Преподобномученикам Серафиму (Богословскому) и Феогносту (Пивоварову), Алма-Атинским (тропарь, кондак, молитва и величания)
Тропарь, глас 1:
Любве́ ра́ди Христо́вы оте́чество свое́ оста́вльше,/ вся́ ми́ра сего́ кра́сная, я́ко скороисчезающая, презре́вше,/ го́рняго Иерусали́ма взыску́юще,/ на гора́х Тянь-Ша́ня в по́двизех благоче́стия Святу́ю Тро́ицу просла́вили есте́./ И венца́ми добропобе́днаго му́ченичества украси́вшеся,/ гра́ду Алма-Ате богодарованнии покрови́телие яви́лися есте́,/ преподобному́ченицы Серафи́ме и Феогно́сте,/ Правосла́вия му́жественнии испове́дницы./ Те́мже и мы́, духо́вная ча́да ва́ша, любо́вию вопие́м:/ Сла́ва Да́вшему ва́м кре́пость,/ Сла́ва Венча́вшему ва́с,// Сла́ва Подаю́щему ва́ми ми́лости и исцеле́ния.
Кондак, глас 2:
Благо́е и́го Христо́во на себе́ восприе́мше/ и ле́гкое бре́мя Его́ любо́вию облобыза́вше,/ житие́м свои́м А́гнца Бо́жия пропове́давше,/ за и́стину, ра́дующеся, пострада́ли есте́,/ и в поко́й Небе́сный преше́дше,/ с ли́ки святы́х Престо́лу Бо́жию предстоите́,/ преподобному́ченицы Серафи́ме и Феогно́сте,/ гра́ду Алма-Ате испроси́те ми́ра// и все́м чту́щым ва́с ве́лию ми́лость.
Молитва
О, Богоблаже́нная дво́ице друзе́й Христо́вых, преподо́бнии страстоте́рпцы Серафи́ме и Феогно́сте! Казахстанския страны́ свети́льницы достопочте́нныя, гра́да Алма-Аты защи́тницы и покрови́телие богодарова́нные, правосла́вных все́х неусы́пныя наста́вницы! На небеси́ богопросвеще́нными душа́ми ва́шими Престо́лу Бо́жию предстоя́щии, на земли́ же му́ченически за Христа́ пострада́вшими телесы́ ва́шими на гора́х Заилийских почива́ющия и разли́чная дарова́ния духо́вная все́м с ве́рою и любо́вию к ва́м приходя́щим источающия! Ми́лостивым призре́нием благосе́рдия ва́шего при́зрите на лю́ди, святу́ю па́мять ва́шу почита́ющия, на ме́сте испове́днических по́двигов и преподо́бнических трудо́в ва́ших святы́й гро́б ва́ш обстоя́щия и те́плаго ва́шего ко Го́споду хода́тайства во обдержа́щих ну́ждах прося́щия. Вси́ бо мы́ по мно́жеству грехо́в на́ших не дерза́ем возвести́ на Не́бо оче́с на́ших, до́лу пони́кших, вы́ же, я́ко стяжа́вшии дерзнове́ние ко Го́споду и ны́не со А́нгелы Ему́ предстоя́щии, принеси́те о на́с благоуханные моли́твы ва́ша, во е́же изба́витися на́м от гла́да, пото́па, тру́са, огня́, меча́, наше́ствия иноплеме́нник и междоусо́бныя бра́ни, от вся́кия ско́рби, зо́л и боле́зни душе́вныя и теле́сныя от люде́й и диа́вола по грехо́м на́шим быва́ющия. Да си́х избежа́вше, Го́споду усе́рдно рабо́тающе, моли́твами ва́шими и те́плым предста́тельством вни́дем в несконча́емый поко́й Ца́рства Небе́снаго и та́мо с ва́ми и ли́ки все́х святы́х просла́вим Вели́кое И́мя Святы́я Тро́ицы, Отца́ и Сы́на и Ду́ха Свята́го во ве́ки веко́в. Ами́нь.
Величание
Велича́ем вас,/ преподо́бнии страстоте́рпцы Серафи́ме и Феогно́сте,/ и чтим святу́ю па́мять ва́шу,/ вы бо мо́лите за нас // Христа́ Бо́га на́шего.
Ино величание
Ублажаем вас,/ преподобномученицы Серафиме и Феогносте,/ и чтим честная за Христа страдания ваша,/ наставницы монахов // и собеседницы Ангелов.
Назад к списку
