Преподобномученикам Зографским, двадцатишести (тропари, кондаки, молитва и величания)

Тропарь, глас 1:

Тревелича́йшия свети́льники, / всех преподобному́ченик Богоизбра́нный полк, / два́десять и шесть Боже́ственныя оби́тели Зогра́фския оте́ц, почти́м, / пре́лесть лати́нскую обличи́вшия / и наси́льственно во огни́ сконча́вшияся; / Фому́ пастыренача́льника, свяще́ннаго Варсоно́фия, / достосла́внаго Парфе́ния и про́чия, подвиза́вшияся, / соше́дшеся, пе́сньми почти́м, / сии́ бо Тро́ицу Святу́ю // при́сно о нас умо́ляют.

Ин тропа́рь, гла́с 1:

Преподобнострада́льный богоизбра́нный по́лк два́десять и шести́ боже́ственных, оби́тели Зогра́фския отце́в, изобличи́вших лати́нское заблужде́ние, и ну́жную сме́рть огне́м на столпе́ претерпе́вших: Фому́ пастыренача́льника, и свяще́ннаго Варсану́фия, со сла́вным Парфе́нием и про́чиих сострада́льцев, вси́ в то́йже оби́тели живу́щии, собра́вшеся пе́сньми почти́м; си́и бо Тро́ице о на́с мо́лятся.

Ин тропарь, глас 1:

До́блих страстоте́рпцев и тве́рдых адама́нтов, сквозе́ о́гнь проше́дших и пре́лесть испепели́вших, два́десять и ше́сть отце́в с преподо́бным Космо́ю, оби́тели защи́тников и блюсти́телей, благохва́ляще согла́сно от души́ воззове́м: сла́ва Укре́пльшему ва́с, сла́ва Уди́вльшему вы́, сла́ва Да́рующему ва́ми все́м исцеле́ния.

Ин тропарь, глас 3:

Столп и́стинный вели́кия похвалы́,/ оби́тели Зогра́фския защи́та и заступле́ние,/ му́ченицы отцы́ да восхва́лятся,/ ле́сть папи́стов низложи́вшия/ и во огни́ венце́в сподо́бившияся,/ и́хже пе́сньми по до́лгу почти́м,// моля́щихся о спасе́нии душ на́ших.

Тропарь (болгарский), глас 1:

Му́ченики Христо́вы, и преподо́бныя отцы́, че́стно почти́м,/ я́ко храни́тели на́ша,/ предста́тели же неусы́пныя,/ и блюсти́тели су́щыя:/ си́и бо пре́лесть латиному́дренных, му́жестенно обличи́вше,// огне́м Боже́ственныя кончи́ны до́бре сподо́бишася.

Кондак, глас 8:

И́же оби́тели на́шея засту́пницы и храни́телие,/ преподо́бнии отцы́, да похва́лятся,/ лесть лати́нян отве́ргшия/ и, огнем сожже́нныя, сконча́вшияся и венча́вшияся,/ и́хже досто́йно воспои́м, зову́ще:// ра́дуйтеся, преподо́бнии му́ченицы.

Ин кондак, глас 8:

Оби́тели на́шея предста́тели и храни́тели, свяще́нныя преподобнострада́льцы два́десять и ше́сть, лати́нскую горды́ню низложи́вшия, и о́гненное сожже́ние претерпе́вшия, и венча́нныя досто́йно, восхва́лим, вопию́ще: ра́дуйтеся, преподобнострада́льнии.

Молитва

О святы́е и блаже́нные отцы́ на́ши, вы, и́же от вели́кия любве́ к нам недосто́йным ча́дам ва́шим, и в пла́мени сгора́емы, не забыва́ете нас, но те́плыя моли́твы возсыла́ете к Бо́гу о на́шем и ми́лующих нас спасе́нии, освяще́нии, прославле́нии и о благосостоя́нии сея́ свято́й оби́тели ва́шея; вы и ны́не, - предстоя́ще Престо́лу Творца́ всея́ тва́ри, Го́спода и Бо́га на́шего Иису́са Христа́, и наслажда́ющеся неизрече́нныя Его́ сла́вы, красоты́ и лицезре́ния, - помяни́те нас чад ва́ших, па́мять ва́шу творя́щих, и умоли́те неизрече́нную Его́ бла́гость, да умилосе́рдится над сла́бостью и окая́нством на́шим, да пре́зрит вся во́льныя и нево́льныя грехи́ на́ши, да всели́т в нас Боже́ственный страх Свой, и укрепи́т нас свое́ю благода́тию в исполне́нии и́ноческих на́ших обе́тов и в творе́нии святы́х и животворя́щих Его́ за́поведей и повеле́ний, да утоли́т пра́ведный Свой гнев, на ны дви́жимый; да рассе́ет покрыва́ющий оби́тель на́шу те́мный и мра́чный о́блак скорбе́й; да покры́ет, заступи́т и изба́вит нас, в ней живу́щих, и вся повсю́ду правосла́вныя христиа́ны от всех ви́димых и неви́димых враго́в, от вся́ких зол, бед и напа́стей наше́дших, ча́емых и неча́емых, да сохрани́т ны в ми́ре и тишине́ и безмяте́жии; да да́рует нам вся́кое дово́льство и изоби́лие, я́ко да те́плыми моли́твами ва́шими и си́льным предста́тельством ва́шим и заступле́нием покрыва́еми и избавля́еми от вся́ких бед и искуше́ний, в ми́ре и тишине́ и дово́льстве, преизоби́лующе во вся́ком де́ле бла́зе, све́тло пра́зднуем ле́тнюю па́мять ва́шу, сла́вяще просла́вившего вас Го́спода ве́чною сла́вою, ея́же и мы, смире́нныя ча́да ва́ша, - мо́лим, вас о достоблаже́ннейшие отцы́ на́ши, - да сподо́бимся с ва́ми, в до́бром покая́нии и благоугожде́нии преде́л жи́зни доше́дше. А́ще и велико́ есть проше́ние на́ше, но наде́емся на бла́гость и неизрече́нное человеколю́бие Го́спода, Бо́га и Спа́са на́шего Иису́са Христа́, Ему́же бу́ди честь, сла́ва и поклоне́ние со безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Величание

Ублажа́ем ва́с,/ святи́и преподобному́ченицы,/ и чти́м святу́ю па́мять ва́шу,/ наста́вницы мона́хов // и собесе́дницы А́нгелов.

Ино величание

Ублажа́ем вас,/ святи́и преподобному́ченицы два́десять и шесть,/ во свяще́нной оби́тели Зогра́фския наси́льственно во огни́ сконча́вшияся,/ и чти́м святу́ю па́мять ва́шу / наста́вницы мона́хов // и собесе́дницы А́нгелов.