Священномученику Иоанну (Смирнову), пресвитеру, другому (тропарь, кондак и молитва)
Тропарь, глас 5:
До́брым по́двигом подвиза́яся,/ украше́ние иере́ем яви́лся еси́, о́тче Иоа́нне,/ любому́дрию же отце́в Сина́йских поуча́яся,/ ра́зум и́стине Христо́вой покори́л еси́,/ па́стве твое́й о́браз чистоты́ и благоче́стия яви́в,/ кро́вию му́ченическою житие́ запечатле́л еси́./ Те́мже Бо́гу предстоя́,// моли́ спасти́ся душа́м на́шим.
Кондак, глас 2:
Моли́твенника те́пла/ обре́те тя земля́ Моско́вская,/ священному́чениче Иоа́нне,/ ты бо, в па́стырских труде́х усе́рдно подвиза́яся,/ мно́гия на стези́ спасе́ния наста́вил еси́/ и, от Христа́ му́ченическим венце́м украси́вся,/ во оби́телех ра́йских водвори́лся еси́.// Те́мже тя любо́вию велича́ем.
Тексты тропаря и кондака утверждены решением Священного Синода от 11 марта 2020 года (журнал № 21).
Молитва
О, избра́нниче и уго́дниче Христо́в, священному́чениче Иоа́нне, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во время гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре свято́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим - пра́вило ве́ры, во́ином – вождь духо́вный, боля́щим – врач изря́дный, печа́льным – уте́шитель, гони́мым – засту́пник, ю́ным – наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́ и Сы́на и Свята́го Ду́ха во ве́ки веко́в. Ами́нь.
Назад к списку
