Священноисповеднику Иоанну (Калинину), Оленевскому (тропарь, кондак, молитва и величание)
Тропарь, глас 4:
Земли́ Ру́сския моли́твенниче,/ покая́ния и жи́зни во Христе́ пропове́дниче,/ от ю́ности в труде́х и посте́х о́браз верным бы́в,/ в годи́ну тя́жкую тесноту́ и лише́ния от безбо́жных претерпе́л еси/ и ко все́м стра́ждущим сердце ми́лующее име́л еси́,/ о́тче наш Иоа́нне. // Поспеши́ и ны́не в по́мощь на́м, любо́вию чту́щим тя́.
Кондак, глас 2:
Дне́сь земля́ Пе́нзенская прославля́ет Иоа́нна преди́внаго,/ в сонме но́вых му́чеников Церкве Русския просия́вшаго./ Его́же моли́твами, Христе́ Бо́же,// спаси́ ве́рныя лю́ди Твоя́.
Тексты тропаря и кондака утверждены решением Священного Синода от 29 октября 2019 года (журнал № 138).
Молитва
О, преди́вный и сла́вный уго́дниче Христо́в, преподо́бне о́тче Иоа́нне испове́дниче. В житии́ свое́м и по́двизех преподо́бному Серафи́му и пра́ведному Иоа́нну Кроншта́дтскому уподо́бился еси́. Та́кожде и мы́, к Твоему́ тве́рдому заступле́нию прибега́юще, в сокруше́нии серде́чном мо́лим Тя́: озари́ на́с све́том дарова́нной Тебе́ благода́ти и моли́твенным предста́тельством пред престо́лом Бо́жиим утверди́ и умно́жь ве́ру на́шу. Ты́ бо и в годи́ну лю́тых гоне́ний явля́л немощны́м подкрепле́ние и утеше́ние, боля́щим исцеле́ние и заступле́ние, заблу́ждшим исправле́ние, бе́дствующим благовре́менную по́мощь. И ны́не не оста́ви на́с, с ве́рою и наде́ждою к ра́це моще́й Твои́х притека́ющих. Умоли́ Всеблага́го Го́спода наро́ды Оте́чества на́шего в единомы́слии ве́ры и во вся́ком благоче́стии соблюсти́, междоусо́бныя бра́ни умири́ти, ду́х благоче́стия, братолю́бия и стра́ха Бо́жия в сыне́х ру́сских возроди́ти. И́мамы бо Тя́, неусыпа́ющаго моли́твенника и предста́теля, непреста́нно с любо́вию славосло́вим ди́внаго во святы́х Свои́х Бо́га — Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Величание
Велича́ем тя,/ преподо́бне испове́дниче Иоа́нне,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
