Священномученику Серафиму (Остроумову), архиепископу Смоленскому (тропарь, кондак и молитва)
Тропарь, глас 4:
Апо́стольскаго служе́ния прее́мник быв,/ сло́во Христо́вы и́стины пра́во пра́вил еси́,/ ве́ры же ра́ди гоне́ния и страда́ния претерпе́в,/ на высоту́ богове́дения возше́л еси́,/ сего́ ра́ди и венце́м му́ченическим украси́лся еси́,/ Серафи́ме прему́дре.// Моли́ся Го́сподеви о спасе́нии душ на́ших.
Кондак, глас 3:
Я́ко иера́рх усе́рдно Це́ркви Христо́вей послужи́в,/ путе́м испове́дания ве́ры небоя́зненно ше́ствовал еси́,/ огнь богобо́рчества угаша́я и собла́зн разделе́ний любо́вию врачу́я,/ па́стырь до́брый ста́ду твоему́ яви́лся еси́./ Сего́ ра́ди уми́льно вопие́м:/ от бед и скорбе́й сохраня́й нас моли́твами твои́ми,// святи́телю Серафи́ме досточу́дне.
Молитва
О всехва́льный священному́чениче Серафи́ме, всечестны́й архиере́ю и служи́телю Христо́в изря́дный! Ты, пресве́тлый о́браз Пастыренача́льника Христа́ Иису́са при́сно в себе́ нося́, до́бре па́ству твою́ упа́сл еси́ и в годи́ну лихоле́тия столп кре́пкий Це́ркве Правосла́вныя яви́лся еси́. Те́мже про́сим тя, ми́лостиваго засту́пника и те́плаго хода́тая на́шего: умоли́ Всеблага́го Бо́га, да низпо́слет хода́тайством твои́м Це́ркви Святе́й едине́ние и любо́вь, Оте́честву на́шему мир и благоде́нствие, нам же всем и́стинное покая́ние, братолю́бие, в доброде́телех преуспе́яние и вся́каго зла одоле́ние. Ей, святи́телю Бо́жий! Помози́ нам, гре́шным и немощны́м, в быстроте́чном сем земно́м житии́, наста́ви нас на путь пра́вый за́поведей Госпо́дних, научи́ возжига́ти в сердца́х на́ших огнь любве́ Боже́ственныя, и́мже от ю́ности твоея́ ангелоподо́бно воспламени́лся еси́, да, сконча́вше тече́ние свое́, ку́пно с тобо́ю на Небеси́ просла́вим великоле́пое и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
Тексты тропаря, кондака и молитвы утверждены решением Священного Синода от 8 декабря 2020 года (журнал № 99).
Назад к списку
