Священномученику Павлу (Лазареву), пресвитеру (тропарь и кондак)
Тропарь, глас 1:
Свы́ше зва́нный и Богома́терию благослове́нный,/ иере́ю честны́й и до́блий страда́льче,/ лю́дем Примо́рскаго кра́я наста́вниче/ и собо́ра но́вых му́ченик досто́йный прича́стниче,/ священному́чениче Па́вле достохва́льне,/ моли́ Пресвяту́ю Тро́ицу,/ Ю́же в земли́ на́шей просла́вил еси́, // дарова́ти нам мир и ве́лию ми́лость.
Кондак, глас 3:
Се́рдцем ве́руя в пра́вду Бо́жию/ и усты́ испове́дуя спаси́тельный Крест Госпо́день,/ мно́гия лю́ди во и́стине утверди́л еси́/ и пред гони́тели Христа́ испове́дал еси́,/ священному́чениче Па́вле,/ сего́ ра́ди, ве́дуще тя, я́ко еди́наго от но́вых му́ченик Восто́ка земли́ на́шея/ и святы́х страда́льцев собо́ра Це́ркве Ру́сския,/ согла́сно тебе́ вопие́м:/ благода́тную по́мощь с Небесе́ нам низпосли́, // пра́зднующим любо́вию па́мять твою́.
Тексты тропаря и кондака утверждены к общецерковному богослужебному употреблению решением Священного Синода от 24 марта 2022 года (журнал № 23).
Назад к списку
