Преподобномученице Вере (Морозовой) (тропари, кондак и молитва)
Преподобномученице Вере (Морозовой) (тропари, кондак и молитва)
Тропарь, глас 5:
И́ноческий крест му́жественне подъе́мши/ и служе́нием бли́жнему той украси́вши,/ путе́м у́зким и приско́рбным ше́ствовала еси́,/ свята́я Ве́ро благохва́льная,/ па́че же венце́м страда́ния увенча́лася еси́;/ сего́ ра́ди Христу́ приле́жно, му́ченице, моли́ся,/ грехо́в отпуще́ние нам дарова́ти // и душа́м на́шим ве́лию ми́лость.
Ин тропарь, глас 2:
Егда́ прии́деши, Иису́се, Судие́ Пра́ведный,/ испыта́ти ве́ру на земли́,/ тогда́ моли́твы за ны приими́ преподобному́ченицы Ве́ры,/ с любо́вию Тебе́ поже́ршияся/ и безбо́жная гоне́ния со смире́нием претерпе́вшая,/ ны́не же в Черто́зех Небе́сных Тебе́ моля́щияся,/ да отврати́ши от нас Твой пра́ведный гнев,/ благоче́стием на неви́димыя враги́ препоя́шеши // и ча́сти спаса́емых нас сподо́биши.
Кондак, глас 1:
Небе́сную сла́ву па́че земны́я предпоче́тши,/ во оби́тель Страстну́ю всели́лася еси́,/ иде́же, усе́рдно подвиза́вшися,/ стра́сти обузда́ла еси́ и терпе́ние мно́гое стяжа́ла еси́,/ любо́вию же ко Христу́ уязви́вшися,/ в же́ртву Тому́ себе́ принесла́ еси́./ Его́же моли́, свята́я блаже́нная Ве́ро,/ да с наде́ждой крест свой понесе́м,/ ве́ру непоро́чну сохрани́м // и любо́вь нелицеме́рну приобря́щем во спасе́ние душ на́ших.
Молитва
О, свята́я преподобному́ченице Ве́ро! Ты изде́тска во святе́м Креще́нии, я́ко зерно́ ма́лое, ве́ру святу́ю восприя́ла еси́ и, во благоче́стии возраста́ющи, сию́ в се́рдце твое́м, я́ко сокро́вище безце́нное, храни́ла еси́. Сего́ ра́ди и во оби́тель Страстну́ю притекла́ еси́, ча́ющи глас Христо́в услы́шати: ве́ра твоя́ спасе́ тя, иди́ в ми́ре. Егда́ же годи́на гоне́ний безбо́жных зе́млю на́шу пости́же, ве́ра твоя́ яви́ся, я́ко дре́во многоли́ственное, е́же се́нию свое́ю приста́нище стра́нным и отра́ду стра́ждущим подава́ше. Тем и мучи́телей твои́х стра́ха не убоя́лася еси́ и в сме́рти, я́же за Христа́, жизнь ве́чную обрела́ еси́. О, всехва́льная му́ченице Ве́ро! Моли́ Го́спода Бо́га, да изба́вит страну́ на́шу от неве́рия, лю́ди ея́ в Правосла́вии утверди́т и во благоче́стии сохрани́т. Научи́ нас, гре́шных и уны́лых, не страши́тися тьмы ве́ка сего́, но све́том ве́ры Христо́вы сию́ побежда́ти, в час же кончи́ны на́шея сподо́би моли́твами твои́ми спаса́емых часть восприя́ти, да ничто́же отлучи́т нас от любве́ Бо́жия, я́же о Христе́ Иису́се, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м, Пресвяты́м, Благи́м и Животворя́щим Его́ Ду́хом ны́не, и при́сно, и во ве́ки веко́в. Ами́нь.
Тексты тропарей, кондака и молитвы утверждены к общецерковному богослужебному употреблению решением Священного Синода от 24 марта 2022 года (журнал № 23).
Назад к списку
