Священномученику Николаю (Попову) пресвитеру (тропарь, кондак, молитва и величание)
Тропарь, глас 2:
Тве́рдым ве́ры испове́данием/ святы́й Никола́й, я́ко крин посреде́ те́рния, во страда́нии свое́м процвете́/ и благоуха́нием весели́т ве́рных сердца́,/ благоче́стию святы́х в ве́ре того́ подража́ющих./ Его́же моли́твами, Христе́ Бо́же,// спаси́ ду́ши на́ша.
Кондак, глас 3:
Христу́ Пастыренача́льнику в служе́нии свое́м подража́я,/ во вся дни ду́шу свою́ за ча́да духо́вная полага́л еси́,/ священному́чениче Нико́лае,/ те́мже, страда́нием в Небе́сная селе́ния водвори́вся,// те́пле мо́лиши о нас Преве́чнаго Бо́га.
Тексты тропаря и кондака утверждены решением Священного Синода от 8 декабря 2020 года (журнал № 99).
Молитва
О избра́нниче и уго́дниче Христо́в, священному́чениче Нико́лае, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дям ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́ и Сы́на и Свята́го Ду́ха во ве́ки веко́в. Ами́нь.
Величание
Велича́ем тя,/ священному́чениче Нико́лае,/ и чтим честна́я страда́ния твоя́,/ я́же за Христа́ / во утвержде́ние на Руси́ Правосла́вия // претерпе́л еси́.
Назад к списку
