Священномученику Василию (Максимову), пресвитеру Кабановскому (тропари, кондаки, молитва и величание)
Тропарь, глас 4:
Па́стырю до́брый и кро́ткий,/ Це́ркве Христо́вы ве́рный служи́телю,/ па́ству твою́ Сло́вом Жи́зни пита́я,/ лю́тых муче́ний не убоя́лся еси́,/ смерть за Христа́ претерпе́вый,/ венца́ нетле́ннаго сподо́бился еси́,/ священному́чениче Васи́лие,/ моли́ Христа́ Бо́га// спасти́ся душа́м на́шим.
Кондак, глас 3:
Ре́вность о Бо́зе стяжа́в измла́да,/ па́стырства крест восприя́л еси́,/ мно́гия ско́рби и боле́зни в житии́ твое́м претерпе́л еси́,/ утеше́ние в моли́тве обрета́я./ Лю́ди твоя́ в сму́тную годи́ну до́бре упа́сл еси́,/ сло́во и́стины усе́рдно возвеща́я./ Сего́ ра́ди от безбо́жных му́чителей лю́те гони́мый,/ сме́рти вре́менныя не устраши́лся еси́./ Священному́чениче Васи́лие,/ дерзнове́ние к Бо́гу име́я,// моли́ спасти́ся душа́м на́шим.
Тексты тропаря и кондака утверждены решением Священного Синода от 11 марта 2020 года (журнал № 21).
Тропарь, глас 3:
Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Васи́лие,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии // до сконча́ния ве́ка.
Кондак, глас 2:
Восхва́лим, ве́рнии,/ изря́днаго в свяще́нницех и сла́внаго в му́ченицех Васи́лия,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га // спасти́ся душа́м на́шим.
Молитва
О, избра́нниче и уго́дниче Христо́в, священному́чениче Васи́лие, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шым — пра́вило ве́ры, во́ином — вождь духо́вный, боля́щим — врач изря́дный, печа́льным — уте́шитель, гони́мым — засту́пник, ю́ным — наста́вник, всем же благосе́рдый оте́ц и те́плый моли́твенник. Я́ко да моли́твами твои́ми соблюде́ся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
Величание
Велича́ем тя,/ священному́чениче Васи́лие,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.
Назад к списку
