадолюби́вый,/ па́ству твою́, блаже́нне Рома́не, до́бре упа́сл еси́./ Во дни́ же гоне́ний лю́тых на Це́рковь Ру́сскую/ тве́рдость во испове́дании ве́ры показа́л еси́./ Ны́не же, Престо́лу Бо́жию предстоя́,/ моли́ся Го́споду, усе́рдно мо́лим тя́:/ Правосла́вию в земли́ на́шей утверди́тися,/ оте́честву в ми́ре пребыва́ти // и душа́м на́шим спасти́ся.
Кондак, глас 2:
Чистото́ю душе́вною боже́ственне вооружи́вся/ и непреста́нныя моли́твы, я́ко копие́, вручи́в кре́пко,/ пробо́л еси́ бесо́вская ополче́ния,/ Рома́не о́тче наш,// моли́ непреста́нно о всех нас.
Ин кондак, глас 2:
Восхва́лим, ве́рнии,/ изря́днаго во свяще́нницех/ и сла́внаго во испове́дницех/ Рома́на досточу́днаго,/ Правосла́вия побо́рника,/ благоче́стия ревни́теля,/ земли́ Ру́сския кра́сное прозябе́ние,/ гра́да Москвы́ похвалу́ и украше́ние,/ и́же, страда́нием Небесе́ дости́г / те́пле мо́лит Христа́ Бо́га // спасти́ся душа́м на́шим.
Величание
Велича́ем тя,/ бсвященноиспове́дниче Рома́не,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
