Мученику Меркурию Смоленскому (тропарь и кондаки)
Тропарь, глас 2:
Возсия́в, я́ко звезда́ многосве́тлая, / в собо́рней це́ркви пред пречи́стым и чудотво́рным о́бразом Пречи́стей Богоро́дицы, / за Ню́же и за град Смоле́нск пострада́, / многоко́зненнаго и богоме́рзкаго царя́ Баты́я устраши́, / и си́льнаго исполи́на победи́, и лю́ди удиви́, / ду́шу свою́, многострада́льне Мерку́рие, за благоче́стие положи́, / я́ко Заха́риина и А́велева я́сно вопие́т твоя́ кровь ко Го́споду. // И ны́не моли́ся за ду́ши на́ша.
Кондак, глас 4:
Яви́ся во бране́х непобеди́мь во́ин, / от ри́млян ро́дом, / сыновство́ име́ гра́да Смоле́нска, / я́ко бо сих ра́ди нарече́ся, / я́ко от Богоро́дицы страж кре́пок посла́ся гра́ду, / пе́сньми Мерку́рия ублажи́м, / пра́зднующе ве́село па́мять его́, // я́ко да изба́вит град наш от беды́ ра́тник.
Ин кондак, глас 8:
Чистото́ю душе́вною ку́пно и теле́сною / и серде́чною к Бо́гу любо́вию и непреста́нною моли́твою / ри́мское бога́тство оста́вль / и прия́т бога́тство от Го́спода – вене́ц, / прие́м в ру́це копие́, кре́пко злове́рнаго царя́ Баты́я ужаси́, / и самохва́льнаго исполи́на победи́, / и вси вну́цы ага́рянския прожену́в, страстоте́рпче Мерку́рие, // моли́ Христа́ Бо́га спасти́ся душа́м на́шим.
Назад к списку
