Священномученику Илариону, (Троицкому), архиепископу Верейскому (тропари, кондаки, молитва и величание)
Тропарь, глас 4:
Святи́телю Христо́в Иларио́не,/ сла́во и похвало́ Це́ркве Ру́сския,/ ра́зум боже́ственный стяжа́в,/ пред безбо́жники Христа́ дерзнове́нно испове́дал еси́,/ Его́же ра́ди страда́ния претерпева́я,/ лю́дем ве́рным возглаша́л еси́:/ без Це́ркве несть спасе́ния.
Кондак, глас 2:
Сла́ву ми́ра сего́ оста́вив, Христу́ до́блественне после́довал еси́ и, святи́тельское служе́ние восприи́м, венце́м му́ченичества украси́лся еси́, и ны́не, Престо́лу Бо́жию предстоя́, моли́ся, Иларио́не, иера́рше прему́дре, спасти́ся душа́м на́шим.
Величание:
Велича́ем тя,/ священному́чениче Иларио́не,/ и чтим честна́я страда́ния твоя́,/ я́же за Христа́// претерпе́л еси́.
Текст утвержден Священным Синодом Русской Православной Церкви 6 июля 2013 года (журнал № 83)
Ин тропарь, глас 4:
Во́ине Христо́в Иларио́не,/ сла́во и похвало́ Це́ркве Ру́сския,/ пред ги́бнущим ми́ром Христа́ испове́дал еси́,/ кровьми́ твои́ми Це́рковь утверди́ся,/ ра́зум Боже́ственный стяжа́л еси́,/ лю́дем ве́рным возглаша́ше:// без Це́ркви не́сть спасе́ния.
Ин кондак, глас 6:
Иларио́не, священному́чениче Христо́в,/ служи́телей гряду́щаго анти́христа не убоя́лся еси́,/ Христа́ му́жески испове́дал еси́,/ за Це́рковь Бо́жию живо́т тво́й положи́./ Красо́ новому́ченик Росси́йских,/ Руси́ Святы́я похвало́,// ты́ Це́ркве на́шея сла́ва и утвержде́ние.
Молитва
О, пресла́вный уго́дниче Бо́жий священному́чениче Иларио́не, о́тче наш, ты во дни маловре́меннаго жития́ земна́го посреде́ гоне́ний и скорбе́й мно́гих ве́ру сохрани́в, ду́ха не угаси́л еси́ и ве́рныя научи́л еси́, ка́ко подоба́ет жи́ти в Дому́ Бо́жии, и́же есть Це́рковь Бо́га Жи́ва, столп и утвержде́ние и́стины. Сего́ ра́ди к тебе́ припа́дающе мо́лимся: помози́ нам твои́ми моли́твами догма́ты и кано́ны церко́вныя тве́рдо храни́ти, зре́ние согреше́ний свои́х ду́хом смире́нным стяжа́ти, вся́каго челове́ка я́ко нетле́нный о́браз Христо́в по глаго́лу Ева́нгельскому возлюби́ти, ни еди́наго же презира́юще или́ отрева́юще, но всем по си́ле служа́ще, и та́ко Го́сподеви рабо́тающе, да сподо́бимся с тобо́ю и со все́ми новому́ченики Це́ркве Ру́сския воспева́ти Святу́ю Тро́ицу во ве́ки веко́в. Ами́нь.
Величание
Велича́ем тя,/ священному́чениче Иларио́не,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
