Священномученику Захарии (Лобову) архиепископу Воронежскому и Задонскому (тропарь, кондак, молитва и величание)
Тропарь, глас 5:
Па́мяти Госпо́дней до́брый храни́телю, / и́стинный ева́нгелия служи́телю / священному́чениче Заха́рие пресла́вне, / ду́шу свою́ за И́стину положи́в, / не преста́й за ны о́тче моли́те Влады́ку Христа́: / дарова́ти нам кре́пость духо́вную // мир и ве́лию ми́лость.
Кондак, глас 2:
Предте́чева роди́теля соиме́нника, / и ре́вности о́наго о Бо́зе подража́теля, / священному́ченика пречу́днаго Заха́рию восхава́лим ве́рнии, / сей бо попече́ния о па́стве Христо́вой не оста́ви в го́рьких рабо́тах / и по кончи́не те́пле мо́лит Христа́ Бо́га, / во е́же изба́вити ны от пре́лести лука́ваго // и ве́рность Це́ркви сохрани́ти.
Молитва
О, избра́нниче и уго́дниче Христо́в, священному́чениче Заха́рие, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шым - пра́вило ве́ры, во́ином вождь духо́вный, боля́щым врачь изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́ и Сы́на и Свята́го Ду́ха во ве́ки веко́в. Ами́нь.
Величание
Велича́ем тя,/ священному́чениче Заха́рие,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.
Назад к списку
