Священномученику Никите Славянину, Албанскому (тропари и кондаки)
Тропарь, глас 4:
По́стнически подвиза́вся / и плоть покори́в ду́ху, / вшел еси́ в тишину́ безстра́стия, / иере́йством же укра́шен, / за Христа́ пострада́л еси́ тверде́йши, / Ему́же моли́ся о чту́щих тя, // священному́чениче Ники́то приснопа́мятне.
Ин тропарь, глас 1:
Плотска́я увяди́в двиза́ния вся,/ моли́твою и стоя́нием всено́щным,/ воздержа́нием же и слеза́ми/ безстра́стия дости́гл еси́, сла́вный Ники́то,/ и Христа́ со дерзнове́нием пропове́дав,/ тве́рдо за Него́ пострада́л еси́, священному́чениче./ Сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.
Кондак, глас 2:
В преподо́бии и пра́вде, о́тче, пожи́л еси́ / и, страда́ньми усоверши́вся, / сокро́виществовал еси́ себе́ бога́тство дарова́ний. / Долго́в у́бо разреше́ние испроси́ нам, / неду́гов свобожда́ющи, всебога́те Ники́то, / и оби́тели сея́, в не́йже Же́ртву Бо́гу приноси́л еси́, // бу́ди при́сное утвержде́ние.
Ин кондак, глас 4:
Всеору́жием Креста́ огражде́н,/ к по́двигом во́льне изше́л еси́,/ не убоя́вся, Богогла́се, вра́жиих преще́ний,/ с ре́вностию же ве́ру испове́дуя, не преста́л еси́,/ до́ндеже муче́ния иску́с проше́л еси́ весь,/ и по́честь побе́ды,// Ники́то, получи́л еси́.
Назад к списку
