Преподобномученику Ефрему Новому, Неамакрийскому (тропари, кондаки, молитвы и величание)

Тропарь, глас 1:

Яко со́лнце, возсия́л еси́ в горе́ Амо́мстей,/ преподобному́чениче Христо́в Ефре́ме,/ и, ва́рварская нахожде́ния претерпе́в,/ му́ченически к Бо́гу отше́л еси́./ Сего́ ра́ди благода́ть при́сно источа́еши/ благоче́стно зову́щим:/ сла́ва Да́вшему ти кре́пость,/ сла́ва Просла́вльшему тя, // сла́ва Де́йствующему тобо́ю всем исцеле́ния.

Кондак, глас 3:      

На горе́ Амо́мстей добр́е подвиза́лся еси́, богому́дре,/ и та́мо му́ченическое тече́ние сконча́л еси́./ Те́мже, преподобному́чениче Ефре́ме,/ Жизнода́вец сугу́быми венцы́ досто́йно увенча́ тя,/ приле́жно моля́щася о душа́х на́ших.

Молитва первая

О, святы́й о́тче Ефре́ме, преподо́бных единовсе́льниче и му́чеников соприча́стниче, возлюби́вый Го́спода Бо́га всем се́рдцем и Тому́ да́же до конца́ после́довавый! Ты пе́рвее посто́м и моли́твою ду́шу твою́ очи́стил еси́ и произволе́нием тве́рдым, я́коже мече́м, вся стра́стныя по́мыслы посе́кл еси́. Та́же, егда́ прии́де вре́мя твоего́ страда́ния, не убоя́лся еси́ мучи́телей, но моли́твою к Бо́гу отрази́л еси́ нахожде́ния диа́вола. И, я́коже еди́н от дре́вних вели́ких страстоте́рпцев, претерпе́л еси вся му́ки, ели́ка безу́мнии врази́ измы́слити возмого́ша. Коне́чне же и смерть за ве́ру Правосла́вную прия́л еси́ и си́лою Креста́ Христо́ва ага́рянское нече́стие посрами́л еси́. Сего́ ра́ди прославля́ем по́двиги твоя́, о́тче Ефре́ме, почита́ем страда́ния и мо́лимся: умилосе́рдися о нас, гре́шных, и житие́ на́ше плодоно́сно покажи́. Да паду́т оби́льныя сле́зы покая́ния на изсо́хшую зе́млю душ на́ших, и да обрати́тся сия́ из пусты́ни непло́дныя в сад боже́ственных доброде́телей, да утверди́тся огра́дою воздержа́ния, да процвете́т цве́том чистоты́ и целому́дрия и принесе́т плод стори́чный де́лы милосе́рдия и любве́ к Бо́гу и бли́жнему. Да услы́шим и мы сла́дкий глас Влады́ки Христа́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Молитва вторая

О, преподобному́чениче Ефре́ме, ди́вный чудотво́рче и вели́кий ми́ру свети́льниче! Ты от ю́ности Христа́ возлюби́в, Тому́ Еди́ному вседу́шно после́довал еси́. Жития́ же мона́шескаго взыску́я, на горе́ Амо́мон всели́лся еси́ и та́мо, плоть распина́я и непреста́нную моли́тву в се́рдце твое́м соверша́я, мно́гими слеза́ми ду́шу твою́ от страсте́й очи́стил еси́. Сего́ ра́ди угото́вася тебе́ путь превосхо́днейший, не то́кмо в Сы́на Бо́жия ве́ровати, но и по Нем страда́ти. Те́мже му́ки горча́йшия за Христа́ ра́достно прия́л еси́ и, ника́коже ага́рян нечести́вых устраши́вся, на до́лзе вре́мени муче́ния теле́сная терпе́л еси́, та́же, ди́вное му́жество показу́я, кровь твою́, я́ко многоце́нное ми́ро, на зе́млю пролия́л еси́. Егда́ же безумнии ага́ряне, жела́вшии тя от Христа́ отри́нути, узре́ша, я́ко ничто́же успева́ют, на дре́ве стремгла́в простро́ша тя и па́лицею горя́щею свято́е те́ло твое́ прободо́ша. Ты же, претру́дный путь свой соверши́в, кро́тко ду́шу твою́ в ру́це Бо́жии преда́л еси́.Те́мже, я́ко мо́лния на не́бо возше́л еси́, дости́гнув возлю́бленнаго тобо́ю Го́спода. И́же прие́м тя, я́ко ве́рнаго во́ина, увязе́ главу́ твою́ честну́ю венце́м нетле́нныя сла́вы и отре́ вся́кую слезу́ твою́, на ве́ки с Собо́ю сочетава́я. Кто ны́не возмо́́жет разлучи́ти тя от любве́ Бо́жия? Кто исхи́тит у тебе́ све́тлую диади́му, дарова́нную Небе́сным Царе́м? Кто лиши́т тя ве́чнаго жи́тельства во гра́де Госпо́днем? Вои́стину неотъе́млемое насле́дие и прича́стие со святы́ми восприя́л еси́ на Небесе́х. Ны́не же на земли́ просия́ сла́ва твоя́, святы́й о́тче Ефре́ме. А́ще бо и безве́стно в ми́ре сем пострада́л еси́, оба́че Творе́ц вся́ческих, ве́дый та́йная, в после́док дний сих яви́ сокрове́нныя в земли́ твоя́ мо́щи, по́двиги твоя́ явле́ны сотвори́ и дарова́ ти ве́лию благода́ть исцеле́ний в по́мощь и утеше́ние ро́ду христиа́нскому. Сего́ ра́ди пото́ки чуде́с источи́л еси́, о́тче Ефре́ме, притека́ющим к святе́й твое́й ра́це, рассла́бленныя укрепля́я, слепы́м зре́ние подава́я, хромы́я возставля́я и ины́ми мно́гими и неисце́льными неду́гами содержи́мыя лю́ди врачу́я. И да́же до днесь вся концы́ вселе́нныя просвеща́еши многоразли́чными ди́вными чудесы́ и виде́нии. О, свя́тче Бо́жий, не оста́ви и нас, убо́гих, оскуде́вших в ве́ре, любви́ и до́брых де́лех, возста́ви нас па́дших в стра́сти, да́руй нам сле́зы покая́ния, утверди́ твое́ю кре́пкою к Бо́гу моли́твою, исцели́ на́ша неду́гующия ду́ши и телеса́. Просвети́ наш ум после́довати ева́нгельским за́поведем, возжзи́ в сердца́х на́ших неугаси́мую любо́вь ко Спа́су и бли́жним на́шим, да́руй нам благи́ми де́лы прославля́ти Отца́ на́шего Небес́наго, Ему́же подоба́ет вся́кая сла́ва, честь и поклоне́ние со Единоро́дным Его́ Сы́ном и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Тексты тропаря, кондака и молитв (в составе службы) утверждены на заседании Священного Синода 25 августа 2022 года (журнал № 78).

Ин тропарь, глас 1:

На горе́ Непоро́чных я́ко со́лнце возсия́л еси́,/ и му́ченически, богоно́сне, к Бо́гу изше́л еси́,/ ва́рварское наше́ствие претерпе́л еси́,/ Ефре́ме великому́чениче Христо́в,/ си́м при́сно источа́еши благода́ть все́м благоче́стно вопию́щим ти́./ Сла́ва да́вшему ти́ кре́пость,/ сла́ва просла́вльшему тя́, // сла́ва подаю́щему тобо́ю все́м исцеле́ния!

Ин кондак, глас 3:

На горе́ Непоро́чных подвиза́лся еси́, богому́дре,/ и на се́й проше́л еси́ му́ченичества пу́ть,/ сего́ ра́ди сугу́бым венце́м Живодавец досто́йно тя́ венча́л е́сть,/ священному́чениче Ефре́ме, // приле́жно прося́ща поми́ловати славосло́вящих тя́.

Молитва вторая

О, пресла́вный священному́чениче Ефре́ме! и ско́рый помо́щниче Христиа́ном в боле́знех! Ве́рую от всея́ души́ и помышле́ния, я́ко даде́ся тебе́ от Го́спода да́р боля́щия врачева́ти и разсла́бленныя укрепля́ти. Сего́ ра́ди к тебе́, я́ко благода́тному врачу́ боле́зней, а́з немощны́й прибега́ю и, тво́й досточти́мый о́браз с благогове́нием лобыза́я, молю́ся: твои́м предста́тельством у Царя́ Небе́снаго испроси́ мне́ боля́щему исцеле́ние от удруча́ющия мя́ боле́зни, а́ще бо и недосто́ин е́смь тебе́, бла́гостнейшаго отца́ и при́снаго засту́пника моего́, но ты́, бы́в подража́тель человеколю́бия Бо́жия, сотвори́ мя́ досто́йна твоего́ заступле́ния чрез мое́ обраще́ние от злы́х де́л к благо́му житию́, уврачу́й оби́льно дарова́нною тебе́ благода́тию я́звы и стру́пы души́ и те́ла моего́, да́руй ми́ здра́вие и спасе́ние и во все́м благо́е поспеше́ние, да та́ко, ти́хое и безмо́лвное житие́ пожи́в во вся́ком благоче́стии и чистоте́, сподо́блюся со все́ми святы́ми сла́вити Всесвято́е и́мя Отца́ и Сы́на и Свята́го Ду́ха. Ами́нь.

Величание

Ублажа́ем тя,/ священному́чениче Ефре́ме,/ и чтим святу́ю па́мять твою́,/ наста́вниче мона́хов // и собесе́дниче А́нгелов.