Преподобномученику Иоасафу Снетогорскому, Псковскому (тропарь, кондак и молитвы)

Тропарь, глас 4:

Любо́вию Христо́вою, Богому́дре, просвети́вся, / и в пусты́ню всели́вся, / та́мо оби́тель в похвалу́ Богома́тери основа́л еси́, / и и́ночествующих мно́жество собра́в, / ста́ду твоему́ прему́др наста́вник показа́лся еси́, / и му́ченически пострада́л еси́ во огне́ от беззако́нных, святы́й Иоаса́фе. / Сего́ ра́ди со преподо́бными и му́чениками венча́лся еси́, / с ни́миже предстои́ши ны́не Христу́ Бо́гу, // Его́же моли́ держа́ве на́шей, гра́ду твоему́ и оби́тели в ми́ре спасти́ся.

Кондак, глас 8:

Лику́й све́тло оби́тель Снетого́рская, / име́я в себе́ мо́щи свята́го преподобному́ченика Иоаса́фа, / всю зе́млю Росси́йскую озаря́юща, / и ду́ши с ве́рою приходя́щих к нему́ просвеща́юща. / Те́мже Христа́ Бо́га возблагодари́м, // я́ко дарова́ нам засту́пника и моли́твенника о душа́х на́ших.

Молитва первая

О святы́й уго́дниче Бо́жий, преподобному́чениче Иоаса́фе, ты, порабо́тати Го́сподеви жела́я, на горе́ Сне́тней оби́тель и́ноческую в похвалу́ Пресвяте́й Богоро́дице основа́л еси́, и неле́ностно в труде́х, в бде́ниих, в моли́твах и посте́х подвиза́лся еси́, и был еси́ наста́вник му́дрый мона́шествующим, всем же лю́дем учи́тель благода́тный; егда́ же наста́ испыта́ния час, му́ченическую смерть во огне́ от враго́в Правосла́вия прия́л еси́ и венце́м нетле́нным венча́лся еси́ от Бо́га. Ны́не же вку́пе со а́нгелы и со все́ми святы́ми земли́ Росси́йския предстоя́ у Престо́ла всех Царя́ Христа́, приле́жно моли́ся Ему́, да сохрани́т оби́тель твою́, град и вся гра́ды и ве́си страны́ на́шея от вся́ких зол, боле́зней, напа́стей и наве́тов вра́жиих, от нахожде́ния иноплеме́нных и междоусо́бныя бра́ни, да утверди́т наро́д наш во святе́й правосла́вней ве́ре, да да́рует нам и́скреннее покая́ние, серде́ц сокруше́ние, воздержа́ние же, смиренному́дрие и кро́тость, чистоту́ душе́вную и теле́сную и друг ко дру́гу нелицеме́рную любо́вь. О святы́й о́тче, кре́пкое оби́тели Снетого́рския, гра́да Пско́ва и всея́ держа́вы Росси́йския огражде́ние и те́плый за нас гре́шных ко Го́споду Иису́су Христу́ и Пречи́стей Ма́тери Его́ моли́твенниче! Мо́лимся тебе́, к ра́це моще́й твои́х притека́юще: испроси́ нам вре́мя на покая́ние, да твои́м предста́тельстаом от ве́чныя му́ки изба́вльшеся. Небе́сное Ца́рство насле́довати сподо́бимся со все́ми пра́ведными, угоди́вшими Христу́ Бо́гу на́шему. Ему́же подоба́ет вся́кая сла́ва, честь и поклоне́ние ны́не и в безконе́чныя ве́ки веко́в. Ами́нь.

Молитва вторая, чтомая во обители Снетогорской

О па́стырю и наста́вниче наш богому́дрый; преподо́бных и му́ченик сонасле́дниче и о́бщаго жития́ и́ноческаго соверши́телю изря́дный, земли́ Пско́вския свети́ло благосве́тлое и оби́тели Снетого́рския основа́телю о́тче Иоаса́фе, к тебе́ прибега́ем и тебе́ усе́рдно мо́лим, бу́ди хода́тай и моли́твенник о всех, во святе́й оби́тели твое́й жи́тельствующих, да и мы, благода́тию Ду́ха Свята́го, после́дованием житию́ твоему́, во о́браз преподо́бия и пра́вды преобрази́мся. Укроти́ во́лны страсте́й и бед, возстаю́щих на нас, не отступи́ от нас ду́хом, огражда́й нас от пре́лести бесо́вския, ко́зней диа́вольских и от челове́к злых. Укрепи́ нас в духо́вной бра́ни, отжени́ вся́кое уны́ние и печа́ль грехо́вную от серде́ц на́ших и небе́сное утеше́ние низпосли́ нам, охладе́вшая сердца́ на́ша согре́й любо́вию к бли́жним и исполне́нию за́поведей Бо́жиих. Огради́, о преподобному́чениче, святу́ю оби́тель твою́ от огня́, и меча́, от смертоно́сныя я́звы и от вся́каго обстоя́ния. Умоли́ Го́спода, е́же сохрани́ти ме́сто по́двигов твои́х, иде́же ду́хом любве́ твоея́ неотсту́пно пребыва́еши, и всем нам, с ве́рою припа́дающим к многоцеле́бным моще́м твои́м от вся́ких бед душе́вных и теле́сных избавле́ние дарова́ти, да утверди́м в чистоте́ и пра́вде ду́ши на́ша и та́ко Ца́рствия Небе́снаго дости́гнем, воспева́ющи ку́пно с тобо́ю Отца́ и Сы́на и Свята́го Ду́ха во ве́ки веко́в. Ами́нь.