Священномученику Михаилу (Накарякову), пресвитеру (тропарь, кондак, молитва и величание)
Тропарь, глас 4:
Дне́сь лику́ет собо́р новому́чеников Росси́йских,/ земли́ Пе́рмския священному́ченика сла́внаго прославля́я,/ усо́льскаго пресви́тера/ Михаи́ла до́браго па́стыря./ Во дни́ гоне́ния безбо́жнаго/ жи́знь свою́ за Христа́ положи́вшаго/ и стоя́ща у Престо́ла Вседержи́телева/ и моля́щагося за ны́.// Его́же моли́твами, Бо́же, спаси́ души́ на́ша.
Кондак, глас 6:
Благослове́ние, прему́дре, стяжа́вый/ и вене́ц муче́ний прии́мый,/ Тро́ицы всесвяты́я пропове́дниче,/ иере́ев о́бразе достохва́льне,/ новому́чеников пресла́вное удобре́ние,/ блаже́ннее Михаи́ле богому́дре,/ моли́ся Влады́це Вседержи́телю // во е́же спасти́ся на́м.
Молитва
О, пресла́вне священному́чениче Михаи́ле, ду́шу за Христа́ преда́вый и кро́вию твое́ю па́жить Его́ удобри́вый! Услы́ши на́с, гре́шных, и непотре́бных ча́д твои́х в ча́с се́й усе́рдно прибега́ющих к хода́тайству твоему́. Моли́ о на́с Человеколю́бца Бо́га, да пода́ст на́м ду́х покая́ния и сокруше́ния о гресе́х на́ших, да всади́т в сердца́ на́ши ду́х смире́ния и кро́тости, ду́х добротолю́бия и незло́бия, ду́х терпе́ния и целому́дрия, ду́х ре́вности к сла́ве Бо́жией и спасе́нию бли́жних. Испроси́, всехва́льне священному́чениче, о́тче на́ш Михаи́ле, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, благоче́стие и кре́пость во искуше́ниих. Упраздни́ моли́твами твои́ми злы́я обы́чаи ми́ра сего́ заражающия христиа́нский ро́д нераде́нием к Боже́ственней Правосла́вной ве́ре, к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Укрепи́ твои́ми моли́твами ру́сских Правосла́вных люде́й, благопоспеше́ствуй на́м во все́х благи́х дея́ниях и начина́ниях к водворе́нию ми́ра и пра́вды в держа́ве на́шей, да всегда́ прославля́ем Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Величание
Велича́ем тя,/ священному́чениче Михаи́ле,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
