Преподобномученикам Серафиму (Булашову), Иоасафу (Крымзину) и Петру (Мамонтову), Гуслицким (тропарь, кондак, молитва и величание)
Тропарь, глас 4:
Днесь све́тло красу́ется оби́тель Гу́слицкая/ прославля́ющи преподо́бных му́ченик свои́х,/ Серафи́ма, Иоаса́фа и Петра́,/ ти́и бо, гоне́ний многоразли́чных и сме́рти не убоя́вшеся,/ ве́ры Правосла́вныя тве́рдии испове́дницы яви́шася/ и, крест страда́ния на ме́сте муче́ния в Бу́тове подъе́мше,/ венцы́ нетле́нными от Христа́ увязо́шася./ Те́мже, новому́ченицы святи́и,/ моли́те Всеми́лостивого Спа́са/ долго́в разреше́ния нам дарова́ти// и душа́м на́шим ве́лию ми́лость.
Кондак, глас 6:
Преподобному́ченицы Твои́, Го́споди,/ руга́нием и ра́нами искуше́ния мно́гая прия́ша,/ еще́ же у́зами и темни́цею томи́ми бы́ша./ Оба́че, да́же до кро́ве проти́ву греха́ подвиза́вшеся,/ пра́вду соде́яша и Воскресе́нию Твоему́ приобщи́шася./ Тех моли́твами, Христе́ Бо́же,/ да́руй нам с терпе́нием предлежа́щий по́двиг соверши́ти// и Ца́рствия Небе́снаго дости́гнути.
Молитва
О, всеблаже́ннии уго́дницы Христо́ви, испове́дницы Це́ркве Ру́сския пресве́тлии, тричи́сленнии му́ченицы Серафи́ме, Иоаса́фе и Пе́тре, ве́ры Правосла́вныя побо́рницы и всех христиа́н те́плии предста́телие!
Вы, в годи́ну лю́тых гоне́ний терпе́нием му́жеским обле́кшеся, оболга́ния и хуле́ния зло́бная, еще́ же и ра́ны многоразли́чныя от нечести́вых мучи́телей претерпе́ли есте́ и, дре́вним му́чеником подража́юще, любо́вию ко Христу́ Бо́гу возгоре́лися есте́.
Ны́не же, Престо́лу Вседержи́телеву предстоя́ще, испроси́те моли́твами ва́шими ве́ры Правосла́вныя укрепле́ние, Оте́честву на́шему на враги́ одоле́ние и сыново́м Росси́йским спасе́ние. Моли́теся, да помо́жет Госпо́дь бра́тии оби́тели Гу́слицкия обе́ты и́ноческия сохрани́ти, всем же ве́рным да́рует покая́ние всеце́лое и любо́вь соверше́нную. Бу́дите нам тве́рдии хода́таи пред Го́сподем в час отше́ствия на́шего, да со все́ми святы́ми сподо́бимся в Ца́рствии Небе́снем досто́йно воспева́ти Пресвяту́ю Тро́ицу, Отца́ и Сы́на и Свята́го Ду́ха во ве́ки веко́в. Ами́нь.
Величание:
Велича́ем вас,/ преподобному́ченицы Серафи́ме, Иоаса́фе и Пе́тре/ и чтим по́двиги и страда́ния ва́ша,/ я́же за Христа́// претерпе́ли есте́.
Текст службы утвержден на заседании Священного Синода 23-24 сентября 2021 года (журнал № 67).
Назад к списку
