Священноисповеднику Петру (Чельцову), пресвитеру Владимирскому (тропари, кондак, молитва и величание)
Тропарь, глас 3:
Земли́ Росси́йския украше́ние,/ исповедниче отче Петре,/ в пра́вей ве́ре и благоче́стии пожи́л еси́,/ ве́рныя в годи́ну гоне́ний утеша́я и и́стине науча́я/ у́зы, поноше́ния и ско́рби претерпе́л еси́/ и вене́ц пра́вды от Христа́ Бо́га прия́л еси́./ Сего́ ра́ди мо́лим тя:/ спаса́й на́с, моли́твами твои́ми // от все́х бе́д и напа́стей.
Ин тропарь, глас 3:
Земли́ Ру́сския украше́ние,/ пра́вою ве́рою благоче́стно пожи́л еси́,/ ве́рныя в годи́ну гоне́ний и́стине науча́я и утеша́я,/ у́зы, гоне́ния и ско́рби терпя́,/ мо́лим тя́ пра́ведне о́тче Пе́тре,/ спаса́й на́с, моли́твами твои́ми // от все́х бе́д и печа́лей.
Кондак, глас 4:
Первоверхо́вному апо́столу па́стыря соиме́ннаго / уте́шителя скорбя́щих, цели́теля немощны́х,/ хвалу́ и утеше́ние на́ше дне́сь любо́вию восхва́лим ве́рнии./ Се́й бо е́сть цели́тель до́блий // и моли́твенник о душа́х на́ших.
Молитва
О, пресви́тере и служи́телю Бо́жий, о́тче святы́й Пе́тре, избра́нниче и па́стырю Христо́в! Ты измла́да Бо́га и́скренне возлюби́л еси́, ду́шу хра́мом Свята́го Ду́ха соде́лал еси́ и всего́ себе́, я́ко же́ртву чи́сту, Спа́су Христу́ прине́сл еси́ до после́дняго твоего́ исхо́да. Ей, пра́ведниче Пе́тре, от дре́вних святы́нь Пече́рския Ла́вры, я́ко от полново́дныя реки́, позна́нию и́стины науче́нный! Ты, тя́жкий и терни́стый путь спасе́ния ра́ди души́ твоея́ от Бо́га восприе́м, Христа́ пред ми́ром лука́вым, от него́же поноше́ния жесто́кая претерпева́я, да́же до сме́рти испове́дал еси́ и, я́ко па́стырь ди́вный, да́ры Бо́жия показу́я, в земли́ Влади́мирстей на ра́дость и утеше́ние лю́дем стра́ждущим яви́лся еси́. Отвсю́ду бо в весь Великодво́рскую за по́мощию и утеше́нием к тебе́ боля́щии и неду́жнии прихожда́ху и врачевство́ ве́лие от тебе́ приима́ху. Те́мже и мы, недосто́йнии и гре́шнии ча́да твоя́, дивя́щеся твоему́ пред Бо́гом дерзнове́нию, взыва́ем к тебе́ си́це: испроси́ благостоя́ние Це́ркви Ру́сстей, в мо́ри жите́йстем обурева́емей, Оте́честву на́шему мир и обновле́ние духо́вное; нам же утвержде́ние и преспе́яние в ве́ре, христиа́нскую кончи́ну и Бо́жие милосе́рдие на Стра́шном Суде́ Христо́вом, иде́же пра́ведницы возсия́ют, я́ко со́лнце, с ни́миже да сподо́бимся и мы прославля́ти в Тро́ице пева́емаго Бо́га, Отца́ и Сы́на и Свята́го Ду́ха. Ами́нь.
Величание
Велича́ем тя,/ пра́ведне о́тче Пе́тре,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
