Мученикам Инне, Пинне и Римме Новодунским (тропарь, кондак, молитва и величание)
Тропарь, глас 2:
Я́коже Первозва́ннаго учени́цы/ первозва́ни яви́стеся от слове́н,/ и бра́тию ва́шу/ све́том И́стины просвеща́юще,/ от безбо́жнаго свире́паго кня́зя/ лю́тую кончи́ну прия́ли есте́,/ мра́зом окова́нни и ле́дом уда́вленни,/ на Дуна́е реце́ в Ски́фстей стране́./ Но я́ко ду́ши за дру́ги поло́жшии,/ святи́и И́нно, Пи́нно и Ри́ммо,/ и о нас всемо́щныя моли́твы приноси́те,/ вся язы́ки слове́нския// па́ки ко Христу́ обраща́юще.
Кондак, глас 2:
Ве́лия ве́ры исправле́ния:/ ледом окова́нни, я́ко на воде́ упокое́ния,/ святи́и И́нна, Пи́нна и Ри́мма ра́довахуся,/ мучи́тель же несмы́сленно яря́шеся,/ плоды́ их виногра́да тща́ся погуби́ти,/ но оба́че доны́не от слове́нских язы́к/ святы́я гро́здия Христо́с прие́млет,/ и первому́ченик слове́нских венча́ет венцы́./ Сего́ ра́ди и мы,/ взра́щенных ва́ми ве́рных отроча́та,/ благодари́м и мо́лим вы, святи́и:/ испроси́те те́плыми моли́твами и нам// в Ду́се и́стины по Бо́зе ревнова́ти.
Молитва
О святи́и и добропобе́дные му́ченицы И́нно, Пи́нно и Ри́ммо! При́зрите с Небе́снаго черто́га на тре́бующих ва́шея по́мощи и не отве́ргните проше́ний на́ших, но, я́ко при́снии благоде́тели и хода́таи на́ши, моли́те Христа́ Бо́га, да, человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, на́шествия иноплеме́нник и междоусо́бныя бра́ни. Да не осу́дит нас гре́шных по беззако́нием на́шим, и да не во зло обрати́м блага́я, да́руемая нам от Всеще́драго Бо́га, но во сла́ву свята́го и́мене Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир помысло́в, от па́губных страсте́й воздержа́ние и от вся́кия скве́рны удале́ние; и да укрепи́т во всем ми́ре Свою́ Еди́ну Святу́ю Собо́рную и Апо́стольскую Це́рковь, ю́же стяжа́л есть честно́ю Свое́ю Кро́вию. Моли́теся приле́жно, святи́и му́ченицы, да благослови́т Христо́с Бог всю на́шу держа́ву, да утверди́т во Святе́й Свое́й Це́ркви живы́й дух пра́выя ве́ры и благоче́стия; да вся ча́да ея́, от суему́дрия и суеве́рия свободи́вшеся, ду́хом и и́стиною покланя́ются Ему́, и о соблюде́нии Его́ за́поведей усе́рдно потща́тся; да мы вси в ми́ре и благоче́стии поживе́м в настоя́щем ве́це, и дости́гнем блаже́нныя ве́чныя жи́зни на небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва, со Отце́м и Святы́м Ду́хом, ны́не и при́сно и во ве́ки веко́в. Ами́нь.
Величание
Велича́ем вас,/ страстоте́рпцы святи́и И́нно, Пи́нно и Ри́ммо,/ и чтим честна́я страда́ния ва́ша,/ я́же за Христа́ // претерпе́ли есте́.
Назад к списку
