Преподобномученице Екатерине (Декалиной) Симбирской (тропарь, кондак и молитва)
Тропарь, глас 1:
От ю́ности Христа́ Бо́га возлюби́вши, / в смире́нии и милосе́рдии Тому́ угоди́ла еси́, / Христа́ со дерзнове́нием пропове́дающи, / тве́рдостию ве́ры безбо́жных посрами́ла еси́, / зе́млю Симби́рскую кро́вию свое́ю освяти́вши, / Ца́рства Небе́снаго дости́гла еси́. / Те́мже по до́лгу восхваля́ем тя, / богому́драя преподобному́ченице Екатери́но, / моли́ Человеколю́бца Христа́, // спасти́ся душа́м на́шим.
Кондак, глас 2:
Новоявле́нная ве́ры звезда́, / возсиява́ет днесь в Симби́рстей земли́: / восхва́лим ны́не преподобному́ченицу Екатери́ну достосла́вную. / Та бо во дни гоне́ний на Це́рковь Ру́сскую, / Христа́ испове́дати не убоя́ся, / о́браз лю́дем ве́рным явля́ющи, / и му́ченический крест на ра́мена своя́ восприи́мши: / кровьми́ же я́ко багряни́цею укра́сившися, / в небе́сныя черто́ги всели́ся. / Те́мже со дерзнове́нием вопие́м ей: // моли́твами твои́ми спаси́ ду́ши на́ша.
Молитва
О свята́я преподобному́ченице Екатери́но, прему́драя неве́сто Христо́ва и ди́вная засту́пнице Симби́рская! К кому́ прибе́гнем в ра́дости и в ско́рби на́шей, а́ще не к тебе́, о ма́ти богому́драя? Ты бо от ю́ности Спа́су угоди́ти потща́лася еси́, и ны́не и́маши пред ним дерзнове́ние ве́лие. Помяни́ же ма́ти Екатери́но, нас неразу́мных и малоду́шных, су́щих во обстоя́ниих ско́рбных, в беда́х и боле́знех. Не еди́ножды пои́вшая ма́лых и си́рых земно́ю сла́достию, умоли́ Небе́сного Влады́ку изба́вити нас го́речи грехо́вныя, и напои́ти сладча́йшею водо́ю ве́ры и упова́ния. Бо́гом да́нное жития́ послуша́ние проходи́вшая со усе́рдием, испроси́ нам у Христа́ терпе́ния и трезве́ния, да не облени́мся и не вни́дем в напа́сть, но до́брый путь обря́щем, и про́йдем его́ благополу́чно. От трудо́в смире́нных рук свои́х име́вшая чим покры́ти наготу́ бли́жняго, ны́не покры́й любо́вию на́шу не́мощь, умоля́ющи Царя́ Небе́снаго прости́ти нам забве́ние даро́в Его́, и о тала́нтех да́нных нераде́ние. Что у́бо про́сим у тебе́ в день ра́достный, о ма́ти Екатери́но? Блаже́нна бо еси́, яко поноша́ху ти, и лжу́ще на тя реко́ша зол глаго́л, и изгна́ша тя и уби́ша Христа́ ра́ди; оба́че ра́дуемся днесь и весели́мся, я́ко мзда твоя мно́га на Небесе́х. Донеси́ же, ма́ти, благодаре́ние и ра́дость на́шу Бо́гу милосе́рдному, преди́вно сотво́ршему сей мир, и вся я́же в нем прекра́сно украси́вшему. Взира́юще, о преподобному́ченице, на о́браз твой, воспомяне́м Христо́ва словеса́ нело́жная : в ми́ре ско́рбни бу́дете, но дерза́йте, я́ко Аз победи́х ми́р. Те́мже у́бо, моли́твами твои́ми поспешеству́еми, не закосни́м в уны́нии плаче́внем, но вы́ну па́мятуем о воскресе́нии, о Ца́рствии Небе́снем и о сре́тении со Христо́м, Ему́же подоба́ет славосло́вие и че́сть и поклоне́ние, со Безнача́льным Его́ Отце́м, и со Пресвяты́м Уте́шителем Ду́хом, ны́не и при́сно, и во ве́ки веко́в. Ами́нь.
Назад к списку
