Мученику Лонгину сотнику, иже при Кресте Господни (тропарь, кондак, молитвы и величание)

Тропарь, глас 4:

Му́ченик Твой, Го́споди, Ло́нгин, / во страда́нии свое́м вене́ц прия́т нетле́нный от Тебе́, Бо́га на́шего: / име́яй бо кре́пость Твою́, / мучи́телей низложи́, / сокруши́ и де́монов немощны́я де́рзости. / Того́ моли́твами // спаси́ ду́ши на́ша.

Кондак, глас 4:

Ве́село возра́довася Це́рковь / в па́мяти днесь приснопа́мятнаго страда́льца Ло́нгина, взыва́ющи: // Ты моя держа́ва, Христе́, и утвержде́ние.

Молитва

О, святы́й му́чениче Ло́нгине со́тниче! Ты некогда на стражи при Кресте Спасителя Пилатом поставлен был еси, обаче, ви́дя чудеса́, при распя́тии Го́спода бы́вшая, и трус, и затме́ние со́лнца, и ме́ртвых из гробо́в воскресе́ние, испове́дал еси́ я́ве Иису́са Сы́на бы́ти Бо́жия и, истину сию небоязненно повсюду проповедовав, во главу́ усече́н был еси́. Ныне же, Престолу Божию предстоя, призри с небесе на просящих твоея́ по́мощи и я́ко при́сный благоде́тель и хода́тай, моли́ Христа́ Бо́га, да сохрани́т нас от вся́каго лю́таго обстоя́ния, тру́са, пото́па, огня́, меча́, наше́ствия иноплеме́нник и междоусо́бныя бра́ни. Да не осу́дит Господь нас, гре́шных, по беззако́нием на́шим, и да не во зло обрати́м блага́я, да́руемая нам от Всеще́драго Бо́га, но во сла́ву свята́го и́мене Его́ и в прославле́ние кре́пкаго твоего́ заступле́ния. Моли́ся, святче Божий, да пода́ст нам Госпо́дь тишину́ в по́мыслех, воздержа́ние от па́губных страсте́й и от вся́кия скве́рны, и да укрепи́т во всем ми́ре Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю Кро́вию, да утверди́т в ней ду́х живы́я пра́выя ве́ры и благоче́стия, да вся ве́рная ча́да ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно творят за́поведи Его́, да вси мы в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Текст молитвы мученику Лонгину сотнику, иже при Кресте Господни, утвержден к общецерковному богослужебному употреблению решением Священного Синода от 17 июня 2021 года (журнал № 34).

Молитва иная,первая

О святы́й уго́дниче Бо́жий, му́чениче Ло́нгине! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Молитва иная, вторая

О святы́й му́чениче Ло́нгине всехва́льне, ты сподо́бился зре́ти на Кресте́ Сы́на Бо́жия, стра́ждущего во́лею. Ты взыва́л еси́ иуде́йскому собо́рищу: «И́стинно Сын Бо́жий есть и Госпо́дь Царь всех». Ты у Креста́ тьмы неве́рия и неразу́мия избе́гл еси́. Ты о́чи серде́чные просвети́л Боже́ственным сия́нием. С ра́достию помышля́ющее о сем, взыва́ем тебе́, засту́пниче наш пред Бо́гом: «Моли́ за нас пострада́вшего Творца́ вся́ческих, да да́рует и нам гре́шным, плотски́я по́хоти попра́вше, сподо́бимся мрак злоче́стия оста́вити и просвети́тися све́том и́стинного Богопозна́ния». Неду́говав зре́нием теле́сным, ты у Креста́ ка́плею кро́ви от Боже́ственного Страда́льца иска́павшей, исцеле́ние обре́л еси́. И нас, ны́не моля́щихся тебе́, услы́ши и ра́дость исцеле́ния оча́м на́шим у Всеще́дрого Влады́ки испроси́. По повеле́нию твоему́ жена́ не́кая, обре́тши главу́ твою́, прикоснове́нием к сей, затворе́нныя зе́ницы оче́й свои́х отве́рзе. Приими́, му́чениче всехва́льный, и на́ше прибега́ние к чудотво́рному о́бразу твоему́, а́ки вдовы́ ко главе́ твое́й прикоснове́ние. Мы с ве́рою несумне́нною прославля́ем Боже́ственную благода́ть, прису́щую чудотво́рному о́бразу твоему́, и посему́ дерза́ем вопи́ти ти: «Вся́ку боле́знь разреши́ всех благочести́во прибега́ющих к тебе́, блаже́нне, и пропове́дующих тя, и́стинны непобеди́мого свиде́теля». Сподоби́ нас, свя́тче Бо́жий, вку́пе с тобо́ю созерца́ти в Ца́рствии Небе́сном сла́ву Бо́жию и та́мо просла́вити Отца́ и Сы́на и Ду́ха Свята́го в безконе́чные ве́ки веко́в. Ами́нь.

Молитва иная, третья

О, святы́й му́чениче Ло́нгине! Пила́том повеле́но тебе́ бы́ло с воинами ста́ти на стра́же при кресте́ Го́спода Иису́са. Ты́ же, неду́говав очи́ма и исцеле́в от ка́пли кро́ви Го́спода, ка́пнувшей тебе́ в о́чи, обре́л и духо́вное прозре́ние и, ви́дя чудеса́, при распя́тии Го́спода происходи́вшие, и тру́с, и со́лнечное затме́ние, и ме́ртвых из гробо́в воскресе́ние, испове́дал я́вно Иису́са Христа́ Сыно́м Бо́жиим. И с кустоди́ею у гро́ба Госпо́дня находя́сь, и Воскресе́ние Христо́во в тре́пете зря́, сре́бренники, дава́емые синедрио́ном за скры́тие воскресе́ния, ты́ отве́рг и, Христа́ пропове́дав, во главу́ усе́чен бы́в. И по усече́нии главы́ вдове́ не́коей, очи́ма неду́говавшей, во сне́ яви́вшись, и е́й, обре́тшей честну́ю главу́ твою́, прозре́ние дарова́л еси́. Мо́лим тя́, святы́й му́чениче Христо́в Ло́нгине, боля́щим очи́ма яви́ ско́рую по́мощь твою́ и исцели́ и́х, дабы́, освободи́вшись от неду́га своего́, не захоте́ли они́ ви́дети ничего́, распаля́ющаго сластолю́бие, но к созерца́нию духо́вной красоты́ устреми́лись, сла́вя Бо́га. Ами́нь.

Величание

Велича́ем тя,/ страстоте́рпче святы́й Ло́нгине,/ и чтим честна́я страда́ния твоя́,/ я́же за Христа́ // претерпе́л еси́.