Великомученице Ксении Пелопонесской (тропарь, кондак, молитва и величание)
Тропарь, глас 4:
А́гница Твоя́, Иису́се, Ксе́ния/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся и спогреба́юся Креще́нию Твоему́,/ и стражду́ Тебе́ ра́ди, я́ко да ца́рствую в Тебе́,/ и умира́ю за Тя, да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́.// Тоя́ моли́твами, я́ко Ми́лостив, спаси́ ду́ши на́ша.
Кондак, глас 4:
Де́вства добро́тами преиспещре́нна, де́во,/ страда́льчеством была́ еси́ красне́йшая, Ксе́ние,/ кровьми́ твои́ми исте́кшими обагре́на,/ пре́лесть низложи́ла еси́ безбо́жия.// Сего́ ра́ди прия́ла еси́ по́чести побе́ды руко́ю Созда́теля твоего́.
Молитва
О прехва́льная му́ченице Христо́ва Ксе́ние, благонаде́жная на́ша пред Го́сподем предста́тельнице! К тебе́ усе́рдно прибега́ем и во умиле́нии серде́ц на́ших про́сим: умоли́ Го́спода и Влады́ку на́шего да проба́вит ми́лость Свою́ к нам, недосто́йным рабо́м Его́, да пода́ст грехо́в на́ших проще́ние, ми́рное и благочести́вое житие́ да да́рует нам, кончи́ны же живота́ непосты́дныя и ми́рныя и блаже́нства ве́чнаго в бу́дущем ве́це нас да сподо́бит, да вы́ну возсыла́ем сла́ву и благодаре́ние Отцу́ и Сы́ну и Свято́му Ду́ху во ве́ки веко́в. Ами́нь.
Величание
Велича́ем тя,/ великому́ченице Христо́ва Ксе́ние,/ и чтим честно́е страда́ние твое́,/ я́же за Христа́ // претерпе́ла еси́.
Назад к списку
